Read Birifor, Malba Nɩ-tʋnɩsɩ tʋmɔ Sɛbɛ 1 Bible Online

Nɩ-tʋnɩsɩ tʋmɔ Sɛbɛ 1 - Birifor, Malba bible

Nɩ-tʋnɩsɩ tʋmɔ Sɛbɛ 1

¹Towfɩl! A ɩ̃ sɛb-dãdãw pʋɔ, ɩ̃ manʼã a ala a jaa a *Jeeju na dãa maal, nɩ a ala ʋ na mɩɩn a nɩbɛ a nyɔwfʋ jie

²wa ta nɩ a bibir ʋlɔ a Naaŋmɩn na de ʋ do nɩ a saa juu. A lɛ ʋ na ma do sɛr wa, a Naaŋmɩn Sɩɛ fãw ʋ miile nɩ a bala ʋ na vɛl ir a ba ɩ a ʋ *nɩ-tʋnɩsɩ a ala ba na sɛw ba maal.

³A lɛ ʋ na kpi ɩ̃ ir a kũu pʋɔ baar, ʋ miilʼã a ʋ yel-mɩ̃ɛ gbɛɛ yayaw a nɩ-tʋnɩsɩ jie, miile nɩ ba a ʋ lɛ tɛrɛ na a baafʋ, a mɩnɛ ʋ na nyɩr ba a bibie lɩjaayi pʋɔ ɩ̃ ƴɛrɛ ba a Naaŋmɩn fãw ƴɛrɩ̃.

⁴Bibir kãw, a mɩnɛ ʋ na lãa dɩrɛ nɩ ba a dɩb, ʋ kʋ ba na a ƴɛrɩ̃ na na yele: “Nyɩ taa wa yire a Jerujalɛm wa, ɩ̃ nyɩ́ jɛ gu a Sɩɛ ʋlɔ a Sãa na pʋlɩ̃ nɩ nyɩ, a ʋlɔ ɩ̃ na mɩ dãa yel nyɩ.

⁵A-na-ɩ a kʋ̃ɔ pʋɔ a Jã-Batii dãa mʋr a nɩbɛ ɩ̃ a ka nɩ a fɩ̃ɩ pʋɔ, Naaŋmɩn Sɩɛ pʋɔ ba na mʋr nyɩ.”

⁶A bala na duo taa a *Jeeju sɛ̃ sooro ʋ na: “Nɩ-kpɛ̃ɛ, fʋ na cɔɔrɩ̃ na a *Ɩsɩrayɛl-tẽw a ʋna daarʼãa pʋɔ ʋ lɛ pɔw a ʋ fãw mɩɩ?”

⁷Ʋ yel ba: “A bibir nɩ a daar ʋlɔ a Sãa na ƴɔ̃w nɩ a ʋ mɩ̃ɛ pʋ-tɩɛrʋ̃, aa ɩ nyɩ ƴɛrɩ̃ ʋ a nyɩ na bɔ̃w wa.

⁸Ɩ̃ a nyɩmɩ, nyɩ na pɔw na a fãw a Naaŋmɩn Sɩɛ na waara nɩ ƴɔnɔ nyɩ, a nyɩ na ɩ a ɩ̃ yel-mɩ̃ɛ ƴɛr-manba a Jerujalɛm, nɩ a Jude nɩ a Samari wɩɛr ʋ jaa, lɛɛ wa ta nɩ a tẽw bɛwfʋ jiir.”

⁹A lɛ ʋ na ƴɛr a ʋna ƴɛrɩ̃ baar, ba ꞌwuoro ʋ na ʋ duoro a saa juu, ɩ̃ a dɔ̃dɔrɩ̃ma wa piw ʋ a baa lɛ nyɛ ʋ go wa.

¹⁰Ɩ̃ a mɩnɛ ba na ꞌwuoro a saꞌlon a lɛ ʋ na duoro, nɩbɛ ayi na su cẽcẽ-pɛlɛ nyɩr ba na

¹¹ɩ̃ yel ba: “A nyɩmɩ Galile nɩbɛ, bõ ɩ a nyɩ ɩraa a ka ꞌwuoro a saꞌlon a lɛ? A Jeeju ba na de a nyɩ sɔ̃w duoro nɩ a saa juu nɔɔ lɩɛbʼã wa a mɩnɛ nyɩ na nyɛ ʋ ʋ duoro a saa juu.”

¹²A *nɩ-tʋnɩsɩ yi na a *Olivi-tɩɩr tãw juu ɩ̃ lɛ lɩɛb cen a Jerujalɛm. A ʋna tãw ma jãa nɩ a Jerujalɛm wa; a ʋ jãafʋ na ta na kilo bõ-ƴen.

