Read Birifor, Malba Jã Sɛbɛ 13 Bible Online

Jã Sɛbɛ 13 - Birifor, Malba bible

Jã Sɛbɛ 13

¹A cɛ na fɩ̃ɩ ɩ̃ a *Pakɩ fɛtɩ na ta, a *Jeeju bɔ̃w ka a ʋ daar ta na ʋ na yi a ka a tẽw pʋɔ ɩ̃ cen a ʋ Sãa sɛ̃. A Jeeju na nʋ a bala ʋ na sɔ a ka a tẽw pʋɔ lɛ tɩɩ na nyɩrɩ̃ nʋ ba daadaa.

²A ʋlɔ nɩ a ʋ *par-tuurbe jɛ na dɩrɛ a dɩb a jaanʋɔr, ɩ̃ a Satã dãa na de nĩe ƴɔ̃w a Sɩmɔ̃ Isikaryɔtɩ bi-daba Judasɩ a ʋ de a Jeeju juu.

³A Jeeju bɔ̃w na a ʋ mɩ̃ɛ áa Naaŋmɩn jie ʋ dãa yi, áa be ʋ lɩɛbɛ cere, ɩ̃ ʋ mɩ bɔ̃w na áa ʋ Sãa de na a yele a jaa ƴɔ̃w a ʋ nuumɩ.

⁴Ala-ɩ̃-sɔ ʋ barʼã a dɩb ɩ̃ ir yaa a ʋ cẽcen bar ɩ̃ de a bɔɔdʋbaa lũ a sɩɛ pʋɔ,

⁵ɩ̃ ꞌwɔ̃w a kʋ̃ɔ ƴɔ̃w a ŋmã-kpoo pʋɔ, ɩ̃ nyɔw ɩ̃ pɛwrɛ a ʋ par-tuurbe gbɛɛ, ɩ̃ fɔfɔrɔ nɩ a bɔɔdʋbaa ʋlɔ ʋ na lũ a sɩɛ pʋɔ.

⁶Ʋ̃ ta na a Sɩmɔ̃ Pɩɛr, a Sɩmɔ̃ Pɩɛr yel ʋ: “Nɩ-kpɛ̃ɛ, fʋ̃ʋ na pɛw ma a gbɛɛ?”

⁷A Jeeju yel ʋ: “A ala ɩ̃ na maala, faa bɔ̃wnɔ a par a ƴɛ̃ƴɛrɩ̃ na wa, ɩ̃ a daar kãw fʋ nɔɔ bɔ̃w na a par.”

⁸A Pɩɛr yel ʋ: “Faa be na pɛw a ɩ̃ gbɛɛ ʋlɔ wa.” A Jeeju yel ʋ: “A maa ma pɛw fʋ a gbɛɛ wa, saa lɛ beree taa wa.”

⁹A Sɩmɔ̃ Pɩɛr yel ʋ: “A ala ɩ̃ ɩ a lɛ ʋ, taa pɛw ma a gbɛɛ tɛw wa, mɩ pɛw ma a nur lãa nɩ a juu.”

¹⁰A Jeeju yel ʋ: “A ʋlɔ na so a kʋ̃ɔ ma lɛ bʋɔrɔ kʋ̃ɔ sofʋ wa, ɩ̃-cɛ a gbɛɛ tɛw ʋ ma pɛw a-na-ɩ ʋ yi na cɛcɛ. A nyɩmɩ, nyɩ ɩ na cɛcɛ, ɩ̃-cɛ aa ɩ nyɩ jaa ʋ wa.”

¹¹A Jeeju bɔ̃w na a ʋlɔ nɔɔ diere ʋ a juu, ala-ɩ̃-sɔ ʋ yel a baa ɩ cɛcɛ ba jaa wa.

¹²A mɩnɛ a Jeeju na pɛw ba a gbɛɛ baar, ʋ lɛ de na a ʋ cẽcen su jɛ nɩ a dɩb par ɩ̃ soor ba: “A ala ɩ̃ na maal nyɩ, nyɩ bɔ̃w na a par mɩɩ?

