Read Birifor, Malba Luki Sɛbɛ 6 Bible Online

Luki Sɛbɛ 6 - Birifor, Malba bible

Luki Sɛbɛ 6

¹A *bibi-ciiraa kãw, a *Jeeju tɔlʼã yi puo pʋɔ, a ʋ par-tuurbe ɓʋrɔ a ci fɔfɔrɔ ꞌwɔbɔ,

²a *Farɩsɩ nɩbɛ ŋmɛɛ yel ba: “Bõ ɩ a nyɩ maala a ala na ciire a sɩ ƴɛr-kpɛn sɔr pʋɔ a bibi-ciiraa dayen?”

³A Jeeju mɩ yel ba: “Nyaa ꞌwuor a Naaŋmɩn Sɛbɛ pʋɔ nyɛ a ala a Davɩtɩ nɩ a ʋ nɩbɛ na maal a lɛ a kɔ̃ na dãa nyɔw ba wa?

⁴Ʋ kpɛ na a Naaŋmɩn yir de a buru ba na bin a Naaŋmɩn ꞌwɔb ɩ̃ mɩ kʋ a ʋ nɩbɛ a ba ꞌwɔb; ɩ̃ a buru ala, nɩsaa pɔrɔ ma dãa tɛrɛ sɔr na ꞌwɔb ɩ̃ a ala ma ɩ a baar-lorbo tɛw ʋ wa.”

⁵Ɩ̃ na ʋ lɛ yel ba: “A *Nɩbɛ Bie ɩ̃ ɩ a bibi-ciiraa Nɩ-kpɛ̃ɛ.”

⁶A *bibi-ciiraa kãw go, a *Jeeju kpɛ na a *puorfʋ yir kãw pʋɔ, ɩ̃ nyɔw ɩ̃ jaana a nɩbɛ. Daba kãw be na a be a ʋ dʋrɩ̃ nuu na kpi.

⁷A *ƴɛr-kpɛn-bɔɔnbɔ nɩ a *Farɩsɩ nɩbɛ jʋʋrɔ a Jeeju bʋɔrɔ ba bɔ̃w a ala ɩ ʋ na kpaarʼã nɩrɛ a bibi-ciiraa dayen, a-na-ɩ ba bʋɔrɔ na sɔr ba ƴɔ̃w ʋ ƴɛrɩ̃.

⁸Ɩ̃ ʋ bɔ̃wnaa a ala ba na tɩɛrɛ ɩ̃ yel a daba ʋlɔ a nuu na ko: “Ir ɩraa a ka a nɩbɛ nii-sɔw.” Ʋ pal ir ɩraa.

⁹Ɩ̃ a Jeeju yel ba: “Ɩ̃ sooro nyɩ na, a bibi-ciiraa dayen, a nɩrɛ tɛrɛ na sɔr na maal a vɩlaa, mɩɩ a bier, na faa a nɩrɛ mɩɩ na kú ʋ?”

¹⁰Ɩ̃ na ʋ ꞌwuor ba kolĩ ba jaa, ɩ̃ yel a daba: “Dɔl a fʋ nuu,” ʋ dɔl, ʋ lɛ lɩɛb ɩ nu-son.

¹¹Ɩ̃-cɛ a nɩbɛ bala, a suur gãw ba na a ba nyɔw ɩ̃ guoro taa a ala ba na tʋɔrɔ maala a Jeeju.

¹²A ʋna daarʼãa a *Jeeju do na a tãw juu Naaŋmɩn sʋɔrfʋ, na ʋ be a be sʋɔr a Naaŋmɩn wa vɩɛ nɩ a bio.

¹³A lɛ a wɩɛr na caarɩ̃ baar, ʋ bʋɔlʼã a ʋ *par-tuurbe na ʋ vɛl ir pie-nʼayi, bʋɔlɔ ba *nɩ-tʋnɩsɩ:

¹⁴a Sɩmɔ̃ ʋ na pʋr a Pɩɛr, nɩ a ʋ yɛbɛ Ãdire, nɩ a Jakɩ nɩ a Jã, a Fɩlɩpɩ nɩ a Batelemi,

¹⁵a Matie nɩ a Tomasɩ nɩ a Alfe bi-daba Jakɩ nɩ a Sɩmɔ̃ ʋlɔ na ma jɛrɛ,

¹⁶a Jakɩ bi-daba Judasɩ nɩ a Judasɩ Isikaryɔtɩ ʋlɔ na dãa lɩɛb de a Jeeju a juu.

