Read Birifor, Malba Jã Sɛbɛ 8 Bible Online

Jã Sɛbɛ 8 - Birifor, Malba bible

Jã Sɛbɛ 8

¹Ɩ̃-cɛ a *Jeeju cen a *Olivi-tɩɩr tãw juu.

²A lɛ a bio na vɩɛ, a Jeeju lɛ cenʼĩ a Naaŋmɩn puor-yir kpɛ̃ɛ pʋɔ a dʋ̃ꞌwʋlɩ̃ ɓaaraa, a nɩbɛ ba jaa wɩ a ʋ sɛ̃, ʋ jɛ ɩ̃ jaana ba.

³Ɩ̃ a *ƴɛr-kpɛn-bɔɔnbɔ nɩ a *Farɩsɩ nɩbɛ wɩ nɩ na pɔw ba na nyɛ ʋ gã nɩ daba a ba nyɔw. Ba ƴɔ̃w ʋ na ʋ ɩraa a nɩbɛ ba jaa nii-sɔw,

⁴ɩ̃ a ba yel a Jeeju: “Jãjaana, sɩ nyɔw na a pɔw naa a gã-ta-burbur pʋɔ.

⁵A Mowisi yel sɩ na a ʋ ƴɛr-kpɛn pʋɔ á sɩ lɔb a pɔw-lɛ nɩ kʋsɩɛ kú. Ɩ̃ a fʋ̃ʋ, bõ fʋ tɛrɛ yele?”

⁶Ba yelʼã a lɛ bʋɔrɔ ba bɩɩrʼɩ̃ a Jeeju, a mɩnɛ ba na tʋɔrɔ nyɛrɛ ƴɛr-fãa ƴɔnɔ ʋ. Ɩ̃-cɛ a Jeeju gũu na nyɩrɛ a tene nɩ a ʋ nubir.

⁷Ɩ̃ a mɩnɛ ba na cãa sooro ʋ, ʋ irʼã ɩ̃ yel ba: “A ala ɩ̃ ɩ nɩrɛ be na ka a nyɩ pʋɔ ɩ̃ ma maal fãa wa, ú de nĩe lɔbʼɩ̃ a pɔw a kʋsɩr”,

⁸ɩ̃ na ʋ lɛ gũu nyɩrɛ a tene nɩ a nubir.

⁹Ɩ̃ a lɛ ba na wõ a ʋna ƴɛr-bir, a nɩ-bɛrɛ de na nĩe yire bõ-ƴene-ƴene wa ta nɩ a nɩbɛ ba jaa, ɩ̃ cɛ a Jeeju bar ʋ yẽ, nɩ a pɔw na cãa ɩraa a be.

¹⁰A lɛ, a Jeeju irʼã soor a pɔw: “Nyɩnɛ ba be? Nɩrɛ ma ƴɔ̃w fʋ ƴɛrɩ̃ wa mɩɩ?”

¹¹A pɔw yel ʋ: “Nɩ-kpɛ̃ɛ, nɩrɛ ma ƴɔ̃w ma ƴɛrɩ̃ wa.” A Jeeju yel ʋ: “A maa mɩ, maa mɩ ƴɔnɔ fʋ ƴɛrɩ̃ wa. Fʋ na tʋɔ na cen, ɩ̃ taa lɔɔ maala fãa wa.”]

¹²A *Jeeju lɛ ƴɛrʼã a ƴɛrɩ̃ kʋ a nɩbɛ yel: “Maa ɩ̃ ɩ a tẽw pʋɔ cãa. A ʋlɔ na tuure ma kɔ̃ cere a libe pʋɔ fɩ̃ɩ wa, ɩ̃-cɛ ʋ na tɛrɛ na a baafʋ cãa.”

¹³A *Farɩsɩ nɩbɛ yel ʋ: “Fʋ mɩ̃ɛ pʋɔ fʋ ƴɛrɛ ƴɔnɔ, ala-ɩ̃-sɔ a ala fʋ na mana ma tɛrɛ par wa.”

