Read Birifor, Malba Jã Sɛbɛ 18 Bible Online

Jã Sɛbɛ 18 - Birifor, Malba bible

Jã Sɛbɛ 18

¹A mɩnɛ a *Jeeju na ƴɛr a lɛ baar, ʋ yi nɩ na a ʋ *par-tuurbe cen na gãw a Sɛdʋrɔ̃ kʋlaa gaan. Nakʋɔ be na a jie ʋlɔ, a Jeeju lãa kpɛ nɩ a ʋ par-tuurbe a be.

²A Judasɩ ʋlɔ na diere ʋ a juu mɩ bɔ̃w na a ʋna jie, a-na-ɩ a Jeeju nɩ a ʋ par-tuurbe ma dãa na cere a be.

³A lɛ, a Judasɩ taw na a Orom sɔdaalsɩ nɩ a parsãdiele bala a *baar-lo-nɩ-bɛrɛ nɩ a *Farɩsɩ nɩbɛ na tʋ̃, a ba tɛrɛ a vũusɩ nɩ a lãpar nɩ a jɛb yele cenʼɩ̃ a be.

⁴A Jeeju bɔ̃w na a ala a jaa nɔɔ tara ʋ ɩ̃ tuor soor ba: “Ala nyɩ bʋɔrɔ?”

⁵A ba yel ʋ: “A Najarɛtɩ Jeeju sɩ bʋɔrɔ.” A Jeeju yel ba: “A maa ʋ.” Ɩ̃ a Judasɩ ʋlɔ na diere ʋ a juu lãa na ɩraa nɩ ba a be.

⁶A mɩnɛ a Jeeju na yel ba: “A maa ʋ,” ba tɛwtɛw na lo a tene.

⁷A Jeeju lɛ soor ba: “Ala nyɩ bʋɔrɔ?” A ba yel ʋ: “A Najarɛtɩ Jeeju sɩ bʋɔrɔ.”

⁸A Jeeju yel ba: “Ɩ̃ yel nyɩ na a maa ʋ. A ala ɩ̃ ɩ a maa nyɩ bʋɔrɔ, nyɩ́ bar a nɩbɛ na a ba cen.”

⁹Ʋ yelʼã a lɛ a mɩnɛ a ʋna ƴɛrɩ̃ ʋ na dãa ƴɛr na tʋɔ maal baar. Ʋ dãa na yel: “A bala fʋ na kʋ ma, bõ-ƴen ma bɔr wa.”

¹⁰A be jie, a Sɩmɔ̃ Pɩɛr vʋ̃ɔ na a bãjɩnɛ ʋ na dãa tɛrɛ cɛ nɩ a *baar-lo-nɩ-kpɛ̃ɛ tʋ̃tʋnɔ dʋrɩ̃ toor ŋmaa. A tʋ̃tʋnɔ ʋlɔ yuor dɩ na Malɩkɩsɩ.

¹¹Ɩ̃-cɛ a Jeeju yelʼã a Pɩɛr: “Su a fʋ bãjɩnɛ a sɔkpa pʋɔ. Mɩnɛ a ɩ ɩ̃ kɔ̃ nyu nɩ a won ŋman ʋlɔ a Sãa na kʋ ma wa?”

¹²A lɛ, a sɔdaalsɩ nɩ a ba nɩ-kpɛ̃ɛ nɩ a Jufisɩ parsãdiele nyɔw na a *Jeeju lũ.

¹³Ba de na nĩe taw ʋ cenʼɩ̃ a An sɛ̃, a-na-ɩ a An ɩ̃ ɩ a Kayifi dɩ̃ɛmɛ ɩ̃ a Kayifi ɩ̃ dãa ɩ a *baar-lo-nɩ-kpɛ̃ɛ a ʋna yuon naa pʋɔ.

¹⁴A ʋna Kayifi ɩ̃ dãa yel a Jufisɩ áa na ɩ na son a nɩ-bõ-ƴen na kpi a nɩbɛ ba jaa ɩnɛ.

