Read Birifor, Malba Jã Sɛbɛ 5 Bible Online

Jã Sɛbɛ 5 - Birifor, Malba bible

Jã Sɛbɛ 5

¹A lɛ a ala na tɔl baar, a Jufisɩ tɛrɛ na a puorfʋ fɛtɩ, a *Jeeju cen a Jerujalɛm.

²A be a ʋna tẽw naa, kʋ̃ɔ puulĩfʋ jie be na be jɛ̃bɛrɩ̃sɩ anuu na kolĩ. A pɩɛlʼɩ̃ na a jie ba na bʋɔlɔ a Piir Dɔ̃dɔr, ɩ̃ a ba bʋɔlɔ nɩ a Jufi ƴɛrɩ̃ a Bɛsata.

³A ana jɛ̃bɛrɩ̃sɩ naa pʋɔ, wʋlɩ̃sɩ deme yayaw dãa na gana a be. Ba ɩ na a jɔn nɩ a gbɛ-sãansɩ deme nɩ a gbɛɛ, [na ba cɛlɛ a kʋ̃ɔ damfʋ,

⁴a-na-ɩ a Naaŋmɩn sɩ-tʋnaa kãw mɔɔ suu na dama a kʋ̃ɔ. A wʋlɩ̃ sʋbɔ ʋlɔ na de nĩe kpɛ a kʋ̃ɔ pʋɔ a lɛ a na dam baar, a ʋ wʋlɩ̃ ɩ̃ saarɩ̃ wɔ̃ mɩnɛ ɩ̃-cɛ ʋ ma kpɛmɛ na.]

⁵Daba be na be a na ꞌwɔb maalʼɩ̃ yomo lɩjaayi ŋmaaʼnuu nʼata.

⁶A mɩnɛ a Jeeju na nyɛ ʋ ʋ gã, ɩ̃ mɩ bɔ̃w ka ʋ dãa na ɩ wʋlɩ̃ nyɩrɩ̃ kam, ʋ soor ʋ na: “Fʋ bʋɔrɔ na fʋ kpɛmɛ?”

⁷A wʋlɩ̃ sʋbɔ yel ʋ: “Nɩ-kpɛ̃ɛ, maa tɛrɛ nɩrɛ ʋ na ƴɔ̃w ma a kʋ̃ɔ pʋɔ a ʋ damfʋ daar wa, ɩ̃ a lɛ ɩ̃ na ma bʋɔrɔ ɩ̃ suu, nɩsaa kpee ma de ma na nĩe kpɛ.”

⁸A Jeeju yel ʋ: “Ir, ɓɔw a fʋ sɛn cere nɩ.”

⁹A jie naan, a daba kpɛmɛ na ɩ̃ ir ɓɔw a ʋ sɛn cere nɩ. Ɩ̃-cɛ a-na-ɩ a *bibi-ciiraa dayen ʋ,

¹⁰a Jufisɩ yelʼã a daba ʋlɔ a Jeeju na kpɛmɛ: “A bibi-ciiraa dayen ʋ! Faa tɛrɛ sɔr na ɓɔw a fʋ sɛn cere nɩ wa.”

¹¹Ʋ yel ba: “A ʋlɔ na kpɛmɛ ma, ʋlɔ ɩ̃ yel ma á ɩ̃ ɓɔw a ɩ̃ sɛn cere nɩ.”

¹²A ba soor ʋ: “Ala sʋbɔ ɩ̃ yel fʋ á fʋ ɓɔw a fʋ sɛn cere nɩ?”

¹³Ɩ̃ a ʋlɔ na lɛ kpɛmɛ ma dãa bɔ̃w a sʋbɔ ʋlɔ na kpɛmɛ ʋ wa, a-na-ɩ a Jeeju kpɛ na bɔr a nɩ-yaw bala pʋɔ na dãa be a ʋna jie.

¹⁴A ɩ na fɩ̃ɩ ɩ̃ a Jeeju nyɛ ʋ a Naaŋmɩn puor-yir kpɛ̃ɛ pʋɔ ɩ̃ yel ʋ: “Cɛlɛ, fʋ pãa na kpɛmɛ. Taa cãa maala fãa wa, a mɩnɛ a bom kɔ̃ɔ pɔw fʋ na bier gãw a korĩ-cɛ ben wa.”

¹⁵A daba cenʼã na yel a Jufisɩ áa Jeeju ɩ̃ ɩ a ʋlɔ na dãa kpɛmɛ ʋ.

¹⁶Ala-ɩ̃-sɔ a Jufisɩ nyɔw na ɩ̃ hʋɔlɔ a Jeeju a-na-ɩ ʋ ma maala na a yele ala a bibi-ciirsɩ dayen.

¹⁷Ɩ̃-cɛ a Jeeju yel ba na: “A daar a jaa a ɩ̃ Sãa tʋnɔ na a tʋn, ɩ̃ a maa mɩ, a lɛ ɩ̃ mɩ tʋnɔ.”

