Read Birifor, Malba Luki Sɛbɛ 9 Bible Online

Luki Sɛbɛ 9 - Birifor, Malba bible

Luki Sɛbɛ 9

¹A *Jeeju bʋɔlʼã a ʋ *par-tuurbe pie-nʼayi tiw, ɩ̃ kʋ ba a fãgã A nɩ a tʋɔfʋ a ba na diw nɩ a kɔ̃tɔnsɩ ba jaa fɛw bar, ɩ̃ mɩ kpaar a wʋlɩ̃sɩ,

²ɩ̃ na ʋ tʋ ba a ba cen na hier a Naaŋmɩn fãw kʋ a nɩbɛ, ɩ̃ kpɛmɛ a wʋlɩ̃sɩ deme.

³Ʋ yel ba na: “Nyɩ taa tɛrɛɛ bom diere nɩ a sɔr wa, a daa, mɩɩ a wʋɔ, mɩɩ a dɩb, mɩɩ a libie, ɩ̃ nyɩ taa tɛrɛɛ kpar-bɛrɛ ayi wa.

⁴A yir lɛ pʋɔ nyɩ nɔɔ kpɛ, nyɩ́ jɛ a be wa ta nɩ a mɩnɛ nyɩ na yire a tẽw ʋlɔ pʋɔ.

⁵Ɩ̃ a ala ɩ a nɩbɛ ma sɔw de nyɩ wa, nyɩ́ yi a tẽw ʋlɔ pʋɔ ɩ̃ tɛb a nyɩ gbɛɛ tãbuulĩ[2] bar, a ɩ bõ-miilaa a ba jie.”

⁶A ba cen na yʋɔrɔ a ten-ten hiere a Naaŋmɩn ƴɛr-son, kpaara nɩ a nɩbɛ wʋlɩ̃sɩ a jiir a jaa.

⁷A lɛ a jamana *Ɛrɔdɩ na wõ a ala jaa na maala, a tɩɛrɩ̃sɩ nyanyaa ʋ na, a-na-ɩ a nɩbɛ ŋmɛɛ yele na áa Jã Batii ɩ̃ ir a kũu pʋɔ.

⁸A ŋmɛɛ yele á Eli ɩ̃ lɛ miilʼɩ̃ a ʋ mɩ̃ɛ, ɩ̃ a ŋmɛɛ go lɛ yele á korĩ-cɛ ƴɛr-hiere kãw ɩ̃ lɛ jaw ir.

⁹Ɩ̃-cɛ a Ɛrɔdɩ yel: “Ɩ̃ ɩ na a ba ŋmaa a Jã juu, ɩ̃ ala nɩ a naa ɩ̃ na wono a ƴɛrɩ̃sɩ a ʋ ɩnɛ a lɛ?” Ɩ̃ bʋɔrɔ ʋ nyɛ a *Jeeju.

¹⁰A *Jeeju *nɩ-tʋnɩsɩ lɩɛbʼã wa na man ʋ a ala a jaa ba na maal, a Jeeju taw ba vɩrɩ̃ nɩ a Bɛsada-tẽw loor.

¹¹Ɩ̃-cɛ a nɩbɛ vɩrɩ̃ na bɔ̃wnaa ɩ̃ bɩɛr cen a ʋ jie, a Jeeju sɔw de ba na ʋ man ba a Naaŋmɩn fãw, ɩ̃ kpɛmɛ a wʋlɩ̃sɩ deme.

¹²A mɩnɛ a wɩɛr na liwre, a ʋ *par-tuurbe pie-nʼayi taw na ta yel ʋ á ʋ wɛl a nɩbɛ bar a ba cen a tẽ-pɩɛlsɩ pʋɔ na ba bɔ a bõ-dɩraa nɩ a gaajie, a-na-ɩ a jie ʋlɔ ba na be ɩ na wɛkar.

