Read Birifor, Malba Luki Sɛbɛ 22 Bible Online

Luki Sɛbɛ 22 - Birifor, Malba bible

Luki Sɛbɛ 22

¹A *bur-pʋɔr fɛtɩ ba na bʋɔlɔ a Pakɩ dãa na pɩɛlɛ.

²A Naaŋmɩn *baar-lo-nɩ-bɛrɛ nɩ a *ƴɛr-kpɛn-bɔɔnbɔ bʋɔrɔ na a mɩnɛ ba na ɩrɛ ɩ̃ bũbure a *Jeeju, ɩ̃ a nɩrɛ kɔ̃ bɔ̃wnaa wa, a-na-ɩ ba dãa na jɔrɔ a nɩbɛ dãbɩ̃ɛ.

³A daar ʋlɔ pʋɔ a Satã kpɛ na a Judasɩ ba na mɩ bʋɔlɔ a Isikaryɔtɩ,

⁴ʋ ir cen na guor taa nɩ a Naaŋmɩn baar-lo-nɩ-bɛrɛ nɩ a Naaŋmɩn puor-yir kpɛ̃ɛ gugurbe nɩ-bɛrɛ, a mɩnɛ ʋ na ɩrɛ ɩ̃ ƴɔnɔ a Jeeju a ba nur pʋɔ.

⁵A nʋ̃ɔ ƴala ba a ala ba na wõ ɩnɛ, a ba man taa a libie ba na yara a Judasɩ,

⁶ʋ sɔw ɩ̃ pãa bʋɔrɔ a daar ʋlɔ ʋ na tʋɔrɔ ƴɔnɔ ʋ a ba nur pʋɔ, ɩ̃ a nɩrɛ kɔ̃ bɔ̃wnaa wa.

⁷A Bur-pʋɔr Fɛtɩ dayen ba na sɛw ba kú a Pakɩ peli ta na,

⁸a *Jeeju tʋ̃ a Pɩɛr nɩ a Jã na ʋ yel: “Nyɩ́ cen na gbɛɛrɩ̃ sɩ a Pakɩ dɩb a sɩ tɩ na dɩ.”

⁹A ba soor ʋ: “Nyɩnɛ fʋ bʋɔrɔ sɩ cen na gbɛɛrɩ̃ a dɩb?”

¹⁰Ʋ yel ba: “Nyɩ́ cɛlɛ, nyɩmɩ ta a tẽw pʋɔ, nyɩ na tuorʼɩ̃ na daba na tuo kʋ̃ɔ nɩ yuor. Nyɩ́ tu ʋ cen na ta kpɛ a yir ʋlɔ pʋɔ ʋ na kpɛɛrɛ,

¹¹ɩ̃ na nyɩ yel kʋ a yir sʋbɔ: ‘A sɩ Jãjaana yelʼã a sɩ wa soor fʋ, á nyɩnɛ a die be a ʋlɔ nɩ a ʋ *par-tuurbe na dɩrɛ a Pakɩ dɩb.’

¹²Ʋ na miil nyɩ na bɔɔpɩɛn di-kpɛ̃ɛ ba na bɔ̃w gbɛɛrɩ̃ vɩlaa. A be nyɩ na gbɛɛrɩ̃ a dɩb.”

¹³Ba cenʼã na ta na ba nyɛ a yele a wɔ̃ a mɩnɛ a Jeeju na dãa yel ba, a ba gbɛɛrɩ̃ a *Pakɩ fɛtɩ.

¹⁴A dɩb dɩfʋ daar ta na, a *Jeeju nɩ a ʋ *nɩ-tʋnɩsɩ jɛ a dɩb nii-sɔw,

¹⁵ʋ yel ba: “Ɩ̃ tɩɩ na nyɩrɩ̃ bʋɔrɔ ɩ̃ lãa dɩ nɩ nyɩ a Pakɩ dɩbʼãa baar ɩ̃ pãa nyɛ a hʋʋr.

¹⁶A-na-ɩ yel-mɩ̃ɛ ɩ̃ yele nyɩ, maa lɔɔ dɩrɛ a Pakɩ bõ-dɩraa wa tara nɩ a daar ʋlɔ a fɛtɩ na par na wa nyɩrɛ a Naaŋmɩn fãw pʋɔ wa.”

