Read Birifor, Malba Luki Sɛbɛ 21 Bible Online

Luki Sɛbɛ 21 - Birifor, Malba bible

Luki Sɛbɛ 21

¹A *Jeeju dʋɔ na ꞌwuor nyɛ a mɩnɛ a tɛraa deme na ƴɔnɔ a ba libie, a be a Naaŋmɩn libie ƴɔ̃wfʋ jie.

²Ʋ mɩ nyɛ na kpɩ̃ɩ-pɔw nã-dɩrɛ ʋ ƴɔnɔ libi-kure ayi na wɔ̃ taa nɩ tama ayi,

³ɩ̃ yel: “Yel-mɩ̃ɛ ɩ̃ yele nyɩ, a kpɩ̃ɩ-pɔw na na nyɛrɛ a nãw, ƴɔ̃w na gãw a nɩbɛ ba jaa.

⁴A-na-ɩ a ba jaa, ba ƴɔ̃w na a ala ba na dɩ ɩ̃ cɛ, ɩ̃-cɛ a pɔw na nɩ a ʋ nãw ʋ jaa, ʋ ƴɔ̃w na a ala a jaa ʋ na dãa bin gu nɩ a ʋ mɩ̃ɛ.”

⁵A nɩbɛ ŋmɛɛ ƴɛrɛ na a Naaŋmɩn puor-yir kpɛ̃ɛ ƴɛrɩ̃, kpiire nɩ a mɩnɛ ba na mɛ nɩ ʋ a kubi-vɛlɛ, ɩ̃ yaarɩ̃ nɩ ʋ a yel-ɓɔmɔ ba na kʋ a Naaŋmɩn. A *Jeeju yel ba:

⁶“A ala nyɩ na nyɛ, a daar na ta na a kʋsɩr kãw kɔ̃ tʋɔ cɛ dɔɔl ɩraa a ʋ tɔ sʋbɔ juu wa. Ba na wɛlaa na a jaa kpar a tene.”

⁷A be jie, ba soor ʋ na: “Jãjaana, dabor a yele ala na ta? Bõ-buor ɩ̃ miile a daar ʋlɔ a ana yele na tara?”

⁸A *Jeeju yel ba na: “Nyɩ́ gu nyɩ mɩ̃ɛ kɔ̃ bar nɩrɛ ʋ wa bɛlɩ̃ nyɩ wa, a-na-ɩ a nɩ-yaw na de na a ɩ̃ yuor wa nɩ yele á bala ɩ̃ ɩ a *Kirisi. Ɩ̃ ba na mɩ yelʼã áa daar tara na. Nyɩ taa tuure ba wa.

⁹A nyɩmɩ wa wõ a jɛb ƴɛrɩ̃sɩ nɩ a faa-taa, nyɩ taa wa ɩ a dãbɩ̃ɛ nyɔwrɔ nyɩ wa, a-na-ɩ a sɛw na a ala na de nĩe ta baar, ɩ̃-cɛ a kɔ̃ gɔr ɩ a tẽw baarfʋ wa.”

¹⁰Ʋ lɛ yelʼã: “Tẽw na nɩbɛ na irʼã jɛbɛ nɩ tẽ-kpee nɩbɛ, ɩ̃ a jamana kãw na irʼã jɛbɛ nɩ a jaman-kpee.

¹¹A tẽw na dama na nɩ kpɛ̃w, ɩ̃ a wʋlɩ̃-yʋɔrsɩ nɩ a kɔ̃-bɛrɛ na lo na a tẽ-bʋrɔ bʋrɔ pʋɔ. Hierũu na mɩ be na a saꞌlon ƴɔnɔ a nɩbɛ a dãbɩ̃ɛ pʋɔ.

¹²Ɩ̃-cɛ a yele ala a jaa kɔ̃ ta sɛr wa, ɩ̃ ba na nyɔɔr nyɩ na hʋɔlɔ nyɩ. Ba na nyɔɔr nyɩ na cenʼɩ̃ a ba *puorfʋ yie pʋɔ, nɩ a kasu yie pʋɔ. Ba na taw nyɩ na cenʼɩ̃ a jamansɩ nɩ a fãgã deme nii-sɔw a maa ɩnɛ.

¹³Be nyɩ na nyɛ a sɔr ƴɛr a nyɩ yel-mɩ̃ɛ kʋ ba.

¹⁴Nyɩ́ nyɛ a ala na sɛw nyɩ ƴɔ̃w a nyɩ jur pʋɔ: nyɩ taa de nĩe waala a ala ɩnɛ nyɩ nɔɔ yele faara nɩ a nyɩ juu wa,

¹⁵a-na-ɩ a maa, ɩ̃ na kʋ nyɩ na a ala nyɩ na ƴɛrɛ, mɩ kʋ nɩ nyɩ a kpaarfʋ ʋlɔ a nyɩ sama-deme na faara a juu, ɩ̃ ma mɩ tʋɔrɔ cɩɩrɛ wa.

¹⁶A nyɩ saanba mɩ̃ɛ, nɩ a nyɩ mã nʋmɔ, nɩ a nyɩ yɛɛr, nɩ a nyɩ bal nɩbɛ, nɩ a nyɩ badɛɛ na de nyɩ na a juu a fãgã deme jie. Ba na kú na a ŋmɛɛ a nyɩ sɔ̃w,

¹⁷ɩ̃ a nɩbɛ ba jaa na ꞌlaar nyɩ na a maa ɩnɛ.

¹⁸Ɩ̃-cɛ a nyɩ jukɔbir bõ-ƴen kɔ̃ be na bɔr wa.

¹⁹Nyɩ́ nyɔw cĩcĩ. A lɛ nyɩ na faa a nyɩ baafʋ.