¹³A lɛ ba na lɩɛb wa a tẽw pʋɔ, ba do na kpɛ a bɔɔpɩɛn die pʋɔ, a jie ʋlɔ ba na ma dãa kpaara taa. A bala na be a be ɩ na a Pɩɛr nɩ a Jã, a Jakɩ, a Ãdire, a Fɩlɩpɩ, a Tomasɩ, a Batelemi, a Matie, a Alfe bie Jakɩ, a Sɩmɔ̃ na ma jɛrɛ, nɩ a Jakɩ kãw bi-daba Judi.

¹⁴A ba jaa fɛw ma duo na taa a daar a jaa, lãa nɩ a pɔɔbɔ, nɩ a *Jeeju mã Maarɩɩ, nɩ a Jeeju yɛɛr, na ba sʋɔrɔ a Naaŋmɩn.

¹⁵A bibir kãw, a popuorbo duo na taa ta lɩjaayʋɔb, a Pɩɛr ir a ba sɔ̃w ɩ̃ yel ba:

¹⁶“Yɛɛr, a dãa na sɛw a na ta a mɩnɛ a Naaŋmɩn Sɛbɛ na yel a lɛ a Naaŋmɩn Sɩɛ na dãa ƴɔ̃w a Davɩtɩ ʋ ƴɛr a Judasɩ ɩnɛ, ʋlɔ na tɔw a nɩbɛ bala na nyɔw a Jeeju.

¹⁷A Judasɩ ʋlɔ dãa na be a sɩ pʋɔ ɩ̃ mɩ dãa lãa tʋnɔ nɩ sɩ a tʋn.

¹⁸“A ʋna daba naa de na a libie ba na dãa ya ʋ a ʋ tʋ̃-fãa ɩnɛ, da nɩ puo. Ʋ lo na a be, gbuu nɩ a juu a tene, a puor pur, a nyaba yi a jaa,

¹⁹a Jerujalɛm nɩbɛ ba jaa wõ a ʋna ƴɛrɩ̃ naa ɩ̃ bʋɔlɔ a ʋna puo nɩ a ba ƴɛrɩ̃ a Akɛl-dama, a lɛ yelʼã a ‘jɩ̃ɩ puo’.

²⁰“A-na-ɩ a sɛbʼã a Pɛwfʋ Sɛbɛ pʋɔ: ‘Wɔ̃ taa nɩ a ʋ yir ʋ lɩɛb ɩ dakpolo, a nɩrɛ kɔ̃ lɛ kpɛ be wa,’ ɩ̃ a lɛ sɛbʼã go: ‘A nɩ-kpee ú de a ʋ tʋmɔ.’

²¹“Ala-ɩ̃-sɔ a sɛw na a nɩ-kpee na pɔw sɩ na ʋ ɩ a yel-mɩ̃ɛ ƴɛr-mana a Nɩ-kpɛ̃ɛ Jeeju kũu-pʋɔ-irfʋ ɩnɛ. A sɛw na a daba ʋlɔ ʋ ɩ a nɩrɛ na dãa be a sɩ pʋɔ a daar a jaa a lɛ a Nɩ-kpɛ̃ɛ Jeeju na dãa lãa yʋɔrɔ nɩ sɩ, wa de nɩ a mɩnɛ a Jã na mʋr ʋ a kʋ̃ɔ, wa ta nɩ a bibir ʋlɔ a Naaŋmɩn na de ʋ a sɩ sɔ̃w do nɩ a saa juu.”

²³Ba bʋɔlʼã nɩbɛ ayi ƴɔ̃w a ba nii-sɔw, a Jojɛfʋ ba na bʋɔlɔ a Basabasɩ na mɩ dɩ a Jusitisi, nɩ a ƴen sʋbɔ ba na bʋɔlɔ a Matɩyasɩ.

²⁴Ɩ̃ a ba jaa sʋɔrɔ na a Naaŋmɩn yele nɩ: “Nɩ-kpɛ̃ɛ, a fʋ̃ʋ na bɔ̃w a nɩbɛ ba jaa sube, miil sɩ a nɩbɛ ayi na pʋɔ a buor fʋ na vɛl ir,

²⁵ʋ na lɩɛr a Judasɩ a nɩ-tʋnɩsɩ tʋmɔ na pʋɔ ʋ na bar ɩ̃ cen a ʋ mɩ̃ɛ jie.”

²⁶Ba lɔbʼã a gbãbie a ba ɩnɛ ɩ̃ a gbãbie miilʼã a Matɩyasɩ, a ba de ʋ ƴɔ̃w a nɩ-tʋnɩsɩ pie-nɩ-bõ-ƴen pʋɔ.