¹⁵A Sɩmɔ̃ Pɩɛr nɩ a *par-tuure ƴen sʋbɔ tuure na a *Jeeju. A *baar-lo-nɩ-kpɛ̃ɛ dãa na bɔ̃w a ʋna par-tuure naa, ala-ɩ̃-sɔ ʋ nyɛ sɔr lãa kpɛ nɩ a Jeeju a baar-lo-nɩ-kpɛ̃ɛ yir a gbalɩ̃ pʋɔ,

¹⁶ɩ̃-cɛ a Pɩɛr cãa ɩraa a yẽw a dɔ̃dɔr nʋɔr. A ʋna par-tuure a baar-lo-nɩ-kpɛ̃ɛ na bɔ̃w yi na ƴɛrʼɩ̃ a tʋtʋ̃-poole ʋlɔ na gure a dɔ̃dɔr, ɩ̃ taw a Pɩɛr kpɛ nɩ.

¹⁷A tʋ̃tʋ̃-poole ʋlɔ na gure a dɔ̃dɔr soorʼã a Pɩɛr: “A fʋ̃ʋ mɩ, faa ɩ a daba na par-tuure ƴen sʋbɔ wa mɩɩ?” Ʋ yel ʋ: “Maa ɩ a ʋ par-tuure wa.”

¹⁸A mɩnɛ a aar na ɩrɛ, a tʋ̃tʋnbɔ nɩ a parsãdiele gbɔw na a vũu ꞌwuoro, a Pɩɛr mɩ lãa ɩraa nɩ ba ꞌwuoro.

¹⁹A *baar-lo-nɩ-kpɛ̃ɛ soorʼã a *Jeeju a ʋ *par-tuurbe ɩnɛ nɩ a ʋ jaanfʋ ɩnɛ ʋ na jaana a nɩbɛ.

²⁰A Jeeju yel ʋ: “Cãa pʋɔ ɩ̃ ma dãa ƴɛrɛ a ƴɛrɩ̃ kʋrɔ a nɩbɛ, jaana nɩ ba a daar a jaa a *puorfʋ yie pʋɔ nɩ a Naaŋmɩn puor-yir kpɛ̃ɛ pʋɔ, na ɩ a jiir ala a Jufisɩ ba jaa na ma duoro taa. Maa sɔɔlɩ̃ yel bom kãw wa.

²¹Bõ ɩnɛ fʋ sooro a maa? Soor a bala na wõ a ɩ̃ ƴɛrɩ̃; ba bɔ̃w na a ala ɩ̃ na man ba.”

²²A mɩnɛ a Jeeju na yel a lɛ, a parsãde ƴen sʋbɔ na ɩraa a ʋ lõboorɩ̃ ɓa ʋ na ɩ̃ yel: “Lɛ ɩ̃ sɛw a fʋ na ƴɛrʼɩ̃ a baar-lo-nɩ-kpɛ̃ɛ mɩɩ?”

²³A Jeeju yel ʋ: “A ala ɩ̃ ɩ ƴɛr-fãa ɩ̃ ƴɛr, miil a fãa jie, ɩ̃-cɛ a ala ɩ̃ ɩ ƴɛr-son ɩ̃ ƴɛr, bõ ɩnɛ fʋ ɓa ma?”

²⁴A lɛ, a An ɩ na a ba lũ ʋ cenʼɩ̃ a baar-lo-nɩ-kpɛ̃ɛ Kayifi sɛ̃.

²⁵A mɩnɛ a Sɩmɔ̃ Pɩɛr na cãa ɩraa a be ꞌwuoro a vũu, ba soor ʋ na: “A fʋ̃ʋ mɩ, faa ɩ a ʋ *par-tuure ƴen sʋbɔ wa mɩɩ?” A Pɩɛr cɩɩrɩ̃ ɩ̃ yel: “Maa ɩ a ʋ par-tuure wa.”

²⁶A *baar-lo-nɩ-kpɛ̃ɛ tʋ̃tʋnɔ ƴen sʋbɔ na ɩ bal bõ-ƴen nɩ a ʋlɔ a Pɩɛr na dãa cɛ a toor ŋmaa, yelʼã a Pɩɛr: “Maa dãa nyɛ fʋ a fʋ lãa be nɩ ʋ be a nakʋɔ pʋɔ wa?”

²⁷Ɩ̃-cɛ a Pɩɛr lɛ cɩɩrɩ̃ na á aa ɩ yel-mɩ̃ɛ ʋ wa, ɩ̃ a ɩ a nɔraa kõ na a jie naan.

²⁸A ala na yi tɔ, ba yi nɩ na a *Jeeju a Kayifi yir ɩ̃ cenʼɩ̃ a jamana *Pɩlatɩ yir. A ɩ na a dʋ̃ꞌwʋlɩ̃ ɓaaraa. Ɩ̃-cɛ a Jufisɩ mɩ̃ɛ ma dãa kpɛ a jamana yir wa, a mɩnɛ ba kɔ̃ wa sãw a ba mɩ̃ɛ, kɔ̃ tʋɔ dɩ a *Pakɩ fɛtɩ wa.

