Read Birifor, Malba Luki Sɛbɛ 19 Bible Online

Luki Sɛbɛ 19 - Birifor, Malba bible

Luki Sɛbɛ 19

²A be, dab-naaba kãw ba na bʋɔlɔ a Jake, na ɩ a lãpo-dierbe nɩ-kpɛ̃ɛ,

³bʋɔrɔ na ʋ nyɛ a Jeeju bɔ̃w a sʋbɔ ʋlɔ ʋ na ɩ, ɩ̃ ꞌwaa dãa tʋɔrɔ wa a-na-ɩ a nɩbɛ waa na, ɩ̃ ʋ ɩ nɩ-ŋmãa.

⁴A lɛ, ʋ jɔ na cen nii-sɔw na do tɩɛ kãw juu ba na bʋɔlɔ sɩkomɔɔr, a Jeeju nyɛfʋ ɩnɛ, a-na-ɩ be ʋ sɛw ʋ tɔlʼɩ̃.

⁵A lɛ a Jeeju na ta a tɩɛ ʋlɔ par, ʋ dʋɔ na ꞌwuor a tɩɛ juu ɩ̃ bʋɔl yel: “Jake, suu fɔfɔw, a-na-ɩ a sɛw na ɩ̃ na kpɛ a fʋ yir a dɩnaa.”

⁶A Jake suu na fɔfɔw de ʋ, a nũɔ ƴala ʋ.

⁷A mɩnɛ a nɩbɛ na nyɛ a lɛ, ba hũhune na ba jaa ɩ̃ yele: “A maal-fãa sʋbɔ yir ʋ cen na kpɛ!”

⁸Ɩ̃-cɛ a Jake irʼã ɩraa a Nɩ-kpɛ̃ɛ nii-sɔw ɩ̃ yel ʋ: “Nɩ-kpɛ̃ɛ, ɩ̃ na de na a ɩ̃ yele po jɛ̃ taa kʋ a nãw deme, ɩ̃ a ala ɩ ɩ̃ dãa na bɛlɩ̃ nɩrɛ bom de, ɩ̃ na lɩɛbʼã kʋ ʋ gbɛɛ anaan dɔɔl.”

⁹A Jeeju yel ʋ: “A faafʋ ta na a yirʼã pʋɔ a dɩnaa, a-na-ɩ a ʋlɔ mɩ̃ɛ, ʋ mɩ ɩ na a Abʋraham yãw.

¹⁰A-na-ɩ a *Nɩbɛ Bie wa na na bʋɔrɔ a bala na bɔr, ʋ faa ba.”

¹¹A lɛ a nɩbɛ na cɛlɛ a ana ƴɛrɩ̃sɩ, a *Jeeju lɛ lɔbʼã a sʋkpa kʋ ba go, a-na-ɩ ʋ dãa na pɩɛlɛ a Jerujalɛm, ɩ̃ a nɩbɛ mɩ dãa tɩɛrɛ áa Naaŋmɩn fãw na ta na fɔfɔw.

¹²Ʋ yelʼã: “Nɩ-kpɛ̃ɛ kãw dãa na be be. Ʋ wa yi na cen tẽ-nɩdaa a ba na ƴɔ̃w ʋ ʋ ɩ jamana ɩ̃ ʋ lɛ lɩɛb wa.

¹³A lɛ ʋ na bʋɔrɔ a cenfʋ, ʋ bʋɔlʼã a ʋ tʋ̃tʋnbɔ pie de sɛlɩ̃-bie na ɩ a ba libie kʋ ba bõ-ƴene-ƴene ba jaa ɩ̃ yel ba: ‘Nyɩ́ de ƴaba nɩ wa ta nɩ a mɩnɛ ɩ̃ na lɩɛbɛ waara.’

¹⁴Ɩ̃-cɛ a ʋna nɩ-kpɛ̃ɛ tẽw nɩbɛ dãa na ꞌlaar ʋ. Ba irʼã nɩbɛ tʋ a ba bɩɛr ʋ cen na yel á baa bʋɔrɔ a daba ʋlɔ ʋ ɩ a ba jamana wa.

¹⁵“A lɛ ʋ na ɩ a jamana baar ɩ̃ lɛ wa, ʋ ƴɔ̃w na a ba bʋɔl a tʋ̃tʋnbɔ bala ʋ na dãa kʋ a libie, a ba wa ʋ soor ba a amɩnɛ ba na pɔw.

