Read Birifor, Malba Jã Sɛbɛ 3 Bible Online

Jã Sɛbɛ 3 - Birifor, Malba bible

Jã Sɛbɛ 3

¹Daba dãa na be be a *Farɩsɩ nɩbɛ pʋɔ ɩ̃ dɩ a Nikodɛ̃. Ʋ mɩ ɩ na a Jufisɩ ni-diere ƴen sʋbɔ.

²Ʋ cenʼã a tɩsɔw a *Jeeju sɛ̃ na yel ʋ: “Nɩ-kpɛ̃ɛ, sɩ bɔw ka fʋ ɩ na a Jãjaana na na yi a Naaŋmɩn sɛ̃ ɩ̃ wa, a-na-ɩ nɩrɛ ma tʋɔrɔ maala a nɔ-kofʋ tʋmɔ asɩmɛ fʋ na maala ɩ̃ a ala ma ɩ a Naaŋmɩn ɩ̃ be nɩ ʋ wa.”

³A Jeeju yel ʋ: “Yel-mɩ̃ɛ ɩ̃ yele fʋ, nɩrɛ ma nyɛrɛ sɔr kpɛɛrɛ a Naaŋmɩn fãw pʋɔ, ɩ̃ a ala ma ɩ a dɔw-paalaa ba dɔw ʋ wa.”

⁴A Nikodɛ̃ soor ʋ: “Mɩnɛ ba na lɛ tʋɔ dɔw a nɩrɛ a lɛ ʋ na kor baar? A nɩrɛ ʋlɔ na tʋɔ na lɛ kpɛ a ʋ mã puorɩ̃ ʋ lɛ dɔw ʋ mɩɩ?”

⁵A Jeeju yel: “Yel-mɩ̃ɛ ɩ̃ yele fʋ, nɩrɛ ma tʋɔrɔ kpɛɛrɛ a Naaŋmɩn fãw pʋɔ ɩ̃ a ala ma ɩ ba dɔw ʋ na a kʋ̃ɔ nɩ a Naaŋmɩn Sɩɛ dɔwfʋ wa.

⁶A ʋlɔ a nɩrɛ na dɔw, nɩrɛ ʋ ɩ, ɩ̃ a ʋlɔ a Naaŋmɩn Sɩɛ na dɔw, a sɩɛ ʋ ɩ.

⁷Taa ɩ a nʋɔr ko fʋ a mɩnɛ ɩ̃ na yel áa sɛw na a ba na dɔw nyɩ dɔw-paalaa wa.

⁸A sɛsɛb ma fure na cere a jie ʋ na bʋɔrɔ. Fʋ ma wõ na a ʋ damfʋ, ɩ̃-cɛ fʋ maa bɔ̃w a jie ʋ na yi, mɩɩ a jie ʋ na cere wa. A lɛ a mɩ wɔ̃ a nɩrɛ ʋlɔ jie a Naaŋmɩn Sɩɛ na dɔw.”

⁹A Nikodɛ̃ lɛ soor ʋ: “Mɩnɛ a ana yele na tʋɔ ɩ ɩ̃ maal a lɛ?”

¹⁰A Jeeju yel ʋ: “A fʋ̃ʋ na ɩ a *Ɩsɩrayɛl nɩbɛ jãjaana, faa bɔ̃w a yele ala par wa?

¹¹Yel-mɩ̃ɛ ɩ̃ yele fʋ, sɩ ƴɛrɛ na a ala sɩ na bɔ̃w ɩ̃ mɩ mana a ala sɩ na nyɛ, ɩ̃ nyaa bʋɔrɔ nyɩ sɔw a sɩ yel-mɩ̃ɛ wa.

¹²A-na-ɩ a tẽw pʋɔ ƴɛrɩ̃sɩ ɩ̃ mana nyɩ ɩ̃ a nyaa sɔw wa, ɩ̃ a maa wa mana nyɩ a saꞌlon ƴɛrɩ̃sɩ, mɩnɛ nyɩ na ɩ ɩ̃ sɔw?

¹³Nɩrɛ ma dãa do be a saꞌlon ɩ̃ a ala ma ɩ a *Nɩbɛ Bie tɛw na yi a be a saꞌlon ɩ̃ suu ʋ wa.

¹⁴A mɩnɛ a Mowisi na dãa maal a kur waab ba bar a daa juu a wɛkar pʋɔ, a lɛ ba na mɩ ba a Nɩbɛ Bie bar

¹⁵a mɩnɛ a nɩrɛ lɛ na sɔw de ʋ na kpɛ na a baa-kɔ̃-tɛw pʋɔ.

¹⁶A-na-ɩ a Naaŋmɩn nyɩrɩ̃ na nʋ a tẽw nɩbɛ ba jaa ala-ɩ̃-sɔ ʋ tɩɩr a ʋ Bi-dab-daadaa kʋ ba, a mɩnɛ a nɩrɛ lɛ na sɔw de ʋ, ʋ kɔ̃ wɛ wa, ɩ̃-cɛ ʋ na kpɛ na a baa-kɔ̃-tɛw pʋɔ.

¹⁷A-na-ɩ a Naaŋmɩn ma tʋ̃ a ʋ Bie ʋ wa a tẽw pʋɔ a nɩbɛ ƴɛrɩ̃ ƴɔ̃wfʋ jie wa, ɩ̃-cɛ ʋ wa na a mɩnɛ a nɩbɛ na tʋɔ nyɛ a faafʋ a ʋ jie.

¹⁸A ʋlɔ na sɔw de ʋ, baa ƴɔnɔ ʋ ƴɛrɩ̃ wa. Ɩ̃-cɛ a ʋlɔ na ma sɔw de ʋ wa, ba gɔrʼã ƴɔ̃w ʋ a ƴɛrɩ̃, a-na-ɩ ꞌwaa sɔw de a Naaŋmɩn Bi-dab-daadaa wa.

