Read Birifor, Malba Orom Sɛbɛ 15 Bible Online

Orom Sɛbɛ 15 - Birifor, Malba bible

Orom Sɛbɛ 15

¹A sɩmɩ na tɛrɛ a kpɛ̃w, a sɛw na a sɩ na sũono a bala na ma kpɛmɛ a ƴɔ̃w-nyãa pʋɔ wa, ɩ̃ saa sɛw na maala a ala tɛw na nʋmɔ sɩ wa.

²A sɩ jaa fɛw bõ-ƴene-ƴene sɛw na sɩ maala a ala na nʋmɔ a sɩ tɔ sʋbɔ, a na tʋɔ sũo ʋ ʋ karɛɛ a Naaŋmɩn sɔr pʋɔ.

³A-na-ɩ a *Kirisi mɩ̃ɛ ma dãa tɩɛrɛ a ala na nʋmɔ ʋ tɛw wa. Ɩ̃-cɛ a mɩnɛ a na sɛb a Naaŋmɩn Sɛbɛ pʋɔ: “A tʋ-bie ala na yi a bala na tʋrɔ fʋ jie lɩɛbʼã lo a ɩ̃ juumɩ.”

⁴A ala a jaa ba na dãa sɛb a Naaŋmɩn Sɛbɛ pʋɔ a korĩ-cɛ, a sɛbʼã a sɩ jaanfʋ ɩnɛ, a mɩnɛ a sɩ na tʋɔ tɛrɛ a gufʋ tɩɛrʋ̃ son a yi a sɩ su-nyɔwraa nɩ a sɩ baalɩ̃fʋ ala jie sɩ na pɔw a Naaŋmɩn Sɛbɛ pʋɔ.

⁵A Naaŋmɩn ʋlɔ na ɩ a su-nyɔwraa sʋbɔ nɩ a baalɩ̃fʋ sʋbɔ, ú maal nyɩ a nyɩ tɛrɛ tɩɛrʋ̃ bõ-ƴen a nyɩ sɔ̃w, tuure nɩ a *Jeeju-Kirisi pʋ-tɩɛrʋ̃,

⁶a mɩnɛ a nyɩ na lãa tɛrɛ nɔ-bõ-ƴen pɛwrɛ nɩ a Naaŋmɩn ʋlɔ na ɩ a sɩ Nɩ-kpɛ̃ɛ Jeeju-Kirisi Sãa.

⁷Nyɩ́ bɔ̃w pɔwrɔ taa a nyɩ sɔ̃w wɔ̃ taa nɩ a mɩnɛ a *Kirisi na sɔw de nyɩ, a na maal a Naaŋmɩn yuor ʋ yire.

⁸A-na-ɩ ɩ̃ yele nyɩ na, a Kirisi lɩɛbʼã ɩ a Jufisɩ tʋtʋnɔ a Naaŋmɩn yel-mɩ̃ɛ miilfʋ ɩnɛ, a mɩnɛ ʋ na maal a pʋlɩ̃fʋ ala baar a Naaŋmɩn na dãa pʋlɩ̃ nɩ a ba sãa-kʋnbɔ.

⁹Ɩ̃ ʋ mɩ wa na a nɩ-bʋlsɩ na tʋɔ pɛwrɛ a Naaŋmɩn a ʋ nã-bɔ̃wfʋ ɩnɛ, a mɩnɛ a na sɛb a Naaŋmɩn Sɛbɛ pʋɔ: “Ala-ɩ̃-sɔ ɩ̃ na pɛwrɛ fʋ na a nɩ-bʋlsɩ sɔ̃w, ɩ̃ mɩ cɩɛrɛ a yele pɛwrɛ nɩ a fʋ yuor.”

¹⁰A lɛ yelʼã go: “Nɩ-bʋlsɩ, nyɩ́ cɩlɛ nɩ a bala na ɩ a Naaŋmɩn deme.”

¹¹Ɩ̃ lɛ yel: “A nyɩmɩ nɩ-bʋlsɩ, nyɩ́ pɛwrɛ a Nɩ-kpɛ̃ɛ nyɩ jaa. Áa nɩbɛ ba jaa, ba pɛwrɛ ʋ.”