¹³Ɩ̃-cɛ a Jeeju lɩɛbʼã yel ba: “A nyɩmɩ mɩ̃ɛ, nyɩ́ kʋ ba a bõ-dɩraa a ba dɩ.” A ba yel: “Bur-bie anuu nɩ jɩm-bie ayi tɛw sɩ tɛrɛ. Fʋ bʋɔrɔ na a sɩ mɩ̃ɛ sɩ́ cen na da a bõ-dɩraa wa nɩ kʋ a nɩ-yaw basɩmɛ mɩɩ?”

¹⁴A-na-ɩ a nɩbɛ bala na dãa be a be, a dabsɩ tɛw, tara na ture anuu. A Jeeju lɛ yel a ʋ par-tuurbe: “Nyɩ́ ŋma a nɩbɛ a ba jɩnaa ji-gbulĩsɩ lɩjaayi nɩ piir-piir.”

¹⁵A par-tuurbe sɔw ɩ̃ maal a lɛ, a nɩbɛ ba jaa jɛ.

¹⁶A ala ɩ̃ baar, a Jeeju de na a bur-bie anuu nɩ a jɩm-bie ayi ɩ̃ na ʋ dʋɔ ꞌwuor a saꞌlon ɩ̃ puor a Naaŋmɩn a bõ-dɩraa ala ɩnɛ, ɩ̃ na ʋ ŋma ŋma kʋ a ʋ par-tuurbe a ba de po a nɩbɛ,

¹⁷a ba jaa ꞌwɔb pi ɩ̃ cãa cɛ, a ba woor a bur-ŋmara sɛw pɩɩr pie-nʼayi.

¹⁸A bibir kãw, a *Jeeju be na a cɛ̃cɛ̃w sʋɔrɔ a Naaŋmɩn, a ʋlɔ nɩ a ʋ *par-tuurbe, ʋ soor ba: “Ala ʋlɔ a nɩbɛ ma de ma ɩ̃ ɩ?”

¹⁹A ba yel: “A ŋmɛɛ ma yelʼã a Jã-Batii fʋ ɩ, a ŋmɛɛ go, a Eli fʋ ɩ, ɩ̃ a ŋmɛɛ yele a korĩ-cɛ ƴɛr-hiere ƴen sʋbɔ ɩ̃ jaw yi a kũu pʋɔ.”

²⁰A Jeeju soor ba: “Ɩ̃ a nyɩmɩ, ala ʋlɔ tɔr nyɩ de ma ɩ̃ ɩ?” A Pɩɛr yel: “Fʋ ɩ na a Naaŋmɩn *Kirisi.”

²¹A *Jeeju bɔ̃w kpãkpan ba ɩ̃ yel a ba taa wa ƴɛrɛ kʋrɔ nɩrɛ wa.

²²Ɩ̃ na ʋ lɛ yel áa sɛw na a *Nɩbɛ Bie na nyɛ won yaw a bɛlɩ̃, áa Jufisɩ ni-dierbe nɩ a *baar-lo-nɩ-bɛrɛ nɩ a *ƴɛr-kpɛn-bɔɔnbɔ na jɛ ʋ na bar, a ba na kú ʋ na, ɩ̃ a bibie ata dayen a ʋ na irʼã a kũu pʋɔ.

²³A ala na yi tɔ, ʋ yelʼã a ba jaa: “A ala ɩ nɩrɛ bʋɔrɔ na ʋ tuure ma, ú jɛ a ʋ mɩ̃ɛ bar ɩ̃ de a ʋ nɩ-kʋ-daa tuo tuure nɩ ma a bio bio jaa.

²⁴A-na-ɩ a nɩrɛ lɛ na bʋɔrɔ ʋ faa a ʋ mɩ̃ɛ, a ʋ baafʋ na bɔrʼã, ɩ̃ a nɩrɛ lɛ na bara a ʋ baafʋ ʋ bɔrɔ a ɩ̃ ɩnɛ, ʋ na cɩ̃ɛ na.

