Read Birifor, Malba Nɩ-tʋnɩsɩ tʋmɔ Sɛbɛ 9 Bible Online

Nɩ-tʋnɩsɩ tʋmɔ Sɛbɛ 9 - Birifor, Malba bible

Nɩ-tʋnɩsɩ tʋmɔ Sɛbɛ 9

¹Ɩ̃-cɛ a Sol cãa na pure a Nɩ-kpɛ̃ɛ *par-tuurbe bʋɔrɔ ʋ kú ba. Ʋ cenʼã a Naaŋmɩn *baar-lo-nɩ-kpɛ̃ɛ sɛ

²na sʋɔr sɛbsɩ a ʋ cenʼɩ̃ na kʋ a *puorfʋ yir ni-dierbe na be a Damasɩ, ɩ̃ a ala ɩ̃ ɩ ʋ nyɛ na a nɩbɛ bala na tuure a Nɩ-kpɛ̃ɛ sɔr, a dabsɩ mɩɩ a pɔɔbɔ, ʋ tʋɔ nyɔɔr ba cenʼɩ̃ a Jerujalɛm.

³A lɛ ʋ na be a sɔr pʋɔ cere na pɩɛlɛ a Damasɩ, a cãa yi na a saꞌlon a jie naan ɩ̃ wa nyɩnyɩl pɔw ʋ,

⁴ʋ lo a tene ɩ̃ wõ kɔkɩr ʋ yel ʋ: “Sol Sol, bõ ɩ̃ ɩ a fʋ hʋɔlɔ ma a nɔhɔ̃?”

⁵A Sol soor: “Nɩ-kpɛ̃ɛ, ala fʋ ɩ?” Ʋ yel ʋ: “Ɩ̃ ɩ na a *Jeeju ʋlɔ fʋ na hʋɔlɔ.

⁶Ɩ̃-cɛ, ir kpɛ a tẽw pʋɔ. A be, ba na yel fʋ na a ala fʋ na sɛw fʋ maal.”

⁷Ɩ̃ a dabsɩ bala na lãa cere nɩ a Sol, ba ɩraa na lɛ gbul, a mɩnɛ ba na wõ a kɔkɩr ɩ̃ ma nyɛ nɩrɛ wa.

⁸A Sol lɛ irʼã ɩraa ɩ̃ yuo a mimie ɩ̃ ma nyɛ bom wa, a ba nyɔw ʋ a nuu taw kpɛ nɩ a Damasɩ.

⁹Ʋ jɔ̃w na maalʼɩ̃ bibie ata, ɩ̃ ma dɩ bom wa, ma mɩ nyu kʋ̃ɔ wa.

¹⁰Ɩ̃-cɛ *par-tuure ƴen sʋbɔ be na be a Damasɩ-tẽw pʋɔ ba na bʋɔlɔ a Ananɩya. Ʋ nyɛ na a Nɩ-kpɛ̃ɛ a sɩɛ bom kaarɩ̃ ʋ bʋɔl ʋ: “Ananɩya!” Ʋ yel: “Nɩ-kpɛ̃ɛ, ɩ̃ sɔw na.”

¹¹Ɩ̃ a Nɩ-kpɛ̃ɛ yel ʋ: “Ir cen a sɔr ʋlɔ pʋɔ ba na bʋɔlɔ a Sɔr Toraa. A fʋ̃ʋ cen, fʋ ta a Judasɩ yir ɩ̃ soor a Tarsɩ-tẽw daba ʋlɔ ba na bʋɔlɔ a Sol. Ʋ be na be sʋɔrɔ a Naaŋmɩn,

¹²ɩ̃ ʋ nyɛ na daba ba na bʋɔlɔ a Ananɩya a sɩɛ bom kaarɩ̃, ʋ kpɛ a ʋ sɛ̃ dɔɔl ʋ a ʋ nuu a ʋ mimie na lɛ yuo.”

¹³A Ananɩya yel: “Nɩ-kpɛ̃ɛ, nɩ-yaw man ma na a daba na ƴɛrɩ̃, nɩ a bier a jaa ʋ na maal a fʋ nɩbɛ na be a Jerujalɛm.

¹⁴Ɩ̃ a ka mɩ, a *baar-lo-nɩ-bɛrɛ mɩ kʋ ʋ na a sɔr ʋ na nyɔɔrʼɩ̃ a bala ba jaa na bʋɔlɔ a fʋ yuor.”

¹⁵Ɩ̃-cɛ a Nɩ-kpɛ̃ɛ yel ʋ na: “Cen, a-na-ɩ ɩ̃ vɛlʼã a ʋna daba ir ʋ na ɩ a ɩ̃ tʋtʋnɔ, miilʼɩ̃ a ɩ̃ yuor kʋ a nɩ-bʋlsɩ nɩ a ba jamansɩ nɩ a *Ɩsɩrayɛl nɩbɛ mɩ a ba na bɔ̃w ma.

