Read Birifor, Malba Nɩ-tʋnɩsɩ tʋmɔ Sɛbɛ 20 Bible Online

Nɩ-tʋnɩsɩ tʋmɔ Sɛbɛ 20 - Birifor, Malba bible

Nɩ-tʋnɩsɩ tʋmɔ Sɛbɛ 20

¹A lɛ a gɔ̃-pɔɔr na baar, a Pol bʋɔlʼã a popuorbo tiw ɩ̃ ƴɛr a sũofʋ ƴɛrɩ̃ kʋ ba. Ɩ̃ a lɛ ʋ na puor ba baar, ʋ yi na cen a Masɛdɔn.

²Ʋ tɔlʼã yi a ʋna wɩɛr pʋɔ na ʋ ƴɛr ƴɛrɩ̃ yaw sũo nɩ a popuorbo, ɩ̃ pãa po cen a Gɩrɛkɩ-tẽw

³na jɛ a be maal cur ata. A ala na baar, ʋ dãa na bʋɔrɔ ʋ cen a Sɩrɩ-tẽw, ɩ̃ a mɩnɛ ʋ na wõ a Jufisɩ goro taa a ʋ ɩnɛ, ʋ lɩɛbʼã gol cen na kpɛ a Masɛdɔn-tẽw tɔl.

⁴A bala na ɩ a ʋ lãa-yʋɔrbɔ ɩ na a Sopatɛɛr, na ɩ a Pirisi bi-daba na yi a Beere, nɩ a Arɩsɩta, nɩ a Sekũdi na yi a Tɛsaloniki, nɩ a Gayisi na yi a Dɛrbɩ, nɩ a Timote, lãa nɩ a Tɩsɩkɩ, nɩ a Torofim na yi a Ajɩ wɩɛr.

⁵A bala ɩ̃ de sɩ a nĩe cenʼã gu sɩ a Torowasɩ.

⁶Ɩ̃ a sɩmɩ, a lɛ a *bur-pʋɔr fɛtɩ na tɔl baar, sɩ kpɛ na a gbor kpɛ̃ɛ a Fɩlɩpɩ-tẽw na sɩ maal bibie anuu, ɩ̃ pɔw ba a Torowasɩ, na sɩ jɛ a be maal bibie anuu-nʼayi.

⁷A jɩmaasɩ jaanʋɔr, sɩ duo na taa a Nɩ-kpɛ̃ɛ dɩb dɩfʋ, ɩ̃ a Pol mana a nɩbɛ a Naaŋmɩn ƴɛrɩ̃. A-na-ɩ a dɩvɩɛ bio a Pol bʋɔrɔ na ʋ bar ba ɩ̃ cen, ala-ɩ̃-sɔ ʋ ƴɛr ba na a ƴɛrɩ̃sɩ kam, wa ta nɩ a tɩsɔw porɩ̃.

⁸A bɔɔpɩɛn die ʋlɔ pʋɔ sɩ na duo, lãpar yayaw be na be,

⁹ɩ̃ a dabile mɩ be be na dɩ Etikisi ɩ̃ jɛ a fɩnɛɛtɩ nʋɔr, a gʋ̃ɔ nyɔwrɔ ʋ. Ɩ̃ a mɩnɛ a Pol na nyɩrɩ̃ ƴɛr a ƴɛrɩ̃ kam, ʋ gurʼã lɛ kper na ʋ yi a be a saꞌlon ɩ̃ faa lo a tene, a ba suu ɓɔw nyɛ ʋ kpi.

¹⁰A Pol suu na gã pɔw ʋ worĩ ʋ ɩ̃ yel a nɩbɛ: “Nyɩ taa tɩɛrɛ wa. A ʋ vʋʋrʋ̃ lɛ wa na.”

¹¹Ɩ̃ ʋ lɛ do na ŋma a buru a ba po ꞌwɔb, ɩ̃ ʋ lɛ ƴɛr a ƴɛrɩ̃sɩ lɛɛ a bio wa vɩɛ, ʋ pãa yi cen.

¹²Ɩ̃ a dabile ʋlɔ, ba de ʋ na kpɛ nɩ nɩ-mimir, a sube lɛ ɓãa ba ba jaa fɛw.

