Read Birifor, Malba Luki Sɛbɛ 2 Bible Online

Luki Sɛbɛ 2 - Birifor, Malba bible

Luki Sɛbɛ 2

¹A ʋna daarʼãa a ƴɛrɩ̃ yi na a jaman-kpɛ̃ɛ Ogusi sɛ̃ na yel a ba sɔr a nɩbɛ ba jaa na be a ʋ ten a jaa pʋɔ.

²A sɔrfʋ na ɩ̃ ɩ a dãdãw sɔrfʋ na maal a lɛdaar a Kirinisi na ɩ a Sɩrɩ jamana.

³A nɩbɛ ba jaa bõ-ƴene-ƴene cenʼã a ba mɩ̃ɛ ten pʋʋr a sɔrfʋ ɩnɛ.

⁴Ala-ɩ̃-sɔ a Jojɛfʋ mɩ yi na a Najarɛtɩ na be a Galile wɩɛr ɩ̃ cen a Jude, a jamana Davɩtɩ tẽ-dɔwraa ba na bʋɔlɔ a Bɛtɩlɛm, a-na-ɩ a ʋlɔ mɩ̃ɛ mɩ ɩ na a Davɩtɩ yir sʋbɔ nɩ a ʋ bal nɩrɛ.

⁵Ʋ cenʼɩ̃ na a ʋ baraa Maarɩɩ na tɛrɛ a pʋɔ, a ba na lãa sɔr ba.

⁶Ɩ̃ a lɛ ba na dãa cãa be a be, a Maarɩɩ dɔwfʋ daar ta na,

⁷ʋ dɔw a ʋ pɔsabie ʋ ɩ dabile, ɩ̃ vilĩ ʋ a cẽcen gaal a dʋn mʋ̃ɔ ƴɔ̃wfʋ jie, a-na-ɩ baa pɔw a die a sáanba yir pʋɔ wa.

⁸A ʋna tẽw naa pʋɔ, dɔ-cɩɩnbɛ dãa na be be gana a mɔɔ pʋɔ a tɩsɔw, gure a ba piir,

⁹a Naaŋmɩn sɩ-tʋnaa nyɩr ba a be ɩ̃ a Naaŋmɩn cãa nyɩnyɩl pɔw ba, a pʋlɩ̃nyɛ nyɩrɩ̃ vʋ̃ɔ ba.

¹⁰Ɩ̃ a sɩ-tʋnaa yel ba: “Nyɩ taa jɔrɔ dãbɩ̃ɛ wa. Ƴɛr-son ɩ̃ ƴɛrɛ kʋrɔ nyɩ na ɩrɛɛ nʋ̃ɔ kpɛ̃ɛ a nɩbɛ ba jaa jie.

¹¹A dɩnaa tɩsɔw na, a Davɩtɩ tẽw pʋɔ, ba dɔw na a Fafaara a nyɩ ɩnɛ, na ɩ a Nɩ-kpɛ̃ɛ nɩ a *Kirisi.

¹²Nyɩ́ nyɛ a jɩbaa ʋlɔ nyɩ na bɔ̃wnɔ nɩ ʋ: nyɩ na nyɛ na bi-pɩɩlaa ba na vilĩ cẽcen gaal a dʋn mʋ̃ɔ ƴɔ̃wfʋ jie.”

¹³Ɩ̃ a jie naan, a saꞌlon sɔdaalsɩ yaw jie wa na pɔw a sɩ-tʋnaa ʋlɔ, ɩ̃ pɛwrɛ a Naaŋmɩn yele nɩ:

¹⁴“A Naaŋmɩn ɩ̃ sɔ a ju-kpɛ̃ɛ a saꞌlon iin ɩ̃ a pɩɛnfʋ ú be a tẽw pʋɔ, a bala ʋ na nʋnɔ jie.”

¹⁵A lɛ a sɩ-tʋnɩsɩ na bar a dɔ-cɩɩnbɛ ɩ̃ lɩɛb do a saꞌlon, ba yele na taa: “Nyɩ ɩ a sɩ cen a Bɛtɩlɛm na nyɛ a ala na ta, a ala ɩnɛ a Naaŋmɩn na tʋ̃ yel sɩ.”

¹⁶Ba pɔw na cen na ta nyɛ a Maarɩɩ, nɩ a Jojɛfʋ, nɩ a bi-pɩɩlaa ba na gaal a dʋn mʋ̃ɔ ƴɔ̃wfʋ jie.

¹⁷A lɛ ba na nyɛ ʋ, ba manʼã a ala a sɩ-tʋnaa na dãa yel ba a bibile ʋlɔ ɩnɛ,

¹⁸a nɔɛ ko a bala ba jaa na wõ a ala a dɔ-cɩɩnbɛ na yele ba.

¹⁹Ɩ̃-cɛ a Maarɩɩ bɔ̃w na tɛrɛ a ana yele a jaa a ʋ pʋ̃ɔ ɩ̃ pɛrɛ.