¹⁶A dãdãw sʋbɔ ta na yel: ‘Nɩ-kpɛ̃ɛ, sɛlɩ̃-bie pie ɩ̃ pɔw dɔɔl a ʋlɔ fʋ na kʋ ma juu.’

¹⁷A jamana yel ʋ: ‘A vɩɛlɛ na. Fʋ ɩ na tʋ̃tʋ̃-son. A mɩnɛ fʋ na ɩ a yel-mɩ̃ɛ sʋbɔ a bõ-bile pʋɔ, ɩ̃ na ƴɔ̃w fʋ na a fʋ ꞌwuoro a ten pie.’

¹⁸A tuure mɩ ta na ɩ̃ yel: ‘Sɛlɩ̃-bie anuu ɩ̃ pɔw nɩ a ʋlɔ fʋ na kʋ ma.’

¹⁹A jamana mɩ yel a ʋlɔ: ‘A fʋ̃ʋ mɩ, fʋ na ꞌwuoro na a ten anuu.’

²⁰A tʋtʋnɔ ƴen sʋbɔ ta na mɩ yel: ‘Nɩ-kpɛ̃ɛ, nyɛ a fʋ sɛlɩ̃-bir ɩ̃ na ƴɔ̃w cẽcen pʋɔ tɛɛlɛ fʋ.

²¹Ɩ̃ jɔrɔ fʋ na dãbɩ̃ɛ, a-na-ɩ a fʋ ben kpɛmɛ na. Fʋ ma de na a ala na ma ɩ a fʋ bom wa, ɩ̃ ma mɩ ŋma a ala fʋ na ma bʋr wa.’

²²A jamana yel ʋ: ‘Fʋna tʋ̃tʋ-fãa naa! A fʋ ƴɛrɩ̃ ɩ̃ na de lɩɛb dɔɔl a fʋ juu. Fʋ na dãa bɔ̃w ka ɩ̃ ben kpɛmɛ na, ɩ̃ ma diere a ala na ma ɩ a ɩ̃ bom wa, ɩ̃ mɩ ŋmara a ala ɩ̃ na ma dãa bʋr wa,

²³ɩ̃ mɩnɛ a ɩ a faa dãa de a ɩ̃ libie kʋ a ƴaƴabsɩ, a maa wa lɩɛb wa, ɩ̃ nyɛ dɔɔlaa wa?’

²⁴Ɩ̃ na ʋ yel a bala na ɩraa a be: ‘Nyɩ́ faa a ʋ sɛlɩ̃-bir kʋ a ʋlɔ na tɛrɛ a sɛlɩ̃-bie pie.’

²⁵A ba yel ʋ: ‘Nɩ-kpɛ̃ɛ, má pie jaa ʋ tɛrɛ!’

²⁶Ʋ yel ba: ‘Ɩ̃ yele nyɩ na, a ʋlɔ na tɛraa, ba na lɛ kʋ ʋ na a dɔɔl, ɩ̃-cɛ a ʋlɔ na ma tɛraa wa, ɩ̃ tɛrɛ a fɩ̃ɩ, ba na de na a fɩ̃ɩ ala a ʋ jie.

²⁷Ɩ̃-cɛ a ɩ̃ sama-deme bala na ma dãa bʋɔrɔ ɩ̃ ɩ a ba jamana wa, nyɩ́ nyɔɔr ba wa nɩ a ka, na nyɩ kú a ɩ̃ nii-sɔw.’ ”

²⁸A lɛ a *Jeeju na ƴɛr a lɛ baar, ʋ de ba na nĩe a ba cere a Jerujalɛm.

²⁹Ɩ̃ a lɛ ʋ na tara a Bɛfaje nɩ a Betani na pɩɛlʼɩ̃ a tãw ʋlɔ ba na bʋɔlɔ a *Olivi-tɩɩr tãw, ʋ tʋ na a ʋ *par-tuurbe ayi, ɩ̃ yel ba:

³⁰“Nyɩ́ cen a tẽw ʋlɔ na be a nii-sɔw. A nyɩmɩ wa ta a be, nyɩ na nyɛ na bʋ̃-bile ba na lũ, nɩrɛ na ma do sɛr wa. Nyɩ́ ꞌlor wa nɩ.

³¹A nɩrɛ wa soor nyɩ á bõ nyɩ ꞌloro ɩrɛ nɩ, nyɩ́ yel áa Nɩ-kpɛ̃ɛ ɩ̃ bʋɔrɔ ʋ.”

³²A bala ʋ na tʋ̃ cenʼã na nyɛ a be a mɩnɛ a Jeeju na yel ba.

