Read Birifor, Malba Nɩ-tʋnɩsɩ tʋmɔ Sɛbɛ 6 Bible Online

Nɩ-tʋnɩsɩ tʋmɔ Sɛbɛ 6 - Birifor, Malba bible

Nɩ-tʋnɩsɩ tʋmɔ Sɛbɛ 6

¹A ʋna daarʼãa, a mɩnɛ a *par-tuurbe na nyɩrɩ̃ dɔɔlɔ, a Jufisɩ bala na wono a Gɩrɛkɩ ƴɛrɩ̃ hũhune na a Jufisɩ bala na ɩ a tẽw deme. A-na-ɩ a bibie a jaa, ba ma po na a dɩb hiin a kpɩ̃ɩ-pɔɔbɔ bala na wono a Gɩrɛkɩ ƴɛrɩ̃.

²A *nɩ-tʋnɩsɩ pie-nʼayi bʋɔlʼã a par-tuurbe tiw taa ɩ̃ yel ba: “Aa sɛw a sɩ na bar a Naaŋmɩn ƴɛrɩ̃ ƴɛrfʋ ɩ̃ poro a dɩb wa.

³Ala-ɩ̃-sɔ sɩ yɛɛr, nyɩ́ vɛl ir nɩbɛ anuu-nʼayi a nyɩ pʋɔ na tɛrɛ yo-vɩlaa a nɩbɛ jie, na mɩ sɛw nɩ a Naaŋmɩn Sɩɛ ɩ̃ tɛrɛ a yɛ̃, a sɩ kʋ ba a tʋn na a ba ꞌwuoro.

⁴Ɩ̃-cɛ a sɩmɩ, sɩ na cãa na de a sɩ mɩ̃ɛ bar ƴɔ̃w a Naaŋmɩn sʋɔrfʋ pʋɔ nɩ a ʋ ƴɛrɩ̃ ƴɛrfʋ pʋɔ.”

⁵A ʋna ƴɛr-bir nʋmɔ na a *duo-puorbo ba jaa a ba vɛl ir a Ɩtɩɛn na tɛrɛ a ƴɔ̃w-nyãa ʋ bɛrmɛ a Naaŋmɩn jie, ɩ̃ mɩ sɛw nɩ a Naaŋmɩn Sɩɛ. Ba mɩ vɛlʼã ir a Fɩlɩpɩ nɩ a Porokɔɔr nɩ a Nɩkanɔɔr nɩ a Tɩmɔ̃, nɩ a Parmena, lãa nɩ a Nikola na ɩ a Ãtɩyɔsɩ-tẽw nɩrɛ na kpɛ a Jufisɩ puorfʋ pʋɔ.

⁶Ba taw ba na ƴɔ̃w a nɩ-tʋnɩsɩ nii-sɔw, a ba dɔɔl ba a nur ɩ̃ sʋɔr a Naaŋmɩn ƴɔ̃w ba.

⁷A Naaŋmɩn ƴɛrɩ̃ yɛrɛ na pɔwrɔ a wɩɛr, ɩ̃ a popuorbo nyɩrɩ̃ waa a Jerujalɛm, ɩ̃ a Naaŋmɩn baar-lorbo yaw sɔw a *Jeeju puorfʋ ƴɛrɩ̃.

⁸Fãw nyɩrɩ̃ na be a Ɩtɩɛn jie, a-na-ɩ a Naaŋmɩn sũofʋ be nɩ ʋ na ʋ maala a nɔ-kofʋ tʋ̃-bɛrɛ na miile a Naaŋmɩn kpɛ̃w a nɩbɛ sɔ̃w.

⁹Ɩ̃-cɛ a nɩbɛ ŋmɛɛ nyɔw na ɩ̃ cɩɩrɛ a Ɩtɩɛn. Ba ɩ na a bala na yi a Sɩɩrɛn nɩ a Alɛsãdiri, ɩ̃ tɛrɛ a ba mɩ̃ɛ *puorfʋ yir a nɩbɛ na bʋɔlɔ aa “Gbãgbaar bala na lɛ sɔ a ba mɩ̃ɛ puorfʋ yir”. A ŋmɛɛ mɩ yi na a Sɩlɩsɩ nɩ a Ajɩ ɩ̃ a ba jaa cɩɩrɛ na taa nɩ a Ɩtɩɛn.

¹⁰Ɩ̃-cɛ baa tʋɔrɔ ɩrɛɛ nɩ ʋ wa, a-na-ɩ ʋ ƴɛrɛ na nɩ a yɛ̃ ʋlɔ a Naaŋmɩn Sɩɛ na kʋ ʋ,

¹¹ala-ɩ̃-sɔ a ba sɔɔlɩ̃ tɔ a nɩbɛ ƴɔ̃w a ba yel a ba wõ na a Ɩtɩɛn ʋ ƴɛrɛ a ƴɛr-fãa ƴɔnɔ a Mowisi nɩ a Naaŋmɩn.

¹²Ba damʼã a nɩbɛ a lɛ, lãa nɩ a ni-dierbe nɩ a *ƴɛr-kpɛn-bɔɔnbɔ a ba nyɛ suur ƴɔ̃w a Ɩtɩɛn ɩ̃ wɩ nyɔw ʋ cenʼɩ̃ a *ƴɛr-guor-nɩ-bɛrɛ nii-sɔw.

¹³Ba mɩ wɩ nɩ na a nɩbɛ bala na ƴɔnɔ ʋ a jir-ƴɛrɩ̃sɩ a ba yele: “A daba na ma bara a ʋ ƴɛrɩ̃sɩ ʋ na ƴɛrɛ sãwna nɩ a sɩ Naaŋmɩn puor-yir kpɛ̃-son nɩ a Mowisi ƴɛr-kpɛn wa.

¹⁴Sɩ wõ na ʋ yel áa Najarɛtɩ *Jeeju ʋlɔ na wɛlʼã a Naaŋmɩn puor-yir kpɛ̃ɛ ɩ̃ lɩɛr a tʋmɔ ala a Mowisi na kʋ sɩ.”

¹⁵A bala ba jaa na jɛ a ƴɛrɩ̃ guorfʋ diem ꞌwuoro na a Ɩtɩɛn kir-kir-kir, ɩ̃ nyɛ a ʋ nii-sɔw ʋ wɔ̃ taa nɩ a Naaŋmɩn sɩ-tʋnaa nii-sɔw.