Read Birifor, Malba Jã Sɛbɛ 1 Bible Online

Jã Sɛbɛ 1 - Birifor, Malba bible

Jã Sɛbɛ 1

¹A lɛ a tẽw na ma dãa be be sɛr wa, ɩ̃ a ʋlɔ na ɩ a Ƴɛrɩ̃ de na nĩe be be. A ʋna Ƴɛrɩ̃ be nɩ na a Naaŋmɩn, ɩ̃ a Ƴɛrɩ̃ ʋlɔ ɩ na a Naaŋmɩn.

²Ʋ be nɩ na a Naaŋmɩn a korĩ-cɛ jaa.

³Ʋlɔ ɩ̃ maal a yele a jaa. Bom ma be be ʋ na ma maal wa.

⁴A baafʋ be na a ʋ jie ɩ̃ a baafʋ ʋlɔ ɩ na cãa a nɩbɛ jie.

⁵A cãa caara na a libe pʋɔ ɩ̃ a libe ma tʋɔ ʋ wa.

⁶Daba kãw dãa na be be a Naaŋmɩn na tʋ̃, a ʋ yuor dɩ a Jã.

⁷Ʋ wa na na ɩ a yel-mɩ̃ɛ ƴɛr-mana, na ʋ mana a cãa ƴɛrɩ̃, a mɩnɛ a nɩbɛ ba jaa na tʋɔ tɛrɛ a ƴɔ̃w-nyãa.

⁸A ʋlɔ mɩ̃ɛ ma ɩ a cãa wa, ɩ̃ ʋ ɛ̃ɛ na wa na mana a cãa ƴɛrɩ̃.

⁹A cãa ʋlɔ ɩ na a yel-mɩ̃ɛ cãa na waara a tẽw pʋɔ caara a nɩbɛ ba jaa.

¹⁰Ʋ dãa na be a tẽw pʋɔ, ɩ̃ a ʋlɔ ɩ̃ maal a tẽw, ɩ̃-cɛ a tẽw nɩbɛ ma dãa bɔ̃w ʋ wa.

¹¹Ʋ wa na a ʋ mɩ̃ɛ tẽw, ɩ̃ a ʋ mɩ̃ɛ nɩbɛ ma sɔw de ʋ wa.

¹²Ɩ̃-cɛ a bala na sɔw de ʋ tɛrɛ nɩ ʋ a ƴɔ̃w-nyãa, ʋ kʋ ba na sɔr a ba lɩɛb ɩ a Naaŋmɩn bibiir.

¹³A dɔwfʋ ʋlɔ ma ɩ a tẽw na dɔwfʋ wa; aa mɩ yi nɩrɛ pʋ-tɩɛrʋ̃ pʋɔ, mɩɩ daba tɩɛrʋ̃ pʋɔ wa, ɩ̃-cɛ a Naaŋmɩn ɩ̃ ɩ a ba Sãa.

¹⁴A Ƴɛrɩ̃ ʋlɔ lɩɛbʼã ɩ nɩrɛ, ɩ̃ jɛ a sɩ sɔ̃w. Sɩ nyɛ na a ʋ yo-yifʋ na ɩ a yo-yifʋ ʋlɔ a Bi-dab-daadaa na pɔw a ʋ Sãa jie. A ʋ maalfʋ nyɩrɩ̃ na vɩɛlɛ, ɩ̃ ʋ mɩ ɩ na yel-mɩ̃ɛ sʋbɔ.

¹⁵A Jã ƴɛrɛ na a ʋ ƴɛrɩ̃ nɩ kpɛ̃w yele: “A naa ɩnɛ ɩ̃ dãa yele nyɩ áa ʋlɔ na be a ɩ̃ puorɩ̃ waara ɩ na kpɛ̃ɛ a ɩ̃ ɩnɛ, a-na-ɩ ʋ dãa na de nĩe be be ɩ̃ a ba wa bɩɛr dɔw ma.”

¹⁶A maal-vɩlaa a jaa yi na a ʋ jie ma ƴala waara a sɩ jie dɔɔlɔ taa.

¹⁷A-na-ɩ a Mowisi a Naaŋmɩn kʋ a ƴɛr-kpɛn ʋ tɩɩr, ɩ̃-cɛ a maal-vɩlaa nɩ a yel-mɩ̃ɛ yi na a *Jeeju-Kirisi jie.

¹⁸Nɩ-bõ-ƴen ma dãa nyɛ a Naaŋmɩn wa, ɩ̃-cɛ a Bi-dab-daadaa na ɩ a Naaŋmɩn, na be a Sãa lõboorɩ̃, ʋlɔ ɩ̃ miil a nɩbɛ a ba bɔ̃w ʋ.

¹⁹A daar ʋlɔ a Jufisɩ bala na be a Jerujalɛm na dãa tʋ̃ a Naaŋmɩn baar-lorbo nɩ a Naaŋmɩn yir tʋ̃tʋnbɔ a ba soor a Jã-Batii á ala ʋ ɩ, nyɩ́ nyɛ a ala ʋ na dãa man ba.

