Read Birifor, Malba Nɩ-tʋnɩsɩ tʋmɔ Sɛbɛ 21 Bible Online

Nɩ-tʋnɩsɩ tʋmɔ Sɛbɛ 21 - Birifor, Malba bible

Nɩ-tʋnɩsɩ tʋmɔ Sɛbɛ 21

¹A lɛ sɩ na faa yi a bana nɩbɛ jie, sɩ kpɛ na a gbor kpɛ̃ɛ cen dẽdẽ na ta a Kɔsɩ, ɩ̃ a bio vɩɛ a sɩ ta a Orodi-tẽw, ɩ̃ lɛ yi a be ɩ̃ ta a Patara.

²A be sɩ lɛ nyɛ na a gbor kpɛ̃ɛ ƴen sʋbɔ na cere a Fenisi, na sɩ kpɛ cere.

³Sɩ tɔlɔ na ɩ̃ nyɛ a Sɩpɩr-tẽw a gʋbaa loor, ɩ̃ vɩɛ bar ɩ̃ ta a Sɩrɩ wɩɛr na sɩ suu a Tɩɩr-tẽw, a-na-ɩ a be ba sɛw ba wɛl a gbor kpɛ̃ɛ yele bar.

⁴A be, sɩ nyɛ na a popuorbo ɩ̃ na sɩ jɛ maal bibie anuu-nʼayi a ba sɛ̃, ɩ̃ a mɩnɛ a Naaŋmɩn Sɩɛ na kʋ ba a ƴɛrɩ̃, ba yelʼã a Pol, a ʋ taa cen a Jerujalɛm wa.

⁵A lɛ a ana bibie na ta baar, sɩ lɛ yi na de a sɩ sɔr, ɩ a ba tɔw sɩ ba jaa, nɩ a ba pɔɔbɔ nɩ a ba bibiir, yi nɩ a tẽw cɛ̃cɛ̃w, a sɩ ta a man gbẽgbere nʋɔr, na sɩ gburĩ a dume ɩ̃ sʋɔr a Naaŋmɩn.

⁶A lɛ sɩ na puor taa baar, sɩ kpɛ na a gbor kpɛ̃ɛ pʋɔ, ɩ̃ a ba mɩ lɩɛb kule.

⁷A mɩnɛ sɩ na yi a Tɩɩr ɩ̃ ta a Pitolemayɩ, a sɩ gbor pʋɔ yɔfʋ baarʼã. Sɩ nyɛ na a yɛɛr a be na sɩ puor ba ɩ̃ jɛ maal bibir bõ-ƴen a ba sɛ̃.

⁸A bio vɩɛ na a sɩ yi a be ɩ̃ cen na ta a Sejare. A be, sɩ kpɛ na na gã a Fɩlɩpɩ yir. Ʋ ɩ na a Naaŋmɩn ƴɛr-son ƴɛƴɛrɛ ɩ̃ mɩ ɩ a nɩbɛ anuu-nʼayi bala ƴen sʋbɔ ba na dãa vɛl ir a Jerujalɛm.

⁹Ʋ tɛrɛ na bi-pɔɔbɔ anaan na ma tɛrɛ sɩrbɛ sɛr wa, a ba ma ƴɛrɛ a ƴɛrɩ̃sɩ ala ba na pɔw a Naaŋmɩn jie.

¹⁰Sɩ jɛ na be kam fɩ̃ɩ ɩ̃ a *Naaŋmɩn pʋ-tɩɛrʋ̃-bʋʋrɔ na dɩ a Agabisi yi a Jude ɩ̃ wɩ.

¹¹Ʋ ta na a sɩ sɛ̃ ɩ̃ de a Pol sɩɛ gan lũ nɩ a ʋ mɩ̃ɛ gbɛɛ nɩ a ʋ nur ɩ̃ yel: “Nyɩ́ cɛlɛ a mɩnɛ a Naaŋmɩn Sɩɛ na yel: nɔhɔ̃ a Jerujalɛm Jufisɩ na lũ a daba ʋlɔ na sɔ a sɩɛ gan na ƴɔ̃w a nɩ-bʋlsɩ nuumɩ.”

¹²A lɛ sɩ na wõ a ʋna ƴɛrɩ̃, a sɩmɩ nɩ a Sejare-tẽw nɩbɛ sʋɔrɔ na a Pol lɔbɔ nɩ a nur a ʋ taa lɛ cere a Jerujalɛm wa.

¹³Ɩ̃-cɛ ʋ yelʼã: “Bõ ɩ̃ ɩ a nyɩ kono na nyɩ bʋɔrɔ nyɩ sãw ma a suur? Ɩ̃ sɔw na a ba na lũ ma, ɩ̃ aa ɩ a ala tɛw ʋ wa, ɩ̃-cɛ ɩ̃ mɩ sɔw na a ba na kú ma a Jerujalɛm a Nɩ-kpɛ̃ɛ *Jeeju ɩnɛ.”