²⁹Ala-ɩ̃-sɔ a Pɩlatɩ yi na be a yẽw na soor ba: “Bõ ƴɛrɩ̃ nyɩ ƴɔ̃w a daba na?”

³⁰A ba yel ʋ: “A ʋlɔ ma dãa ɩ nɩ-bier wa, sɩ kɔ̃ɔ dãa nyɔw ʋ wa nɩ a fʋ sɛ̃ wa.”

³¹A Pɩlatɩ yel ba: “A nyɩmɩ mɩ̃ɛ, nyɩ́ de ʋ guor a ʋ ƴɛrɩ̃ tu nɩ a nyɩ ƴɛr-kpɛn sɔr.” A Jufisɩ yel ʋ: “A sɩmɩ, saa tɛrɛ sɔr na kú nɩrɛ wa.”

³²A ta na a lɛ a mɩnɛ a ƴɛrɩ̃ ʋlɔ a Jeeju na dãa ƴɛr miilʼɩ̃ a kũu wɔ̃ mɩnɛ ʋ na kpiire, na maal baar.

³³A jamana Pɩlatɩ lɛ kpɛ na a diem ɩ̃ bʋɔl a Jeeju soor: “Fʋ̃ʋ ɩ̃ ɩ a Jufisɩ jamana mɩɩ?”

³⁴A Jeeju yel ʋ: “Fʋ̃ʋ tɩɛr fʋ yẽ ɩ̃ yel a lɛ, mɩɩ nɩbɛ ɩ̃ yel a ala kʋ fʋ a ɩ̃ ɩnɛ?”

³⁵A Pɩlatɩ yel ʋ: “Jufi nɩrɛ ɩ̃ ɩ mɩɩ? Má a fʋ bal nɩbɛ nɩ a *baar-lo-nɩ-bɛrɛ ɩ̃ nyɔw fʋ wa nɩ a ɩ̃ sɛ̃. Bõ ʋlɔ fʋ maal?”

³⁶A Jeeju yel ʋ: “A ɩ̃ jamana fãw ma yi ka a tẽw na pʋɔ wa. A ala ɩ̃ dãa ɩ a tẽw na pʋɔ ʋ yi, a ɩ̃ tʋ̃tʋnbɔ naa dãa na jɛbɛ a jɛb ƴɔnɔ ma, a ba kɔ̃ tʋɔ nyɔw ma kʋ a Jufisɩ wa. Ɩ̃-cɛ a ɩ̃ jamana fãw ma yi ka a tẽw na pʋɔ wa.”

³⁷A Pɩlatɩ soor ʋ: “A ala ɩ̃ ɩ a lɛ ʋ, jamana fʋ ɩ mɩɩ?” A Jeeju yel ʋ: “A lɛ fʋ na yel ʋ, jamana ɩ̃ ɩ. Ba dɔw ma na ɩ̃ wa ka a tẽw pʋɔ, na ɩ̃ mana a yel-mɩ̃ɛ kʋrɔ a nɩbɛ. A ʋlɔ na ɩ a yel-mɩ̃ɛ sʋbɔ ma cɛlɛ na a ɩ̃ ƴɛrɩ̃.”

³⁸A Pɩlatɩ soor ʋ: “A yel-mɩ̃ɛ parʼɩ̃ a bõ?” A lɛ a *Pɩlatɩ na ƴɛr a lɛ baar, ʋ lɛ yi na na yel a Jufisɩ: “Maa nyɛ a daba na sãwfʋ jie wa.

³⁹Ɩ̃-cɛ a mɩnɛ nyɩ na mɩlɩ̃ nɩ, ɩ̃ ma barʼã kasu nɩ-bõ-ƴen kʋ nyɩ a *Pakɩ fɛtɩ daar. A Jufisɩ jamana nyɩ bʋɔrɔ ɩ̃ bar kʋ nyɩ mɩɩ?”

⁴⁰A lɛ, ba wuure na yele nɩ: “Aa ɩ ʋlɔ sɩ bʋɔrɔ wa! Barabasɩ sɩ bʋɔrɔ!” Ɩ̃ a ʋna Barabasɩ naa ɩ na nɩ-bier.