²⁰ꞌWaa sɔɔlɩ̃ ba wa, ɩ̃ ʋ yel ba na cãa pʋɔ: “Aa ɩ maa ɩ̃ ɩ a *Kirisi wa.”

²¹Ba lɛ soor ʋ na: “Ɩ̃ ala fʋ ɩ? A Eli fʋ ɩ mɩɩ?” A Jã yel: “Maa ɩ a ʋlɔ wa.” A ba lɛ soor ʋ: “Fʋ̃ʋ ɩ a Naaŋmɩn ƴɛr-hiere ʋlɔ mɩɩ?” Ʋ yel: “Kpee!”

²²Ala-ɩ̃-sɔ ba soor ʋ na: “Ɩ̃ ala tɔr fʋ ɩ? A sɛw na a fʋ na yel sɩ a sʋbɔ ʋlɔ fʋ na ɩ, a sɩ yel kʋ a bala na tʋ̃ sɩ.”

²³A Jã yel ba: “Ɩ̃ ɩ na a nɩrɛ ʋlɔ kɔkɩr na yire a wɛkar pʋɔ yele: Nyɩ́ cɔɔrɩ̃ a Nɩ-kpɛ̃ɛ sɔr bar ʋ tor,” a mɩnɛ a Naaŋmɩn ƴɛr-hiere Ejayi na dãa yel.

²⁴A bala ba na tʋ̃ a Jã jie, *Farɩsɩ nɩbɛ be na tɔ

²⁵ɩ̃ soor ʋ: “A fʋ na ma ɩ a Kirisi wa, ma mɩ ɩ a Eli wa, ma ɩ a ʋna Naaŋmɩn ƴɛr-hiere wa, bõ ɩ̃ ɩ a fʋ mʋrɔ a nɩbɛ a kʋ̃ɔ?”

²⁶A Jã yel ba: “A maa, kʋ̃ɔ pʋɔ ɩ̃ mʋrɔ nyɩ, ɩ̃-cɛ nɩrɛ be na a nyɩ sɔ̃w nyɩ na ma bɔ̃w wa.

²⁷Ʋ be na a ɩ̃ puor waara ɩ̃ maa ɩ bom na tʋɔ gũu sɩɩr a ʋ nafaba wa.”

²⁸A ala a jaa maalʼã a Betani na be a Jʋrdɛ̃ man gaan, a jie ʋlɔ a Jã na dãa mʋrɔ a nɩbɛ a kʋ̃ɔ.

²⁹A dɩvɩɛ bio, a Jã nyɛ na a *Jeeju ʋ wɩɛrɛ a ʋ sɛ̃, ʋ yel: “Nyɩ́ nyɛ a Naaŋmɩn Péle na ire a tẽw nɩbɛ maal-fãa bara.

³⁰A ʋ ƴɛrɩ̃ ɩ̃ dãa ƴɛr a mɩnɛ ɩ̃ na yel á daba be na a ɩ̃ puorɩ̃ waara na ɩ kpɛ̃ɛ a ɩ̃ ɩnɛ, a-na-ɩ ʋ dãa na de nĩe be be ɩ̃ a ba wa bɩɛr dɔw ma.

³¹Ɩ̃ a maa, maa dãa bɔ̃w a nɩ-buor ʋ na ɩ wa, ɩ̃-cɛ ɩ̃ wa na na mʋrɔ a nɩbɛ a kʋ̃ɔ a mɩnɛ a na tʋɔ maal a *Ɩsɩrayɛl nɩbɛ a ba bɔ̃w ʋ.”

³²A Jã lɛ yelʼã: “Ɩ̃ nyɛ na a Naaŋmɩn Sɩɛ ʋ yi a saꞌlon wɔ̃ taa nɩ a ŋmam ɩ̃ suure waara na lo a ʋ juu.

³³Maa dãa bɔ̃w a sʋbɔ ʋlɔ ʋ na ɩ wa, ɩ̃-cɛ a Naaŋmɩn ʋlɔ na tʋ ma ɩ̃ mʋrɔ a nɩbɛ a kʋ̃ɔmɩ, ʋ dãa na yel ma á ɩ̃ nɔɔ nyɛ na a Naaŋmɩn Sɩɛ ʋ suure na lo a daba juu, áa daba ʋlɔ ɩ̃ nɔɔ mʋrɔ a nɩbɛ a Naaŋmɩn Sɩɛ pʋɔ.

³⁴Ɩ̃ a maa, ɩ̃ nyɛ na a ala ɩ̃ mana kʋrɔ nyɩ a ʋlɔ ɩ̃ ɩ a Naaŋmɩn Bie.”

³⁵A dɩvɩɛ bio, a Jã lɛ be na be nɩ a ʋ *par-tuurbe ayi

³⁶ɩ̃ nyɛ a *Jeeju ʋ tɔlɔ, ʋ yel: “Nyɩ́ nyɛ a Naaŋmɩn Péle!”