¹⁴Ɩ̃ a mɩnɛ sɩ na ma tʋɔrɔ lɩɛbɛ a ʋ tɩɛrɩ̃sɩ wa, sɩ barʼã a sʋɔrfʋ, ɩ̃ yel: “A Nɩ-kpɛ̃ɛ ú maal a ʋ pʋ-tɩɛrʋ̃ tʋmɔ.”

¹⁵A mɩnɛ a bibie ala na tɔl baar, sɩ gbɛɛrɩ̃ na cen a Jerujalɛm,

¹⁶a Sejare popuorbo ŋmɛɛ bɩɛl sɩ cenʼɩ̃ a daba ʋlɔ yir sɩ na bʋɔrɔ sɩ gã. A ʋ yuor dɩ na a Mɩnasõ ɩ̃ ʋ yi na a Sɩpɩr-tẽw ɩ̃ kam a puorfʋ pʋɔ.

¹⁷A mɩnɛ sɩ na ta a Jerujalɛm, a yɛɛr de sɩ na nɩ nʋ̃ɔ.

¹⁸A dɩvɩɛ bio sɩ lãa na cenʼɩ̃ a Pol a Jakɩ yir, a jie ʋlɔ a duo-puor-ni-dierbe ba jaa na kpaarɩ̃ taa.

¹⁹Ɩ̃ a mɩnɛ a Pol na puor ba baar, ʋ miil ba na a jaa barsɩ, a ala a Naaŋmɩn na maal a ʋ tʋmɔ pʋɔ a nɩ-bʋlsɩ jie.

²⁰Ɩ̃ a lɛ ba na wonaa, ba pɛw na a Naaŋmɩn ɩ̃ yel a Pol: “Yɛbɛ, fʋ nyɛ na a mɩnɛ a Jufisɩ ture ture na sɔw de a *Kirisi, ɩ̃ a ba jaa ɓĩɓine na a Mowisi ƴɛr-kpɛn ɩnɛ.

²¹Ba man ba na a fʋ ƴɛrɩ̃, a fʋ mɩɩnɛ na a Jufisɩ ba jaa na be a nɩ-bʋlsɩ ten a ba lɩɛb ɩ̃ bar a Mowisi ƴɛr-kpɛn, yele nɩ ba a ba taa cãa ŋmara a ba bibiir yɔɛ wa, ɩ̃ ba taa mɩ goro nɩ a Jufisɩ maalfʋ wa.

²²Mɩnɛ sɩ na ɩ? A-na-ɩ ba na wonaa na a fʋ ta na a ka.

²³Ala-ɩ̃-sɔ, maal a ala sɩ na yele fʋ. Sɩ tɛrɛ na dabsɩ anaan ka, na ƴɛr nʋɔr a Naaŋmɩn jie.

²⁴De ba a nyɩ lãa cen na pɔl a nyɩ mɩ̃ɛ, a fʋ ya a ba jur pũofʋ. A lɛ, a nɩbɛ ba jaa na bɔ̃w ka a ala ba na ƴɛrɛ ƴɔnɔ fʋ, a pɔrɔ ʋ, a-na-ɩ a fʋ̃ʋ mɩ̃ɛ mɩ jɔrɔ na a Mowisi ƴɛr-kpɛn.

²⁵A ala ɩ a nɩ-bʋlsɩ bala na ɩ a popuorbo ʋ, sɩ turʼã sɛbɛ miil ba a ala sɩ na guor taa, á ba taa dɩrɛ tɩɩb bom wa, á ba taa ꞌwɔbɔ a jɩ̃ɩ mɩɩ dʋ̃ɔ ʋlɔ ba na cɩm kú wa, ɩ̃ ba taa mɩ pebe taa wa.”

²⁶A dɩvɩɛ bio, a Pol taw na a bana dabsɩ anaan a ba lãa maal a ba pɔlfʋ tʋmɔ, ɩ̃ ʋ cen na kpɛ a Naaŋmɩn puor-yir kpɛ̃ɛ pʋɔ yel ba a bibir ʋlɔ a pɔlfʋ tʋmɔ na baara, a lɛ yelʼã a daar ʋlɔ ba na ɩrɛ a ba loro a baar kʋrɔ a Naaŋmɩn.

²⁷A cɛ na fɩ̃ɩ, ɩ̃ a ana bibie anuu-nʼayi na ta baar, ɩ̃ a Jufisɩ bala na yi a Ajɩ wɩɛr nyɛ na a Pol be a Naaŋmɩn puor-yir kpɛ̃ɛ pʋɔ ɩ̃ dam a nɩbɛ ba jaa, ɩ̃ nyɔw ʋ

²⁸wuure nɩ: “*Ɩsɩrayɛl nɩbɛ, nyɩ́ wa sũo sɩ! Nyɩ́ nyɛ a daba ʋlɔ na ma hiere a ƴɛrɩ̃sɩ kʋrɔ a nɩbɛ ba jaa a jiir a jaa, sãwna nɩ a Ɩsɩrayɛl nɩbɛ yoe, nɩ a Mowisi ƴɛr-kpɛn, ɩ̃ mɩ kpɛrɛ a Naaŋmɩn yirʼã. Ɩ̃ a ƴɛ̃ƴɛrɩ̃ na, ʋ taw na a nɩ-bʋlsɩ kpɛ nɩ a Naaŋmɩn puor-yir kpɛ̃ɛ pʋɔ, sãw nɩ a ji-son na.”