¹⁷A Jeeju yi nɩ ba na a tãw juu ɩ̃ suu ɩraa nɩ ba dalɩ̃pʋɔ juu, a jie ʋlɔ a ʋ par-tuurbe yayaw na be. Nɩ-yayaw mɩ dãa na yi a Jude wɩɛr ʋ jaa nɩ a Jerujalɛm, nɩ a Tɩɩr nɩ a Sɩdɔ̃ na be a man nʋɔr,

¹⁸ɩ̃ wa a ʋ ƴɛrɩ̃ cɛlfʋ jie nɩ a ba ɩ̃gan kpɛmɛfʋ, ɩ̃ a bala a kɔ̃tɔnsɩ na dama mɩ nyɛ na a kpɛ̃w.

¹⁹A nɩbɛ ba jaa bʋɔrɔ na ba sɩɩr a Jeeju, a-na-ɩ a fãw mɩ yi na a ʋ jie ɩ̃ kpɛmɛ ba ba jaa.

²⁰A *Jeeju ꞌwuorʼã a ʋ *par-tuurbe ɩ̃ yel: “Nʋ̃ɔ ma be na a nyɩmɩ jie na ɩ a nãw deme a-na-ɩ nyɩmɩ ɩ̃ sɔ a Naaŋmɩn fãw.

²¹Nũɔ ma be na a nyɩmɩ jie a kɔ̃ na nyɔw a ƴɛ̃ƴɛrɩ̃ na, a-na-ɩ nyɩ nɔɔ pi na. Nʋ̃ɔ ma be na a nyɩmɩ jie na kono a ƴɛ̃ƴɛrɩ̃ na, a-na-ɩ nyɩ nɔɔ laara na.

²²Nyɩ́ ɩ a nʋmɔ nyɩ a lɛ a nɩbɛ nɔɔ ꞌlaara nyɩ, ɩ̃ jaara nyɩ bara, ɩ̃ tʋrɔ nyɩ, sãwna nɩ a nyɩ yuor ʋ wɔ̃ bom kpana kaarɩ̃ a *Nɩbɛ Bie ɩnɛ.

²³A bibir ʋlɔ, nyɩ́ ɩ a nʋmɔ nyɩ a nyɩ cɩlɛ, a-na-ɩ a nyɩ yar na bɛrmɛ na a be a saa juu. A lɛ a ba sãa-kʋnbɔ mɩ dãa maal a Naaŋmɩn ƴɛr-hierbe.

²⁴Ɩ̃-cɛ nabier na pɔw na a nyɩmɩ tɛraa deme a-na-ɩ nyɩ gɔrʼã pɔw a nyɩ nʋ̃ɔ a jaa.

²⁵Nabier na pɔw na a nyɩmɩ na pi a ƴɛ̃ƴɛrɩ̃ na, a-na-ɩ kɔ̃ nɔɔ nyɔw nyɩ na. Nabier na pɔw na a nyɩmɩ na laara a ƴɛ̃ƴɛrɩ̃ na, a-na-ɩ ni-sɔbaa nɔɔ kpɛ nyɩ na a nyɩ kono.

²⁶“A na ɩ nyɩ na nabier a lɛ a nɩbɛ ba jaa nɔɔ yele a nyɩ son! A lɛ a ba sãa-kʋnbɔ dãa maalʼɩ̃ a jirsɩ ƴɛr-hierbe.