¹²A Ejayi mɩ yelʼã a ʋ sɛbɛ pʋɔ: “A Jɛsɩ bal nɩrɛ nɔɔ wa na wa ir de a nɩ-bʋlsɩ ten, ɩ̃ a ba jaa nɔɔ tɛrɛ nɩ ʋ na a tɩɛrʋ̃ son.”

¹³A Naaŋmɩn ʋlɔ na ɩ a tɩɛrʋ̃ son sʋbɔ, ú sɛw a nyɩ sube nɩ a nʋ̃ɔ nɩ a pɩɛnfʋ a nyɩ ƴɔ̃w-nyãa ɩnɛ. A Naaŋmɩn Sɩɛ fãw ú mɩ maal nyɩ á nyɩ́ tɛrɛ a tɩɛrʋ̃ son a ƴala a nyɩ jie.

¹⁴Ɩ̃ yɛɛr, maa mɩ̃ɛ bɔ̃w na bɔ̃w ka nyɩ sɩrɩ̃ na ɩ a nɩ-sono tɛrɛ a bɔ̃wfʋ a jaa, na mɩ tʋɔ kʋ taa a yɛ̃ a nyɩ sɔ̃w.

¹⁵Ɩ̃-cɛ ɩ̃ cãa na sɛb nyɩ a sɛbɛ, yel nyɩ a yele ŋmɛɛ cãa pʋɔ a na tʋɔ jaw nyɩ a yele ala ɩnɛ. A-na-ɩ a Naaŋmɩn wɩɛfʋ be na a ɩ̃ jie,

¹⁶a mɩnɛ ʋ na ƴɔ̃w ma ɩ̃ ɩ a *Jeeju-Kirisi tʋ̃tʋnɔ a nɩ-bʋlsɩ jie. A Naaŋmɩn tʋ̃-cɛcɛ ɩ̃ tʋnɔ hiere nɩ a ʋ ƴɛr-son, a mɩnɛ ɩ̃ na tʋɔ diere a nɩ-bʋlsɩ kʋrɔ a Naaŋmɩn a baar-lo-bom kaarɩ̃ na kpɛ ʋ a nyãa, a ʋ Sɩɛ na mɩ ow kpee, a ba ɩ a ʋ ben.

¹⁷Ala-ɩ̃-sɔ, a mɩnɛ ɩ̃ na be a Jeeju-Kirisi pʋɔ, ɩ̃ barʼã tɩɛrʋ̃ a ɩ̃ tʋmɔ ɩ̃ na tʋnɔ kʋrɔ a Naaŋmɩn.

¹⁸A ala ɩ ɩ̃ na sɔw na ƴɛr bom kãw, a na ɩ na a ala tɛw a *Kirisi na maal a ɩ̃ ɩnɛ, ɩ̃ na wa nɩ a nɩ-bʋlsɩ a ba na wono a Naaŋmɩn a toor a ɩ̃ ƴɛrɩ̃sɩ nɩ a ala ɩ̃ na maal ɩnɛ,

¹⁹a fãgã ʋlɔ ɩ̃ na maalʼɩ̃ nɔ-kofʋ tʋmɔ miilʼɩ̃ ba a Naaŋmɩn kpɛ̃w, nɩ a Naaŋmɩn Sɩɛ fãgã ba na mɩ nyɛ. A nɔhɔ̃ ɩ̃ manʼã a Kirisi ƴɛr-son ʋ jaa a jiir a jaa, wa nyɔw nɩ a Jerujalɛm wa ta nɩ a Ɩlɩrɩ wɩɛr.

²⁰A-na-ɩ ɩ̃ tɩɛrʋ̃ dãa na ɩ, ɩ man a ƴɛr-son a jiir ala tɛw ba na ma dãa wõ a Kirisi yuor sɛr wa, a mɩnɛ ɩ̃ kɔ̃ wa mɛ ɩ̃ yir dɔɔl nɩrɛ dacin kparaa juu wa.

²¹Ɩ̃-cɛ, ɩ̃ maalʼã a mɩnɛ a Naaŋmɩn Sɛbɛ na yel: “A bala ba na ma dãa hier a ʋ ƴɛrɩ̃ kʋ wa nɔɔ nyɛ ʋ na, ɩ̃ a bala na ma dãa wõ a ʋ ƴɛrɩ̃ wa nɔɔ wonaa na.”

