Read Birifor, Malba Luki Sɛbɛ 23 Bible Online

Luki Sɛbɛ 23 - Birifor, Malba bible

Luki Sɛbɛ 23

¹A bala ba jaa na kpaarɩ̃ taa irʼã taw a *Jeeju cenʼɩ̃ a *Pɩlatɩ nii-sɔw,

²na ba nyɔw ɩ̃ dɔɔlɔ ʋ a ƴɛrɩ̃sɩ yele: “Sɩ nyɛ na a daba na ʋ sãwna a nɩbɛ jur, yele ba a ba taa yara a lãpo kʋrɔ a jaman-kpɛ̃ɛ wa. Ʋ mɩ yele na a ʋlɔ tɔr jaa ɩ̃ ɩ a *Kirisi, a lɛ yelʼã a jamana.”

³A Pɩlatɩ soor ʋ na: “Fʋ̃ʋ ɩ a Jufisɩ jamana?” A Jeeju yel ʋ: “A lɛ fʋ na yel ʋ.”

⁴A be jie, a Pɩlatɩ yelʼã a Naaŋmɩn *baar-lo-nɩ-bɛrɛ nɩ a nɩbɛ: “Maa nyɛ cɛfʋ jie fɩ̃ɩ a daba na jie wa.”

⁵Ɩ̃-cɛ ba jaarʼã ɩ̃ yele: “Ʋ tɔrɔ na a nɩbɛ ƴɔnɔ a ba dama a tẽw nɩ a ʋ jaanfʋ ʋ na jaana ba. A Galile ʋ nyɔw, ɩ̃ wa yi nɩ a Jude wɩɛr ʋ jaa pʋɔ, ɩ̃ a ƴɛ̃ƴɛrɩ̃ ʋ ta na a ka.”

⁶A lɛ a Pɩlatɩ na wõ a ala, ʋ soorʼã a ala ɩ a Galile a daba na yi.

⁷Ɩ̃ a mɩnɛ ba na man ʋ áa Jeeju yi na a wɩɛr ʋlɔ a jamana *Ɛrɔdɩ na ꞌwuoro, ʋ ɩ na a ba cenʼɩ̃ ʋ a ʋ sɛ̃, a-na-ɩ a Ɛrɔdɩ mɩ dãa na be be a Jerujalɛm a ʋna daarʼãa.

⁸A mɩnɛ a *Ɛrɔdɩ na nyɛ a *Jeeju, nʋ̃ɔ ƴala ʋ na a-na-ɩ a korĩ-cɛ jaa ʋ dãa na wõ a ʋ ƴɛrɩ̃ ɩ̃ bʋɔrɔ ʋ nyɛ ʋ. Ʋ mɩ dãa na bʋɔrɔ ʋ nyɛ ʋ ʋ maal nɔ-kofʋ tʋn.

⁹Ʋ soorʼã a Jeeju yel-yayaw, ɩ̃-cɛ ꞌwaa haa nʋɔr cɔw ʋ wa.

¹⁰Ɩ̃ a *baar-lo-nɩ-bɛrɛ nɩ a *ƴɛr-kpɛn-bɔɔnbɔ ɩraa na a be dɔɔlɔ a Jeeju a ƴɛrɩ̃sɩ nɩ kpɛ̃w.

¹¹A Ɛrɔdɩ nɩ a ʋ sɔdaalsɩ maal ʋ na kpana, ɩ̃ la la ʋ, ɩ̃ pãa de kpar-vɩlaa lɔb yarɩ̃ ʋ, ɩ̃ a Ɛrɔdɩ ɩ a ba lɛ lɩɛbɩ̃ ʋ cenʼɩ̃ a *Pɩlatɩ sɛ̃.

¹²A Ɛrɔdɩ nɩ a Pɩlatɩ dãa na ɩ taa sama-deme a korĩ-cɛ, ɩ̃ a ʋna bibir ba lɩɛbʼã ɩ badɛɛ.

