Read Birifor, Malba Nɩ-tʋnɩsɩ tʋmɔ Sɛbɛ 19 Bible Online

Nɩ-tʋnɩsɩ tʋmɔ Sɛbɛ 19 - Birifor, Malba bible

Nɩ-tʋnɩsɩ tʋmɔ Sɛbɛ 19

¹A daar ʋlɔ a Apolosi na be a Kɔrɛ̃tɩ, a Pol tɔlʼã yi a ten ala na be a tã-gar juu, ɩ̃ ta a ɛfɛɛsɩ. Ʋ nyɛ na a *par-tuurbe ŋmɛɛ a be,

²ɩ̃ soor ba: “A lɛdaar nyɩ na sɔw de a *Jeeju, nyɩ pɔw na a Naaŋmɩn Sɩɛ mɩɩ?” A ba yel ʋ: “Saa mɩ wõ a ba yel a Naaŋmɩn Sɩɛ be na be wa.”

³A Pol soor ba: “Ɩ̃-cɛ, kʋ̃ɔ mʋrfʋ buor ba mʋr nyɩ?” A ba yel ʋ a Jã-Batii kʋ̃ɔ mʋrfʋ ʋ.

⁴A Pol yel ba: “A Jã mʋrʼã a bala na sɔw ɩ̃ lɩɛb a yɛ̃, ɩ̃ mɩ yel kʋ a *Ɩsɩrayɛl nɩbɛ a ba sɔw de a ʋlɔ na waara a ʋ puo-sɔw. A Jeeju ʋ yel a lɛ.”

⁵A lɛ a par-tuurbe bala na wõ a ʋna ƴɛrɩ̃ baar, ba ɩ na a ba mʋr ba a kʋ̃ɔ nɩ a Nɩ-kpɛ̃ɛ Jeeju yuor.

⁶A mɩnɛ a Pol na dɔɔl ba a nur, a Naaŋmɩn Sɩɛ wa na pɔw ba, a ba nyɔw ɩ̃ ƴɛrɛ a ƴɛr-bɔ̃w-faarsɩ, ɩ̃ mɩ mana a Naaŋmɩn pʋ-tɩɛrʋ̃ ƴɛrɩ̃ kʋrɔ a nɩbɛ.

⁷A bana nɩbɛ na ta na dabsɩ pie-nʼayi.

⁸A Pol cenʼã a *puorfʋ yir ɩ̃ ƴɛrɛ a ƴɛrɩ̃ nɩ ꞌlafʋ wa maalʼɩ̃ cur ata, mana nɩ ba a Naaŋmɩn fãw ƴɛrɩ̃sɩ bʋɔrɔ ʋ lɩɛbʼɩ̃ a bala na cɛlɛ ʋ tɩɛrɩ̃sɩ.

⁹Ɩ̃ a yaw jie kpɛmɛ na a sube ɩ̃ jaar ɩ̃ kpɛrɛ a Nɩ-kpɛ̃ɛ sɔr a nɩbɛ ba jaa nii-sɔw. Ala-ɩ̃-sɔ a Pol ŋmaa yi a ba jie, ɩ̃ ow a ʋ par-tuurbe kpee na ʋ jaana ba a Naaŋmɩn ƴɛrɩ̃ a bibie a jaa a Tɩranisi nakol yir.

¹⁰Yomo ayi a maal a lɛ, a saa a Jufisɩ nɩ a nɩ-bʋlsɩ ba jaa na be a Ajɩ-tẽw wõ a Nɩ-kpɛ̃ɛ ƴɛrɩ̃.

¹¹A Naaŋmɩn de na a Pol tʋnɔ nɩ a nɔ-kpawfʋ tʋmɔ ala na bɛrmɛ.

¹²A ala ɩ̃ saarɩ̃ ɩ a nɩbɛ de na a nii-sɔw bõ-fɛraa nɩ a cẽcene na sɩɩr a Pol ɩ̃gan cenʼɩ̃ na dɔɔl a wʋlɩ̃sɩ deme, ba ma kpɛmɛ na, ɩ̃ a kɔ̃tɔn-bebe ma mɩ yi ɩ̃ cɛ ba.

¹³A Jufisɩ bala na ma yʋɔrɔ diwre a kɔ̃tɔn-bebe bara, a ŋmɛɛ a ba sɔ̃w mɩ bʋɔrɔ na ba de a *Jeeju yuor diw nɩ a kɔ̃tɔnsɩ bar. Ba ma yelʼã a kɔ̃tɔn-bebe: “A Jeeju ʋlɔ ƴɛrɩ̃ a Pol na hiere, a ʋ yuor sɩ de ƴɛrɛ nɩ nyɩ: nyɩ́ yi!” (

¹⁴A bala na maala a lɛ ɩ na nɩbɛ anuu-nʼayi, ɩ̃ ɩ a Jufisɩ *baar-lo-nɩ-kpɛ̃ɛ Seva bi-dabsɩ.)