³⁷A mɩnɛ a par-tuurbe ayi bala na wõ a ala ʋ na ƴɛr, ba tuure na a Jeeju.

³⁸A Jeeju lɩɛbʼã nyɛ a ba tuure ʋ, ʋ soor ba: “Bõ nyɩ bʋɔrɔ?” A ba yel ʋ: “Arabɩ! (A lɛ yelʼã, Jãjaana) Nyɩnɛ fʋ kpɛɛrɛ?”

³⁹A Jeeju yel ba: “Nyɩ́ wa bɔ̃w a jie.” A lɛ, ba cenʼã na nyɛ a jie, ɩ̃ jɛ nɩ ʋ a be a bibir ʋlɔ. A mɔtɔ̃w gɔrfʋ daar ba cen a be.

⁴⁰A bana nɩbɛ ayi ƴen sʋbɔ na dãa wõ a Jã ƴɛrɩ̃ ɩ̃ tuure a Jeeju ɩ na a Ãdire na ɩ a Sɩmɔ̃ Pɩɛr yɛbɛ.

⁴¹A Ãdire de na nĩe bɔ a ʋ yɛbɛ Sɩmɔ̃ ɩ̃ yel ʋ: “Sɩ nyɛ na a Mɛsɩ.” (A lɛ yelʼã, a ʋlɔ a Naaŋmɩn na tʋ̃.)

⁴²Ɩ v taw na a Sɩmɔ̃ cenʼɩ̃ a Jeeju sɛ̃, a Jeeju ꞌwuor ʋ ɩ̃ yel: “Fʋ ɩ na a Jã bie, Sɩmɔ̃, ɩ̃ ba nɔɔ bʋɔlɔ fʋ na Sefasɩ.” (A lɛ yelʼã, a Pɩɛr.)

⁴³A dɩvɩɛ bio, a *Jeeju bʋɔrɔ na ʋ cen a Galile wɩɛr, ɩ̃ a be ʋ nyɛ na a Fɩlɩpɩ ɩ̃ yel ʋ: “Tuure ma!”

⁴⁴A Fɩlɩpɩ ɩ na a Bɛsada-tẽw nɩrɛ a Ãdire nɩ a Pɩɛr kaarɩ̃.

⁴⁵A Fɩlɩpɩ bɔ na a Natanɩɛl nyɛ ɩ̃ yel ʋ: “Sɩ nyɛ na a ʋlɔ a Mowisi na dãa ƴɛr a ʋ ƴɛrɩ̃ a ƴɛr-kpɛn sɛbɛ pʋɔ, na ɩ a ʋlɔ a Naaŋmɩn ƴɛr-hierbe na mɩ dãa ƴɛr a ʋ ƴɛrɩ̃. A Jeeju ʋ, na ɩ a Najarɛtɩ Jojɛfʋ bi-daba.”

⁴⁶a Natanɩɛl yel ʋ: “Bõ-vɩlaa na tʋɔ na yi a Najarɛtɩ-tẽw pʋɔ mɩɩ?” A Fɩlɩpɩ yel ʋ: “Wa su nɩ ʋ a fʋ mimir.”

⁴⁷Ɩ̃ a mɩnɛ a Jeeju na nyɛ a Natanɩɛl ʋ waara a ʋ sɛ̃, ʋ yelʼã a ʋ ɩnɛ: “Nyɩ́ nyɛ a *Ɩsɩrayɛl nɩrɛ sɩrɛ jaa. Bɛlɩ̃fʋ ma be a ʋ jie fɩ̃ɩ wa.”

⁴⁸A Natanɩɛl soor ʋ: “Mɩnɛ fʋ ɩ ɩ̃ bɔ̃w ma?” A Jeeju yel ʋ: “A lɛ a Fɩlɩpɩ na ma dãa bʋɔl fʋ sɛr wa, ɩ̃ dãa na de nĩe nyɛ fʋ a lɛ fʋ na be a fɩgɩ tɩɛ pulẽe.”

⁴⁹A Natanɩɛl yel ʋ: “Jãjaana, fʋ̃ʋ ɩ a Naaŋmɩn Bie! Fʋ̃ʋ ɩ a Ɩsɩrayɛl nɩbɛ jamana!”

⁵⁰A Jeeju yel ʋ: “Fʋ sɔw ma na a-na-ɩ ɩ̃ yel fʋ na a ɩ̃ dãa na nyɛ fʋ a be a fɩgɩ tɩɛ pulẽe. Fʋ nɔɔ nyɛ na yele a bɛrmɛ gãw a asɩmɛ.”

⁵¹Ɩ̃ ʋ lɛ yelʼã go: “Yel-mɩ̃ɛ ɩ̃ yele nyɩ, nyɩ nɔɔ nyɛ na a saꞌlon ʋ yuo ɩ̃ a Naaŋmɩn sɩ-tʋnɩsɩ duoro ɩ̃ suure a *Nɩbɛ Bie jie.”