¹⁷A mɩnɛ ʋ na ƴɛr a lɛ baar, ʋ de na a dɩvɛ̃ nɩ a ŋman ɩ̃ na ʋ puor a Naaŋmɩn ɩ̃ yel: “Nyɩ́ de a dɩvɛ̃ na na nyɩ nyu ꞌlʋɔrɩ̃ taa.

¹⁸A-na-ɩ yel-mɩ̃ɛ ɩ̃ yele nyɩ, wa nyɔw nɩ a ƴɛ̃ƴɛrɩ̃, maa lɔɔ nyuure a dɩvɛ̃ wa tara nɩ a daar ʋlɔ a Naaŋmɩn fãw nɔɔ waara wa.”

¹⁹A ala ɩ̃ baar, ʋ de na buru na ʋ pɛw a Naaŋmɩn, ɩ̃ ŋma kʋ ba ɩ̃ yel: “A naa ɩ̃ ɩ a ɩ̃ ɩ̃gan [ɩ̃ na de tɩɩr a nyɩ ɩnɛ. Nyɩ́ maala a lɛ bɔ̃wnɔ nɩ ma.”

²⁰A mɩnɛ ba na dɩ a dɩb baar, ʋ mɩ de na a dɩvɛ̃ nɩ a ŋman kʋ ba ɩ̃ yel: “A dɩvɛ̃ na ɩ̃ ɩ a pʋlɩ̃-ta-paalaa ʋlɔ a ɩ̃ jɩ̃ɩ nɔɔ cire cɔɔrɔ a nyɩ ɩnɛ.]

²¹Ɩ̃-cɛ nyɩ́ bɔ̃wnaa, a ʋlɔ na ƴɔnɔ ma a ɩ̃ sama-deme nur pʋɔ lãa na jɛ nɩ ma a ka a dɩb dɩfʋ jie.

²²Yel-mɩ̃ɛ ʋ, a *Nɩbɛ Bie na sɩrɩ̃ na kpi, a mɩnɛ a Naaŋmɩn na biin a ʋ tɩɛrʋ̃, ɩ̃-cɛ nabier na pɔw na a nɩrɛ ʋlɔ na diere ʋ a juu.”

²³A be jie, ba nyɔw na ɩ̃ sooro taa, á nɩ-buor a ba sɔ̃w ɩ̃ na maal a bom a lɛ.

²⁴A *nɩ-tʋnɩsɩ nyɔw na ɩ̃ faara taa bʋɔrɔ ba bɔ̃w a buor sʋbɔ a ba sɔ̃w ba na sɛw ba ꞌwuoro ʋ ɩ a nɩ-kpɛ̃ɛ.

²⁵A be jie, a *Jeeju yel ba: “A tẽw na jamansɩ ma fɛrɛ na a ba nɩbɛ, ɩ̃ a ba tʋtʋɔrbɔ ma ɩ a ba bʋɔlɔ ba a vɩlaa-maalba.

²⁶Ɩ̃-cɛ a nyɩmɩ, nyɩ taa ɩ a be a lɛ a nyɩ sɔ̃w wa. Ɩ̃ a nɩ-kpɛ̃ɛ a nyɩ sɔ̃w ú ɛ̃ɛ lɩɛb wɔ̃ taa nɩ a bibile, ɩ̃ a ʋlɔ na ɩ a ni-diere ú wɔ̃ taa nɩ a ʋlɔ na ɩ a tʋ̃tʋnɔ.

²⁷A-na-ɩ ala ɩ̃ ɩ a kpɛ̃ɛ? A ʋlɔ na tɩɩr a sɔr a ba poro a dɩb ʋ, mɩɩ a ʋlɔ na poro ʋ? Má a ʋlɔ na tɩɩr a sɔr ɩ̃ ɩ a kpɛ̃ɛ. Ɩ̃ a maa, na ɩ a nyɩ nɩ-kpɛ̃ɛ, ɩ̃ be na a nyɩ sɔ̃w wɔ̃ taa nɩ a ʋlɔ na poro.

