Read Birifor, Malba Orom Sɛbɛ 1 Bible Online

Orom Sɛbɛ 1 - Birifor, Malba bible

Orom Sɛbɛ 1

¹A maa Pol na ɩ a *Jeeju-Kirisi tʋtʋnɔ ɩ̃ tɩɩrɛ a sɛbɛ na, a maa a Naaŋmɩn na vɛl ir ɩ̃ ɩ a *nɩ-tʋnaa a ʋ ƴɛr-son hierfʋ ɩnɛ.

²A Naaŋmɩn dãa na de nĩe pʋlɩ̃ nɩ sɩ a ƴɛr-son naa a ʋ ƴɛr-hierbe ƴɛrɩ̃sɩ pʋɔ, a mɩnɛ ba na dãa sɛb a Naaŋmɩn Sɛbɛ pʋɔ.

³A ɩ na a ʋ Bie ƴɛrɩ̃, na ɩ a sɩ Nɩ-kpɛ̃ɛ Jeeju-Kirisi ba na dɔw a Davɩtɩ bal pʋɔ, ʋ ɩ a nɩrɛ;

⁴ɩ̃-cɛ a Naaŋmɩn miilʼɩ̃ na a ʋ fãw á ʋ ɩ na a ʋ Bie, tu nɩ a ʋ Sɩ-cɛcɛ tʋmɔ a mɩnɛ ʋ na maal ʋ ʋ ir a kũusɩ pʋɔ.

⁵A ʋlɔ ɩnɛ, ɩ̃ pɔw na a Naaŋmɩn sũofʋ wa lɩɛb ɩ a nɩ-tʋnaa, ɩ̃ na bʋɔl a tẽ-bʋrɔ bʋrɔ a jaa nɩbɛ nɩ a ʋ yuor, a ba ƴɔ̃w ʋ a nyãa, mɩ wono nɩ ʋ a toor.

⁶A nyɩmɩ mɩ, nyɩ be na tɔ a bana nɩbɛ pʋɔ a Naaŋmɩn na bʋɔl a nyɩ na ɩ a Jeeju-Kirisi nɩbɛ.

⁷Ɩ̃ tɩɩrɛ na a sɛbɛ na kʋrɔ a nyɩmɩ nyɩ jaa na be a Orom-tẽw, a nyɩmɩ a Naaŋmɩn na nʋnɔ, ɩ̃ mɩ ow nyɩ a kpee. A sũofʋ nɩ a pɩɛnfʋ na yi a sɩ Sãa Naaŋmɩn nɩ a Nɩ-kpɛ̃ɛ Jeeju-Kirisi sɛ̃ á be a nyɩ jie.

⁸Ɩ̃ puoro na a ɩ̃ Naaŋmɩn nɩ a *Jeeju-Kirisi yuor a nyɩ jaa ɩnɛ, a-na-ɩ a tẽw ʋ jaa pʋɔ ba ƴɛrɛ na a nyɩ ƴɔ̃w-nyãa ƴɛrɩ̃.

⁹A Naaŋmɩn ʋlɔ tʋn ɩ̃ na tʋnɔ nɩ a ɩ̃ suur ʋ jaa, hiere nɩ a ƴɛr-son ʋlɔ na yi a ʋ Bie jie, bɔ̃w ma na. Ʋ bɔ̃w na ka ɩ̃ ma tɩɛrɛ nɩ nyɩ na a daar a jaa

¹⁰a lɛ ɩ̃ na ma puoro, sʋɔrɔ nɩ ʋ ma gala wa. A ala ɩ ʋ sɔw na, ɩ̃ na pãa na sɩrɩ̃ nyɛ a sɔr wɩ a be a nyɩ jie.

¹¹A-na-ɩ ɩ̃ tɩɩ na bʋɔrɔ ɩ̃ nyɛ nyɩ kʋ nyɩ a Naaŋmɩn Sɩɛ tʋɔfʋ kãw a nyɩ na nyɩrɩ̃ tɛrɛ a kpɛ̃w.