²⁰A dɔ-cɩɩnbɛ lɩɛbʼã cen na kʋrɔ a Naaŋmɩn a ju-kpɛ̃ɛ pɛwrɛ nɩ ʋ a ala a jaa ɩnɛ ba na wõ ɩ̃ mɩ nyɛ, a be a lɛ a mɩnɛ a sɩ-tʋnaa na dãa yel ba.

²¹A bibie anuu-nʼata dayen, na ɩ a ʋ yʋɔr ŋmaafʋ bibir ta na, a ba pʋr ʋ a yuor *Jeeju, na ɩ a yuor ʋlɔ a sɩ-tʋnaa na dãa tɩɩr, ɩ̃ a ʋ mã Maarɩɩ ma dãa tɛrɛ a ʋ pʋɔ sɛr wa.

²²A mɩnɛ a Maarɩɩ pɔdɔɔr na baar ʋ yi a ʋ pɔdɔɔr diem, a ʋlɔ nɩ a Jojɛfʋ irʼã tu a ƴɛr-kpɛn sɔr a mɩnɛ a Naaŋmɩn na dãa miil a Mowisi, á ba de a dabil ba jaa na ɩ a pɔsabiir kʋ a Nɩ-kpɛ̃ɛ. Ba de na a bie cenʼɩ̃ a Jerujalɛm a Nɩ-kpɛ̃ɛ kʋfʋ jie, ɩ̃ mɩ de a baar-lo-bom a mɩnɛ a Nɩ-kpɛ̃ɛ ƴɛr-kpɛ̃w na yel: a ŋmama ayi mɩɩ naŋmam-pɔlɔ ayi.

²³

²⁴

²⁵A be a Jerujalɛm, daba kãw be na be na dɩ Sɩmẽw. Ʋ ɩ na nɩ-toraa ɩ̃ mɩ jɔrɔ a Naaŋmɩn, ɩ̃ jɛ ƴɔ̃w toor cɛlɛ a ʋlɔ na waara faara a *Ɩsɩrayɛl nɩbɛ a ba won pʋɔ. A Naaŋmɩn Sɩɛ be nɩ ʋ na,

²⁶ɩ̃ yel ʋ a ʋ na de na nĩe nyɛ a *Kirisi ʋlɔ a Nɩ-kpɛ̃ɛ na tʋ̃ ɩ̃ wa pãa bɩɛr kpi.

²⁷A Naaŋmɩn Sɩɛ tɔw na a Sɩmẽw cenʼɩ̃ a Naaŋmɩn puor-yir kpɛ̃ɛ pʋɔ, ɩ̃ a Jojɛfʋ nɩ a Maarɩɩ wɩ nɩ na a ba bie *Jeeju a be, a mɩnɛ a ba na maal ʋ a ala a *Naaŋmɩn ƴɛr-kpɛn na yel.

²⁸A Sɩmẽw de ʋ na ƴɔ̃w a ʋ nuu pʋɔ, ɩ̃ pɛw a Naaŋmɩn yel:

²⁹“A ƴɛ̃ƴɛrɩ̃ na, Nɩ-kpɛ̃ɛ, fʋ na tʋɔ na bar a fʋ tʋ̃tʋnɔ ʋ cenʼɩ̃ pɩɛnfʋ, a-na-ɩ a fʋ pʋlɩ̃fʋ ƴɛrɩ̃ maalʼã baar:

³⁰a ɩ̃ mɩ̃ɛ mimir nyɛ na a fʋ faafʋ

³¹ʋlɔ fʋ na gbɛɛrɩ̃ a bal bʋrɔ bʋrɔ ba jaa nii-sɔw,

³²na ɩ a cãa na caara a nɩ-bʋrɔ bʋrɔ a ba bɔ̃wnɔ fʋ, ɩ̃ mɩ maala a Ɩsɩrayɛl na ɩ a fʋ nɩbɛ yuor ʋ yire.”

³³A mɩnɛ a Jeeju sãa nɩ a ʋ mã na wõ a ala a Sɩmẽw na yel, nʋɔr ko ba na.

³⁴A Sɩmẽw sʋɔrʼã a Naaŋmɩn ƴɔ̃w ba ɩ̃ yel a Jeeju mã, Maarɩɩ: “A Naaŋmɩn vɛlʼã ir a bie na a Ɩsɩrayɛl nɩbɛ yaw lofʋ ɩnɛ, nɩ a ba lɩɛb irfʋ ɩnɛ. A Naaŋmɩn ƴɔ̃w ʋ na ʋ ɩ jɩbaa a nɩ-yaw na ƴɛrɛ a ƴɛr-bebe ƴɔnɔ ʋ,

³⁵a mɩnɛ a yaw jie pʋ-tɩɛrɩ̃sɩ na yi a cãa pʋɔ. Ɩ̃ a fʋ̃ʋ mɩ, a na wʋlɔ fʋ na wɔ̃ taa nɩ bãjɩnɛ ba na cɔrʼɩ̃ fʋ a suur.”