¹⁴A Jeeju yel ba: “A ala ɩ̃ saarɩ̃ ɩ a ɩ̃ mɩ̃ɛ pʋɔ ɩ̃ ƴɛrɛ ƴɔnɔ, a ala ɩ̃ na mana tɛrɛ na par, a-na-ɩ ɩ̃ bɔ̃w na a jie ɩ̃ na yi ɩ̃ wa, nɩ a jie ɩ̃ na cere. Ɩ̃-cɛ a nyɩmɩ, nyaa bɔ̃w a jie ɩ̃ na yi ɩ̃ wa, nɩ a jie ɩ̃ na cere wa.

¹⁵A nyɩmɩ, nɩbɛ tɩɛrɩ̃sɩ nyɩ guoro nɩ a ƴɛrɩ̃sɩ, ɩ̃ a maa, maa guoro nɩrɛ ƴɛrɩ̃ wa.

¹⁶Ɩ̃-cɛ a maa wa guoro nɩrɛ ƴɛrɩ̃, a ɩ̃ guorfʋ na torʼã dẽdẽ, a-na-ɩ maa be ɩ̃ yẽ wa, ɩ̃-cɛ a ɩ̃ Sãa na tʋ̃ ma be nɩ ma na.

¹⁷A sɛbʼã a nyɩ ƴɛr-kpɛn pʋɔ áa ala ɩ̃ ɩ nɩbɛ ayi manʼã a ƴɛrɩ̃, áa tɛrɛ na par.

¹⁸A maa, ɩ̃ ƴɛrɛ na ƴɔnɔ a ɩ̃ mɩ̃ɛ, ɩ̃ a ɩ̃ Sãa na tʋ̃ ma, mɩ ƴɛrɛ na ƴɔnɔ ma.”

¹⁹A ba soor ʋ: “Nyɩnɛ a fʋ Sãa be?” Ʋ yel ba: “Nyaa bɔ̃w a maa nɩ a ɩ̃ Sãa wa. A ala ɩ̃ ɩ nyɩ dãa na bɔ̃w ma, nyɩ naa mɩ bɔ̃w na a ɩ̃ Sãa.”

²⁰A Jeeju ƴɛrʼã a ana ƴɛrɩ̃sɩ a libie ƴɔ̃wfʋ jie par, be a Naaŋmɩn puor-yir kpɛ̃ɛ pʋɔ, ɩ̃-cɛ nɩrɛ ma nyɔw ʋ wa, a-na-ɩ a ʋ daar ma ta sɛr wa.

²¹A *Jeeju lɛ yel ba na: “Ɩ̃ cere na ɩ̃ nyɩ nɔɔ bʋɔrɔ ma na, ɩ̃-cɛ nyɩ na kpi nɩ na a nyɩ maal-faar. A jie ʋlɔ ɩ̃ na cere, nyaa tʋɔrɔ wɩɛrɛ a be wa.”

²²A be jie, a Jufisɩ sooro na taa: “Ʋ na kú na a ʋ mɩ̃ɛ mɩɩ? A-na-ɩ ʋ yelʼã á saa tʋɔrɔ cere a jie ʋ na cere wa.”

²³A Jeeju yel ba: “A nyɩmɩ, ka tẽw pʋɔ nyɩ yi, ɩ̃-cɛ a maa, saꞌlon ɩ̃ yi. A nyɩmɩ, nyɩ ɩ na a tẽw naa nɩbɛ, ɩ̃-cɛ a maa, maa ɩ a tẽw naa nɩrɛ wa.

²⁴Ala-ɩ̃-sɔ ɩ̃ yel nyɩ a nyɩ na kpi nɩ na a nyɩ maal-faar, a-na-ɩ a ala ɩ̃ ɩ nyaa sɔw á maa ɩ̃ ɩ a ʋlɔ ɩ̃ na ɩ wa, nyɩ na kpi nɩ na a nyɩ maal-faar.”