¹³Nyɩ bʋɔlɔ ma na ‘Jãjaana’ nɩ ‘Nɩ-kpɛ̃ɛ’. Yel-mɩ̃ɛ nyɩ yel, a-na-ɩ a ala ɩ̃ ɩ.

¹⁴Ɩ̃ a ala ɩ̃ ɩ a maa na ɩ a Nɩ-kpɛ̃ɛ nɩ a Jãjaana pɛw nyɩ na a gbɛɛ, a nyɩmɩ mɩ, nyɩ mɩ sɛw na na pɛwrɛ taa a gbɛɛ.

¹⁵Ɩ̃ maalʼã tʋ̃-tɔɔnaa miilʼɩ̃ nyɩ a nyɩ na mɩ maala a mɩnɛ ɩ̃ na maal a nyɩ jie.

¹⁶Yel-mɩ̃ɛ ɩ̃ yele nyɩ, a tʋ̃tʋnɔ ma ɩ kpɛ̃ɛ a ʋ nɩ-kpɛ̃ɛ jie wa, ɩ̃ a ʋlɔ ba na tʋ ma ɩ kpɛ̃ɛ a ʋlɔ na tʋ ʋ jie wa.

¹⁷A mɩnɛ nyɩ na bɔ̃w a yele ala, a na ɩ nyɩ na nʋɔ a ala ɩ̃ ɩ nyɩ maala na a lɛ.

¹⁸“Ɩ̃ aa ɩ nyɩ jaa fɛw ɩ̃ yele wa. Ɩ̃ bɔ̃w na a bala ɩ̃ na vɛl ir. Ɩ̃-cɛ a sɛw na a ala na sɛb a Naaŋmɩn Sɛbɛ pʋɔ na maal baar a mɩnɛ a na yel: ‘A ʋlɔ na lãa dɩrɛ nɩ ma a dɩb lɛ lɩɛbʼã maal ma bier.’

¹⁹Ɩ̃ de na nĩe yele nyɩ a ƴɛ̃ƴɛrɩ̃, ɩ̃-cɛ a ana yele ma ta sɛr wa, a mɩnɛ a ala ɩ̃ wa ta, nyɩ tɩɛr bɔ̃w ka maa ɩ̃ ɩ a ʋlɔ ɩ̃ na ɩ.

²⁰Yel-mɩ̃ɛ ɩ̃ yele nyɩ, a ʋlɔ na sɔw de a ʋlɔ ɩ̃ na tʋ, ʋ mɩ sɔw na de ma. Ɩ̃ a ʋlɔ na sɔw de a maa, ʋ mɩ sɔw na de a ʋlɔ na tʋ ma.”

²¹A mɩnɛ a *Jeeju na ƴɛr a lɛ baar, a suur nyɩrɩ̃ na sãw ʋ ʋ yel: “Yel-mɩ̃ɛ ɩ̃ yele nyɩ, bõ-ƴen a nyɩ sɔ̃w nɔɔ de ma na a juu.”

²²A ʋ *par-tuurbe ꞌwuoro taa ma bɔ̃w a buor ʋ na yele wa.

²³A *par-tuure ʋlɔ a Jeeju na nʋnɔ jɛ na a ʋ lõboorɩ̃,

²⁴a Sɩmɔ̃ Pɩɛr kab ʋ a ʋ soor a Jeeju bɔ̃w a sʋbɔ ʋlɔ ʋ na yele.

²⁵A par-tuure ʋlɔ gã dɩɛl a Jeeju ɩ̃ soor ʋ: “Nɩ-kpɛ̃ɛ, ala fʋ yele?”

²⁶A Jeeju yel: “A ʋlɔ ɩ̃ na ŋmaara a buru bɛrɛ nɩ a jɩɛr kʋrɔ, ʋlɔ ʋ,” ɩ̃ ɓɛ nɩ a buru ŋmãa a jɩɛr kʋ a Judasɩ na ɩ a Sɩmɔ̃ Isikaryɔtɩ bie.