²⁰“A nyɩmɩ wa nyɛ a sɔdaalsɩ a ba kpal a Jerujalɛm, nyɩ́ bɔ̃wnaa, a ʋ wɛlfʋ pɩɛlʼã yɛ̃yɛ̃.

²¹A lɛ, a bala nɔɔ beree a Jude, bá jɔrɔ duoro a tan jur. A bala nɔɔ beree a Jerujalɛm tẽ-pʋ̃ɔ bá jɔrɔ yire, ɩ̃ a bala nɔɔ beree a cɛ̃cɛ̃w ba taa kpɛɛrɛ a tẽw pʋɔ wa.

²²A bibie ala na ɩ na a daar ʋlɔ a Naaŋmɩn na kpãana a *Ɩsɩrayɛl nɩbɛ, maala nɩ a ala a jaa na sɛb a ʋ Sɛbɛ pʋɔ.

²³Won na nyɩrɩ̃ na ta a pɔɔ-pʋʋr deme nɩ a bala na tɛrɛ a bi-pɩɩlsɩ a bibie ala cara pʋɔ. A-na-ɩ won kpɛ̃ɛ na ta na a tẽw ʋlɔ, ɩ̃ a Naaŋmɩn su-tuo na lo na a ʋ nɩbɛ juu.

²⁴Sɔ-bãjɩnɛ ba na kú nɩ ba. Ba na nyɔɔr ba na cenʼɩ̃ a ba ɩ gbãgbaar a tẽ-bʋrɔ bʋrɔ a jaa pʋɔ, ɩ̃ a nɩ-bʋlsɩ ɩ̃ na sãsarɩ̃ a Jerujalɛm-tẽw, wa ta nɩ a mɩnɛ a ba fãgã daar nɔɔ baara.

²⁵“Jɩbsɩ na nyɩrʼã a mɔtɔ̃w pʋɔ, nɩ a cuu pʋɔ, nɩ a ŋmarbie pʋɔ. Tuo na be na a tẽ-bʋrɔ bʋrɔ nɩbɛ ba jaa jie a ka a tẽw juu, a ba ɓine a man kʋ̃ɔ ɩnɛ na hele, ɩ̃ kara duoro ɩ̃ suure.

²⁶A dãbɩ̃ɛ na maalʼã a nɩbɛ a ba pɛl a mɩnɛ ba na jɛ cɛlɛ a bier ala nɔɔ tara a tẽw pʋɔ, a-na-ɩ a fãgãsɩ ala na be a saꞌlon na damʼã nyãkarɩ̃ taa.

²⁷A lɛdaar, ba na nyɛ na a *Nɩbɛ Bie ʋ be a dɔ̃dɔrɩ̃ma pʋɔ nyɩnyɩlɛ waara nɩ a fãgã kpɛ̃w.

²⁸A yele ala ɩ̃ wa tara, nyɩ́ ir ɩraa ɩ̃ jɛw a jur, a-na-ɩ a nyɩ faafʋ daar pɩɛlʼã.”

²⁹A ala na yi tɔ, a *Jeeju lɔbʼã a sʋkpa na kʋ ba: “Nyɩ́ nyɛ a fɩgɩ tɩɛ nɩ a tɩɩr a jaa.

³⁰A nyɩmɩ wa ꞌwuor nyɛ a ba tɔbɔ, nyɩ ma bɔ̃w ka a susuur daar tara na.

³¹A lɛ ʋ mɩ, a nyɩmɩ wa nyɛ a ana yele a tara, nyɩ́ bɔ̃w ka a Naaŋmɩn fãw mɩ tara na.

³²Yel-mɩ̃ɛ ɩ̃ yele nyɩ, a ƴɛ̃ƴɛrɩ̃ na nɩbɛ kɔ̃ baar ba jaa wa, wa ta nɩ a ana yele a jaa nɔɔ tara.

³³A saꞌlon nɩ a tene na tɔlʼã, ɩ̃-cɛ a ɩ̃ ƴɛrɩ̃ ma be tɔlfʋ jie fɩ̃ɩ wa.

³⁴“Nyɩ́ tɛrɛ nyɩ mɩ̃ɛ. Nyɩ taa bar a folfʋ, nɩ a dãa kʋfʋ, nɩ a tẽw na baafʋ dɛn, a ɩ tuor a nyɩ tɩɛrɩ̃sɩ pʋɔ wa. A ala ma ɩ lɛ ʋ wa, a *Kirisi waa bibir nɔɔ puurĩ nyɩ na,

³⁵a mɩnɛ a jʋɔ na ma lo pɔw a jɩmɛ, a-na-ɩ a na lo na pɔw a nɩbɛ ba jaa na be a ka a tẽw juu.

³⁶Nyɩ taa gure wa. Nyɩ́ ɛ̃ɛ sʋɔrɔ a Naaŋmɩn a daar a jaa, a mɩnɛ a nyɩ na tʋɔ cɩ̃ɛ a ala a jaa ɩnɛ na sɛw a ta, ɩ̃ na nyɩ tʋɔ ɩraa a *Nɩbɛ Bie nii-sɔw.”

³⁷A *Jeeju ma jaana na a nɩbɛ a mɔtɔ̃w a Naaŋmɩn puor-yir kpɛ̃ɛ pʋɔ, ɩ̃-cɛ a tɩsɔw wa ta, ʋ ma cenʼã na gã a tãw ʋlɔ juu ba na bʋɔlɔ a *Olivi-tɩɩr tãw.

³⁸Ɩ̃ a nɩbɛ ba jaa ma ca na ir wa a Naaŋmɩn puor-yir kpɛ̃ɛ pʋɔ a dʋ̃ꞌwʋlɩ̃ ɓaaraa a ʋ ƴɛrɩ̃ cɛlfʋ ɩnɛ.