²⁵A-na-ɩ a ala ɩ a nɩrɛ pɔw na a tẽw na yele a jaa, ɩ̃ a ʋlɔ mɩ̃ɛ bũburĩ, mɩɩ ʋ wɛ, bõ a na kʋ ʋ?

²⁶A-na-ɩ a nɩrɛ lɛ a vĩ na nyɔw a maa nɩ a ɩ̃ ƴɛrɩ̃sɩ ɩnɛ, a vĩ na mɩ nyɔw na a Nɩbɛ Bie a ʋ ɩnɛ, a lɛ ʋ nɔɔ waara nɩ a ʋ cãa kpɛ̃ɛ na mɩ ɩ a ʋ Sãa cãa, nɩ a ʋ sɩ-tʋnɩsɩ na ɩ a cɛcɛ ben mɩ.

²⁷Yel-mɩ̃ɛ ɩ̃ yele nyɩ, a bala na be a ka, a ŋmɛɛ na nyɛ na a mɩnɛ a Naaŋmɩn na diere a ʋ fãw, ɩ̃ wa pãa bɩɛr kpi.”

²⁸A lɛ a *Jeeju na ƴɛr a ƴɛrɩ̃sɩ ala baar, a maalʼã bibie anuu-nʼata, ɩ̃ ʋ taw a Pɩɛr nɩ a Jã nɩ a Jakɩ do nɩ tãw juu a Naaŋmɩn sʋɔrfʋ.

²⁹A mɩnɛ ʋ na sʋɔrɔ a Naaŋmɩn, a ʋ nii-sɔw lɩɛbʼã, ɩ̃ a ʋ kparʋ lɩɛb pɛlɩ̃ nyɩlɛ ƴala-ƴala-ƴala,

³⁰ɩ̃ a dabsɩ ayi ɩraa ƴɛrɛ nɩ ʋ. A nɩbɛ bala ɩ na a Eli nɩ a Mowisi

³¹na nyɩr a cãa kpɛ̃ɛ pʋɔ, a ba mana taa a Jeeju kũu ɩnɛ ʋ na cere kpiire a Jerujalɛm.

³²A gʋ̃ɔ dãa na tɛrɛ a Pɩɛr nɩ a ʋ tɔ deme, ɩ̃-cɛ ba jaw na nyɛ a Jeeju a cãa kpɛ̃ɛ pʋɔ nɩ a dabsɩ ayi na lãa ɩraa nɩ ʋ.

³³A lɛ a dabsɩ bala na bar a Jeeju ɩ̃ bʋɔrɔ ba cen, a Pɩɛr yelʼã a Jeeju: “Jãjaana, a vɩɛlɛ na sɩ na be a ka. Sɩ na ƴɔ̃w na sɛɛr ata; a bõ-ƴen na ɩ na a fʋ ben, a ƴen sʋbɔ ɩ a Mowisi ben, ɩ̃ a kãw ɩ a Eli ben.” ꞌWaa dãa bɔ̃w a ala ʋ na yele wa.

³⁴A lɛ ʋ na cãa ƴɛrɛ a lɛ, dɔ̃dɔrɩ̃ma suu na pɔw ba, ɩ̃ a lɛ a Mowisi nɩ a Eli na kpɛɛrɛ a dɔ̃dɔrɩ̃ma ʋlɔ pʋɔ, dãbɩ̃ɛ nyɔw na a *par-tuurbe.

³⁵Ɩ̃ a ƴɛrɩ̃sɩ yi be a dɔ̃dɔrɩ̃ma pʋɔ yele: “A ɩ̃ Bi-daba nɩ a naa, ʋlɔ ɩ̃ vɛl ir: nyɩ́ cɛlɛ ʋ.”

