Read Birifor, Malba Luki Sɛbɛ 20 Bible Online

Luki Sɛbɛ 20 - Birifor, Malba bible

Luki Sɛbɛ 20

¹Bibir kaw̃, a *Jeeju jaana na a nɩbɛ a Naaŋmɩn puor-yir kpɛ̃ɛ pʋɔ, ƴɛrɛ nɩ a Naaŋmɩn ƴɛr-son, a Jufisɩ *baar-lo-nɩ-bɛrɛ, nɩ a ba *ƴɛr-kpɛn-bɔɔnbɔ, nɩ a ba ni-dierbe ta

²soor ʋ: “Yel sɩ a nyɩnɛ fʋ na pɔw a sɔr maala nɩ a yele asɩmɛ? Ala ɩ̃ kʋ fʋ a sɔr?”

³A Jeeju yel ba: “Ɩ̃ na mɩ soor nyɩ na bom bõ-ƴen. Nyɩ́ man ma:

⁴a Jã-Batii kʋ̃ɔ mʋrfʋ, nyɩnɛ a yi? A Naaŋmɩn jie ʋ, mɩɩ a nɩbɛ jie ʋ?”

⁵Ɩ̃-cɛ ba nyɔw na ɩ̃ pɛrɛ ƴɔnɔ taa a ba mɩ̃ɛ ɩ̃ yele: “A ala ɩ sɩ yelʼã á Naaŋmɩn jie a yi, ʋ na soor sɩ na á bõ ɩnɛ saa sɔw de a Jã wa.

⁶Ɩ̃ a ala ɩ sɩ yelʼã á nɩbɛ jie a yi, a nɩbɛ ba jaa na lɔb sɩ na nɩ a kʋsɩɛ kú, a-na-ɩ ba dãa na sɔw nɩ a ba pʋɔ ʋ jaa áa Jã ɩ na a Naaŋmɩn ƴɛr-hiere.”

⁷A be jie, ba yelʼã: “Saa bɔ̃w a jie a ʋ kʋ̃ɔ mʋrfʋ na yi wa.”

⁸A Jeeju lɩɛb yel ba: “A maa mɩ, ɩ̃ kɔ̃ mɩ yel nyɩ a jie ʋlɔ ɩ̃ na pɔw a sɔr maala nɩ a yele ala wa.”

⁹A ala na yi tɔ, a *Jeeju lɔbʼã a sʋkpa na kʋ a nɩbɛ. Ʋ yelʼã: “Daba kãw sɛlʼã dɩvɛ̃-tɩɩr a ʋ puo pʋɔ ɩ̃ bɔ tʋ̃tʋnbɔ ƴɔ̃w a ba ꞌwuoro, ɩ̃ yɔ cen jie kãw kam a be.

¹⁰A lɛ a tɩ-wɔmɔ daar na ta, ʋ tʋ na tʋ̃tʋnɔ kãw a nɩbɛ bala jie a ʋ cen a ba kʋ ʋ a ala na ɩ a ʋ ben, ʋ wa nɩ. Ɩ̃-cɛ a tʋ̃tʋnbɔ bala narʼã a ʋlɔ ʋ na tʋ̃ ɩ̃ diw ʋ bar ʋ kulʼɩ̃ nu-jaala.

¹¹A puo sʋbɔ lɛ bɔ̃w tʋ̃ a tʋ̃tʋnɔ ƴen sʋbɔ, a ba mɩ nar ʋ ɩ̃ tʋ tʋ ʋ, ɩ̃ diw ʋ bar ʋ mɩ kulʼɩ̃ nu-jaala.

¹²Ʋ lɛ bɔ̃w tʋ̃ a ata sʋbɔ a ba nyɔw ʋ nar ƴɔ̃w wʋlɩ̃, ɩ̃ lɔb ʋ bar yẽw.

¹³A be jie, a puo sʋbɔ yel: ‘Mɩnɛ ɩ̃ na ɩ? Ɩ̃ na tʋ̃ na a ɩ̃ bi-nʋnaa; a nʋmɔ wa sɔw ba na jɔ na a ʋlɔ.’

¹⁴Ɩ̃-cɛ a lɛ a tʋ̃tʋnbɔ bala na nyɛ ʋ, ba yelʼã kʋ taa: ‘A naa ɩ̃ ɩ a gã-diere; nyɩ́ ɩ a sɩ kú ʋ bar ɩ̃ de a gãw.’

¹⁵Ɩ̃ na ba nyɔw ʋ vu yi nɩ a puo cɛ̃cɛ̃w, kú ʋ bar. “A na be a lɛ, bõ a puo sʋbɔ na pãa maal ba?