¹³A sɩmɩ, sɩ de na nĩe cen na kpɛ a gbor kpɛ̃ɛ cen a Asɔsɩ, a jie ʋlɔ sɩ na sɛw sɩ de a Pol nɩ a gbor. A-na-ɩ lɛ ʋ dãa yel sɩ, ɩ̃-cɛ a ʋlɔ mɩ̃ɛ, gbɛɛ ʋ na wɩ nɩ.

¹⁴A mɩnɛ ʋ na tuorʼɩ̃ sɩ a Asɔsɩ, sɩ de ʋ na nɩ a gbor a sɩ cen a Mɩtɩlɛ̃.

¹⁵Ɩ̃ sɩ lɛ yi na a be ɩ̃ a lɛ a bio na vɩɛ na sɩ ta a Kio, ɩ̃ a dayere daar a sɩ ta a Samɔsɩ, ɩ̃ a datɛrɛ daar a sɩ pãa ta a Mile.

¹⁶A Pol dãa na yel a ʋ na po na a ɛfɛɛsɩ bar a mɩnɛ ʋ kɔ̃ wa ɩraa be a Ajɩ wɩɛr a daar wa po ʋ wa. A-na-ɩ ʋ pɔwrɔ na bʋɔrɔ a ʋlɔ tʋɔ ʋ ta a Jerujalɛm a *Pãtekɔtɩ fɛtɩ bibir.

¹⁷A lɛ a Pol na be a Mile-tẽw, ʋ tʋ̃ na bʋɔl a ɛfɛɛsɩ duo-puor-ni-dierbe a ba wɩ.

¹⁸A mɩnɛ ba na ta a ʋ sɛ̃, ʋ yel ba na: “Nyɩ bɔ̃w na a mɩnɛ ɩ̃ na dãa wɔ̃ a nyɩ sɔ̃w a daar a jaa, wa nyɔw nɩ a bibir dãdãw ʋlɔ ɩ̃ na ta a nyɩ jie a Ajɩ-tẽw.

¹⁹Ɩ̃ pabʼã a ɩ̃ mɩ̃ɛ tʋnɔ nɩ a Nɩ-kpɛ̃ɛ tʋn, cire nɩ a mɔtɔ̃-kʋ̃ɔ, nyɛrɛ nɩ a won ala na ta ma a Jufisɩ na goro ma ɩnɛ.

²⁰Nyɩ bɔ̃w ka maa sɔɔlɩ̃ bom kãw bar na ɩrɛɛ bõ-son a nyɩ jie wa. Ɩ̃-cɛ ɩ̃ ɛ̃ɛ na miil nyɩ a yele a jaa jaana nɩ nyɩ a kpaarɩ̃-taa jiir nɩ a nyɩ yie pʋɔ.

²¹Ɩ̃ kpãkpanʼã a Jufisɩ nɩ a nɩ-bʋlsɩ a ba lɩɛb a ba yɛ̃ ɩ̃ puoro a Naaŋmɩn, ɩ̃ sɔw de a sɩ Nɩ-kpɛ̃ɛ *Jeeju.

²²Ɩ̃ a ƴɛ̃ƴɛrɩ̃ na, a mɩnɛ a Naaŋmɩn Sɩɛ na fɛrɛ ma, ɩ̃ cere na a Jerujalɛm ɩ̃ maa bɔ̃w a ala nɔɔ tara ma a be wa.

²³Ɩ̃-cɛ a tẽw lɛ ɩ̃ na ma ta a Naaŋmɩn Sɩɛ ma yel ma na a kasu nɩ a won be na be gu ma.

²⁴Ɩ̃-cɛ ɩ̃ maa tɩɛrʼɩ̃ a ɩ̃ baafʋ ʋ ɩ bom a ɩ̃ jie wa. A ala ɩ̃ na ꞌwuoro ɩ na a mɩnɛ ɩ̃ na tʋɔrɔ maala a tʋmɔ ala a Nɩ-kpɛ̃ɛ Jeeju na kʋ ma cere na tara nɩ a baarfʋ jie: a lɛ yelʼã, a ɩ̃ ƴɛrɛ a ƴɛr-son ʋlɔ na miile a Naaŋmɩn maal-vɩlaa.

²⁵“Ɩ̃ bɔ̃w ka a ƴɛ̃ƴɛrɩ̃ na, a nyɩmɩ nyɩ jaa jie ɩ̃ na dãa yɔ ƴɛr a Naaŋmɩn fãw ƴɛrɩ̃, nyaa lɔɔ nyɛrɛ ma go wa.

