Read Birifor, Malba Jã Sɛbɛ 10 Bible Online

Jã Sɛbɛ 10 - Birifor, Malba bible

Jã Sɛbɛ 10

¹“Yel-mɩ̃ɛ ɩ̃ yele nyɩ, a ʋlɔ na maa kpɛ a piir jaw pʋɔ nɩ a dɔ̃dɔr wa, ɩ̃ ma do nɩ a dacin juu, a ʋna sʋbɔ naa ɩ na nyanyuur nɩ nɩ-bier.

²Ɩ̃ a ʋlɔ na ma kpɛ nɩ a dɔ̃dɔrɩ̃, ʋlɔ ɩ̃ ɩ a piir dɔ-cɩɩnaa.

³A dɔ̃dɔr-gure ma yuo ʋ na a pan, a piir ma wõ a ʋ kɔkɩr, ɩ̃ ʋ bʋɔlɔ a ʋ piir yoe a ba tuure ʋ yire nɩ a yẽw[4].

⁴A mɩnɛ ʋ na kpa a ʋ piir ba jaa yi nɩ, ʋ ma de na nĩe a ba tuure ʋ, a-na-ɩ ba bɔ̃w na a ʋ kɔkɩr.

⁵Ba kɔ̃ tu a saana wa, ɩ̃-cɛ ba na ɛ̃ɛ na jɔ jãa nɩ ʋ, a-na-ɩ baa bɔ̃w a sáanba kɔkɩɛ wa.”

⁶A *Jeeju lɔbʼã a sʋkpa ʋlɔ kʋ ba, ɩ̃ baa bɔ̃w a ala ʋ na ƴɛrɛ ba par wa.

⁷A *Jeeju lɛ yel ba: “Yel-mɩ̃ɛ ɩ̃ yele nyɩ, maa ɩ̃ ɩ a piir dɔ̃dɔr nʋɔr.

⁸A bala ba jaa na dãa de ma a nĩe wa ɩ na nyanyube nɩ nɩ-bebe, ɩ̃ a piir ma dãa sɔw cɛl ba wa.

⁹Maa ɩ̃ ɩ a dɔ̃dɔr nʋɔr. A nɩrɛ ʋlɔ na kpɛɛrɛ nɩ a dɔ̃dɔr ʋlɔ, ʋ na nyɛ na a faafʋ. Ʋ na kpɛ na ɩ̃ yi, ɩ̃ ʋ na pɔw na a bõ-dɩraa.

¹⁰A nyanyuur ma wa na a jufʋ nɩ a kúfʋ nɩ a sãwfʋ ɩnɛ tɛw. A maa, ɩ̃ wa na a nɩbɛ na tʋɔ pɔw a baafʋ, ɩ̃ a baafʋ ʋlɔ na ƴɔ ba.

¹¹“Maa ɩ̃ ɩ a dɔ-cɩɩn-son. A dɔ-cɩɩn-son sɔw na na kpi a ʋ piir ɩnɛ.

¹²A ʋlɔ na tʋnɔ a libie tʋn, ꞌwaa ɩ a dɔ-cɩɩnaa ʋlɔ na sɔ a piir wa. Ala-ɩ̃-sɔ a ʋlɔ ɩ̃ wa nyɛ a nyaanyiir ʋ waara, ʋ ma barʼã a piir ɩ̃ jɔ, a nyaanyiir ma yɛ̃yɛlɩ̃ ba bar ɩ̃ nyɔɔr a ŋmɛɛ.

¹³Ʋ ma jɔ na a lɛ, a-na-ɩ libie tʋn ʋ tʋnɔ ɩ̃ a piir ben ma ba ʋ wa.

¹⁴Maa ɩ̃ ɩ a dɔ-cɩɩn-son. A mɩnɛ ɩ̃ na bɔ̃w a ɩ̃ Sãa ɩ̃ a ɩ̃ Sãa mɩ bɔ̃w ma, a lɛ ɩ̃ mɩ bɔ̃w a ɩ̃ piir a ba mɩ bɔ̃w ma, ɩ̃ ɩ̃ sɔw na na kpi a ba ɩnɛ.

¹⁶Ɩ̃ mɩ tɛrɛ na piir ŋmɛɛ na ma be a jaw na pʋɔ wa. A sɛw na ɩ̃ na kpa ba wa nɩ; ba na cɛlɛ na a ɩ̃ kɔkɩr ɩ̃ a ba jaa nɔɔ ɩ na a dʋ̃-bõ-ƴen ɩ̃ mɩ tɛrɛ a dɔ-cɩɩn-bõ-ƴen.

¹⁷“A ɩ̃ Sãa nʋ ma na a-na-ɩ ɩ̃ sɔw na na kpi, ɩ̃ na lɛ tʋɔ ir de a ɩ̃ baafʋ.

¹⁸Nɩrɛ ma faara ʋ a ɩ̃ jie wa, ɩ̃-cɛ maa mɩ̃ɛ ɩ̃ sɔw na kpi. Ɩ̃ tɛrɛ na a tʋɔfʋ na kpi a ɩ̃ mɩ̃ɛ; ɩ̃ mɩ lɛ tɛrɛ na a tʋɔfʋ na lɛ ir de a ɩ̃ baafʋ. A ala ɩ̃ ɩ a ala a ɩ̃ Sãa na ƴɔ̃w ma a ɩ̃ maal.”

¹⁹A ana ƴɛrɩ̃sɩ ɩnɛ, a Jufisɩ lɛ ƴɛrɛ na kpee kpee.

²⁰A yaw jie a ba pʋɔ yele na: “Kɔ̃tɔn tɛrɛ ʋ na. Ʋ yaara na! Bõ ɩ̃ ɩ a nyɩ cɛlɛ ʋ?”

