Read Birifor, Malba Orom Sɛbɛ 16 Bible Online

Orom Sɛbɛ 16 - Birifor, Malba bible

Orom Sɛbɛ 16

¹Ɩ̃ sʋɔr nyɩ na a sɩ yɛ-pɔw Febe ɩnɛ, a ʋlɔ na tʋnɔ a Naaŋmɩn tʋn a Sãkire-tẽw *duo-puorbo sɔ̃w,

²a nyɩ na bɔ̃w de ʋ a Nɩ-kpɛ̃ɛ yuor pʋɔ, a mɩnɛ a na sɛw na maala a popuorbo sɔ̃w, ɩ̃ mɩ sũo ʋ a bom jaa lɛ pʋɔ ʋ na bʋɔrɔ. A ʋlɔ mɩ̃ɛ mɩ dãa na sũo nɩ-yaw, nɩ a ɩ̃ tɔr jaa.

³Nyɩ́ puor a Pɩrɩsɩl nɩ a Akɩlasɩ kʋ ma. Ba ɩ na a ɩ̃ lãa-tʋnbɔ a *Jeeju-Kirisi tʋmɔ pʋɔ,

⁴ɩ̃ mɩ dãa sɔw a kũu a ɩ̃ baafʋ ɩnɛ. Aa ɩ maa tɛw ɩ̃ bɔ̃w wa, ɩ̃-cɛ a nɩ-bʋlsɩ duo-puorbo ba jaa mɩ bɔ̃w na.

⁵Nyɩ́ puor a duo-puorbo bala na ma duoro taa a be a ba yir pʋɔ. Nyɩ́ mɩ puor a ɩ̃ baraa Ɛpɛnɛtɩ, na ɩ a *Kirisi popuor-dãdãw a Ajɩ-wɩɛr.

⁶Nyɩ́ lɛ puor a Maarɩɩ na nyɩrɩ̃ tʋ̃ a tʋmɔ kʋ nyɩ.

⁷Nyɩ́ puor a Ãdɩrɛnɩkɩ nɩ a Jʋnyasɩ na ɩ a ɩ̃ bal nɩbɛ na dãa lãa be nɩ ma a kasu pʋɔ ɩ̃ a ba yuor na yi a *nɩ-tʋnɩsɩ pʋɔ. Ba de ma na nĩe puoro a Kirisi.

⁸Nyɩ́ mɩ puor a Ãpɩlate na ɩ a ɩ̃ baraa a Nɩ-kpɛ̃ɛ pʋɔ.

⁹Nyɩ́ lɛ puor a Ʋrbɛ̃ na ɩ a sɩ lãa-tʋnɔ a Kirisi tʋmɔ pʋɔ, nɩ a ɩ̃ baraa Sɩtakɩ.

¹⁰Nyɩ́ puor a Apɛlɛ ba na ꞌwuor nyɛ ʋ sɩrɩ̃ ɩraa a Kirisi sɔr pʋɔ. Nyɩ́ mɩ puor a Aritobul yir deme,

¹¹nɩ a *Ɛrɔdɩyɔ̃ na mɩ ɩ a ɩ̃ bal nɩrɛ, ɩ̃ mɩ lɛ puor a Narsɩsɩ yir deme na lɩɛb ɩ a popuorbo.

¹²Nyɩ́ mɩ lɛ puor a Tɩrɩfɛn nɩ a Tɩrɩfɔsɩ, na ɩ a pɔɔbɔ bala na tʋnɔ a Nɩ-kpɛ̃ɛ tʋmɔ, ɩ̃ mɩ puor a ɩ̃ yɛ-pɔw nʋnaa Pɛrsɩdɩ na tʋ̃ a tʋn yaw kʋ ʋ.

¹³Nyɩ́ puor a Urufusi na tʋlɔ a Nɩ-kpɛ̃ɛ ɩnɛ, nɩ a ʋ mã na mɩ dãa be a ɩ̃ mã kaarɩ̃.

¹⁴Nyɩ́ mɩ puor a Asɛ̃kɩrɩ, nɩ a Filegɔ̃, a Ɛmɛsɩ, a Paturoba, a Ɛmasɩ nɩ a yɛɛr bala ba na be nɩ taa.

¹⁵Nyɩ́ mɩ lɛ puor a Filolɔgɩ, nɩ a Juli, a Nere, nɩ a v yɛ-pɔw Olɛ̃pa, lãa nɩ a Naaŋmɩn-puorbo bala na be nɩ ba.

