Read Birifor, Malba Orom Sɛbɛ 14 Bible Online

Orom Sɛbɛ 14 - Birifor, Malba bible

Orom Sɛbɛ 14

¹Nyɩ́ sɔw de a ʋlɔ na bal a ƴɔ̃w-nyãa pʋɔ, kɔ̃ cɩɩrɛ a ʋ tɩɛrɩ̃sɩ wa.

²Nɩrɛ ƴen sʋbɔ na tʋɔ na tɛrɛ a ƴɔ̃w-nyãa dɩrɛ nɩ a yele a jaa, ɩ̃-cɛ a kãw na bal a ƴɔ̃w-nyãa pʋɔ dɩrɛ na a jɛ-vɛɛ tɛw.

³A ʋlɔ na dɩrɛ a yele a jaa ma sɛw na kpɛrɛ a ʋlɔ na ma dɩrɛ a jaa wa. Ɩ̃-cɛ a ʋlɔ na ma dɩrɛ a yele a jaa wa, ma mɩ sɛw ʋ ƴɔ̃w a ʋlɔ na dɩrɛ a jaa a ƴɛrɩ̃ wa, a-na-ɩ a Naaŋmɩn sɔw na de ʋ.

⁴Bõ fʋ ɩ ɩ̃ ƴɔnɔ a nɩrɛ kãw tʋtʋnɔ a ƴɛrɩ̃? A ʋlɔ ɩraa a cĩcĩ mɩɩ ʋ faa na lo, a ʋ nɩ-kpɛ̃ɛ a ba. Ɩ̃ ʋ na ɩra na cĩcĩ, a-na-ɩ a Nɩ-kpɛ̃ɛ tɛrɛ na kpɛ̃w na nyɔw ʋ ʋ ɩraa.

⁵Ƴen sʋbɔ na tɩɛrʼã a bibir kãw sa na a bibie ŋmɛɛ, ɩ̃ a kãw tɩɛr áa bibie a jaa ma sa taa wa. A sɛw na a ba jaa na sɩrɩ̃ bɔ̃w ka a ba tɩɛrɩ̃sɩ vɩɛlɛ na.

⁶A ʋlɔ na de a bibir bõ-ƴen ʋ be kpee, a Nɩ-kpɛ̃ɛ ʋ de ƴɔnɔ nɩ. Ɩ̃ a ʋlɔ na dɩrɛ a jaa, a Nɩ-kpɛ̃ɛ ʋ dɩrɛ ƴɔnɔ nɩ, a-na-ɩ ʋ puorʼã a Naaŋmɩn ƴɔ̃w a ala pʋɔ. Ɩ̃ a ʋlɔ na jaara a ala, a Nɩ-kpɛ̃ɛ ʋ mɩ maala ƴɔnɔ nɩ, a-na-ɩ a ʋlɔ mɩ, mɩ puorʼã a Naaŋmɩn ƴɔ̃w a ala pʋɔ.

⁷Nɩrɛ kãw ma be ka a sɩ sɔ̃w a tẽw pʋɔ a ʋ mɩ̃ɛ ɩnɛ wa, ɩ̃ nɩrɛ kãw ma mɩ be a sɩ sɔ̃w ɩ̃ kpi a ʋ mɩ̃ɛ ɩnɛ wa.

⁸A sɩmɩ na be ka a tẽw pʋɔ, a Nɩ-kpɛ̃ɛ ɩnɛ sɩ be ka. A sɩmɩ mɩ kpi, a Nɩ-kpɛ̃ɛ ɩnɛ sɩ mɩ kpi. Ala-ɩ̃-sɔ a sɩmɩ be ka a tẽw pʋɔ mɩɩ sɩ kpi na, a Nɩ-kpɛ̃ɛ ɩ̃ sɔ sɩ.

⁹A *Kirisi kpi na ɩ̃ ir a kũu pʋɔ na tʋɔ ɩ a nɩ-mimie nɩ a kũusɩ Nɩ-kpɛ̃ɛ.

¹⁰Ɩ̃-cɛ a fʋ̃ʋ, bõ ɩnɛ fʋ ƴɔnɔ a fʋ yɛbɛ a ƴɛrɩ̃? Mɩɩ bõ ɩnɛ fʋ mɩ kpɛrɛ ʋ? A-na-ɩ a sɩ jaa nɔɔ ɩraa na a Naaŋmɩn nii-sɔw a ƴɛrɩ̃ guorfʋ ɩnɛ.