¹⁹A ala ɩnɛ ba na ƴɔnɔ a nɩbɛ a ƴɛrɩ̃ ɩ na, a cãa na wa a ka a tẽw pʋɔ ɩ̃-cɛ a ba jaar a cãa, ɩ̃ nʋ a libe a-na-ɩ a ba tʋmɔ ɩ na tʋ̃-faar.

²⁰A nɩrɛ lɛ na maala a burbur ma ꞌlaarʼã a cãa, ɩ̃ maa sɔwrɔ yire a cãa pʋɔ wa, a mɩnɛ a ʋ tʋ̃-bie kɔ̃ wa nyɩr wa.

²¹Ɩ̃-cɛ a nɩrɛ ʋlɔ tʋ̃-bie na tor, ʋ ma yi na a cãa pʋɔ, a mɩnɛ a ba na nyɛ bɔ̃w ka a ʋ tʋ̃-bie pʋɔ, a ʋ jɔrɔ na a Naaŋmɩn.”

²²A ala na baar, a *Jeeju nɩ a ʋ *par-tuurbe cenʼã a Jude wɩɛr na ba jɛ a be fɩ̃ɩ, ʋ mʋrɔ a nɩbɛ a kʋ̃ɔ.

²³A Jã mɩ mʋrɔ na a nɩbɛ a Ɛnɔ na pɩɛlʼɩ̃ a Salim, a-na-ɩ a kʋ̃ɔ dãa na waa a be. A nɩbɛ wɩɛrɛ na a ʋ sɛ̃ ʋ mʋrɔ ba

²⁴a-na-ɩ a daar ʋlɔ, baa dãa ƴɔ̃w a Jã a kasu pʋɔ sɛr wa.

²⁵A Jã par-tuurbe ŋmɛɛ nyɔw na ɩ̃ cɩɩrɛ taa nɩ Jufi nɩrɛ kãw a mɩnɛ a ba ɩ̃gan pɔlfʋ ƴɛrɩ̃ na wɔ̃.

²⁶Ba cenʼã a Jã sɛ̃ na yel ʋ: “Jãjaana, a daba ʋlɔ na dãa be nɩ fʋ a Jʋrdɛ̃ man gaan, a ʋlɔ ƴɛrɩ̃ fʋ na dãa ƴɛrɛ, ʋ mʋrɔ na a nɩbɛ a kʋ̃ɔ, a nɩbɛ ba jaa cere a ʋ sɛ̃.”

²⁷A Jã yel ba: “Nɩrɛ ma tʋɔrɔ pɔwrɔ bom ɩ̃ a ala ma ɩ a Naaŋmɩn ɩ̃ kʋ ʋ wa.

²⁸A nyɩmɩ mɩ̃ɛ, nyɩ na tʋɔ na man a mɩnɛ ɩ̃ na dãa yel á maa ɩ a *Kirisi wa, ɩ̃-cɛ á ba tʋ ma na ɩ̃ de ʋ nĩe.

²⁹A ʋlɔ na kule a pɔw, ʋlɔ ɩ̃ ɩ a pɔw sʋbɔ. Ɩ̃-cɛ a pɔw sʋbɔ baraa na ɩraa a be cɛlɛ ʋ, ʋ ma cɩlɛ na a mɩnɛ ʋ na wõ a pɔw sʋbɔ kɔkɩr. A lɛ a ɩ̃ nʋɔ mɩ wɔ̃; a sɛw ma na ƴala.

³⁰A sɛw na a ʋlɔ, ʋ jɛwrɛ duoro, ɩ̃ a maa, ɩ̃ wure suure.

³¹“A ʋlɔ na yi a saꞌlon ɩ̃ wa, ʋlɔ ɩ̃ ɩ a yele a jaa Nɩ-kpɛ̃ɛ. Ɩ̃ a ʋlɔ na yi a ka a tẽw pʋɔ, ʋ ɩ na a tẽw pʋɔ nɩrɛ, ɩ̃ ƴɛrɛ a tẽw pʋɔ ƴɛrɩ̃sɩ. Ɩ̃-cɛ a ʋlɔ na yi a saꞌlon ɩ̃ wa, ʋlɔ ɩ̃ ɩ a yele a jaa Nɩ-kpɛ̃ɛ.

³²Ʋ mana na a ala ʋ na nyɛ ɩ̃ mɩ wõ, ɩ̃-cɛ nɩrɛ ma sɔw a ʋ ƴɛrɩ̃ wa.

³³Ɩ̃ a ʋlɔ na sɔw a ʋ ƴɛrɩ̃ miilʼã áa Naaŋmɩn ɩ na yel-mɩ̃ɛ sʋbɔ.

³⁴A ʋlɔ a Naaŋmɩn na tʋ̃, a Naaŋmɩn ƴɛrɩ̃sɩ ʋ ma ƴɛrɛ, a-na-ɩ a Naaŋmɩn vibʼã a ʋ Sɩɛ sɛw ʋ.

³⁵A Sãa nʋ na a ʋ Bie ɩ̃ de a yele a jaa bar ƴɔ̃w a ʋ nuumɩ.

³⁶A ʋlɔ na sɔw de a Bie, ʋ kpɛ na a baa-kɔ̃-tɛw pʋɔ, ɩ̃-cɛ a ʋlɔ na jaar a Bie bar, ꞌwaa nyɛrɛ a ʋna baafʋ wa, ɩ̃-cɛ a Naaŋmɩn su-tuo dɔɔlʼã a ʋ juu.”