¹⁶Nyɩ́ puoro taa woro nɩ taa nɩ a Nɩ-kpɛ̃ɛ yuor. A Kirisi popuorbo ji-gbulĩsɩ ba jaa puor nyɩ na.

¹⁷Yɛɛr, ɩ̃ kpãkpana nyɩ na a nyɩ na bɔw piire a bala na ma ŋmara a nɩbɛ a kpee kpee, mɩɩ maala ba a ba loro a fãa pʋɔ, cɩɩrɛ nɩ a jaanfʋ ʋlɔ nyɩ na dãa pɔw. Nyɩ́ taw a nyɩ mɩ̃ɛ yi nɩ a ba jie,

¹⁸a-na-ɩ a bana nɩ-bʋrɔ par ma tʋnɔ a sɩ Nɩ-kpɛ̃ɛ *Kirisi tʋmɔ wa, ɩ̃-cɛ a ba mɩ̃ɛ ɩ̃gan buur yele ba bʋɔrɔ. A ba ƴɛr-vɛlɛ nɩ a ba nɔ-kãa ƴɛrɩ̃sɩ ba ma de bɛlɩ̃ nɩ a nɩ-ɓaara tɩɛrɩ̃sɩ.

¹⁹A nyɩ toor wõfʋ ta na a jiir a jaa, ala-ɩ̃-sɔ ɩ̃ cɩlɛ na a nyɩ maalfʋ ɩnɛ. Ɩ̃-cɛ ɩ̃ bʋɔrɔ na nyɩ ɩ nɩ-kpaarsɩ maala nɩ a vɩlaa, ɩ̃ ɩ cɛcɛ, sɔmɔ nɩ a bier.

²⁰Ɩ̃ ka nɩ fɩ̃ɩ pʋɔ, a Naaŋmɩn ʋlɔ na ɩ a pɩɛnfʋ sʋbɔ na ŋmɩ̃ɛ na a Satã a nyɩ gbɛɛ pʋɔ. A sũofʋ na yi a sɩ Nɩ-kpɛ̃ɛ *Jeeju sɛ̃ ú be a nyɩ jie!

²¹A Timote na ɩ a ɩ̃ lãa-tʋnɔ, nɩ a Lusiisi, a Jasɔ̃ nɩ a Sɔsɩpatɛɛr na ɩ a ɩ̃ bal nɩbɛ puor nyɩ na.

²²A maa Tɛrtiw mɩ̃ɛ na sɛb a sɛbɛ na[1], puor nyɩ na a Nɩ-kpɛ̃ɛ pʋɔ.

²³A Gayisi na ɩ a ɩ̃ yir daba, lãa nɩ a popuorbo bala ba jaa na kpaara a be, puor nyɩ na. A Erasɩtɩ na ɩ a tẽw libi-gure, nɩ a ɩ̃ yɛbɛ Kartu mɩ puor nyɩ na. [

²⁴A sũofʋ na yi a sɩ Nɩ-kpɛ̃ɛ *Jeeju-Kirisi sɛ̃ ú be a nyɩ jie nyɩ jaa! *Amɛn.]

²⁵Naaŋmɩn sɔ pɛwfʋ, a ʋlɔ na tʋɔrɔ maala nyɩ a nyɩ na ɩraa cĩcĩ, tu nɩ a ɩ̃ ƴɛr-son na ɩ a *Jeeju-Kirisi ƴɛrɩ̃ ɩ̃ na hiere. A ƴɛrɩ̃ ʋlɔ dãa na sɔɔlɩ̃ a sɩ jie a korĩ-cɛ-cɛ jaa,

²⁶ɩ̃-cɛ a ƴɛ̃ƴɛrɩ̃ na, ʋ nyɩrʼã cãa pʋɔ a Naaŋmɩn ƴɛr-hierbe sɛbsɩ pʋʋr, a mɩnɛ a ten bʋrɔ bʋrɔ nɩbɛ ba jaa na tʋɔ wõ a ʋna ƴɛrɩ̃, ɩ̃ sɔw de ʋ, wono nɩ ʋ a toor, tu nɩ a Naaŋmɩn ʋlɔ na ma be a kũu jie wa pʋ-tɩɛrʋ̃.

²⁷A Naaŋmɩn ʋlɔ tɛw na ɩ a kpaarfʋ sʋbɔ yuor ʋ yire a daar a jaa a Jeeju-Kirisi ɩnɛ! *Amɛn.