³³A lɛ ba na cãa ꞌloro a bʋ̃-bile, a bʋ̃ɔ deme soor ba na: “Bõ nyɩ ꞌloro a bʋ̃-bile ɩrɛ nɩ?”

³⁴a ba yel ba áa Nɩ-kpɛ̃ɛ ɩ̃ bʋɔrɔ ʋ,

³⁵ɩ̃ na ba de a bʋ̃-bile cenʼɩ̃ a Jeeju sɛ̃, ɩ̃ lɔb a ba cẽcene dɔɔl a ʋ juu, ɩ̃ ɩ a Jeeju ʋ do jɛ.

³⁶A lɛ ʋ na cere, a lɛ a nɩbɛ mɩ yɛrɛ a ba cẽcene pɔwrɔ a sɔr cere nɩ.

³⁷Ɩ̃ a lɛ ʋ na tara a Jerujalɛm, suure nɩ a Olivi-tɩɩr tãw sɔr, nʋ̃ɔ ƴala na a nɩ-yaw bala ba jaa na ma tuure ʋ, a ba pɛwrɛ a Naaŋmɩn nɩ kpɛ̃w a ana tʋ̃-kpɛn a jaa ba na nyɛ ɩnɛ.

³⁸Ba yele na: “A Nɩ-kpɛ̃ɛ Naaŋmɩn ú be nɩ a jamana ʋlɔ na waara nɩ a ʋ yuor! A pɩɛnfʋ ʋ be a saꞌlon, ɩ̃ a Naaŋmɩn ʋ sɔ a ju-kpɛ̃ɛ a saꞌlon iin!”

³⁹A *Farɩsɩ nɩbɛ ŋmɛɛ na dãa be a nɩbɛ sɔ̃w, yelʼã a Jeeju: “Jãjaana, tan a fʋ par-tuurbe a ba sine.”

⁴⁰A Jeeju yel ba: “Ɩ̃ yele nyɩ na, a bala ɩ̃ sine, a kʋsɩɛ na wuure na.”

⁴¹A mɩnɛ a *Jeeju na tara a Jerujalɛm, nyɛ a tẽw, ʋ kõ na a ʋ ɩnɛ

⁴²ɩ̃ yel: “A nyɩmɩ mɩ, a ala ɩ nyɩ dãa na bɔ̃w a dɩnaa bibirʼã, a ana yele na kʋrɔ nyɩ a pɩɛnfʋ ɩ̃-cɛ a ƴɛ̃ƴɛrɩ̃ na, a liw na a nyɩ jie.

⁴³A-na-ɩ a daar nɔɔ ta na a nyɩ sama-deme wa tiw kolĩ nyɩ, jɛ var gu nyɩ, ɩ̃ jɛbɛ nɩ nyɩ a lõbobo a jaa.

⁴⁴Ba na bũburĩ nyɩ na, ɩ̃ wɛl a nyɩ tẽw bar. Ba kɔ̃ bar kubie a lɛ dɔɔl taa fɩ̃ɩ wa, a-na-ɩ a daar ʋlɔ a Naaŋmɩn na wa a nyɩ faafʋ ɩnɛ, nyaa bɔ̃wnaa wa.”

⁴⁵A *Jeeju kpɛ na a Naaŋmɩn puor-yir kpɛ̃ɛ pʋɔ, diwre a bala na ƴaba bara

⁴⁶ɩ̃ yele ba: “A sɛbʼã a Naaŋmɩn Sɛbɛ pʋɔ: ‘A ɩ̃ yir na ɩ na a *puorfʋ yir,’ ɩ̃-cɛ nyɩ lɩɛb ʋ na ʋ ɩ a nyanyube sɔɔlɩ̃fʋ jie.”

⁴⁷A bibie a jaa, a Jeeju ma jaana na a nɩbɛ a be a Naaŋmɩn puor-yir kpɛ̃ɛ pʋɔ, a Jufisɩ *baar-lo-nɩ-bɛrɛ nɩ a ba *ƴɛr-kpɛn-bɔɔnbɔ nɩ a ba nɩ-bɛrɛ dãa bʋɔrɔ ba kú ʋ,

⁴⁸ɩ̃-cɛ baa bɔ̃w a mɩnɛ ba na ɩrɛ wa, a-na-ɩ a nɩbɛ ba jaa nyɩrɩ̃ na ƴɔ̃w toor cɛlɛ a ʋ ƴɛrɩ̃sɩ.