Read Birifor, Malba Jã Sɛbɛ 14 Bible Online

Jã Sɛbɛ 14 - Birifor, Malba bible

Jã Sɛbɛ 14

¹A *Jeeju yel ba na: “Nyɩ taa ɩ a tɩɛrɩ̃sɩ dama nyɩ wa. Nyɩ́ tɛrɛ ƴɔ̃w-nyãa a Naaŋmɩn jie ɩ̃ mɩ tɛrɛ ƴɔ̃w-nyãa a maa jie.

²Jaaji-yaw be na a ɩ̃ Sãa yir. A ala ma ɩ lɛ ʋ wa, ɩ̃ kɔ̃ɔ dãa yel nyɩ wa. Ɩ̃ cere na a be na gbɛɛrɛ a nyɩ jaajie.

³A maa wa cen na gbɛɛrɩ̃ a nyɩ jaajie baar, ɩ̃ na lɛ lɩɛbʼã wa na de nyɩ, a mɩnɛ a jie ʋlɔ ɩ̃ na be, a nyɩ na mɩ be a be.

⁴Ɩ̃ a jie ʋlɔ ɩ̃ na cere, nyɩ bɔ̃w na a sɔr.”

⁵A Tomasi yel ʋ: “Nɩ-kpɛ̃ɛ, saa bɔ̃w a jie fʋ na cere wa. Mɩnɛ sɩ na ɩ ɩ̃ bɔ̃w a sɔr?”

⁶A Jeeju yel ʋ: “Maa ɩ̃ ɩ a sɔr, maa ɩ̃ ɩ a yel-mɩ̃ɛ, maa ɩ̃ ɩ a baafʋ. Nɩrɛ ma tʋɔrɔ wɩɛrɛ a ɩ̃ Sãa jie ɩ̃ a ala ma ɩ a maa jie ʋ tɔlʼɩ̃ wa.

⁷A ala ɩ̃ ɩ nyɩ dãa na bɔ̃w ma, nyɩ naa mɩ bɔ̃w na a ɩ̃ Sãa. Ɩ̃ wa nyɔw nɩ a ƴɛ̃ƴɛrɩ̃ na, nyɩ bɔ̃w ʋ na ɩ̃ nyɩ mɩ nyɛ ʋ na.”

⁸A Fɩlɩpɩ yel ʋ: “Nɩ-kpɛ̃ɛ, miil sɩ a Sãa ɩ̃ a na sɛw sɩ na.”

⁹A Jeeju yel ʋ: “Ɩ̃ kamʼã a nyɩ jie ɩ̃ a faa bɔ̃w ma sɛr wa Fɩlɩpɩ? A ʋlɔ na nyɛ ma, ʋ mɩ nyɛ na a Sãa. Mɩnɛ a ɩ a fʋ yel a ɩ̃ miil nyɩ a Sãa?

¹⁰Faa sɔw ka ɩ̃ be na a ɩ̃ Sãa pʋɔ ɩ̃ a ɩ̃ Sãa mɩ be a ɩ̃ pʋ̃ɔ wa mɩɩ? A ala ɩ̃ na ƴɛrɛ nyɩ, aa ɩ a ɩ̃ mɩ̃ɛ ƴɛrɩ̃sɩ ʋ wa, ɩ̃ a ɩ̃ Sãa na be a ɩ̃ pʋɔ, ʋlɔ ɩ̃ tʋnɔ a ʋ tʋmɔ.

¹¹Nyɩ́ sɔw a mɩnɛ ɩ̃ na yel nyɩ á ɩ̃ be na a ɩ̃ Sãa pʋɔ, a ɩ̃ Sãa mɩ be a ɩ̃ pʋɔ. A ala ma ɩ lɛ ʋ wa, nyɩ́ sɔw a tʋmɔ ala ɩ̃ na maala ɩnɛ.

¹²Yel-mɩ̃ɛ ɩ̃ yele nyɩ, a ʋlɔ na sɔw de ma, ʋ na tʋnɔ na a tʋmɔ ala ɩ̃ na tʋnɔ, ɩ̃ ʋ na tʋ̃ na a gãw a lɛ, a-na-ɩ ɩ̃ cere na a ɩ̃ Sãa sɛ.

¹³A bom jaa lɛ nyɩ na de a ɩ̃ yuor sʋɔrɔ nɩ, ɩ̃ na maalʼã kʋ nyɩ, a mɩnɛ a Sãa yo-yifʋ na nyɩr a Bie jie.

¹⁴A nyɩmɩ de a ɩ̃ yuor sʋɔrʼɩ̃ ma bom lɛ, ɩ̃ na maalʼã kʋ nyɩ.

¹⁵“A nyɩmɩ nʋnɔ ma, nyɩ na jɔrɔ na a ɩ̃ ƴɛrɩ̃sɩ,

¹⁶ɩ̃ a maa, ɩ̃ na sʋɔrʼã a Sãa ʋ kʋ nyɩ a Sõsũono ƴen sʋbɔ, a ʋlɔ na ɩ a yel-mɩ̃ɛ Sɩɛ, ʋ na be nɩ nyɩ daadaa kpoolaa.