²⁸“A nyɩmɩ, nyɩ ɩ na a bala na lãa ɩraa nɩ ma a ɩ̃ won bʋrɔ bʋrɔ pʋɔ,

²⁹ɩ̃ a mɩnɛ a ɩ̃ Sãa na biin ma ɩ̃ tɛrɛ a jamana fãw, ɩ̃ mɩ biin nyɩ na a nyɩ na tɛrɛ a jamansɩ fãw.

³⁰A lɛ, sɩ na lãa na dɩrɛ nyuure nɩ a ŋman bõ-ƴen pʋɔ a ɩ̃ fãw pʋɔ. Nyɩ na mɩ jɛ na a naa dakɔɔr jur na nyɩ guoro a *Ɩsɩrayɛl bal bʋrɔ bʋrɔ pie-nʼayi ƴɛrɩ̃sɩ.”

³¹A *Jeeju yelʼã: “Sɩmɔ̃, cɛlɛ! A Satã sʋɔrʼã sɔr a ʋ yɛl nyɩ ci kaarɩ̃.

³²Ɩ̃-cɛ ɩ̃ sʋɔrʼã a Naaŋmɩn ƴɔ̃w fʋ a fʋ ƴɔ̃w-nyãa kɔ̃ bũburĩ wa. Ɩ̃ a fʋ̃ʋ wa lɛ lɩɛb a fʋ yɛ̃ ɩ̃ wa, fú sũo a fʋ tɔ deme a ba ɩraa cĩcĩ.”

³³A Pɩɛr yel ʋ: “Nɩ-kpɛ̃ɛ, ɩ̃ sɔw na na lãa kpɛ nɩ fʋ a kasu pʋɔ, ɩ̃ mɩ lãa kpi nɩ fʋ.”

³⁴A Jeeju yel ʋ: “Pɩɛr, ɩ̃ yele fʋ na, a nɔraa kɔ̃ kokolĩ a dɩnaa tɩsɔw naan sɛr wa, ɩ̃ fʋ na cɩɩrɩ̃ na gbɛɛ ata a faa bɔ̃w ma wa.”

³⁵A *Jeeju lɛ bɔ̃w na yel ba go: “A mɩnɛ ɩ̃ na dãa tʋ̃ nɩ nyɩ a nu-jaala, a nyaa de a libie, mɩɩ a vɩrwʋɔ, mɩɩ a nafaba wa, bom dãa na bɔr nyɩ mɩɩ?” A ba yel ʋ: “Bom ma ɓɔr sɩ wa.”

³⁶Ʋ lɛ yel ba: “Ƴɛ̃ƴɛrɩ̃ na, a ʋlɔ na tɛrɛ libie, ú de tɛrɛ a ʋ ɩ̃ganɩ̃, ɩ̃ a ʋlɔ na tɛrɛ a wʋɔ, ú mɩ de tɛrɛ. A ʋlɔ na ma tɛrɛ a sɔ-bãjɩnɛ wa, ú da a ʋ kparʋ lɩɛb da nɩ.

³⁷A-na-ɩ ɩ̃ yele nyɩ na, ƴɛrɩ̃ be na a Naaŋmɩn Sɛbɛ pʋɔ na sɛw na ta ma. A yelʼã: ‘Ba de ʋ na ƴɔ̃w a nɩ-bebe pʋɔ.’ Sɩrɛ jaa ʋ, a ala na tor ma tara na a ʋ baarfʋ jie.”

³⁸A ba yel: “Nɩ-kpɛ̃ɛ, nyɛ, sɔ-bãjɩnsɩ ayi be na ka.” Ʋ yel ba: “A sɛw na lɛ.”

³⁹A *Jeeju yi na a tẽw pʋɔ cere a *Olivi-tɩɩr tãw juu, a mɩnɛ ʋ na mɩlɩ̃ nɩ, a ʋ *par-tuurbe pɔw ʋ cenʼɩ̃.