²⁵A ba soor ʋ: “Ala fʋ ɩ?” A Jeeju yel ba: “Ɩ̃ ɩ na a ʋlɔ ɩ̃ na dãa yel nyɩ a korĩ-cɛ.

²⁶Ɩ̃ tɛrɛ na yele yaw na ƴɛr ɩ̃ guor a nyɩ ɩnɛ. Ɩ̃-cɛ a ʋlɔ na tʋ ma ɩ na Yel-mɩ̃ɛ Sʋbɔ, ɩ̃ a ala ɩ̃ na ƴɛrɛ kʋrɔ a nɩbɛ a ka a tẽw pʋɔ ɩ na a ala tɛw ɩ̃ na wõ a ʋ jie.”

²⁷Ɩ̃ a Jufisɩ ma dãa bɔ̃w ka a Sãa ɩnɛ a Jeeju ƴɛrɛ ba wa.

²⁸Ala-ɩ̃-sɔ a Jeeju yel ba: “A daar ʋlɔ nyɩ nɔɔ jɛwrɛ a *Nɩbɛ Bie duoro nɩ, ala nyɩ na bɔ̃w ka a maa ɩ̃ ɩ a ʋlɔ ɩ̃ na ɩ. Nyɩ na mɩ bɔ̃w na á maa maala bom ɩ̃ yẽ wa, ɩ̃-cɛ a ala a Sãa na man ma, ala tɛw ɩ̃ ƴɛrɛ.

²⁹A ʋlɔ na tʋ ma be nɩ ma na. ꞌWaa bar ma ɩ̃ yẽ wa, a-na-ɩ a daar a jaa ɩ̃ maala na a ala na nʋmɔ ʋ.”

³⁰A mɩnɛ a Jeeju na ƴɛrɛ a lɛ, yaw jie sɔw na de ʋ.

³¹A *Jeeju yelʼã a Jufisɩ bala na dãa sɔw de ʋ: “A ala ɩ̃ ɩ nyɩ sɩrɩ̃ na jɔrɔ a ɩ̃ ƴɛrɩ̃sɩ, nyɩ na sɩrɩ̃ na ɩ a ɩ̃ *par-tuurbe.

³²Nyɩ na bɔ̃w na a yel-mɩ̃ɛ ɩ̃ a ʋna yel-mɩ̃ɛ na ꞌlor nyɩ na bar a nyɩ sɔ nyɩ mɩ̃ɛ.”

³³A ba yel: “Sɩ ɩ na a Abʋraham bal par bibiir; saa dãa ɩ nɩrɛ kãw gbãgbaar wa. Ɩ̃ mɩnɛ fʋ ɩ ɩ̃ yel a sɩ na sɔ na sɩ mɩ̃ɛ?”

³⁴a Jeeju yel ba: “Yel-mɩ̃ɛ ɩ̃ yele nyɩ, a nɩrɛ lɛ na maala a fãa, ʋ ɩ na a maal-fãa gbãgbaa.

³⁵Ɩ̃ a gbãgbaa ma tɛrɛ jaajie a yir deme sɔ̃w a daar a jaa wa, ɩ̃ a yir bie, ʋlɔ tɛrɛ na a jaajie a daar a jaa.

³⁶Ala-ɩ̃-sɔ, a ala ɩ̃ ɩ a Bie ꞌlor nyɩ na bar, nyɩ na sɔ na nyɩ mɩ̃ɛ sɩrɛ jaa.

³⁷Ɩ̃ bɔ̃w na bɔ̃w ka nyɩ ɩ na a Abʋraham bal par bibiir, ɩ̃-cɛ nyɩ bʋɔrɔ na nyɩ kú ma, a-na-ɩ nyaa sɔw a ɩ̃ jaanfʋ wa.