¹⁶Ʋ na wa na na kú a tʋ̃tʋnbɔ bala bar, ɩ̃ de a puo kʋ a nɩ-kpeesɩ.” A lɛ a nɩbɛ na wõ a ƴɛr-bir ʋlɔ, ba yelʼã: “A taa be a lɛ wa!”

¹⁷Ɩ̃-cɛ a Jeeju ꞌwuor ba na kir-kir-kir ɩ̃ yel: “A ala ɩ a lɛ ʋ, bõ a ƴɛrɩ̃ na na sɛb a Naaŋmɩn Sɛbɛ pʋɔ bʋɔrɔ a yel? ‘A kubir ʋlɔ a dacin-mɩɛrbɛ na dãa jaar bar, lɛ lɩɛbʼã ɩ a kubir ʋlɔ ba na de ƴɔ̃w a dacin gbɛr pʋɔ.’

¹⁸“A nɩrɛ lɛ nɔɔ loro a kubir ʋlɔ juu, a sʋbɔ ʋlɔ na karʼã, ɩ̃ a ʋlɔ juu a kubir ʋlɔ nɔɔ loro, ʋ na pʋ̃pʋrɩ̃ ʋ na bar.

¹⁹A mɩnɛ a *ƴɛr-kpɛn-bɔɔnbɔ nɩ a *baar-lo-nɩ-bɛrɛ na bɔ̃w ka bala a Jeeju lɔbɔ nɩ a sʋkpa, ba dãa na bʋɔrɔ ba nyɔw ʋ a ʋna daarʼãa pʋɔ, ɩ̃-cɛ ba dãa na jɔ dãbɩ̃ɛ a nɩbɛ ɩnɛ.”

²⁰Ba nyɔw na ɩ̃ jʋʋrɔ a *Jeeju, ɩ̃ ir jʋjʋʋrbɔ bar a ba cen a ʋ sɛ̃, maala wɔ̃ nɩ-sono ba ɩ, bʋɔrɔ ʋ ƴɛr ƴɛrɩ̃ lɩɛb nyɔw nɩ a ʋ mɩ̃ɛ, a ba ƴɔ̃w ʋ a fãgã sʋbɔ nuumɩ na ɩ a ba tẽw nɩ-kpɛ̃ɛ.

²¹Ba soor ʋ na: “Jãjaana, sɩ bɔ̃w ka a fʋ ƴɛrɩ̃sɩ nɩ a fʋ jaanfʋ fʋ na jaana a nɩbɛ de na a sɔr. Fʋ maa ꞌwuor a ala a nɩrɛ na ɩ wa, ɩ̃-cɛ fʋ ma jaana na a nɩbɛ a Naaŋmɩn sɔr a yel-mɩ̃ɛ pʋɔ.

²²Sɔr be na be a sɩ na ma ya a lãpo kʋ a Orom jaman-kpɛ̃ɛ, mɩɩ sɔr ma be be wa?”

²³Ɩ̃-cɛ a Jeeju bɔ̃w nɩ na a ba bɛraa ɩ̃ yel ba:

²⁴“Nyɩ́ miilʼɩ̃ ma libi-kur. Ala nii-sɔw nɩ ala yuor ɩ̃ be be?” A ba yel ʋ: “A Orom jaman-kpɛ̃ɛ ʋ.”

²⁵A be jie, a Jeeju yel ba: “Nyɩ́ lɩɛbɛ kʋrɔ a Orom jaman-kpɛ̃ɛ a ala na ɩ a Orom jaman-kpɛ̃ɛ ben, ɩ̃ mɩ kʋrɔ a Naaŋmɩn a ala na mɩ ɩ a Naaŋmɩn ben.”

²⁶Baa tʋɔ nyɛ mabfʋ jie a ʋ ƴɛrɩ̃sɩ pʋɔ ʋ na ƴɛrɛ a nɩbɛ nii-sɔw wa; ɩ̃ nɔɛ ɛ̃ɛ na ko ba a ba ŋma vʋʋrɩ̃sɩ.

²⁷A *Saduse nɩbɛ na ma yele áa kũusɩ ma ire a kũu pʋɔ wa, nɩbɛ ŋmɛɛ ta na soor a *Jeeju:

²⁸“Jãjaana, a Mowisi sɛbʼã a ʋ sɛbɛ pʋɔ yel sɩ, a ala ɩ a nɩrɛ tɛrɛ na yɛbɛ ʋ wa kpi ɩ̃ cɛ a pɔw bar, a ꞌwaa tɛrɛ bibiir wa, a nɩrɛ ʋlɔ ʋ de a kpɩ̃ɩ-pɔw dɔw bibiir a ʋ yɛbɛ ʋlɔ yuor ɩnɛ.