¹⁷A tẽw pʋɔ nɩbɛ ma tʋɔrɔ pɔwrɔ a Sɩɛ ʋlɔ wa a-na-ɩ baa tʋɔrɔ nyɛrɛ ʋ wa, baa mɩ tʋɔrɔ bɔ̃wnɔ ʋ wa. Ɩ̃-cɛ a nyɩmɩ, nyɩ bɔ̃w ʋ na, a-na-ɩ ʋ be na a nyɩ sɔ̃w ɩ̃ mɩ be a nyɩ pʋ̃ɔ.

¹⁸“Ɩ̃ kɔ̃ bar nyɩ a nyɩ wɔ̃ taa nɩ kpiibsɩ wa; ɩ̃ na lɛ lɩɛbʼã wa a nyɩ jie.

¹⁹A ka nɩ a fɩ̃ɩ, a tẽw pʋɔ nɩbɛ ma lɛ nyɛrɛ ma wa; ɩ̃ a mɩnɛ ɩ̃ na tɛrɛ a baafʋ nyɩ na mɩ tɛrɛ na a baafʋ.

²⁰Ɩ̃ a ʋna bibir[5] ɩ̃ wa ta, nyɩ na bɔ̃w na bɔ̃w ka ɩ̃ be na a ɩ̃ Sãa pʋɔ, ɩ̃ a nyɩ be a ɩ̃ pʋɔ ɩ̃ mɩ be a nyɩ pʋɔ.

²¹“A ʋlɔ na sɔw a ɩ̃ ƴɛrɩ̃sɩ ɩ̃ maala, ʋlɔ ɩ̃ nʋ ma. Ɩ̃ a ʋlɔ na nʋ ma, a ɩ̃ Sãa na mɩ nʋ ʋ na, ɩ̃ a maa mɩ, ɩ̃ na mɩ nʋ ʋ na ɩ̃ miilʼɩ̃ ʋ a ɩ̃ mɩ̃ɛ.”

²²A Judasɩ soor ʋ (ɩ̃ aa ɩ a Judasɩ Isikaryɔtɩ ʋ wa): “Nɩ-kpɛ̃ɛ, mɩnɛ a ɩ a fʋ na miilʼɩ̃ a fʋ mɩ̃ɛ a sɩmɩ tɛw ɩ̃ ma miile nɩ a tẽw pʋɔ nɩbɛ wa?”

²³A *Jeeju yel ʋ: “A nɩrɛ ɩ̃ nʋ ma, ʋ na jɔrɔ na a ɩ̃ ƴɛrɩ̃; a ɩ̃ Sãa na nʋnɔ ʋ na ɩ̃ sɩ na wɩ na de ʋ ʋ ɩ a sɩ jaajie.

²⁴A nɩrɛ ʋlɔ na ma nʋ ma wa, ꞌwaa jɔrɔ a ɩ̃ ƴɛrɩ̃sɩ wa. A ƴɛrɩ̃ ʋlɔ nyɩ na wõ, aa ɩ a maa mɩ̃ɛ ƴɛrɩ̃ ʋ wa, ɩ̃-cɛ a yi na a ɩ̃ Sãa na tʋ̃ ma jie.

²⁵“Ɩ̃ man nyɩ na a yele ala a lɛ a mɩnɛ ɩ̃ na cãa be nɩ nyɩ.

²⁶Ɩ̃-cɛ a Sõsũono ʋlɔ na ɩ a Naaŋmɩn Sɩɛ a Sãa nɔɔ tʋnɔ nɩ a ɩ̃ yuor, ʋlɔ ɩ̃ na jaana nyɩ a yele a jaa ɩ̃ mɩ jawra nyɩ a ala a jaa ɩ̃ na dãa yel nyɩ.

²⁷“Su-ɓaar pʋɔ ɩ̃ bar nyɩ, a maa mɩ̃ɛ su-ɓaar ɩ̃ bar kʋ nyɩ. A su-ɓaar ʋlɔ ɩ̃ na kʋ nyɩ ma wɔ̃ taa nɩ a tẽw na ben wa. Nyɩ taa ɩ a tɩɛrɩ̃sɩ dama nyɩ wa. Nyɩ taa mɩ ɩ a dãbɩ̃ɛ nyɔw nyɩ wa.

²⁸Nyɩ wõ na a mɩnɛ ɩ̃ na dãa yel nyɩ a ɩ̃ cere na, ɩ̃-cɛ ɩ̃ lɛ lɩɛbɛ na waara a nyɩ sɛ̃. A ala ɩ̃ ɩ nyɩ dãa na nʋ ma, a naa mɩ nʋmɔ nyɩ na ɩ̃ na cere a ɩ̃ Sãa sɛ̃, a-na-ɩ a ɩ̃ Sãa bɛrmɛ na gãw ma.

²⁹Ɩ̃ de na nĩe man nyɩ a yele ala a ƴɛ̃ƴɛrɩ̃ ɩ̃-cɛ a aa ta sɛr wa, a mɩnɛ a ala ɩ̃ wa ta, nyɩ na ƴɔ̃w ma na nyãa.

³⁰Maa lɛ ƴɛrɛ nyɩ ƴɛr-yaw go wa, a-na-ɩ a tẽw na jamana waara na. ꞌWaa tɛrɛ bom a ɩ̃ pʋɔ na kʋrɔ ʋ sɔr a ɩ̃ jie wa,

³¹ɩ̃-cɛ a sɛw na a tẽw na nɩbɛ na bɔ̃w ka ɩ̃ nʋ na a ɩ̃ Sãa ɩ̃ maala a ala a jaa ʋ na ƴɔ̃w ma. Nyɩ́ ir a sɩ cen.