³⁸A maa, ɩ̃ ƴɛrɛ na a ala ɩ̃ na nyɛ a ɩ̃ Sãa sɛ̃, ɩ̃-cɛ a nyɩmɩ, a ala nyɩ na wõ a nyɩ sãa jie, ala nyɩ maala.”

³⁹A ba yel a Jeeju: “Abʋraham ɩ̃ ɩ a sɩ sãa.” Ʋ yel ba: “A ala ɩ̃ ɩ a Abʋraham bibiir nyɩ dãa ɩ, nyɩ naa maala na a tʋ̃-bie ala ʋ na dãa maal.

⁴⁰Ɩ̃-cɛ nyɩ ɛ̃ɛ na bʋɔrɔ nyɩ kú ma, a maa na yel nyɩ a yel-mɩ̃ɛ ala ɩ̃ na wõ a Naaŋmɩn jie. A Abʋraham ma dãa maal a lɛ wa.

⁴¹A nyɩ sãa tʋ̃-bie nyɩ maala.” A ba yel ʋ: “Saa ɩ sɛ̃sɛ̃-biir wa; sãa bõ-ƴen tɛw sɩ tɛrɛ, a Naaŋmɩn ʋ.”

⁴²A Jeeju yel ba: “A ala ɩ̃ dãa ɩ a Naaŋmɩn ɩ̃ sɩrɩ̃ ɩ a nyɩ Sãa, nyɩ naa nʋ ma na, a-na-ɩ a Naaŋmɩn jie ɩ̃ yi ɩ̃ wa. Maa wa nɩ a ɩ̃ mɩ̃ɛ yuor wa, ʋlɔ ɩ̃ tʋ̃ ma.

⁴³Bõ ɩnɛ nyaa bɔ̃w a ɩ̃ ƴɛrɩ̃sɩ par wa? A-na-ɩ nyaa tʋɔrɔ bɔ̃wnɔ a ɩ̃ tɩɛrʋ̃ gbɛr wa.

⁴⁴A nyɩ sãa ɩ na a Satã, ɩ̃ nyɩ mɩ bʋɔrɔ na nyɩ maal a nyɩ sãa pʋ-tɩɛrʋ̃. Wa nyɔw nɩ a korĩ-cɛ jaa, nɩ-kúrɔ ʋ ɩ, ɩ̃ ꞌwaa ɩraa a yel-mɩ̃ɛ pʋɔ wa, a-na-ɩ yel-mɩ̃ɛ ma be a ʋ jie wa. A ʋlɔ ɩ̃ wa ŋmaara a jiri, a ʋ wãa ɩ̃ be a lɛ, a-na-ɩ jir-ŋmara ʋ ɩ, ɩ̃ mɩ ɩ a jiri sãa.

⁴⁵Ɩ̃-cɛ a maa, a yel-mɩ̃ɛ ɩ̃ na yele nyɩ, ala-ɩ̃-sɔ a nyaa sɔw de ma wa.

⁴⁶Ala ɩ̃ be a nyɩ pʋɔ na tʋɔ miilʼɩ̃ a ɩ yel-mɩ̃ɛ á ɩ̃ maalʼã a fãa. Ɩ̃-cɛ a ala ɩ̃ ɩ a yel-mɩ̃ɛ ɩ̃ yele, bõ ɩnɛ nyaa sɔw a ɩ̃ ƴɛrɩ̃ wa?

⁴⁷A nɩrɛ ʋlɔ na ɩ a Naaŋmɩn ben ma cɛlɛ na a Naaŋmɩn ƴɛrɩ̃. Ɩ̃-cɛ a nyɩmɩ, nyaa cɛlɛ wa, a-na-ɩ nyaa ɩ a Naaŋmɩn ben wa.”

⁴⁸A Jufisɩ yelʼã a *Jeeju: “Má yel-mɩ̃ɛ sɩ yel a Samari nɩrɛ fʋ ɩ, ɩ̃ a kɔ̃tɔn mɩ tɛrɛ fʋ na!”