¹⁵Ɩ̃-cɛ a kɔ̃tɔn-bier yel ba na: “Ɩ̃ bɔ̃w na a Jeeju, nɩ a ʋlɔ na ɩ a Pol. Ɩ̃-cɛ a nyɩmɩ mɩ, babõ nyɩ ɩ?”

¹⁶A daba ʋlɔ a kɔ̃tɔn-bier na tɛrɛ aw na nyɔɔr ba, ɩ̃ ŋme ba vɩlaa ƴɔ̃w ba wʋlɩ̃sɩ a ba jɔ yi a yene nɩ salĩɓobo.

¹⁷A Jufisɩ nɩ a nɩ-bʋlsɩ ba jaa na be a ɛfɛɛsɩ wõ na a ʋna ƴɛrɩ̃ naa, a dãbɩ̃ɛ nyɔw ba ba jaa ɩ̃ a Nɩ-kpɛ̃ɛ Jeeju yuor yire dɔɔlɔ.

¹⁸A nɩbɛ yaw jie na dãa sɔw de a Jeeju wɩ na caala a ba maal-faar ala ba na dãa maal,

¹⁹ɩ̃ a nɩ-yaw bala na mɩ dãa ɩ a jɩbʋʋ-kpɩlbɛ de na a ba sɛbsɩ wɩ nɩ su bar a dɩ a nɩbɛ ba jaa nii-sɔw. Ba gorʼã a sɛbsɩ ala libie a ɩ ture ture kɔɔr ayi gbɛɛ anuu.

²⁰A be jie, a Nɩ-kpɛ̃ɛ ƴɛrɩ̃ yire na pɔwrɔ nɩ kpɛ̃w ɩ̃ a ʋ tʋɔfʋ mɩ dɔɔlɔ.

²¹A ana yele na tɔl baar, a Pol bʋɔrɔ na ʋ tɔl yi a Masɛdɔn nɩ a Akayi cen a Jerujalɛm. Ʋ yele na: “A maa wa ta a be baar, a sɛw na ɩ̃ mɩ nyɛ a Orom-tẽw nɩ mimir.”

²²Ʋ tʋ̃ na a ʋ sõsũonbo ayi na ɩ a Timote nɩ a Erasɩtɩ a Masɛdɔn, ɩ̃ na ʋ cãa jɛ be a Ajɩ-tẽw fɩ̃ɩ.

²³A ʋna daarʼãa, damfʋ irʼã be a Nɩ-kpɛ̃ɛ sɔr defʋ ɩnɛ, naa a bɛlɩ̃.

²⁴Daba kãw na dɩ Demetiri na ɩ kukure na kure a kur-pɛlɛ, ma maalʼã a yir-bil a ba naaŋmɩn Atemi[9] yir kaarɩ̃, a ɩ bom na na sũono a ʋ tʋ̃tʋnbɔ yaw.

²⁵Ʋ bʋɔlʼã a ʋ tʋtʋnbɔ lãa nɩ a bala na mɩ tʋnɔ a ʋna tʋ̃-bõ-ƴen, na ʋ yel ba: “Ɩ̃ badɛɛ, nyɩ bɔ̃w ka a sɩ vɩlaa jie yi na a sɩ tʋmɔ sɩ na tʋnɔ ɩnɛ.

²⁶Ɩ̃ nyɩ nyɛ na ɩ̃ mɩ wõ a ala a ʋna Pol na maal. Ʋ yele na áa naaŋmɩnsɩ ala a nɩbɛ na maalʼɩ̃ a ba nur ma ɩ naaŋmɩnsɩ wa. Ʋ lɩɛbʼã a nɩ-yaw tɩɛrɩ̃sɩ, ɩ̃ aa ɩ a ka a ɛfɛɛsɩ-tẽw tɛw ʋ maal a lɛ wa. A lɛ ʋ mɩ maal a Ajɩ ten yayaw pʋɔ.

²⁷Ɩ̃ aa ɩ a sɩ tʋmɔ tɛw ba bʋɔrɔ ba lɩɛb a ɩ tʋ̃-pɔrɔ wa, ɩ̃-cɛ ba mɩ bʋɔrɔ na ba maal a sɩ naaŋmɩn kpɛ̃ɛ Atemi yir ʋ lɩɛb ɩ bõ-pɔrɔ. Ɩ̃ a sɩmɩ bar ba a ba maala a lɛ, a Atemi ʋlɔ a Ajɩ nɩbɛ ba jaa na puoro nɩ a ten nɩbɛ ba jaa, ʋ kɔ̃ lɛ yi a yuor go wa.”