²⁶Ala-ɩ̃-sɔ, ɩ̃ yele kʋrɔ nyɩ a dɩnaa, a nyɩ sɔ̃w, nɩ-bõ-ƴen wa bɔr, aa ɩrɛ a ɩ̃ ƴɛrɩ̃ wa.

²⁷A-na-ɩ ɩ̃ miil nyɩ na a Naaŋmɩn pʋ-tɩɛrʋ̃ tʋmɔ ʋ jaa. Maa sɔɔlɩ̃ bom kãw a nyɩ jie wa.

²⁸Nyɩ́ tɛrɛ nyɩ mɩ̃ɛ, ɩ̃ mɩ ꞌwuoro a nɩbɛ bala ba jaa a Naaŋmɩn Sɩɛ na kʋ nyɩ a nyɩ ꞌwuoro a piir kaarɩ̃. Nyɩ́ bɔ̃w guolo a Naaŋmɩn *duo-puorbo ʋ na da nɩ a ʋ mɩ̃ɛ Bie jɩ̃ɩ sɔ.

²⁹Ɩ̃ bɔ̃w ka a maa cen baar, a nɩbɛ na kpɛ na a nyɩ sɔ̃w wɔ̃ taa nɩ wɛ-dʋ̃-bebe, ɩ̃ ma bara a piir wa.

³⁰Ɩ̃ a nyɩmɩ mɩ̃ɛ sɔ̃w, a ŋmɛɛ nɔɔ irʼã ŋmara a jirsɩ bɛlɛ nɩ a popuorbo a ba tuure ba.

³¹Ala-ɩ̃-sɔ, nyɩ́ jʋʋrɔ, ɩ̃ nyɩ taa hiin a ala ɩ̃ na maal a nyɩ sɔ̃w a yomo ata, a mɩnɛ ɩ̃ na dãa jaw nyɩ a yɛ̃, a tɩsɔw nɩ a mɔtɔ̃w ma galɩ̃ wa, cire nɩ a mɔtɔ̃-kʋ̃ɔ.

³²“Ɩ̃ a ƴɛ̃ƴɛrɩ̃ na, ɩ̃ de nyɩ na ƴɔ̃w a Naaŋmɩn nuumɩ, nɩ a ʋ sũofʋ ƴɛrɩ̃ pʋɔ. A ʋlɔ na tʋɔrɔ kʋrɔ nyɩ a fãw, ɩ̃ mɩ kʋrɔ nyɩ a yel-sono ala ʋ na bin a bala ba jaa ɩnɛ na ɩ a ʋ nɩbɛ.

³³Maa dãa tɩɛrʼɩ̃ nɩrɛ kãw bom wa: a libie, mɩɩ a sɛlmɛ, mɩɩ a cẽcene wa.

³⁴Nyɩ mɩ̃ɛ bɔ̃w na ka a ɩ̃ mɩ̃ɛ nuu ɩ̃ dãa tʋnɔ nɩ a tʋmɔ pɔwrɔ nɩ a yele ala na sɛw nɩ a maa nɩ a ɩ̃ lãa-yʋɔrbɔ.

³⁵A ɩ̃ tʋmɔ a jaa ɩ̃ na maal, ɩ̃ miil nyɩ na a nyɩ sɛw na na tʋnɔ nɩ kpɛ̃w a nɔhɔ̃, na nyɩ pɔw a yele sũo nɩ a nɩ-nãw nɩbɛ, tɩɛrɛ nɩ a ƴɛrɩ̃sɩ ala a Nɩ-kpɛ̃ɛ Jeeju mɩ̃ɛ na dãa yel: ‘Nʋ̃ɔ ma be na a ʋlɔ jie na kʋ a nɩrɛ a bom gãw a ʋlɔ na pɔw.’ ”

³⁶A lɛ a Pol na ƴɛr a ana ƴɛrɩ̃sɩ baar, ʋ gburĩ na a dume a ba lãa sʋɔr a Naaŋmɩn.

³⁷A ba jaa fɛw kono woro nɩ a Pol puoro nɩ ʋ,

³⁸a sube sãw ba a mɩnɛ ʋ na yel ba a baa lɛ nyɛrɛ ʋ go wa. A ala ɩ̃ baar, ba tɔw ʋ na cenʼɩ̃ ƴɔ̃w a gbor kpɛ̃ɛ pʋɔ.