²⁷“Ɩ̃-cɛ a nyɩmɩ na cɛlɛ ma, ɩ̃ yele nyɩ na, nyɩ́ nʋnɔ a nyɩ dɔ̃ deme. Nyɩ́ maala a bala na ꞌlaar nyɩ vɩlaa,

²⁸nyɩ́ bʋɔlɔ a son ƴɔnɔ a bala na sɔnɔ nyɩ, nyɩ́ sʋɔrɔ a Naaŋmɩn ƴɔnɔ a bala na hʋɔlɔ nyɩ.

²⁹A ala ɩ a nɩrɛ ɓa fʋ na a tʋkpal bõ-ƴen pʋɔ, lɩɛb a tʋkpal gãw na cɔw ʋ. A ala ɩ a nɩrɛ de fʋ na a fu, bar ʋ mɩ de a fʋ kparle.

³⁰A nɩrɛ lɛ ɩ̃ wa sʋɔr fʋ a bom fú kʋ ʋ, ɩ̃ taa wa sooro a fʋ bom a nɩrɛ na de wa.

³¹A ala nyɩ na bʋɔrɔ a nɩbɛ ba maala nyɩ, nyɩ́ mɩ maala ba a lɛ.

³²“A ala ɩ nyɩ nʋnɔ na a bala tɛw na nʋnɔ nyɩ, bõ ƴɔ̃wfʋ nyɩ na pɔw? A-na-ɩ a nɩ-faar mɩ̃ɛ ma mɩ nʋnɔ na a bala na nʋnɔ ba.

³³Ɩ̃ a ala ɩ nyɩ maala na a vɩlaa a bala tɛw na maala nyɩ a vɩlaa, bõ ƴɔ̃wfʋ nyɩ na pɔw? A-na-ɩ a nɩ-faar mɩ̃ɛ ma mɩ maala na a lɛ.

³⁴Ɩ̃ a ala ɩ a bala tɛw nyɩ na tɩɛrɛ a nyɩmɩ pɛ̃w ba a bom ba na wa ya na kʋ nyɩ, nyɩ ma pɛ̃w, bõ ƴɔ̃wfʋ nyɩ na pɔw? A nɩ-faar mɩ̃ɛ ma mɩ pɛ̃w na a ba tɔ deme, a ba na mɩ lɩɛb ya ba a libie nʋɔr.

³⁵Ɩ̃-cɛ nyɩ́ nʋnɔ a nyɩ dɔ̃-deme, nyɩ́ maala ba a vɩlaa, nyɩ́ ma pɛ̃w ba a bom ɩ̃ nyɩ taa cɛlɛ a ba na lɩɛb ya nyɩ wa. A lɛ, a nyɩ yar na bɛrmɛ na, ɩ̃ nyɩ na mɩ ɩ na a saa juu Naaŋmɩn bi-dabsɩ a-na-ɩ ʋ ma maala na a vɩlaa a nɩsaa saansɩ nɩ a nɩ-bebe jie.

³⁶Nyɩ́ ɩ pʋ-pɩlaa deme a mɩnɛ a nyɩ Sãa na ɩ a pʋ-pɩlaa sʋbɔ.

³⁷“Nyɩ taa koro nɩrɛ wa, ɩ̃ a Naaŋmɩn kɔ̃ mɩ guor a nyɩ ƴɛrɩ̃ wa. Nyɩ taa ƴɔnɔ nɩrɛ ƴɛrɩ̃ wa, ɩ̃ a Naaŋmɩn ma mɩ ƴɔnɔ nyɩ ƴɛrɩ̃ wa. Nyɩ́ de a nɩbɛ mabfʋ bar kʋ ba; a lɛ a Naaŋmɩn na mɩ de a nyɩ mabfʋ bar kʋ nyɩ.

³⁸Nyɩ́ tɩɩre; a lɛ a Naaŋmɩn na mɩ tɩɩrɛ kʋrɔ nyɩ. Ʋ na bɔ̃w na sɛw a bõ-mɩɩnaa a nɛ taa, ɩ̃ dam, a sɛw deere, ʋ kʋ nyɩ, a-na-ɩ a bom ʋlɔ nyɩ na de mana nɩ a yele, a ʋna bom a Naaŋmɩn na mɩ de manʼɩ̃ a nyɩ ben.”