¹⁶A maa mɩ̃ɛ, ɩ̃ na miil ʋ na a won ala ʋ na sɛw ʋ nyɛ a ɩ̃ ɩnɛ.”

¹⁷Ala-ɩ̃-sɔ a Ananɩya cenʼã na kpɛ a yir ʋlɔ pʋɔ a Sol na be ɩ̃ dɔɔl ʋ a nuu ɩ̃ yel: “Ɩ̃ yɛbɛ Sol, a Nɩ-kpɛ̃ɛ Jeeju ʋlɔ na nyɩr fʋ a lɛ fʋ na be a sɔr pʋɔ waara ɩ̃ tʋ̃ ma a fʋ sɛ̃, a fʋ mimie na lɛ yuo ɩ̃ a fʋ na sɛw nɩ a Naaŋmɩn Sɩɛ.”

¹⁸A jie naan, bom ꞌlaw na a Sol mimie pʋɔ lo wɔ̃ taa nɩ jɩm pɔbɔ, ɩ̃-cɛ ʋ lɛ nyɛrɛ. A lɛ, ʋ irʼã a ba mʋr ʋ a kʋ̃ɔ,

¹⁹ɩ̃ a lɛ ʋ na dɩ a dɩb baar, ʋ lɛ nyɛ na kpɛ̃w. A Sol jɛ na a be a Damasɩ fɩ̃ɩ nɩ a *par-tuurbe bala na be a be.

²⁰A jie naan, ʋ cenʼã a *puorfʋ yie pʋɔ na nyɔw ɩ̃ hiere kʋrɔ ba áa *Jeeju ɩ na a Naaŋmɩn Bie.

²¹A nɔɛ ko na a bala ba jaa na wõ a ʋ ƴɛrɩ̃, a ba sooro taa: “Aa ɩ a daba na ɩ̃ dãa bũbure a bala na bʋɔlɔ a yuorʼãa a Jerujalɛm wa? Ɩ̃ ꞌwaa mɩ wa a ka a ʋ nyɔɔr ba lũ cenʼɩ̃ a *baar-lo-nɩ-bɛrɛ jie wa?”

²²Ɩ̃-cɛ a Sol fãw dɔɔlɔ na a bibie a jaa, ʋ ma ƴɛr a ƴɛrɩ̃ tʋɔ a Jufisɩ bala na be a Damasɩ, a jur bɔr ba, a mɩnɛ ʋ na ma miile ba áa Jeeju ɩ̃ sɩrɩ̃ ɩ a *Kirisi.

²³A mɩnɛ a bibi-yaw na tɔl baar, a Jufisɩ duo na taa goro a Sol kúfʋ.

²⁴Ɩ̃-cɛ nɩrɛ yel ʋ na á ba goro ʋ na. Ba gure na a tẽw dɔ̃dɔ-nɔɛ a mɔtɔ̃w nɩ a tɩsɔw a mɩnɛ ba na kúrɔ ʋ.

²⁵Ɩ̃-cɛ a Sol par-tuurbe ɩ na ʋ kpɛ kpɛ̃jɛrɩ̃ pʋɔ a tɩsɔw a ba tur ʋ bar ʋ suu a tẽw dacin dapuor.

²⁶A mɩnɛ a Sol na ta a Jerujalɛm, ʋ bʋɔrɔ na ʋ pɔw a *par-tuurbe, ɩ̃-cɛ a ba jaa jɔrɔ ʋ na dãbɩ̃ɛ a-na-ɩ baa sɔw a ʋ sɩrɩ̃ na ɩ a *par-tuure wa.

²⁷Ɩ̃-cɛ a Banabasɩ tɛrɛ ʋ na cenʼɩ̃ a *nɩ-tʋnɩsɩ sɛ̃ ɩ̃ man ba a mɩnɛ a Sol na nyɛ a Nɩ-kpɛ̃ɛ a sɔr pʋɔ, nɩ a mɩnɛ a Nɩ-kpɛ̃ɛ na ƴɛrʼɩ̃ ʋ. Ʋ mɩ yel ba na a mɩnɛ a Sol na de a *Jeeju yuor ƴɛrʼɩ̃ a ƴɛrɩ̃ nɩ ꞌlafʋ a lɛ ʋ na be a Damasɩ.