²²A tʋmɔ ala ɩ̃ dãa var ma a sɔr gbɛɛ yayaw a nyɩ jie wɩfʋ,

²³ɩ̃-cɛ a ƴɛ̃ƴɛrɩ̃ na, ɩ̃ baarʼã a ɩ̃ tʋmɔ a be a ana wɛɛ naa. Ɩ̃ a mɩnɛ a yõ-yaw pʋɔ ɩ̃ na dãa bʋɔrɔ ɩ̃ wɩ nyɛ nyɩ,

²⁴a ƴɛ̃ƴɛrɩ̃ na, a maa wa cere a Ɛsɩpan-tẽw ɩ̃ bʋɔrɔ na ɩ̃ ꞌlaw ꞌwuor nyɩ je kãa. A na nʋmɔ ma na a mɩnɛ sɩ na nyɛrɛ taa mɩ beree taa a bibie ala pʋɔ, ɩ̃ a ala baar ɩ̃ na mɩ pɔw a sũofʋ a nyɩ jie a ʋna tẽw naa cenfʋ ɩnɛ.

²⁵Ɩ̃-cɛ a ƴɛ̃ƴɛrɩ̃, Jerujalɛm ɩ̃ cere a Naaŋmɩn popuorbo tʋmɔ ɩnɛ na be a be.

²⁶A-na-ɩ a *duo-puorbo bala na be a Masɛdɔn nɩ a Akayi ten guorʼã taa a libie cɩɛrfʋ a Naaŋmɩn bibiir bala na ɩ a nãw deme a Jerujalɛm ɩnɛ.

²⁷A bala mɩ̃ɛ ɩ̃ guor taa ba yẽ a ala maalfʋ, ɩ̃-cɛ a dãa na sɩrɩ̃ sɛw a ba na maal a lɛ. A-na-ɩ a ala ɩ a Jerujalɛm popuorbo ɩ na a ba po a Naaŋmɩn Sɩɛ yele nɩ a nɩ-bʋlsɩ, a nɩ-bʋlsɩ mɩ sɛw na na mɩ po a ba ɩ̃gan buur yele a mɩ sũo a Jerujalɛm popuorbo.

²⁸A maa wa maal a ʋna tʋn naa baar, na ɩ ɩ̃ de a libie ala ba na cɩɛr a jaa tɩɩr kʋ a Jerujalɛm deme, ɩ̃ na ꞌlaw na nyɛ nyɩ, ɩ̃ pãa cere a ɛsɩpan-tẽw.

²⁹Ɩ̃, ɩ̃ bɔ̃w ka a lɛ ɩ̃ nɔɔ wɩɛrɛ a be a nyɩ jie, ɩ̃ na tɛrɛ na a *Kirisi sũofʋ na ƴala, wɩ nɩ.

³⁰Yɛɛr, nyɩ́ nyɛ a ala ɩ̃ na sʋɔrɔ nɩ nyɩ a sɩ Nɩ-kpɛ̃ɛ *Jeeju-Kirisi yuor, nɩ a Naaŋmɩn Sɩɛ nʋfʋ ɩnɛ. Nyɩ́ pɔw ma a ɩ̃ jɛb pʋɔ, sʋɔrɔ nɩ a Naaŋmɩn ƴɔnɔ ma,

³¹a mɩnɛ ɩ̃ na cɩ̃ɛ a Naaŋmɩn to-woonbo jie na be a Jude wɩɛr pʋɔ, ɩ̃ a popuorbo na mɩ sɔw de ma vɩlaa a libie ala ɩ̃ na cere nɩ.

³²A nɔhɔ̃, a Naaŋmɩn wa sɔw, ɩ̃ na ta na a be a nyɩ jie nɩ nʋ̃ɔ, mɩ pɔw nɩ a pɩɛnfʋ a nyɩ sɔ̃w.

³³A Naaŋmɩn na ɩ a pɩɛnfʋ sʋbɔ, ú be nɩ nyɩ nyɩ jaa. *Amɛn.