¹⁸A ʋna ƴɛrɩ̃ naa ɩnɛ a Jufisɩ pãa nyɩrɩ̃ bʋɔrɔ ba kú ʋ, a-na-ɩ aa ɩ a bibi-ciiraa tɛw ʋ sãw wa, ɩ̃-cɛ ʋ ma mɩ bʋɔlʼã a Naaŋmɩn a ʋ Sãa, de nɩ a ʋ mɩ̃ɛ ʋ ɩ bõ-ƴen nɩ a Naaŋmɩn.

¹⁹A *Jeeju yel ba na: “Yel-mɩ̃ɛ ɩ̃ yele nyɩ, a Bie ma tʋɔrɔ maala bom a ʋ mɩ̃ɛ wa, ɩ̃-cɛ a ala ʋ na nyɛ a ʋ Sãa ʋ maala, ala tɛw ʋ maala. A-na-ɩ a ala a jaa a Sãa na maala, ala a Bie mɩ maala.

²⁰A-na-ɩ a Sãa nʋ na a ʋ Bie ɩ̃ miil ʋ a yele a jaa ʋ na maala, ɩ̃ ʋ na lɛ miil ʋ na a tʋmɔ ala na bɛrmɛ gãw a asɩmɛ, a nɔɛ na ko nyɩ.

²¹A-na-ɩ a mɩnɛ a Sãa na ma maal a kũusɩ a ba ir, ʋ kʋ ba a baafʋ, a lɛ a ʋ Bie ma mɩ kʋ a bala ʋ na bʋɔrɔ a baafʋ.

²²A Sãa maa guor nɩrɛ ƴɛrɩ̃ wa, ɩ̃-cɛ a ʋ Bie ʋ ƴɔ̃w ʋ guoro a ƴɛrɩ̃sɩ a jaa,

²³a mɩnɛ a nɩbɛ ba jaa na mɩ ƴɔnɔ a Bie a mɩnɛ ba na ƴɔnɔ a Sãa. A ʋlɔ na ma ƴɔnɔ a Bie wa, ꞌwaa mɩ ƴɔnɔ a Sãa na tʋ ʋ wa.

²⁴“Yel-mɩ̃ɛ ɩ̃ yele nyɩ, a ʋlɔ na wõ a ɩ̃ ƴɛrɩ̃sɩ ɩ̃ sɔw a ʋlɔ na tʋ̃ ma, ʋ kpɛ na a baa-kɔ̃-tɛw pʋɔ. Ba kɔ̃ɔ ƴɔ̃w ʋ ƴɛrɩ̃ wa, ɩ̃-cɛ ʋ yi na a kũu pʋɔ kpɛ a baafʋ pʋɔ.

²⁵Yel-mɩ̃ɛ ɩ̃ yele nyɩ, a daar tara na ɩ̃ ʋ gɔrʼã ta baar. A ɩ na a daar ʋlɔ a kũusɩ na wono a Naaŋmɩn Bie kɔkɩr ɩ̃ a bala na wonaa, ba na irʼã lɛ baa.

²⁶A-na-ɩ a mɩnɛ a Sãa na ɩ a Baafʋ Sʋbɔ, lɛ ʋ mɩ ƴɔ̃w a ʋ Bie ʋ mɩ ɩ a Baafʋ Sʋbɔ.

²⁷Ʋ mɩ kʋ ʋ na a sɔr ʋ ɩ a ƴɛr-guoro, a-na-ɩ ʋ ɩ na a *Nɩbɛ Bie.

²⁸Nyɩ taa ɩ a nʋɔr ko nyɩ a ala ɩnɛ wa, a-na-ɩ a daar tara na, a daar ʋlɔ a kũusɩ ba jaa nɔɔ wono a ʋ kɔkɩr

²⁹ɩ̃ yire a yar pʋɔ. A bala na maal a vɩlaa, ba na irʼã pɔw a baafʋ, ɩ̃-cɛ a bala na maal a fãa, ba na irʼã pɔw a yel.

³⁰“Maa tʋɔrɔ maala bom a ɩ̃ mɩ̃ɛ wa. Ɩ̃ guoro na a ƴɛrɩ̃sɩ tuure nɩ a mɩnɛ a Naaŋmɩn na yel ma, ɩ̃ a ɩ̃ ƴɛrɩ̃ guorfʋ torʼã, a-na-ɩ maa maala a ala a maa mɩ̃ɛ na bʋɔrɔ wa, ɩ̃-cɛ ɩ̃ maala na a ala na nʋmɔ a ʋlɔ na tʋ̃ ma.