¹¹A-na-ɩ a sɛbʼã a Naaŋmɩn Sɛbɛ pʋɔ: “A maa na ɩ a Nɩ-kpɛ̃-mimir ɩ̃ yel, a nɩbɛ ba jaa nɔɔ gburĩ na a dume a ɩ̃ nii-sɔw, ɩ̃ a ba jaa nɔɛ nɔɔ haa na pɛw a Naaŋmɩn.”

¹²A lɛ ʋ, a sɩ jaa fɛw bõ-ƴene-ƴene na manʼã a sɩ mɩ̃ɛ baafʋ ƴɛrɩ̃ kʋ a Naaŋmɩn.

¹³Nyɩ́ ɩ a ƴɛr-ƴɔ̃w-taa a na baar a sɩ sɔ̃w, ɩ̃ a nyɩ ɛ̃ɛ de a maal-bie asɩmɛ: a nyɩ taa wa maal bom kãw na cɩɛrɛ a nyɩ yɛbɛ, mɩɩ na wa maala ʋ ʋ loro a fãa pʋɔ wa.

¹⁴A mɩnɛ ɩ̃ na be a sɩ Nɩ-kpɛ̃ɛ *Jeeju pʋɔ, ɩ̃ bɔ̃w na bɔ̃w ka bõ-dɩraa kãw ma be be na ɩ bõ-saanaa wa. Ɩ̃-cɛ a ala ɩ nɩrɛ wa de na a bom ʋ ɩ a bõ-saanaa, a ʋ jie ʋ ɩ a saanaa.

¹⁵A fʋ̃ʋ maal a cɛ a fʋ yɛbɛ a bõ-dɩraa kãw ɩnɛ fʋ na dɩrɛ, nʋfʋ ma lɛ be a fʋ maalfʋ pʋɔ wa. Taa ɩ a fʋ bom dɩfʋ ʋ maal a nɩrɛ ʋlɔ ɩnɛ a *Kirisi na kpi, ʋ wa bɔr wa.

¹⁶Nyɩ́ tɛrɛ nyɩ mɩ̃ɛ a ala nyɩ na nyɛ a ɩ a bõ-son, a kɔ̃ ɩ bõ-hũhunaa a nɩbɛ jie wa.

¹⁷A-na-ɩ a Naaŋmɩn fãw pʋɔ ƴɛrɩ̃ ma ɩ a bõ-dɩraa nɩ a bõ-nyuuraa ƴɛrɩ̃ wa, ɩ̃-cɛ ʋ ɩ na a torfʋ, a pɩɛnfʋ nɩ a nʋ̃ɔ ʋlɔ na yi a Naaŋmɩn Sɩɛ jie ƴɛrɩ̃.

¹⁸A ʋlɔ na tʋnɔ a Kirisi tʋmɔ a nɔhɔ̃, ʋ maalfʋ kpɛ na a Naaŋmɩn a nyãa ɩ̃ mɩ vɩɛlɛ a nɩbɛ jie.

¹⁹Ala-ɩ̃-sɔ, sɩ́ tuure a tʋmɔ ala na tɛrɛ a pɩɛnfʋ, nɩ a ala na maala sɩ a sɩ karɛɛ a Naaŋmɩn sɔr pʋɔ.

²⁰Taa sãw a Naaŋmɩn tʋmɔ bar a bõ-dɩraa ƴɛrɩ̃ ɩnɛ tɛw wa. Yel-mɩ̃ɛ ʋ, a yele a jaa sɛw na a dɩfʋ, ɩ̃-cɛ a ala ɩ a nɩrɛ bom dɩfʋ maalʼã a ʋ yɛbɛ ʋ lo a fãa pʋɔ, bier ʋ maal.

²¹A sa na a fʋ na jaara a nɩn ꞌwɔbfʋ, mɩɩ a dãa nyufʋ, mɩɩ a bõ-lɛ dɩfʋ na wa maala a fʋ yɛbɛ ʋ loro.

²²Nʋ̃ɔ ma be na a nɩrɛ ʋlɔ jie a ʋ tɩɛrɩ̃sɩ na ma ƴɔnɔ ʋ a ƴɛrɩ̃ wa a lɛ ʋ na maal a bom ʋlɔ ʋ na vɛl ir.

²³Ɩ̃-cɛ a ʋlɔ na baala a dɩb ɩnɛ, ɩ̃ wa dɩ, na pɔw na a ƴɛrɩ̃ a Naaŋmɩn jie, a-na-ɩ ꞌwaa dɩ nɩ ƴɔ̃w-nyãa wa. Ɩ̃ a ala a jaa na ma yi a ƴɔ̃w-nyãa pʋɔ wa ɩ na a maal-fãa.