³⁶A lɛ ba na wõ a ƴɛrɩ̃sɩ ala baar, ba nyɛ na a Jeeju ʋ ɩraa ʋ yẽ. A ʋ par-tuurbe ŋma vʋʋrʋ̃sɩ ɩ̃ baa man a ala ba na nyɛ a daar ʋlɔ pʋɔ kʋ nɩrɛ wa.

³⁷A dɩvɩɛ bio, a mɩnɛ a *Jeeju na yi a tãw juu suu nɩ a ɩ *par-tuurbe, nɩ-yayaw tuor ʋ na.

³⁸A be a nɩbɛ sɔ̃w, daba kãw wuurʼɩ̃ na kpɛ̃w yele: “Jãjaana, ɩ̃ sʋɔr fʋ na bɩlɛ, ꞌwuor ma a bile, a-na-ɩ ʋlɔ ɩ̃ ɩ a ɩ̃ bi-bõ-ƴen tẽ-tẽ-tẽ.

³⁹Kɔ̃tɔn kãw ɩ̃ ire ʋ, ɩ̃ ma maal ʋ ʋ wuure a jie naan, vara nɩ fãgã ɩ̃ ma fure a natɛ-fube, ɩ̃ a ʋlɔ wa pãa bar ʋ, a ɩ̃gan ma kar ʋ na.

⁴⁰Ɩ̃ sʋɔrʼã a fʋ par-tuurbe a ba diw a kɔ̃tɔn bar, ɩ̃ baa tʋɔ wa.”

⁴¹A mɩnɛ a Jeeju na wõ a lɛ, ʋ yelʼã: “A nyɩmɩ dɩnaa su-kpɛn deme na ma tɛrɛ ƴɔ̃w-nyãa wa! Ɩ̃ be nɩ nyɩ, ɩ̃ dɩ nɩ nyɩ a tuo wa ta nɩ dabor?” Ɩ̃ na ʋ yel a daba: “Taw a fʋ bie wa nɩ ka.”

⁴²A lɛ a daba na taw a bie wa tara nɩ a Jeeju, a kɔ̃tɔn dam ʋ na nɩ kpɛ̃w lɔb a tene, ɩ̃-cɛ a Jeeju mʋ̃ɔ na mimir ƴɔ̃w a kɔ̃tɔn bier, ɩ̃ na ʋ kpɛmɛ a bile kʋ a sãa,

⁴³a nʋɔr ko a nɩbɛ ba jaa a lɛ ba na nyɛ a Naaŋmɩn bɛrmɛfʋ. A mɩnɛ a nɩbɛ ba jaa na kpiire a *Jeeju a ala a jaa ɩnɛ ʋ na maala, ʋ yelʼã a ʋ *par-tuurbe:

⁴⁴“A nyɩmɩ, nyɩ́ bɔ̃w cɛlɛ a ƴɛrɩ̃ na: ba na nyɔw na a *Nɩbɛ Bie ƴɔ̃w a nɩbɛ nuu pʋɔ.”

⁴⁵Ɩ̃-cɛ a ʋ par-tuurbe ma dãa bɔ̃w a ƴɛrɩ̃ ʋlɔ par wa. A dãa na liw ba a ba bɔ̃w faa, ɩ̃ a dãbɩ̃ɛ nyɔw ba a baa ꞌla soor a Jeeju a ƴɛrɩ̃ ʋlɔ wa.

⁴⁶Cɩɩrɩ̃-taa irʼã a *Jeeju *par-tuurbe sɔ̃w a ba bʋɔrɔ ba bɔ̃w a ʋlɔ na ɩ a kpɛ̃ɛ a ba pʋɔ.

⁴⁷A Jeeju bɔ̃w a ala ba na tɩɛrɛ ɩ̃ taw bibile wa nɩ ʋ ɩraa a ʋ lõboorɩ̃,

⁴⁸ɩ̃ ʋ yel ba: “A nɩrɛ lɛ na sɔw de a bibile na a maa ɩnɛ, a maa mɩ̃ɛ ʋ sɔw de, ɩ̃ a ʋlɔ na sɔw de ma, mɩ sɔw na de a ʋlɔ na tʋ ma. A-na-ɩ a ʋlɔ na nyɩrɩ̃ pab a ʋ mɩ̃ɛ a nyɩ jaa sɔ̃w, ʋlɔ ɩ̃ ɩ a kpɛ̃ɛ.”