¹²Ɩ̃ bʋɔrɔ na ɩ̃ yel a lɛ, a maa wa be a nyɩ sɔ̃w, sɩ na kʋ na taa a ꞌlafʋ, a sɩ ƴɔ̃w-nyãa sɩ na tɛrɛ ɩnɛ, a nyɩmɩ nɩ a maa.

¹³Yɛɛr, maa bʋɔrɔ nyɩ baala wa; ɩ̃ ma tɩɛrʼɩ̃ na gbɛɛ yayaw a nyɩ jie wɩfʋ a mɩnɛ ɩ̃ na tʋɔ pɔw a ɩ̃ tʋmɔ wɔmɔ a nyɩ jie, wɔ̃ taa nɩ a mɩnɛ ɩ̃ na pɔw a wɔmɔ a tẽ-bʋrɔ bʋrɔ ŋmɛɛ pʋʋr; ɩ̃-cɛ maa nyɛ a sɔr wa ta nɩ a dɩnaa wa.

¹⁴A-na-ɩ maa ɩ̃ sɛw na cen a yel-bɔɔnbɔ, nɩ a bala na ma bɔ̃w bom wa jie, nɩ a nɩ-kpaarsɩ nɩ a gẽgemsɩ jie.

¹⁵Ala-ɩ̃-sɔ ɩ̃ tɩɩ bʋɔrɔ ɩ̃ wɩ nɩ a ƴɛr-son hier kʋ a nyɩmɩ mɩ na be a Orom-tẽw.

¹⁶Maa jɔrɔ a vĩ a Naaŋmɩn ƴɛr-son ƴɛrfʋ ɩnɛ wa, a-na-ɩ ʋ ɩ na a fãw ʋlɔ a Naaŋmɩn na faara nɩ a nɩrɛ lɛ na sɔw ʋ: a Jufisɩ jie sɛr, nɩ a nɩ-bʋrɔ bʋrɔ ba jaa jie mɩ.

¹⁷A-na-ɩ a ʋna ƴɛr-son jie, a Naaŋmɩn miilʼã a mɩnɛ a nɩrɛ na tʋɔrɔ toro a ʋ nii-sɔw, a mɩnɛ ʋ na nyɔw nɩ a ƴɔ̃w-nyãa wa cenʼɩ̃ ta nɩ a baarfʋ daar, tu nɩ a ƴɛr-bir ʋlɔ na be a Naaŋmɩn Sɛbɛ pʋɔ na yel: “A ʋlɔ na tor a Naaŋmɩn jie a ʋ ƴɔ̃w-nyãa ɩnɛ, na pɔw na a baafʋ.”

¹⁸Sɩ nyɛ na a Naaŋmɩn su-tuo ʋ yi a saa juu, ɩ̃ suu pɔw a maal-bi-kpansɩ nɩ a faar ala a jaa a nɩbɛ na maal, a maal-faar ala ba na piw nɩ a yel-mɩ̃ɛ bar.

¹⁹A-na-ɩ a ala ba na tʋɔrɔ bɔ̃wnɔ a Naaŋmɩn ɩnɛ a be na cãa pʋɔ a ba nii-sɔw; a Naaŋmɩn mɩ̃ɛ miilʼɩ̃ ba na a ala.

²⁰Wa nyɔw nɩ a tẽw maalfʋ daar, a Naaŋmɩn miilʼã a mɩnɛ ʋ na wɔ̃. A ala sɩ na ma dãa tʋɔrɔ nyɛrɛ wa, yi na a cãa pʋɔ a ala ʋ na maal ɩnɛ. A lɛ bʋɔrɔ na a yel, a ʋ fãgã daadaa, nɩ a ʋ Naaŋmɩn ɩfʋ wãa. A nɔhɔ̃, nɩrɛ ma lɛ tɛrɛ ful-yifʋ jie wa.

²¹Ba bɔ̃w na a Naaŋmɩn, ɩ̃-cɛ baa kʋrɔ ʋ a ju-kpɛ̃ɛ wa; baa mɩ puoro ʋ a mɩnɛ ʋ na ɩ a Naaŋmɩn wa. A ba juu tɩɛrɩ̃sɩ lɩɛbʼã ɩ bõ-jaalsɩ, ɩ̃ a ba sube liw a baa tʋɔrɔ bɔ̃wnɔ bom wa.

