Read Birifor, Malba Jã Sɛbɛ 17 Bible Online

Jã Sɛbɛ 17 - Birifor, Malba bible

Jã Sɛbɛ 17

¹A mɩnɛ a *Jeeju na ƴɛr a lɛ baar, ʋ ꞌwuorʼã a saꞌlon ɩ yel: “Sãa, a daar ta na. Maal a fʋ Bie yuor ʋ yi, a Bie na mɩ maal a fʋ yuor ʋ yi,

²a mɩnɛ fʋ na kʋ ʋ a tʋɔfʋ a nɩbɛ ba jaa jie, ʋ na kʋ a bala fʋ na kʋ ʋ a baa-kɔ̃-tɛw.

³A baa-kɔ̃-tɛw ɩ na a ba na bɔ̃w a fʋ̃ʋ fʋ yẽ na ɩ a Naaŋmɩn tɔr, ɩ̃ mɩ bɔ̃w a *Jeeju-Kirisi ʋlɔ fʋ na tʋ̃.

⁴Ɩ̃ maalʼã a fʋ yuor ʋ yi ka a tẽw pʋɔ, ɩ̃ mɩ maal a tʋmɔ ala fʋ na kʋ ma baar.

⁵A ƴɛ̃ƴɛrɩ̃ na, Sãa, maal a ɩ̃ yuor ʋ yi a fʋ nii-sɔw nɩ a ʋna yo-yifʋ ɩ̃ na dãa tɛrɛ a fʋ sɛ̃, ɩ̃ a tẽw na ma dãa be be sɛr wa.

⁶“A nɩbɛ bala fʋ na ir ka a tẽw pʋɔ kʋ ma, ɩ̃ maal ba na a ba bɔ̃w fʋ. Fʋ̃ʋ ɩ̃ dãa sɔ ba ɩ̃ de kʋ ma, ɩ̃ ba jɔ na a fʋ ƴɛrɩ̃.

⁷A ƴɛ̃ƴɛrɩ̃ na, ba bɔ̃w ka a bom jaa lɛ fʋ na kʋ ma sɩrɩ̃ na yi a fʋ sɛ̃,

⁸a-na-ɩ ɩ̃ man ba na a ƴɛrɩ̃sɩ ala fʋ na kʋ ma, a ba sɔw de. Ba sɩrɩ̃ na bɔ̃w ka fʋ sɛ̃ ɩ̃ yi, ɩ̃ ba sɔw na a fʋ̃ʋ ɩ̃ tʋ̃ ma.

⁹“A bala ɩnɛ ɩ̃ sʋɔrɔ fʋ. Aa ɩ a tẽw pʋɔ nɩbɛ ɩnɛ ɩ̃ sʋɔrɔ fʋ wa, ɩ̃ a bala fʋ na de kʋ ma, bala ɩ̃ sʋɔrɔ ƴɔnɔ, a-na-ɩ fʋ̃ʋ sɔ ba.

¹⁰A bom jaa lɛ ɩ̃ na tɛrɛ ɩ na a fʋ bom, ɩ̃ a bom jaa lɛ fʋ na tɛrɛ mɩ ɩ na a ɩ̃ bom, ɩ̃ a ɩ̃ yuor yi na a ba jie.

¹¹Maa cãa be ka a tẽw pʋɔ wa, ɩ̃-cɛ a bala, ba cãa na be ka, ɩ̃ a maa, ɩ̃ wɩɛrɛ na a fʋ sɛ̃. Sãa son, ꞌwuoro ba nɩ a fʋ fãw na ɩ a fãw ʋlɔ fʋ na kʋ ma, a mɩnɛ a ba na tʋɔ ɩ bõ-ƴen a sɩ kaarɩ̃.

¹²A lɛ ɩ̃ na dãa cãa be nɩ ba, ɩ̃ ꞌwuoro ba na, bɔ̃w tɛrɛ nɩ ba a fʋ fãw ʋlɔ fʋ na kʋ ma. Bõ-ƴen ma bɔr wa ɩ̃ a ala ma ɩ a ʋlɔ tɛw na sɛw ʋ bɔr wa, a mɩnɛ a Naaŋmɩn Sɛbɛ ƴɛrɩ̃ na tʋɔ maal baar.

¹³A ƴɛ̃ƴɛrɩ̃ na, ɩ̃ wɩɛrɛ na a fʋ sɛ̃, ɩ̃ ƴɛrɛ a lɛ a mɩnɛ ɩ̃ na cãa be ka a tẽw pʋɔ, a ba na tʋɔ tɛrɛ a ɩ̃ nʋ̃ɔ, ʋ na nyɩrɩ̃ ƴala ba.