⁴⁰A mɩnɛ ba na ta a jie ʋlɔ, ʋ yel ba na: “Nyɩ́ sʋɔrɔ a Naaŋmɩn a mɩnɛ nyɩ kɔ̃ wa lo a bɩɩrfʋ pʋɔ wa”,

⁴¹ɩ̃ na ʋ taw jãa nɩ ba, wɔ̃ taa nɩ a mɩnɛ a nɩrɛ na ma lɔb a kubir ʋ ta, ɩ̃ lo gburĩ a dume sʋɔr a Naaŋmɩn

⁴²yel: “Ɩ̃ Sãa, a ala ɩ fʋ sɔw na, maal a tuo ŋman na ʋ jãa nɩ ma, ɩ̃-cɛ a taa ɩ a mɩnɛ ɩ̃ na bʋɔrɔ ʋ wa, ɩ̃ a mɩnɛ a fʋ̃ʋ na bʋɔrɔ.” [

⁴³A be jie, a Naaŋmɩn sɩ-tʋnaa kãw yi na a saꞌlon ɩ̃ suu nyɩr ʋ, kʋrɔ ʋ a ꞌlafʋ.

⁴⁴A mɩnɛ a Jeeju na be a ni-sɔbaa pʋɔ, ʋ dãa na nyɩrɩ̃ sʋɔrɔ a Naaŋmɩn, a ʋ hanfʋ lɩɛb wɔ̃ taa nɩ jɩ̃ɩ na ꞌlɛmɛ a tene.]

⁴⁵A mɩnɛ ʋ na sʋɔr a Naaŋmɩn baar, ʋ irʼã lɩɛb cen a ʋ par-tuurbe jie na nyɛ ba a suur sãw ba a ba gã gure.

⁴⁶Ʋ yel ba: “Mɩnɛ a ɩ a nyɩ gã gure a lɛ? Nyɩ́ ir sʋɔrɔ a Naaŋmɩn, kɔ̃ wa kpɛ a bɩɩrfʋ pʋɔ wa.”

⁴⁷A mɩnɛ a *Jeeju na cãa ƴɛrɛ a ƴɛrɩ̃, nɩbɛ wa na ta. A Judasɩ na ɩ a *par-tuurbe pie-nʼayi ƴen sʋbɔ, ɩ̃ dãa tɛrɛ ba wa nɩ, ɩ̃ taw ta a Jeeju a ʋ worĩfʋ ɩnɛ.

⁴⁸A Jeeju yel ʋ: “Judasɩ, a worĩfʋ fʋ na worĩ a *Nɩbɛ Bie ƴɔ̃w ʋ a ʋ sama-deme nur pʋɔ?”

⁴⁹A Jeeju tɔ deme nyɛ na a ala nɔɔ tara, ɩ̃ yel ʋ: “Nɩ-kpɛ̃ɛ, sɩ́ de a sɔ-bãjɩnsɩ cɛ nɩ ba mɩɩ?”

⁵⁰Ɩ̃ a bõ-ƴen a ba sɔ̃w cɛ na a Naaŋmɩn *baar-lo-nɩ-kpɛ̃ɛ tʋ̃tʋnɔ dʋrɩ̃ toor ŋmaa lɛ hab!

⁵¹Ɩ̃-cɛ a Jeeju yelʼã: “A sɛw na. Nyɩ́ bar lɛ!” Ɩ̃ na ʋ sɩɩr a daba ʋlɔ toor ʋ lɛ ɓɔ̃ pɔw.

⁵²Ɩ̃ ʋ soor a Naaŋmɩn *baar-lo-nɩ-bɛrɛ nɩ a Naaŋmɩn yir gugurbe nɩ-bɛrɛ nɩ a Jufisɩ ni-dierbe na wa a ʋ nyɔwfʋ jie: “Nyanyuur ɩ̃ ɩ a nyɩ waara nɩ sɔ-bãjɩnsɩ nɩ gʋdɛɛ a ɩ̃ nyɔwfʋ jie mɩɩ?

⁵³Sɩ ma dãa na lãa be taa bio bio jaa a Naaŋmɩn puor-yir kpɛ̃ɛ pʋɔ, ɩ̃ nyaa dãa ir a nyɩ nuu sɩɩrʼɩ̃ ma wa. Ɩ̃-cɛ a ƴɛ̃ƴɛrɩ̃ na, a ɩ na a nyɩ daar, nɩ a libe fãw daar.”

⁵⁴Ba nyɔw na a *Jeeju cenʼɩ̃ a Naaŋmɩn *baar-lo-nɩ-kpɛ̃ɛ yir ɩ̃ a Pɩɛr be nɩdaa tuure ba.