⁴⁹A Jeeju yel ba: “Kɔ̃tɔn ma tɛrɛ ma wa, ɩ̃-cɛ a ɩ̃ Sãa ɩ̃ ƴɔnɔ, ɩ̃ a nyɩ kpɛrɛ ma.

⁵⁰A maa, maa bʋɔrɔ a ɩ̃ mɩ̃ɛ yuor ʋ yire wa, ɩ̃ a bõ-ƴen be na be na bʋɔrɔ a ɩ̃ yuor ʋ yire, ɩ̃ ʋlɔ mɩ ɩ a Ƴɛr-guoro.

⁵¹Yel-mɩ̃ɛ ɩ̃ yele nyɩ, a ala ɩ̃ ɩ a nɩrɛ jɔrɔ na a ɩ̃ ƴɛrɩ̃sɩ, ꞌwaa be na kpi wa.”

⁵²A Jufisɩ yel ʋ: “A ƴɛ̃ƴɛrɩ̃, sɩ pãa na bɔ̃w ka kɔ̃tɔn tɛrɛ fʋ na. A-na-ɩ a Abʋraham kpi na, a Naaŋmɩn ƴɛr-hierbe mɩ kpi, ɩ̃-cɛ a fʋ yel áa ala ɩ̃ ɩ nɩrɛ jɔrɔ na a fʋ ƴɛrɩ̃sɩ, a ꞌwaa be na kpi wa.

⁵³Fʋ̃ʋ bɛrmɛ gãw a sɩ sãa Abʋraham mɩɩ? Ʋ kpi na, a Naaŋmɩn ƴɛr-hierbe mɩ kpi, ɩ̃ a fʋ̃ʋ, ala fʋ tɩɛr a fʋ ɩ?”

⁵⁴A Jeeju yel: “A ala ɩ̃ ɩ a maa mɩ̃ɛ ɩ̃ bʋɔrɔ a yuor, a ɩ̃ yo-bɔfʋ na ɩ na pɔrɔ. Ɩ̃ a ʋlɔ na maala a ɩ̃ yuor ʋ yire ɩ na a ɩ̃ Sãa, a ʋlɔ nyɩ na yel áa nyɩ Naaŋmɩn ʋ.

⁵⁵Ɩ̃-cɛ nyaa bɔ̃w ʋ wa, ɩ̃ a maa, ɩ̃ bɔ̃w ʋ na. A maa ɩ̃ yel á maa bɔ̃w ʋ wa, ɩ̃ na mɩ ɩ na jir-ŋmara a nyɩ kaarɩ̃, ɩ̃-cɛ ɩ̃ bɔ̃w ʋ na ɩ̃ mɩ jɔrɔ a ʋ ƴɛrɩ̃sɩ.

⁵⁶A nyɩ sãa Abʋraham dãa na cɩlɛ a mɩnɛ ʋ na tɩɛrɛ a ʋ na nyɛ na a ɩ̃ bibir[2]. Ʋ nyɛ ʋ na, a nʋ̃ɔ nyɔw ʋ.”

⁵⁷A Jufisɩ yel ʋ: “Faa mɩ pɔw yomo lɩjaayi nɩ pie sɛr wa, ɩ̃ yel a fʋ nyɛ na a Abʋraham?”

⁵⁸A Jeeju yel ba: “Yel-mɩ̃ɛ ɩ̃ yele nyɩ, a lɛ ba na ma dãa dɔw a Abʋraham sɛr wa, a maa, ɩ̃ be na be.”

⁵⁹A be jie, ba woorʼã kubie bʋɔrɔ ba lɔbʼɩ̃ ʋ, ɩ̃-cɛ a Jeeju sɔɔlɩ̃ na yi a Naaŋmɩn puor-yir kpɛ̃ɛ pʋɔ cen.