¹⁴Ɩ̃ de na a fʋ ƴɛrɩ̃ man ba, a tẽw na nɩbɛ ꞌlaar ba, a-na-ɩ baa ɩ a tẽw na ben wa, a mɩnɛ a maa mɩ̃ɛ na ma mɩ ɩ a tẽw na ben wa.

¹⁵Maa sʋɔrɔ fʋ a fʋ ir ba ka a tẽw pʋɔ wa, ɩ̃-cɛ a fʋ na ꞌwuoro ba a Fãa Sʋbɔ ɩnɛ.

¹⁶A mɩnɛ ɩ̃ na ma ɩ a tẽw na ben wa, a lɛ baa mɩ ɩ a tẽw na ben wa.

¹⁷Ow ba kpee nɩ a fʋ yel-mɩ̃ɛ a ba ɩ a fʋ ben; a fʋ ƴɛrɩ̃ ɩ̃ ɩ a yel-mɩ̃ɛ.

¹⁸A mɩnɛ fʋ na tʋ̃ ma a ka a tẽw pʋɔ, a lɛ ɩ̃ mɩ tʋ̃ ba a tẽw pʋɔ.

¹⁹A bala ɩnɛ ɩ̃ ow a ɩ̃ mɩ̃ɛ kpee kʋ fʋ, a mɩnɛ a ba na mɩ tʋɔ sɩrɩ̃ ow kpee ɩ a fʋ ben.

²⁰“Aa ɩ bala tɛw ɩnɛ ɩ̃ sʋɔrɔ fʋ wa, ɩ̃-cɛ ɩ̃ mɩ sʋɔrɔ na ƴɔnɔ a bala nɔɔ sɔwrɔ diere ma a ba ƴɛrɩ̃ ɩnɛ.

²¹Ɩ̃ sʋɔrɔ na a fʋ maal a ba jaa a ba ɩ bõ-ƴen, a mɩnɛ a fʋ̃ʋ Sãa na be a ɩ̃ pʋ̃ɔ, ɩ̃ mɩ be a fʋ pʋ̃ɔ. Maal ba a ba na mɩ be a sɩ pʋ̃ɔ, a mɩnɛ a tẽw na nɩbɛ na sɔw bɔ̃w ka fʋ̃ʋ ɩ̃ tʋ̃ ma.

²²Ɩ̃ kʋ ba na a yo-yifʋ ʋlɔ fʋ na kʋ ma, a ba na ɩ bõ-ƴen a mɩnɛ a maa nɩ a fʋ̃ʋ na ɩ a bõ-ƴen,

²³a maa be a ba pʋ̃ɔ, a fʋ mɩ be a ɩ̃ pʋ̃ɔ, a mɩnɛ a ba na bɔ̃w sɩrɩ̃ nyɔw taa ɩ bõ-ƴen. A nɔhɔ̃ a tẽw na nɩbɛ na bɔ̃w ka fʋ̃ʋ ɩ̃ tʋ̃ ma, ɩ̃ fʋ mɩ nʋ ba na a mɩnɛ fʋ na mɩ nʋ ma.

²⁴“Sãa, ɩ̃ bʋɔrɔ na a bala fʋ na kʋ ma, ba be nɩ ma a jie ʋlɔ ɩ na be, a mɩnɛ a ba na tʋɔ nyɛ a ɩ̃ yo-yifʋ ʋlɔ fʋ na kʋ ma, a-na-ɩ fʋ de na nĩe nʋ ma ɩ̃ a tẽw na ma dãa be be sɛr wa.

²⁵Sãa toraa, a tẽw na nɩbɛ ma bɔ̃w fʋ wa, ɩ̃-cɛ a maa, ɩ̃ bɔ̃w fʋ na ɩ̃ a bala fʋ na kʋ ma mɩ bɔ̃w ka fʋ̃ʋ ɩ̃ tʋ̃ ma.

²⁶Ɩ̃ maal ba na a ba bɔ̃w fʋ, ɩ̃ ɩ̃ na cãa na maala ba a ba bɔ̃wnɔ fʋ, a mɩnɛ a nʋfʋ ʋlɔ fʋ na nʋ ma na mɩ be a ba pʋ̃ɔ, ɩ̃ a maa mɩ̃ɛ mɩ be a ba pʋ̃ɔ.”