²⁹(Ba yelʼã a lɛ, a-na-ɩ ba dãa na nyɛ a Pol nɩ a ɛfɛɛsɩ nɩrɛ na dɩ a Torofim a tẽw pʋɔ, ɩ̃ ba tɩɛrʼã beeka a Pol taw ʋ na kpɛ nɩ a Naaŋmɩn puor-yir kpɛ̃ɛ.)

³⁰A gɔ̃-pɔɔr pɔw na a tẽw ʋ jaa, a nɩbɛ yi a tẽw pʋɔ a jiir a jaa ɩ̃ jɔrɔ wɩɛrɛ. Ba nyɔw na a Pol taw yi nɩ a Naaŋmɩn puor-yir kpɛ̃ɛ cɛ̃cɛ̃w ɩ̃ pɔw a pana a jie naan.

³¹Ba dãa na bʋɔrɔ ba kú ʋ, ɩ̃ a ba cen na yel a Orom sɔdaalsɩ nɩ-kpɛ̃ɛ, áa Jerujalɛm-tẽw ʋ jaa dama na.

³²A jie naan, ʋ de na a sɔdaal-nɩ-bɛrɛ nɩ a sɔdaalsɩ jɔ cenʼɩ̃ a nɩ-yaw pʋɔ. A mɩnɛ ba na nyɛ a nɩ-kpɛ̃ɛ ʋlɔ nɩ a sɔdaalsɩ, ba barʼã a Pol narfʋ.

³³A sɔdaalsɩ nɩ-kpɛ̃ɛ ta na a Pol sɛ̃ ƴɔ̃w a ba nyɔw ʋ lũ nɩ a bɔ̃jɔrɩ̃sɩ ayi, ɩ̃ ʋ soor a ala ʋ na ɩ nɩ a bom ʋlɔ ʋ na maal.

³⁴Ɩ̃-cɛ a nɩ-yaw pʋɔ, a ŋmɛɛ ma yelʼã a nɔhɔ̃, ɩ̃ a ŋmɛɛ ma yel bõ-kpee, ɩ̃ a mɩnɛ a nɩ-kpɛ̃ɛ na ma tʋɔrɔ bɔ̃wnɔ a par a gɔn yaw sɔ̃w wa, ʋ yelʼã a ba taw a Pol wɩ nɩ a sɔdaalsɩ yir kpɛ̃ɛ pʋɔ.

³⁵A mɩnɛ ba na ta a yir dofʋ jie, a nɩbɛ nyɩrɩ̃ na dama yaw, ala-ɩ̃-sɔ a sɔdaalsɩ ɓɔw a Pol do nɩ,

³⁶a-na-ɩ a nɩ-yaw tuure na ɩ̃ wuure yele a ba kú ʋ.

³⁷A lɛ ba na kpɛɛrɛ nɩ a Pol a sɔdaalsɩ yir pʋɔ, ʋ yelʼã a sɔdaalsɩ nɩ-kpɛ̃ɛ: “Ɩ̃ na tʋɔ na ƴɛr fʋ ƴɛrɩ̃ mɩɩ?” A nɩ-kpɛ̃ɛ soor ʋ: “Fʋ wono na a Gɩrɛkɩ ƴɛrɩ̃?

³⁸A lɛ ʋ, faa ɩ a ʋna Ejibti nɩrɛ na dãa ir a nɩbɛ a daar kãw a ba jɛbɛ nɩ sɩ wa? A ʋlɔ na dãa taw a nɩ-bebe ture anaan kpɛ nɩ a wɛkar pʋɔ wa?”

³⁹A Pol yel ʋ: “Ɩ̃ ɩ na a Jufi nɩrɛ ba na dɔw a Tarsɩ na be a Sɩlɩsɩ wɩɛr. Ɩ̃ ɩ na a tẽ-kpɛ̃ɛ nɩrɛ. Ɩ̃ suɔr fu na, kʋ ma sɔr ɩ̃ ƴɛrʼɩ̃ a nɩbɛ.”

⁴⁰A sɔdaalsɩ nɩ-kpɛ̃ɛ kʋ ʋ a sɔr, a Pol ɩraa a dofʋ jie juu ɩ̃ tur a nɩbɛ a nuu a ba ŋma gʋmɔ, v ƴɛrɛ ba nɩ a Eburo ƴɛrɩ̃.