²²Ba ma yelʼã a yɛ̃-bɔɔnbɔ ba ɩ, ɩ̃ lɩɛb ɩ dãbolo.

²³Ba de na a Naaŋmɩn ʋlɔ na ma tɛrɛ kũu wa yo-yifʋ, na ba lɩɛb kʋrɔ a bʋtɩbɛ ala na wɔ̃ taa nɩ a nɩrɛ na wa kpiire, mɩɩ a lili, a dʋn, nɩ a wɩɩr ba na pɛrɩ̃.

²⁴Ala-ɩ̃-sɔ a Naaŋmɩn de ba bar a ba sube yel-kpansɩ bɔfʋ pʋɔ, a ba sãwna a ba ĩgana maala nɩ a vĩ yele a ba sɔ̃w.

²⁵Ba de na a Naaŋmɩn yel-mɩ̃ɛ tɛw nɩ a jiri, ɩ̃ puoro tʋnɔ nɩ a tʋmɔ kʋrɔ a ala a Naaŋmɩn na maal, ɩ̃ cɛ a Naaŋmɩn na ɩ a yel-maala bar, na ɩ a ʋlɔ na sɛw nɩ a pɛwfʋ a daar a jaa. *Amɛn.

²⁶Ala-ɩ̃-sɔ a Naaŋmɩn de ba bar a vĩ yele bɔfʋ pʋɔ. A ba pɔɔbɔ mɩ lɩɛbʼã maala a ala na ma ɩ wa, a-na-ɩ ba ma barʼã a dabsɩ ɩ̃ lɩɛb bʋɔrɔ taa a ba nɩ̃ɛ.

²⁷A lɛ ʋ mɩ a dabsɩ jie. Ba ma barʼã a pɔɔbɔ, ɩ̃ lɩɛb pebe a ba dab-tɔ. A daba nɩ a ʋ dab-tɔ maala na a vĩ yele, pɔwrɔ nɩ a kpãafʋ ala na sɛw nɩ ba a ba burbur ɩnɛ.

²⁸A mɩnɛ ba na ma nyɛ a Naaŋmɩn bɔ̃wfʋ ʋ ɩ ba son wa, a Naaŋmɩn de ba na bar a ba tɩɛrɩ̃-saansɩ pʋʋr, a ba maala a ala na ma vɩɛlɛ wa.

²⁹Ba bɔ̃w na a gõgolĩfʋ tʋmɔ a jaa: a maal-fãa, a nɩbɛ yele jɩɛlfʋ, nɩ a bier maalfʋ. Ba mɩ sɛw nɩ na a nyuur, ɩ nɩ a nɩ-kúrbɔ, faara nɩ taa, bɛlɛ nɩ taa, tɛrɛ nɩ a tɩɛrɩ̃-bebe, mɩ cile nɩ taa.

³⁰Ba ma mɩ koro na taa, ꞌlaarʼɩ̃ a Naaŋmɩn, mɩ kpɛrɛ nɩ a nɩbɛ, bʋɔrɔ nɩ a ju-kpɛ̃ɛ nɩ a yuor. Ba bɔ̃w na a mɩnɛ ba na fʋ̃fʋlɔ ɩ̃ maala a bier, ɩ̃ mɩ wõw a toor a ba dɔɔrbɔ jiir.

³¹Baa tɛrɛ bɔ̃wfʋ wa, ɩ nɩ a nɩ-gõgolĩsɩ, mɩ kpɛ nɩ a bɩcɩɩr, ma mɩ tɛrɛ nã-bɔ̃wfʋ wa.

³²Ba bɔ̃w na a Naaŋmɩn ƴɛrɩ̃ ʋlɔ na yel áa bala na maala a lɛ sɛw nɩ na a kũu. Ɩ̃-cɛ ba cãa na maala a ala, ɩ̃ mɩ kpiire a bala na mɩ maala a lɛ.