⁵⁵A mɩnɛ ba na gbɔw a vũu a gbalɩ̃ pʋɔ jɛ nɩ, a Pɩɛr mɩ pɔw ba na jɛ nɩ.

⁵⁶A tʋtʋ̃-poole nyɛ ʋ na a vũu na caarɩ̃ ɩ̃ ꞌwuor ʋ kir-kir-kir ɩ̃ yel: “A daba na mɩ dãa na be nɩ ʋ.”

⁵⁷A Pɩɛr cɩɩrɩ̃ yel: “Poole wee, maa bɔ̃w ʋ wa.”

⁵⁸A ɩ na fɩ̃ɩ, nɩsaa kpee lɛ nyɛ ʋ na ɩ̃ yel: “A fʋ̃ʋ, fʋ mɩ be na a nɩbɛ bala pʋɔ.” A Pɩɛr yel ʋ: “Daba wee, maa be tɔ wa.”

⁵⁹A ɩ na fɩ̃ɩ a nɩ-kpee lɛ yel go: “Baalʋ̃ʋ ma be be wa, a daba na mɩ dãa na be nɩ ʋ, a-na-ɩ ʋ ɩ na a Galile nɩrɛ.”

⁶⁰A Pɩɛr yel: “Daba wee, maa bɔ̃w a ala fʋ na yele wa.” Ɩ̃ a mɩnɛ ʋ na cãa cɩɩrɛ, nɔraa kokolĩ na a jie naan.

⁶¹A Nɩ-kpɛ̃ɛ ŋmelĩ ꞌwuor a Pɩɛr kir-kir-kir, a Pɩɛr tɩɛr yuo a ala a Nɩ-kpɛ̃ɛ na dãa yel ʋ, áa nɔraa kɔ̃ kokolĩ a tɩsɔw na sɛr wa, ɩ̃ a Pɩɛr na cɩɩrɩ̃ na gbɛɛ ata a ꞌwaa bɔ̃w ʋ wa.

⁶²Ɩ̃ a Pɩɛr irʼã yi yẽw kõ kõ-tuo ma ɩ ala wa.

⁶³A dabsɩ bala na gu a *Jeeju, laara ʋ na pɔbɔ nɩ ʋ.

⁶⁴Ba lũ ʋ na a nii-sɔw pɔw ɩ̃ yele ʋ: “Ala ɩ̃ ŋme fʋ? Bɔ̃w a sʋbɔ!”

⁶⁵Ɩ̃ na ba lɛ tʋ tʋ ʋ tʋ-bi-yaw go.

⁶⁶A mɩnɛ a bio na vɩɛ, a Jufisɩ ni-dierbe nɩ a ba *baar-lo-nɩ-bɛrɛ nɩ a ba *ƴɛr-kpɛn-bɔɔnbɔ kpaarɩ̃ na taa a ba ƴɛrɩ̃sɩ guorfʋ jie. Ba ɩ na a ba taw a *Jeeju wɩ nɩ a ba nii-sɔw,

⁶⁷a ba yel ʋ: “A ala ɩ fʋ̃ʋ ɩ a *Kirisi, yel kʋ sɩ.” Ʋ yel ba: “A maa yel nyɩ, nyɩ kɔ̃ sɔw wa,

⁶⁸ɩ̃ a maa soor nyɩ bom, nyɩ kɔ̃ haa ma nʋɔr wa.

⁶⁹Ɩ̃-cɛ wa nyɔw nɩ a ƴɛ̃ƴɛrɩ̃ a *Nɩbɛ Bie na jɛ na a Fãw Sʋbɔ Naaŋmɩn dʋrɩ̃ loor.”

⁷⁰A be jie, ba jaa soor ʋ na: “Fʋ sɩrɩ̃ na ɩ a Naaŋmɩn Bie?” Ʋ yel ba: “A lɛ nyɩ na yel, a ʋlɔ ɩ̃ sɩrɩ̃ ɩ.”

⁷¹A mɩnɛ a na be a lɛ, ba yelʼã: “Bõ ɩnɛ sɩ lɛ cãa bʋɔrɔ nɩbɛ a ba na wa man ƴɛrɩ̃ a ʋ ɩnɛ? A-na-ɩ a sɩ jaa wõ na a ala na yi a ʋ nʋɔr pʋɔ.”