⁴⁹A Jã yel: “Jãjaana, sɩ nyɛ na nɩrɛ kãw ʋ de a fʋ yuor diwre nɩ a kɔ̃tɔnsɩ bara, a sɩ dãa bʋɔrɔ sɩ pɩɛrɩ̃ ʋ bar, a-na-ɩ ꞌwaa be a sɩ pʋɔ wa.”

⁵⁰A Jeeju yel ʋ: “Nyɩ taa pɩɛrɛ ʋ bara wa, a-na-ɩ a nɩrɛ ʋlɔ na ma jaar a nyɩ ƴɛrɩ̃ wa, nyɩ nɩrɛ ʋ ɩ.”

⁵¹A mɩnɛ a daar ʋlɔ ba na diere a *Jeeju duoro nɩ a saꞌlon na pɩɛlɛ, ʋ ŋme na nyãa a Jerujalɛm cenfʋ ɩnɛ.

⁵²Ʋ tʋ̃ na nɩbɛ a ba de ʋ nĩe cen na kpɛ Samari tẽ-bile kãw pʋɔ a ʋ gaajie gbɛɛrɩ̃fʋ ɩnɛ.

⁵³Ɩ̃-cɛ a tẽw ʋlɔ nɩbɛ ma sɔw de ʋ wa, a-na-ɩ a Jerujalɛm ʋ dãa cere.

⁵⁴A mɩnɛ a ʋ *par-tuurbe Jakɩ nɩ a Jã na nyɛ a lɛ, ba yelʼã: “Nɩ-kpɛ̃ɛ, fʋ bʋɔrɔ na sɩ bʋɔl a vũu ʋ yi a saꞌlon ɩ̃ suu wa dɩ ba mɩɩ?”

⁵⁵A Jeeju lɩɛb mʋ̃ɔ mimir ƴɔ̃w ba.

⁵⁶Ɩ̃ na ba lɛ cen tẽ-kpee.

⁵⁷A lɛ ba na cãa be a sɔr juu cere, daba kãw yelʼã a *Jeeju: “Ɩ̃ na tuure fʋ na a jiir a jaa fʋ na cere.”

⁵⁸A Jeeju yel ʋ: “A sɛ́nɛ tɛrɛ na a ba bɔɔr, ɩ̃ a wɛ-lili mɩ tɛrɛ a ba cor, ɩ̃-cɛ a *Nɩbɛ Bie ma mɩ tɛrɛ jie ʋ na gaala a ʋ juu wa.”

⁵⁹Ʋ lɛ yelʼã nɩsaa kpee: “Wa tuure ma.” Ʋ yel: “Nɩ-kpɛ̃ɛ! Kʋ ma sɔr ɩ̃ kulʼɩ̃ ũu a ɩ̃ sãa baar.”

⁶⁰Ɩ̃-cɛ a Jeeju yel ʋ na: “Bar a nɩ-kũusɩ a ba uune a ba kũusɩ, ɩ̃ a fʋ̃ʋ, cen na hier a Naaŋmɩn fãw kʋ a nɩbɛ.”

⁶¹A kãw yel: “Ɩ̃ na tu fʋ na, ɩ̃-cɛ kʋ ma sɔr ɩ̃ de nĩe kulʼɩ̃ puor a ɩ̃ yir deme baar.”

⁶²A Jeeju yel ʋ: “A nɩrɛ ʋlɔ na de a nii kʋɔrɔ nɩ, ɩ̃ ŋmele ꞌwuoro a puo-sɔw, ꞌwaa sɛw nɩ a Naaŋmɩn fãw wa.”