²¹A ŋmɛɛ yele: “A ƴɛrɩ̃sɩ na ma ɩ kɔ̃tɔn-ire ƴɛrɩ̃sɩ wa. A kɔ̃tɔn na tʋɔ na yuo jɔ̃w mimie mɩɩ?”

²²A ɩ na a ꞌwuon, a ba maala a Naaŋmɩn puor-yir kpɛ̃ɛ pɔlfʋ fɛtɩ a Jerujalɛm.

²³A *Jeeju yʋɔrɔ na a Salʋmɔ̃ jɛ̃bɛrɩ̃ pʋɔ be a Naaŋmɩn puor-yir kpɛ̃ɛ,

²⁴a Jufisɩ tiw kolĩ ʋ ɩ̃ sooro ʋ: “A baalɩ̃fʋ na fʋ na ƴɔ̃w sɩ, dabor a nɔɔ baar? A ala ɩ̃ ɩ fʋ̃ʋ ɩ̃ ɩ a *Kirisi, yel kʋ sɩ cãa pʋɔ.”

²⁵A Jeeju yel ba: “Ɩ̃ yelʼã kʋ nyɩ, ɩ̃ nyaa sɔw wa. A tʋmɔ ala ɩ̃ na maala nɩ a ɩ̃ Sãa yuor, ala ɩ̃ miile a ɩ̃ yel-mɩ̃ɛ,

²⁶ɩ̃-cɛ nyaa sɔw wa, a-na-ɩ nyaa be a ɩ̃ piir pʋɔ wa.

²⁷A ɩ̃ piir ma wõ na a ɩ̃ kɔkɩr, ɩ̃ bɔ̃w ba, a ba tuure ma.

²⁸Ɩ̃ kʋrɔ ba na a baa-kɔ̃-tɛw ɩ̃ baa be na kpi wa, ɩ̃ nɩrɛ ma faara ba a ɩ̃ nuumɩ wa.

²⁹A ala a ɩ̃ Sãa na kʋ ma gãw na a yele a jaa, ɩ̃ nɩrɛ kɔ̃ tʋɔ faa bom a ɩ̃ Sãa nuumɩ wa.

³⁰A maa nɩ a ɩ̃ Sãa ɩ na bõ-ƴen.”

³¹A Jufisɩ lɛ woorʼã a kubie bʋɔrɔ ba lɔb ʋ,

³²a Jeeju yel ba: “Ɩ̃ maalʼã a tʋ̃-sono yaw miilʼɩ̃ nyɩ nɩ a ɩ̃ Sãa fãw. Tʋn buor ɩnɛ nyɩ bʋɔrɔ nyɩ lɔb ma nɩ a kubie kú?”

³³A Jufisɩ yel ʋ: “Aa ɩ tʋn son ɩnɛ sɩ lɔbɔ fʋ wa, ɩ̃-cɛ a Naaŋmɩn fʋ na kpɛrɛ ɩnɛ ʋ, a-na-ɩ a fʋ̃ʋ na ɩ a nɩrɛ, fʋ bʋɔrɔ na ba de fʋ a fʋ ɩ Naaŋmɩn.”

³⁴A Jeeju yel ba: “A nyɩ ƴɛr-kpɛn pʋɔ, a Naaŋmɩn ma yel á ‘Nyɩ ɩ na a naaŋmɩnsɩ’ wa mɩɩ?

³⁵A bala ʋ na bʋɔlɔ a naaŋmɩnsɩ ɩ na a nɩbɛ bala na pɔw a ʋ ƴɛrɩ̃, ɩ̃ sɩ bɔ̃w ka a Naaŋmɩn Sɛbɛ ƴɛrɩ̃sɩ ma tʋɔrɔ ɩrɛ jiri wa.

³⁶Ɩ̃ a maa a Sãa na vɛl ir tʋ̃ a ka a tẽw pʋɔ, a maa yel áa Naaŋmɩn Bie ɩ̃ ɩ, bõ ɩnɛ nyɩ yel áa Naaŋmɩn ɩ̃ kpɛrɛ?

³⁷A maa ma maala a ɩ̃ Sãa tʋmɔ wa, nyɩ taa sɔw a ɩ̃ ben wa.

³⁸Ɩ̃-cɛ a ala ɩ̃ ɩ ɩ̃ maala na a ɩ̃ Sãa tʋmɔ, a nyɩmɩ ma saarɩ̃ sɔw a maa mɩ̃ɛ wa, ɩ̃ nyɩ́ sɔw a tʋmɔ ala ɩnɛ, a mɩnɛ a nyɩ na tʋɔ bɔ̃w bɔ̃w ka a ɩ̃ Sãa be na a ɩ̃ pʋ̃ɔ, ɩ̃ mɩ be a ɩ̃ Sãa pʋ̃ɔ.”

³⁹A lɛ, a Jufisɩ lɛ bʋɔrɔ na ba nyɔw ʋ, ɩ̃-cɛ ʋ cenʼã ɩ̃ cɛ ba bar.

⁴⁰A Jeeju lɛ cenʼã a Jʋrdɛ̃ man gaan, ta a jie ʋlɔ a Jã na dãa mʋrɔ a nɩbɛ a kʋ̃ɔ a korĩ-cɛ. Ʋ jɛ na a be,

⁴¹a nɩ-yaw wɩ a ʋ sɛ̃ na yele: “A Jã ma dãa maal nɔ-kofʋ tʋn kãw wa, ɩ̃-cɛ a ala a jaa ʋ na yel a daba na ɩnɛ ɩ na yel-mɩ̃ɛ.”

⁴²Ɩ̃ a nɩ-yaw sɔw na de a Jeeju a be.