¹³A *Pɩlatɩ kpaarɩ̃ na a *baar-lo-nɩ-bɛrɛ nɩ a tẽw nɩ-bɛrɛ nɩ a nɩbɛ jaa,

¹⁴ɩ̃ yel ba: “Nyɩ wa nɩ na a daba na a ɩ̃ sɛ̃ ɩ̃ yel á ʋ sãwna na a nɩbɛ jur. Ɩ̃ nyɩ́ nyɛ, ɩ̃ ꞌlo na a ʋ ben a nyɩ nii-sɔw, ɩ̃ maa nyɛ cɛfʋ jie fɩ̃ɩ a daba na jie a ala nyɩ na dɔɔlɔ a ʋ juu wa.

¹⁵A *Ɛrɔdɩ ma mɩ nyɛ cɛfʋ jie a ʋ sɛ̃ wa. Ala-ɩ̃-sɔ ʋ lɛ tɩɩr ʋ kʋ sɩ. Nyɩ́ nyɛ, a daba na ma maal bom kãw a sɛw a ba na kú ʋ wa.

¹⁶Ala-ɩ̃-sɔ ɩ̃ na ɩ na a ba fɔb ʋ nɩ kpaara, ɩ̃ cɛ ʋ bar.” [

¹⁷A *Pakɩ fɛtɩ daar, a Pɩlatɩ sɛw na ʋ ma yuo kasu sʋbɔ bõ-ƴen bar kʋ ba.]

¹⁸Ɩ̃-cɛ a ba jaa fɛw nyɔw na ɩ̃ lãa wuure yele: “Kú a daba na bar! Ɩ̃ yuo a Barabasɩ kʋ sɩ!”

¹⁹(Damfʋ kãw dãa na ta be a tẽw pʋɔ a Barabasɩ kú nɩrɛ a ba nyɔw ʋ pɔw a kasu pʋɔ.)

²⁰A mɩnɛ a Pɩlatɩ na bʋɔrɔ ʋ bar a *Jeeju, ʋ lɛ bɔ̃w na bʋɔl a nɩbɛ ƴɛrʼɩ̃.

²¹Ɩ̃-cɛ ba wuure na yele nɩ: “Kpa ʋ yaal! Kpa ʋ yaal a nɩ-kʋ-daa juu!”

²²A Pɩlatɩ lɛ bɔ̃w na soor ba a ɩ gbɛɛ ata: “Fãa buor ʋ maal? Maa nyɛ cɛfʋ jie fɩ̃ɩ a ʋ jie na ƴɔnɔ ʋ a kũu ƴɛrɩ̃ wa. Ala-ɩ̃-sɔ ɩ̃ na ɩ na a ba fɔb ʋ nɩ a kpaara ɩ̃ cɛ ʋ bar.”

²³Ɩ̃-cɛ ba jaarʼã ɩ̃ nyɩrɩ̃ wuure nɩ kpɛ̃w yele a ba kpa ʋ yaal a nɩ-kʋ-daa juu, ɩ̃ a ba wuurfʋ tʋɔ a Pɩlatɩ

²⁴ʋ sɔw bar sɔr a na maal a mɩnɛ ba na sʋɔrɔ ʋ.

²⁵Ʋ yuo na a daba ʋlɔ ba na dãa sʋɔrɔ bar, na ɩ a ʋlɔ na dãa dam a tẽw kú nɩ a nɩrɛ a ba nyɔw ʋ ƴɔ̃w a kasu pʋɔ, ɩ̃ bar a Jeeju ƴɔ̃w a ba nurɩ̃ a ba na maal ʋ a ala ba na bʋɔrɔ.

²⁶A mɩnɛ ba na cere nɩ a *Jeeju, ba tuorʼɩ̃ na a Sɩɩrɛn-tẽw nɩrɛ kãw na dɩ Sɩmɔ̃, ʋ yi a puo pʋɔ ɩ̃ waara, a sɔdaalsɩ fɛr ʋ ƴɔ̃w ʋ tuo a nɩ-kʋ-daa tuure nɩ a Jeeju.

²⁷A tẽw nɩbɛ yayaw mɩ dãa na tuure ʋ, lãa nɩ a pɔɔbɔ na kono waala nɩ ƴɔnɔ ʋ.