²⁹Yɛɛr anuu-nʼayi dãa na be be; a ba kpɛ̃ɛ kulʼã pɔw ma dɔw bie wa ɩ̃ kpi,

³⁰a ʋ tuure de a kpɩ̃ɩ-pɔw ma mɩ dɔw bie wa ɩ̃ mɩ kpi,

³¹a ata sʋbɔ de, a mɩ ɩ a wãa naa. A lɛ a wɔ̃ nɩ a yɛɛr anuu-nʼayi bala ba jaa. Baa tʋɔ dɔw bie wa ɩ̃ mɩ kpi,

³²ɩ̃ a pɔw wa pãa bɩɛr kpi.

³³A na be a lɛ, a kũu-pʋɔ-irfʋ daar, buor sʋbɔ ɩ̃ na sɔ a pɔw? A-na-ɩ a ba jaa anuu-nʼayi dãa na kul ʋ.”

³⁴A Jeeju yel ba: “A dabsɩ nɩ a pɔɔbɔ na be a tẽw na pʋɔ, kule na taa.

³⁵Ɩ̃-cɛ a bala a Naaŋmɩn na kʋ a sɔr a ba na ir a kũu pʋɔ, tɛrɛ nɩ a baafʋ a tẽw ʋlɔ na waara ɩnɛ, baa kule taa wa.

³⁶Baa lɛ be na kpi wa, a-na-ɩ ba na wɔ̃ na a Naaŋmɩn sɩ-tʋnɩsɩ kaarɩ̃. Ba ɩ na a Naaŋmɩn bibiir a mɩnɛ ba na ir a kũu pʋɔ.

³⁷A ala ɩ a kũu-pʋɔ-irfʋ ʋ, a Mowisi miilʼã a ala a tɩ-bile a vũu na ꞌlere ƴɛrɩ̃ pʋɔ, a mɩnɛ ʋ na yel áa Nɩ-kpɛ̃ɛ ɩ na a Abʋraham nɩ a Ɩjakɩ nɩ a Jakɔb Naaŋmɩn.

³⁸Ɩ̃ a Naaŋmɩn ma ɩ a nɩ-kpɩmɛ Naaŋmɩn wa, nɩ-mimie Naaŋmɩn ʋ ɩ, a-na-ɩ a ʋ jie a nɩbɛ ba jaa ɩ na nɩ-mimie.”

³⁹A be jie, a *ƴɛr-kpɛn-bɔɔnbɔ ŋmɛɛ yelʼã: “Jãjaana, sɩrɛ jaa ʋ!”

⁴⁰A-na-ɩ a nɩrɛ ma lɛ dãa ꞌlara sooro ʋ bom kãw go wa.

⁴¹A *Jeeju yel ba: “Mɩnɛ ɩ̃ ɩ a nɩbɛ ma yel áa jamana Davɩtɩ bie a *Kirisi ɩ?

⁴²A-na-ɩ a Davɩtɩ mɩ̃ɛ yelʼã a Pɛwfʋ sɛbɛ pʋɔ: ‘A Nɩ-kpɛ̃ɛ Naaŋmɩn yelʼã a ɩ̃ Nɩ-kpɛ̃ɛ: Jɛ a ɩ̃ dʋrɩ̃ loor

⁴³wa ta nɩ a daar ʋlɔ ɩ̃ nɔɔ maala a fʋ sama-deme a ba ɩrɛɛ a fʋ gbɛɛ dɔɔlfʋ jie.’

⁴⁴A ala ɩ a Davɩtɩ bʋɔlɔ ʋ na Nɩ-kpɛ̃ɛ, mɩnɛ ʋ na lɛ tʋɔ ɩ a ʋ bie?”

⁴⁵A mɩnɛ a nɩbɛ ba jaa na cɛlɛ a ʋ ƴɛrɩ̃sɩ, a *Jeeju yelʼã a ʋ *par-tuurbe:

⁴⁶“Nyɩ́ gu nyɩ mɩ̃ɛ a *ƴɛr-kpɛn-bɔɔnbɔ ɩnɛ. Ba ma su na a cẽcẽ-bɛrɛ yʋɔrɔ nɩ, bʋɔrɔ nɩ a nɩbɛ ba jaa ba puoro ba a dar pʋɔ; ba nʋ na a nii-sɔw jaajiir a ba *puorfʋ yie pʋɔ, mɩ nʋ nɩ a nɩ-bɛrɛ dakɔɔr jur jɩnaafʋ a fɛtɩsɩ jie.

⁴⁷Bala ɩ̃ ma bɛlɛ a kpɩ̃ɩ-pɔɔbɔ yele fara dɩrɛ, ɩ̃ ma bɔ̃w nɩ sʋɔr a Naaŋmɩn kamʼɩ̃, bʋɔrɔ a nɩbɛ ba ꞌwuoro ba. Ƴɛr-kpɛ̃ɛ na dɔɔlʼã a ba juumɩ.”