²⁷A lɛ a Judasɩ na tɔ̃ɔ ꞌwɔb a buru baar, a Satã kpɛ ʋ na, a Jeeju yel ʋ: “A ala fʋ na maala, pɔw fɔfɔw maal!”

²⁸A bala na dãa jɛ a be a dɩb par, bõ-ƴen kãw ma dãa bɔ̃w a bom na ɩnɛ ʋ na yel ʋ a ala wa.

²⁹Ɩ̃-cɛ a-na-ɩ a Judasɩ ɩ̃ tɛrɛ a ba libie wʋɔ, a nɩŋmɛɛ tɩɛrʼã áa Jeeju yele ʋ na á ʋ cen na da a yele ala ba na maala nɩ a fɛtɩ, mɩɩ á ʋ ir bom cenʼɩ̃ kʋ a nãw deme.

³⁰A lɛ, a mɩnɛ a Judasɩ na ꞌwɔb a buru baar, ʋ yi na a jie naan. A ɩ na tɩsɔw.

³¹A lɛ a Judasɩ na yi baar, a *Jeeju yelʼã: “A ƴɛ̃ƴɛrɩ̃ na, a *Nɩbɛ Bie yuor yi na, ɩ̃ a Naaŋmɩn yo-yifʋ mɩ nyɩrʼã a ʋ jie.

³²A ala ɩ̃ ɩ a Naaŋmɩn yo-yifʋ nyɩrʼã a Nɩbɛ Bie jie, a Naaŋmɩn na mɩ maalʼã a Nɩbɛ Bie yo-yifʋ ʋ nyɩr a ʋlɔ Naaŋmɩn jie, ɩ̃ ʋ na maalʼã a lɛ a jie naan.

³³Ɩ̃ bibiir, fɩ̃ɩ tɛw ɩ̃ na lɛ cãa be nɩ nyɩ. Nyɩ nɔɔ bʋɔrɔ ma na ɩ̃-cɛ a mɩnɛ ɩ̃ na dãa yel a Jufisɩ, ɩ̃ mɩ yele nyɩ na a ƴɛ̃ƴɛrɩ̃ na, á nyaa tʋɔrɔ wɩɛrɛ a jie ʋlɔ ɩ̃ na cere wa.

³⁴Yɛr-paalaa ɩ̃ kʋrɔ nyɩ: nyɩ́ nʋnɔ taa. A mɩnɛ ɩ̃ na nʋ nyɩ, a sɛw na a nyɩ na mɩ nʋnɔ taa a lɛ.

³⁵A ala ɩ̃ ɩ nyɩ nʋnɔ na taa, a nɩbɛ ba jaa na sɩrɩ̃ na bɔ̃w ka nyɩ ɩ na a ɩ̃ *par-tuurbe.”

³⁶A Sɩmɔ̃ Pɩɛr soor ʋ na: “Nɩ-kpɛ̃ɛ, nyɩnɛ fʋ cere?” A *Jeeju yel ʋ: “A jie ʋlɔ ɩ̃ na cere, faa tʋɔrɔ tuure ma cere a ƴɛ̃ƴɛrɩ̃ na wa, ɩ̃-cɛ a daar kãw fʋ nɔɔ tu ma na wɩ.”

³⁷A Pɩɛr lɛ soor ʋ: “Nɩ-kpɛ̃ɛ, bõ ɩ̃ ɩ a maa tʋɔrɔ tuure fʋ a ƴɛ̃ƴɛrɩ̃ wa? Ɩ̃ sɔw na na kpi a fʋ ɩnɛ.”

³⁸A Jeeju yel ʋ: “Fʋ na sɩrɩ̃ na kpi a ɩ̃ ɩnɛ? Yel-mɩ̃ɛ ɩ̃ yele fʋ, a nɔraa kɔ̃ kõ sɛr wa, ɩ̃ fʋ na cɩɩrɩ̃ na gbɛɛ ata a faa bɔ̃w ma wa.”