Read Birifor, Malba Orom Sɛbɛ 13 Bible Online

Orom Sɛbɛ 13 - Birifor, Malba bible

Orom Sɛbɛ 13

¹A sɛw na a nɩrɛ lɛ na wur a ʋ mɩ̃ɛ a fãgã deme na ꞌwuoro a tẽw jie, a-na-ɩ fãgã ma be be ɩ̃ ma yi a Naaŋmɩn jie wa, ɩ̃ a fãgã deme na be a ka, Naaŋmɩn biin ba ba jaa.

²Ala-ɩ̃-sɔ a ʋlɔ na jɛbɛ nɩ a fãgã deme, ʋ jɛbɛ nɩ na a fãgã ʋlɔ a Naaŋmɩn na biin, ɩ̃ a ʋlɔ nɔɔ maala a lɛ na taw na a yel dɔɔl a ʋ juumɩ.

³A bala na maala a vɩlaa, baa sɛw na jɔrɔ a tẽw nɩ-bɛrɛ dãbɩ̃ɛ wa, ɩ̃-cɛ a bala tɛw na maala a fãa ɩ̃ sɛw na jɔrɔ ba. Faa bʋɔrɔ fʋ jɔrɔ a fãgã deme dãbɩ̃ɛ wa mɩɩ? Maala a vɩlaa ɩ̃ ba na kpiire fʋ na.

⁴A-na-ɩ a Naaŋmɩn tʋmɔ pʋɔ ba be ƴɔnɔ fʋ a vɩla-maalfʋ pʋɔ, ɩ̃-cɛ a fʋ̃ʋ maala a bier, jɔrɔ ba a dãbɩ̃ɛ, a-na-ɩ aa ɩ pɔrɔ ba tɛrɛ a fãgã kpãana nɩ wa. A Naaŋmɩn su-tuo ba miile, waara nɩ a ʋ kpãafʋ a ʋlɔ na maala a bier jie.

⁵Ala-ɩ̃-sɔ, a ɩ na son a fʋ na wur a fʋ mɩ̃ɛ a ba jie, a kɔ̃ ɩ a Naaŋmɩn suur ɩnɛ tɛw ʋ wa, ɩ̃-cɛ a na mɩ yi a fʋ mɩ̃ɛ bɔ̃wfʋ jie.

⁶A ala ɩnɛ nyɩ ma yara a lãpo, a-na-ɩ a fãgã deme bala na cɛlɛ tɔ a ana tʋmɔ ɩ na a tʋtʋnbɔ a Naaŋmɩn na biin.

⁷Nyɩ́ ya a nɩrɛ lɛ a bom lɛ nyɩ na tɛrɛ ʋ. A lãpo ʋ mɩɩ, nyɩ́ ya ʋ; a sɛbɛ kãw libie ʋ mɩɩ, nyɩ́ ya ʋ. Nyɩ́ jɔrɔ a ʋlɔ na sɛw nɩ a jɔfʋ, ɩ̃ ƴɔnɔ a ʋlɔ na sɛw nɩ a ƴɔ̃wfʋ.

⁸Nyɩ taa tɛrɛ nɩrɛ san ɩ̃ a ala ma ɩ a nʋfʋ nyɩ na nʋnɔ taa a nyɩ sɔ̃w wa, a-na-ɩ a ʋlɔ na nʋnɔ a ʋ tɔ deme, ʋ maalʼã a ƴɛr-kpɛn a jaa baar.

⁹A-na-ɩ a ƴɛr-kpɛn ala yelʼã: “Taa wa gana nɩ pɔw kpee mɩɩ a dab-kpee wa, taa wa kúrɔ nɩrɛ wa, taa wa jure wa, taa ꞌwuoro nɩrɛ bom a ꞌwuor-fãa wa”. Ɩ̃-cɛ a ƴɛr-kpɛn ala a jaa, nɩ a ala na cɛ, tiw na a ƴɛr-kpɛ̃w bõ-ƴen pʋɔ na yel: “Nʋnɔ a fʋ tɔ sʋbɔ a fʋ mɩ̃ɛ kaarɩ̃.”

¹⁰A fʋ̃ʋ na nʋnɔ a fʋ tɔ sʋbɔ, faa lɛ tʋɔrɔ maala ʋ a fãa wa. Ala-ɩ̃-sɔ, a ʋlɔ na tɛrɛ a nʋfʋ a lɛ maalʼã a ƴɛr-kpɛn a jaa baar.

¹¹Nyɩ́ bɔ̃w maala a lɛ, a-na-ɩ nyɩ bɔ̃w na a daar ʋlɔ pʋɔ sɩ na be. A gʋ̃ɔ pʋɔ irfʋ daar ta na. A faafʋ pɩɛl sɩ na a ƴɛ̃ƴɛrɩ̃ na, gãw a sɩ ƴɔ̃w-nyãa nyɔwfʋ daar.

¹²A tɩsɔw tɔlɔ na, a wɩɛr kpaarʼã. Ala-ɩ̃-sɔ, sɩ́ bar a tʋmɔ ala na ma maala a tɩsɔw, ɩ̃ lɩɛb de a jɛb-yele ala sɩ na jɛbɛ nɩ a cãa pʋɔ.

¹³Sɩ́ ɩ a sɩ maalfʋ ʋ vɩɛlɛ a mɩnɛ a na sɛw a cãa pʋɔ. Sɩ́ bɔ̃w tɛrɛ a sɩ mɩ̃ɛ a kpokpo dɩb dɩfʋ, a dãa kʋfʋ, a gã-ta-burbur, a pebfʋ, a gɔm-bɔfʋ nɩ a nyuur tɛrɛfʋ ɩnɛ.

¹⁴Nyɩ́ bar a Nɩ-kpɛ̃ɛ *Jeeju-Kirisi baa-paalaa ʋ pɔw nyɩ. Nyɩ taa bar a nyɩ mɩ̃ɛ ʋ tɛrɛ a ɩ̃gan buur tɩɛrʋ̃, maala nɩ a ala ʋ na bʋɔrɔ wa.