²⁸Ɩ̃-cɛ a Jeeju ŋmelɩ̃ na yel ba: “Jerujalɛm pɔɔbɔ, nyɩ taa kono a maa ɩnɛ wa! Nyɩ́ ɛ̃ɛ kono a nyɩ mɩ̃ɛ ɩnɛ nɩ a nyɩ bibiir ɩnɛ!

²⁹A-na-ɩ a daar na ta na, ba na yelʼã áa nʋmɔ a pɔɔbɔ bala na ab, nɩ a bala na ma dɔw a bie wa, ɩ̃ mɩ nʋmɔ a bala na ma dãa ƴen a bie wa.

³⁰A be ba na nyɔw ɩ̃ yele a tã-bɛrɛ: ‘Nyɩ́ lo pɔw sɩ!’ ɩ̃ mɩ yele a tã-bil: ‘Nyɩ́ piw sɩ!’

³¹A-na-ɩ a ala ɩ ba maalʼã a da-ɓaar a nɔhɔ̃, mɩnɛ a na be nɩ a da-kõw?”

³²Ba mɩ taw na nɩbɛ ayi na ɩ nɩ-bebe cenʼɩ̃ a ba na lãa kú ba nɩ a Jeeju.

³³A mɩnɛ ba na ta a jie ʋlɔ ba na bʋɔlɔ a “Juŋman jie,” ba kpa na a Jeeju yaal a nɩ-kʋ-daa juu a be, ɩ̃ mɩ kpa a nɩ-bebe ayi bala, a bõ-ƴen be a ʋ dʋrɩ̃ loor, ɩ̃ a kãw be a ʋ gʋbaa loor.

³⁴Ɩ̃-cɛ a Jeeju yelʼã: “Ɩ̃ Sãa, de bar kʋ ba, a-na-ɩ baa bɔ̃w a ala ba na maala wa.” Ɩ̃ ba de na gbãbie lɔb po nɩ a ʋ cẽcene.

³⁵A nɩbɛ ɩraa na a be ɩ̃ ꞌwuoro ʋ. A Jufisɩ nɩ-bɛrɛ kpɛrɛ ʋ na yele: “Ʋ faa na a nɩbɛ. A ala ɩ ʋ ɩ na a *Kirisi, a ʋlɔ a Naaŋmɩn na vɛl ir, ú mɩ faa a ʋ mɩ̃ɛ!”

³⁶A sɔdaalsɩ mɩ laara ʋ na, ɩ̃ taw ta ture ʋ dã-ɓiirũu yele nɩ:

³⁷“A ala ɩ fʋ̃ʋ ɩ a Jufisɩ jamana, lɩɛb faa a fʋ mɩ̃ɛ!”

³⁸Ba mɩ dãa na sɛb a ƴɛr-bie na yaal a ʋ ju-sɔ̃w: “A naa ɩ̃ ɩ a Jufisɩ jamana.”

³⁹A nɩ-bebe bala ba na kpa yaal bõ-ƴen tʋrɔ ʋ na yele nɩ: “Aa ɩ a Kirisi fʋ ɩ wa? Lɩɛb faa a fʋ mɩ̃ɛ ɩ̃ mɩ faa sɩ!”

⁴⁰Ɩ̃-cɛ a kãw ʋlɔ gala ʋ na yele nɩ: “Faa jɔrɔ Naaŋmɩn wa mɩɩ? A-na-ɩ a fʋ̃ʋ, fʋ mɩ be na a ʋna kpãafʋ naa pʋɔ.

⁴¹A ala ɩ a sɩ jie ʋ, a kpãafʋ ʋlɔ torʼã, a-na-ɩ sɩ pɔw na a ala na sɛw nɩ a sɩ maal-bie, ɩ̃-cɛ a ʋlɔ, ꞌwaa sãw bom kãw pʋɔ fɩ̃ɩ wa.”

⁴²Ɩ̃ ʋ lɛ yelʼã: “Jeeju, tɩɛr bɔ̃w nɩ ma a lɛ fʋ nɔɔ waara nɩ a fʋ fãw.”