³⁹A *Jeeju lɛ lɔb ba na a sʋkpa na: “A jɔ̃w na tʋɔ na tawra a ʋ jɔ̃-tɔ mɩɩ? Má a ba jaa ayi na lo na bɔw pʋɔ.

⁴⁰Par-tuure ma be be na gãw a ʋ jãjaana wa, ɩ̃ a *par-tuure lɛ na jaan baar, ʋ na wɔ̃ na a ʋ jãjaana kaarɩ̃.

⁴¹“Mɩnɛ ɩ̃ ɩ a fʋ ga a mimir ƴɔ̃w a mobir na be a fʋ yɛbɛ mimirɩ̃, ɩ̃ ma lɛ ɛ̃ɛ bil nyɛ a dakpur na be a fʋ mɩ̃ɛ mimirɩ̃ wa?

⁴²Mɩɩ mɩnɛ fʋ na tʋɔ yel a fʋ yebɛ: ‘Ɩ̃ yɛbɛ, ɩraa ɩ̃ ir fʋ mobir a mimirɩ̃ bar,’ a fʋ̃ʋ na ma nyɛ a dakpur na be a fʋ mimirɩ̃ wa? Fʋna bɛbɛlɛ naa! De nĩe ir a dakpur a fʋ mimirɩ̃ sɛr; lɛ fʋ na bɔ̃w nyɛrɛ tʋɔ ir a mobir na be a fʋ yɛbɛ mimirɩ̃.

⁴³“Tɩ-son ma be be na wɔnɔ bi-kpana wa; a lɛ ʋ mɩ, tɩ-kpana ma be be na wɔnɔ bi-son wa.

⁴⁴A-na-ɩ a wɔmɔ ba bɔ̃wnɔ nɩ a tɩɛ; ba maa ꞌwɔ̃w ꞌwɔrɔ gʋ-pɩlaa juu wa, ba maa mɩ ꞌwɔ̃w aaraa gʋ-salaa juu wa.

⁴⁵A nɩ-son ma irʼã a yel-vɛlɛ ala ʋ na bin a ʋ pʋ-vɩlaa pʋɔ yi nɩ, ɩ̃ a nɩ-kpana ma ir a yel-kpansɩ ala ʋ na bin a ʋ pʋ-bier pʋɔ yi nɩ, a-na-ɩ a ala na sɛw a nɩrɛ pʋɔ, ala ɩ̃ yire a nʋɔr pʋɔ.

⁴⁶“Mɩnɛ ɩ̃ ɩ a nyɩ bʋɔlɔ ma a ‘Nɩ-kpɛ̃ɛ! Nɩ-kpɛ̃ɛ!’ ɩ̃ maa maala a ala ɩ̃ na ma yele nyɩ wa?

⁴⁷A nɩrɛ lɛ na wa a ɩ̃ sɛ̃ cɛl a ɩ̃ ƴɛrɩ̃ ɩ̃ sɔw maala, ɩ̃ na miil nyɩ na a ʋlɔ kaarɩ̃ ʋ na wɔ̃.

⁴⁸Ʋ wɔ̃ na taa nɩ daba na mɩɛrɛ yir ɩ̃ tuu a bɔw ʋ kpɛ, ʋ kpar a dacin a kubir-pan juu. A kʋ̃ɔ wa na a kʋlaa paal yi ŋmeere a yir ʋlɔ, ɩ̃-cɛ ꞌwaa tʋɔ ʋ wɛl bar wa, a-na-ɩ ba dãa na bɔ̃w mɛ ʋ.

⁴⁹Ɩ̃-cɛ a ʋlɔ na wono a ɩ̃ ƴɛrɩ̃ ɩ̃ ma sɔw maala wa, ʋ wɔ̃ na taa nɩ a daba ʋlɔ na mɛ a yir a tẽ-buur juu, ɩ̃ ma tuu a bɔw ɩ̃ kpar a dacin wa. A kʋ̃ɔ ŋme na a yir ʋ tɔ̃ɔ lo a jie naan ɩ̃ a ʋ lofʋ ʋlɔ bɛlɩ̃ na.”