²⁸Wa nyɔw nɩ a ʋna daarʼãa, a Sol pɔw na a par-tuurbe a ba lãa yʋɔrɔ a Jerujalɛm ɩ̃ de a Jeeju yuor ƴɛrɛ nɩ a ƴɛrɩ̃ nɩ ꞌlafʋ,

²⁹ɩ̃ mɩ ƴɛrɛ nɩ a Jufisɩ bala na wono a Gɩrɛkɩ ƴɛrɩ̃ ɩ̃ mana taa nɩ ba, ɩ̃ a bala ʋlɔ bʋɔrɔ ba kú ʋ.

³⁰A mɩnɛ a yɛɛr na wonaa, ba tɔw na a Sol cenʼɩ̃ a Sejare na ƴɔ̃w a sɔr ʋ cere a Tarsɩ.

³¹A lɛ, a *duo-puorbo dãa na be a pɩɛnfʋ pʋɔ a Jude nɩ a Galile nɩ a Samari wɛɛ a jaa. Ba pɔwrɔ na a fãw jɔrɔ nɩ a Nɩ-kpɛ̃ɛ, ɩ̃ a mɩnɛ a Naaŋmɩn Sɩɛ na sũono ba, a nɩbɛ wɩɛrɛ na dɔɔlɔ a ba pʋɔ.

³²A Pɩɛr yʋɔrɔ na a ten a jaa. Ɩ̃ bibir bõ-ƴen ʋ cenʼã a popuorbo sɛ̃ a Lɩda,

³³na nyɛ a daba ba na bʋɔlɔ a Ene a be, na maal yomo anuu-nʼata a sɛn pʋɔ a-na-ɩ ʋ gbɛrʼã.

³⁴A Pɩɛr yel ʋ: “Ene, a *Jeeju-Kirisi kpɛmɛ fʋ na. Ir pilĩ a fʋ sɛn”, a Ene ir a jie naan.

³⁵A Lɩda nɩbɛ, nɩ a Saarɔ̃ nɩbɛ ba jaa nyɛ ʋ na ɩ̃ lɩɛb puoro a Nɩ-kpɛ̃ɛ.

³⁶Pɔw be na be a Jope ɩ̃ ɩ a popuoro a ba bʋɔlɔ Tabɩta, a ʋna yuor a Gɩrɛkɩ nɩbɛ lɩɛb bʋɔlɔ a Dɔrkasɩ, a lɛ yelʼã a “Wʋl-pɩɛl.” Tʋ̃-vɛlɛ ʋ dãa tʋnɔ a daar a jaa sũono nɩ a nãw deme.

³⁷Wʋlɩ̃ dãa na nyɔw ʋ a ʋna daarʼãa ʋ kpi a ba so ʋ a kʋ̃ɔ baar ɩ̃ de ʋ do nɩ bin a bɔɔpɩɛn diem.

³⁸A Lɩda pɩɛlʼɩ̃ na a Jope, ala-ɩ̃-sɔ a mɩnɛ a *par-tuurbe bala na be a Jope na wõ áa Pɩɛr be na a be, ba tʋ na nɩbɛ ayi a ʋ sɛ̃ nɩ a ƴɛrɩ̃ na: “Sɩ sʋɔr fʋ na a fʋ na wa a sɩ jie fɔfɔw,”

³⁹a Pɩɛr ir a jie naan a ba lãa cen. A mɩnɛ ʋ na ta a be, ba de ʋ na do nɩ a garɩ̃ a bɔɔpɩɛn diem, ɩ̃ a kpɩ̃ɩ-pɔɔbɔ ba jaa taw na ta ʋ ɩ̃ kono miile nɩ ʋ a kparsɩ nɩ a cẽcene a Dɔrkasɩ na dãa maal a lɛdaar ʋ na dãa be nɩ ba.

⁴⁰A Pɩɛr ɩ na a ba yi ba jaa ɩ̃ ʋ lo gburĩ a dume ɩ̃ sʋɔr a Naaŋmɩn, ɩ̃ lɩɛb a nii-sɔw cɔw a kũu ɩ̃ yel: “Tabɩta, ir!” A kũu yuo a mimie nyɛ a Pɩɛr ɩ̃ ir jɛ.

⁴¹A Pɩɛr nyɔw ʋ na a nuu sũo ʋ ʋ ir, ɩ̃ ʋ bʋɔl a popuorbo nɩ a kpɩ̃ɩ-pɔɔbɔ na ʋ miilʼɩ̃ ba ʋ lɛ ɩ a nɩ-mimir.

⁴²A Jope-tẽw nɩbɛ ba jaa bɔ̃wnaa na ɩ̃ a nɩ-yaw sɔw de a Nɩ-kpɛ̃ɛ.

⁴³A Pɩɛr jɛ na be a Jope kam a daba ʋlɔ yir ba na bʋɔlɔ a Sɩmɔ̃, na ɩ a gan-cɔɔrɔ.