³¹A ala ɩ̃ ɩ a maa ɩ̃ ƴɛrɛ ƴɔnɔ a ɩ̃ mɩ̃ɛ, ba kɔ̃ tʋɔ sɔw a ɩ̃ yel-mɩ̃ɛ wa,

³²ɩ̃-cɛ nɩ-kpee be na be na ƴɛrɛ ƴɔnɔ ma, ɩ̃ ɩ̃ bɔ̃w ka a ala ʋ na ƴɛrɛ a ɩ̃ ɩnɛ ɩ na yel-mɩ̃ɛ.

³³Nyɩ dãa na tʋ̃ nɩbɛ a ba soor a Jã-Batii ɩ̃ ʋ man nyɩ na a ala na ɩ a yel-mɩ̃ɛ.

³⁴Ɩ̃ a maa, aa ɩ nɩrɛ ɩ̃ bʋɔrɔ ʋ ƴɛr ƴɔ̃w ma wa, ɩ̃-cɛ ɩ̃ yelʼã a lɛ a nyɩ na tʋɔ nyɛ a cɩ̃ɛfʋ jie.

³⁵A Jã dãa na wɔ̃ taa nɩ a lãpa na ꞌle caarɩ̃ a nʋmɔ nyɩ a nyɩ ɩraa fɩ̃ɩ a ʋ cãa pʋɔ.

³⁶Ɩ̃ a maa, ɩ̃ tɛrɛ na yel-mɩ̃ɛ ƴɛrɩ̃ na na tɩmɛ gãw a ala a Jã na dãa mana a ɩ̃ ɩnɛ. A-na-ɩ a tʋmɔ ala a ɩ̃ Sãa na kʋ ma ɩ̃ maala, a ana tʋmɔ ɩ̃ sɩrɩ̃ miile á ɩ̃ Sãa tʋ̃ ma na.

³⁷Ɩ̃ a ɩ̃ Sãa na tʋ ma, ʋlɔ ɩ̃ mana a ɩ̃ yel-mɩ̃ɛ. Nyaa dãa wõ a ʋ kɔkɩr sɛr wa, nyaa mɩ dãa nyɛ a ʋ nii-sɔw wa,

³⁸ɩ̃ a ʋ ƴɛrɩ̃ ma jɛ a nyɩ suur pʋɔ wa, a-na-ɩ nyaa sɔw de a ʋlɔ ʋ na tʋ wa.

³⁹Nyɩ ma cɛ̃pɛrɛ na a Naaŋmɩn Sɛbɛ ƴɛrɩ̃sɩ a-na-ɩ nyɩ tɩɛrʼã bɔ̃w ka ala ɩ̃ kʋrɔ nyɩ a baa-kɔ̃-tɛw, ɩ̃ a ƴɛrɩ̃sɩ ala, a ɩ na a maa ɩnɛ a ƴɛrɛ,

⁴⁰ɩ̃ nyaa bʋɔrɔ nyɩ wa a ɩ̃ jie na nyɩ pɔw a baafʋ wa.

⁴¹“Maa bʋɔrɔ a nɩbɛ ba pɛwrɛ ma wa.

⁴²Ɩ̃-cɛ ɩ̃ bɔ̃w nyɩ na: nyaa nʋ a Naaŋmɩn nɩ a nyɩ pʋɔ wa.

⁴³Ɩ̃ wa nɩ na a ɩ̃ Sãa yuor a nyaa bʋɔrɔ ma wa, ɩ̃-cɛ a ala ɩ̃ ɩ a nɩrɛ wa nɩ na a ʋ mɩ̃ɛ yuor, nyɩ na bʋɔrɔ ʋ na.

⁴⁴A nyɩ jaa fɛw ma bʋɔrɔ na a nyɩ tɔ deme ba lɩɛb pɛwrɛ nyɩ, ɩ̃ nyɩ maa bʋɔrɔ a pɛwfʋ ʋlɔ na yi a Naaŋmɩn daadaa jie wa. Mɩnɛ nyɩ na tʋɔ ɩ ɩ̃ sɔw?

⁴⁵Nyɩ taa tɩɛr beeka maa ɩ̃ nɔɔ ƴɔnɔ nyɩ a ƴɛrɩ̃sɩ a ɩ̃ Sãa nii-sɔw wa. A ʋlɔ nɔɔ ƴɔnɔ nyɩ a ƴɛrɩ̃sɩ na ɩ na a Mowisi ʋlɔ juu nyɩ na de a nyɩ tɩɛrɩ̃sɩ dɔɔl.

⁴⁶A ala ɩ̃ ɩ nyɩ dãa na sɔw de a ala a Mowisi na sɛb sɩrɛ jaa, nyɩ naa mɩ sɔw na de ma, a-na-ɩ a ala na tor ma ʋ dãa sɛb.

⁴⁷Ɩ̃ a mɩnɛ nyɩ na ma sɔw de a ala ʋ na sɛb wa, mɩnɛ nyɩ na mɩ tʋɔ sɔw de a ɩ̃ ƴɛrɩ̃sɩ?”