⁴³A Jeeju yel ʋ: “Yel-mɩ̃ɛ ɩ̃ yele fʋ, a dɩnaa naan, fʋ na lãa na be nɩ ma a Naaŋmɩn ji-vɩlaa pʋɔ.”

⁴⁴A mɔtɔ̃w dãa na pɩɛlɛ a ju-sɔ̃w, ɩ̃ a ʋ cãa bɔr, a wɩɛr liw a lɛ a gbɛb pɔw a tẽw ʋ jaa lɛɛ wa ta nɩ a mɔtɔ̃w gɔrfʋ daar.

⁴⁵A cẽcen kpɛ̃ɛ ʋlɔ na yaal a be a Naaŋmɩn puor-yir kpɛ̃ɛ pʋɔ ɓerʼã ayi,

⁴⁶ɩ̃ a *Jeeju wuurʼɩ̃ kpɛ̃w yel: “Ɩ̃ Sãa, ɩ̃ de na a ɩ̃ sɩɛ bar ƴɔ̃w a fʋ nuumɩ.” A mɩnɛ ʋ na yel a lɛ baar, ʋ ŋmaa na a vʋʋrʋ̃.

⁴⁷A sɔdal-nɩ-kpɛ̃ɛ nyɛ na a ala na ta ɩ̃ kpiire a Naaŋmɩn yele: “Sɩrɛ jaa ʋ, a daba na ɩ na nɩ-toraa.”

⁴⁸A nɩbɛ ba jaa na dãa kaal taa wa a ꞌwuorfʋ jie, nyɛ na a ala na ta a nyɩrɩ̃ tɔ ba, a ba lɩɛb waala kule nɩ.

⁴⁹A Jeeju badɛɛ ba jaa lãa nɩ a pɔɔbɔ bala na dãa tu ʋ a Galile wa ta nɩ a be, ɩraa na nɩdaa ɩ̃ ꞌwuoro a ala na tara.

⁵⁰Daba kãw dãa na be be na dɩ Jojɛfʋ. Ʋ yi na a Arimate na ɩ a Jufisɩ tẽw. Ʋ ɩ na pʋ-pɩlaa sʋbɔ nɩ nɩ-toraa, ɩ̃ dãa jɛ cɛlɛ a Naaŋmɩn fãw waa. Ʋ mɩ dãa na be a *ƴɛr-guor-nɩ-bɛrɛ pʋɔ, ɩ̃-cɛ ꞌwaa dãa sɔw a ala a ʋ ƴɛr-guor-tɔ deme na vɛl ir maal wa.

⁵¹

⁵²A daba ʋlɔ cenʼã a *Pɩlatɩ sɛ̃ na sʋɔr á ʋ kʋ ʋ a kũu.

⁵³A ala ɩ̃ baar, ʋ yaw na a kũu suu nɩ ɩ̃ de cẽcen pɩlaa vilĩ pɔw ʋ, ɩ̃ ũu ʋ a yaa kãw pʋɔ ba na dãa kpu kubir pan juu, ɩ̃ a yaa ʋlɔ pʋɔ baa dãa ũu nɩrɛ be sɛr wa.

⁵⁴A dãa na ɩ a *bibi-ciiraa gbɛɛrɩ̃fʋ bibir, ɩ̃ a bibi-ciiraa tara na a ʋ nyɔwfʋ jie.

⁵⁵A pɔɔbɔ bala na dãa pɔw a *Jeeju a Galile wa ta nɩ a be, tu na a Jojɛfʋ. Ba ꞌwuorʼã a yaa ɩ̃ mɩ nyɛ a mɩnɛ ba na gaal a kũu a be.

⁵⁶A ala ɩ̃ baar, ba lɩɛbʼã kulʼɩ̃ gbɛɛrɩ̃ a mɔ-nyuu nɩ a kã-nyu-vɩlaa a kũu jɛfʋ ɩnɛ. Ɩ̃ a bibi-ciiraa dayen, ba pɩɛnʼã a mɩnɛ a na yel a *Naaŋmɩn ƴɛr-kpɛn pʋɔ.