³⁶Pɔw kãw mɩ dãa na be be na dɩ a An na ma ƴɛrɛ a Naaŋmɩn ƴɛrɩ̃sɩ, a ʋ sãa na dɩ Panʋwɛl na ɩ a Asɛɛr bal nɩrɛ. A pɔw ʋlɔ korʼã yaw. Ʋ dãa na kul a sɩrɛ a ʋ pɔsabile daar maalʼɩ̃ yomo anuu-nʼayi,

³⁷ɩ̃ jɛ ɩ kpɩ̃ɩ-pɔw wa ta nɩ yomo lɩjaanaan nʼanaan. ꞌWaa yire a Naaŋmɩn puor-yir kpɛ̃ɛ wa; ʋ tʋnɔ na a Naaŋmɩn tʋn a tɩsɔw nɩ a mɔtɔ̃w, ma lũ nɩ a nʋɔr puoro nɩ a Naaŋmɩn.

³⁸Ʋ ta na a be a daar ʋlɔ pʋɔ, pɛwrɛ a Naaŋmɩn ɩ̃ ƴɛrɛ a Jeeju ƴɛrɩ̃ kʋrɔ a nɩbɛ ba jaa bala na gu a mɩnɛ a Naaŋmɩn nɔɔ faara a Jerujalɛm-tẽw.

³⁹A lɛ a Maarɩɩ nɩ a Jojɛfʋ na maal a tʋmɔ a jaa baar tu nɩ a mɩnɛ a Nɩ-kpɛ̃ɛ ƴɛr-kpɛn na yel, ba lɩɛbʼã kul a ba tẽw, Najarɛtɩ, na be a Galile wɩɛr.

⁴⁰A Jeeju nʋ̃ɔnɔ na lãa pɔwrɔ nɩ a fãgã mɩ tɛrɛ nɩ a kpaarfʋ, ɩ̃ a Naaŋmɩn sũofʋ be a ʋ jie.

⁴¹A yomo a jaa, a *Jeeju dɔɔrbɔ ma cenʼã a Jerujalɛm a *Pakɩ fɛtɩ ɩnɛ.

⁴²A lɛ a Jeeju na pɔw a yomo pie-nʼayi, ba cenʼɩ̃ ʋ na a fɛtɩ ʋlɔ jie a mɩnɛ ba na ma cere a yomo a jaa.

⁴³A lɛ a fɛtɩ bibie na tɔl baar, ba lɛ lɩɛbʼã kule ɩ̃ a Jeeju cãa jɛ be a Jerujalɛm, ɩ̃ a ʋ dɔɔrbɔ ma dãa bɔ̃wnaa wa.

⁴⁴Ba dãa na tɩɛr beeka ʋ pɔw na a ba nɩbɛ kule nɩ, ɩ̃ maal bibir bõ-ƴen a sɔr juu, ɩ̃ bʋɔrɔ ʋ yʋɔrɔ nɩ a ba yir deme nɩ a ba nɩ-bɔ̃wsɩ jie.

⁴⁵Ɩ̃-cɛ baa nyɛ ʋ wa, ɩ̃ lɛ lɩɛb cen a Jerujalɛm a ʋ bɔfʋ jie.

⁴⁶Ba bɔ ʋ na maalʼɩ̃ bibie ata ɩ̃ wa pãa nyɛ ʋ a Naaŋmɩn puor-yir kpɛ̃ɛ pʋɔ, ʋ lãa jɛ nɩ a Jufisɩ *ƴɛr-kpɛn-jaanba, cɛlɛ a ba ƴɛrɩ̃sɩ, sooro nɩ ba a yele par.

⁴⁷A bala ba jaa na wõ a mɩnɛ ʋ na ire a ƴɛrɩ̃sɩ par, nɔɛ ko ba na a ʋ yɛ̃ ɩnɛ.

⁴⁸A lɛ a ʋ dɔɔrbɔ na nyɛ ʋ, nɔɛ kpal ba na. Ɩ̃ a ʋ mã soor ʋ: “Ɩ̃ bie! Bõ ɩ a fʋ maal sɩ a nɔhɔ̃? A fʋ bɔfʋ ƴɔ̃w na a maa nɩ a fʋ sãa dɛn.”

⁴⁹A Jeeju yel ba: “Bõ ɩ a nyɩ bʋɔrɔ ma? Nyaa dãa bɔ̃w ka a sɛw na ɩ̃ na jɛ a ɩ̃ Sãa yir pʋɔ wa mɩɩ?”

⁵⁰Ɩ̃-cɛ baa bɔ̃w a ala ʋ na yel ba par wa,

⁵¹ɩ̃ na ʋ ir pɔw ba kulʼɩ̃ a Najarɛtɩ, ɩ̃ wono ba a toor, ɩ̃ a ʋ mã ƴɔ̃w a ƴɛrɩ̃sɩ a jaa a ʋ suur pʋɔ.

⁵²A Jeeju nʋ̃ɔnɔ na, a ʋ yɛ̃ mɩ dɔɔlɔ, ɩ̃ a ʋ ben nʋmɔ a Naaŋmɩn nɩ a nɩbɛ mɩ.