²⁸A lɛ a bala na cɛlɛ na wõ a ana ƴɛrɩ̃sɩ, suur nyɔw ba na po nɩ a ba wuure yele nɩ: “A ɛfɛɛsɩ Atemi bɛrmɛ na!”

²⁹A damfʋ pɔw a tẽw ʋ jaa, a nɩbɛ dar taa cen na nyɔɔr a Masɛdɔn nɩbɛ ayi, a Gayisi nɩ a Arɩsɩta na ɩ a Pol lãa-yʋɔrbɔ ɩ̃ gbu ba cenʼɩ̃ a ɓolĩ wɩɛr.

³⁰A Pol dãa na bʋɔrɔ ʋ cen a nɩ-yaw bala nii-sɔw, ɩ̃-cɛ a popuorbo mɔ̃w ʋ bar.

³¹A tʋ̃tʋ̃-nɩ-bɛrɛ ŋmɛɛ na be a Ajɩ-tẽw, ɩ̃ ɩ a ʋ badɛɛ, tʋ̃ na nɩrɛ a ʋ yel ʋ a ʋ taa cen be a ɓolĩ wɩɛr wa.

³²Burbur kpɛ na a nɩ-yaw bala na duo taa a be. A ŋmɛɛ ma wuurʼã yel á asɩmɛ ʋ, ɩ̃ a ŋmɛɛ ma wuur yel bõ-kpee, a yaw jie a ba pʋɔ ma mɩ bɔ̃w a bom ɩnɛ ba na tiw taa wa.

³³A nɩbɛ ŋmɛɛ a be a nɩbɛ pʋɔ de na a ƴɛrɩ̃ man a Alɛsãdɩrɛ, a Jufisɩ na dara ƴɔnɔ a nii-sɔw. A Alɛsãdɩrɛ ɩ na a nɩbɛ a ba sine a-na-ɩ ʋ bʋɔrɔ na ʋ ƴɛr faa a ʋ mɩ̃ɛ nɩ a ʋ tɔ deme a nɩbɛ nii-sɔw.

³⁴Ɩ̃-cɛ a lɛ ba na nyɛ ʋ ʋ ɩ a Jufi nɩrɛ, ba wuurʼã a wuur-bõ-ƴen, maalʼɩ̃ lɛɛrɛ ayi, yele nɩ: “A ɛfɛɛsɩ Atemi bɛrmɛ na!”

³⁵A tẽw sɛsɛbɛ pãa na tʋɔ ɩ a nɩbɛ a ba sine, ɩ̃ ʋ yel ba: “Ɛfɛɛsɩ nɩbɛ, a nɩbɛ ba jaa bɔ̃w na áa sɩmɩ ɛfɛɛsɩ nɩbɛ ɩ̃ gure a naaŋmɩn kpɛ̃ɛ Atemi yir nɩ a ʋ bʋtɩb-kpɛ̃ɛ na yi a saꞌlon ɩ̃ lo.

³⁶Nɩrɛ ma tʋɔrɔ cɩɩrɛ wa. Ala-ɩ̃-sɔ a sɛw na a nyɩ na bar a gɔn ɩ̃ kɔ̃ pɔw maal bom wa.

³⁷A-na-ɩ nyɩ wa nɩ na a nɩbɛ na, na ma ju a bom a sɩ naaŋmɩn yir pʋɔ wa, baa mɩ ƴɛr ƴɛr-fãa ƴɔ̃w a sɩ naaŋmɩn wa.

³⁸Ala-ɩ̃-sɔ a ala ɩ a Demetiri nɩ a ʋ tʋtʋnbɔ tɛrɛ na ƴɛrɩ̃ ƴɔnɔ nɩrɛ, a ƴɛrɩ̃ guorfʋ tɛrɛ na a ʋ bibir ɩ̃ a nɩ-bɛrɛ ma mɩ be na be. Bá cen a be na bʋɔl taa.

³⁹Ɩ̃ a ala ɩ a bom lɛ be na be a nyɩ bʋɔrɔ ba gbɛɛrɩ̃, ba na gbɛɛrɩ̃ na a tẽw nɩbɛ kpaarɩ̃-taa kpɛ̃ɛ pʋɔ.

⁴⁰A-na-ɩ a ala sɩ na maal a dɩnaa, a na tʋɔ na ɩ sɩ ƴɛrɩ̃. Ba na yelʼã á tẽw sɩ dama, a-na-ɩ ƴɛrɩ̃ ma be be sɩ na duo nɩ taa a nɔhɔ̃ wa, ɩ̃ saa mɩ tʋɔrɔ miile a ƴɛrɩ̃ par vɩlaa wa.”

⁴¹A mɩnɛ ʋ na ƴɛr a lɛ baar, ʋ wɛlʼã a nɩbɛ bar.