Read Birifor, Malba Orom Sɛbɛ 4 Bible Online

Orom Sɛbɛ 4 - Birifor, Malba bible

Orom Sɛbɛ 4

¹Bõ sɩ na lɛ yel a sɩ sãa-kʋmɔ Abʋraham ɩnɛ? Bõ ʋ pɔw nɩ a ʋ mɩ̃ɛ fãgã?

²A ala ɩ a Abʋraham dãa na tor a Naaŋmɩn nii-sɔw a ʋ tʋmɔ ɩnɛ, sɔr be na be ʋ na tʋɔ bʋɔrɔ a yuor, ɩ̃-cɛ aa ɩ a Naaŋmɩn nii-sɔw wa.

³A-na-ɩ bõ a yel a Naaŋmɩn Sɛbɛ pʋɔ? A yelʼã: “A Abʋraham ƴɔ̃w na a Naaŋmɩn a nyãa, ala-ɩ̃-sɔ a Naaŋmɩn de ʋ ʋ ɩ a nɩ-toraa.”

⁴A nɩrɛ na tʋnɔ a tʋn, baa de a ʋ yar ʋ ɩ bõ-pɔrɔ wa, ɩ̃-cɛ san ʋ, a ba na ya ʋ.

⁵Ɩ̃-cɛ, a ʋlɔ na ma maal a bom wa, ɩ̃ sɔw de a Naaŋmɩn ʋlɔ na lɩɛbɛ a maal-kpana sʋbɔ ʋ toro a ʋ nii-sɔw, a Naaŋmɩn na de ʋ na ʋ tor a ʋ ƴɔ̃w-nyãa ɩnɛ.

⁶A lɛ ʋ a Davɩtɩ mɩ ƴɛr a mɩnɛ a na nʋmɛɛ a nɩrɛ ʋlɔ a Naaŋmɩn na nyɛ ʋ tor ɩ̃-cɛ ꞌwaa maal bom wa.

⁷“Nʋ̃ɔ ma be na a bala jie a Naaŋmɩn na de a ba burbur bar kʋ ba, nɩ a bala ʋ na piw a ba maal-fãa tɛɛlɛ.

⁸Nʋ̃ɔ ma be na a nɩrɛ ʋlɔ jie a Nɩ-kpɛ̃ɛ na mɔɔ sooro ʋ a ʋ maal-fãa wa.”

⁹A ʋna nʋ̃ɔ naa, a bala na ŋmaa a yʋɔr jie tɛw ʋ be mɩɩ? Mɩɩ ʋ mɩ be na a bala na ma mɩ ŋmaa wa jie? A-na-ɩ sɩ yelʼã: “A Abʋraham ƴɔ̃w-nyãa ɩnɛ a Naaŋmɩn de ʋ ʋ ɩ a nɩ-toraa.”

¹⁰Mɩnɛ a Abʋraham dãa wɔ̃ ɩ̃-cɛ a Naaŋmɩn de ʋ? Ʋ dãa na ŋmaa a yʋɔr mɩɩ ꞌwaa dãa ŋmaa sɛr wa? ꞌWaa dãa ŋmaa sɛr wa.

¹¹A Naaŋmɩn bɩɛrʼã man ʋ a yʋɔr ŋmaafʋ ʋ ɩ a jɩbaa na miile á Naaŋmɩn de ʋ na ʋ ɩ a nɩ-toraa a ʋ ƴɔ̃w-nyãa ɩnɛ, ɩ̃-cɛ a ꞌwaa ŋmaa a yʋɔr sɛr wa. A nɔhɔ̃, a bala ba jaa na ma ŋmaa a yʋɔr wa ɩ̃ sɔw de a Naaŋmɩn ʋ na de ba na a ba ɩ a nɩ-torisɩ, a Abʋraham ɩ a ba sãa-kʋmɔ.

¹²Ʋ mɩ ɩ na a bala na ŋmaa a yʋɔr sãa-kʋmɔ; a lɛ yelʼã, a bala na ŋmaa a yʋɔr ɩ̃ mɩ tuure a sɩ sãa Abʋraham, tɛrɛ nɩ a ƴɔ̃w-nyãa ʋlɔ ʋ na dãa tɛrɛ ɩ̃-cɛ a ꞌwaa dãa ŋmaa a yʋɔr sɛr wa.

¹³A Naaŋmɩn pʋlɩ̃fʋ ʋ na pʋlɩ̃ nɩ a Abʋraham nɩ a ʋ bal parvʋɔr áa tẽw nɔɔ ɩ na a ba gãw bom, aa yi a ba ƴɛr-kpɛn jɔfʋ ɩnɛ wa, ɩ̃-cɛ a ɩ na a mɩnɛ ba na tor a ba ƴɔ̃w-nyãa ɩnɛ.

¹⁴A ala ɩ a bala na jɔrɔ a ƴɛr-kpɛn, bala tɛw ɩ̃ wa pɔwrɔ a gã-yele, a ƴɔ̃w-nyãa na ɩ na pɔrɔ, ɩ̃ a Naaŋmɩn pʋlɩ̃fʋ ma lɛ tɛrɛ par wa.

¹⁵A-na-ɩ a ƴɛr-kpɛn ɩ̃ ma waara nɩ a Naaŋmɩn su-tuo; ɩ̃-cɛ a jie a ƴɛr-kpɛn na ma be wa, a ƴɛr-kpɛn sãwfʋ kɔ̃ mɩ be wa.

¹⁶Ala-ɩ̃-sɔ, a pʋlɩ̃fʋ ma yi a ƴɛr-kpɛn jie wa, ɩ̃-cɛ ʋ yi na a ƴɔ̃w-nyãa jie, ʋ na ɩ a Naaŋmɩn wɩɛfʋ bom, na tʋɔrɔ ɩrɛɛ a cĩcĩ a Abʋraham bal parvʋɔr nɩbɛ ba jaa jie. Aa ɩ a bala tɛw na jɔrɔ a ƴɛr-kpɛn ʋ wa, ɩ̃-cɛ a mɩ ɩ na a bala na mɩ tɛrɛ a ƴɔ̃w-nyãa a Abʋraham kaarɩ̃, a ʋlɔ na ɩ a sɩ jaa sãa-kʋmɔ.

¹⁷A mɩnɛ a na sɛb a Naaŋmɩn Sɛbɛ pʋɔ: “Ɩ̃ biin fʋ na a fʋ ɩ a tẽ-bʋrɔ bʋrɔ sãa-kʋmɔ.” Ʋ ɩ na a ba sãa a Naaŋmɩn ʋlɔ nii-sɔw ʋ na dãa ƴɔ̃w a nyãa, a Naaŋmɩn ʋlɔ na maala a kũusɩ a ba ire a kũu pʋɔ, ɩ̃ mɩ de a ʋ ƴɛrɩ̃ maalʼɩ̃ a yele ala na ma dãa be wa, a lɛ be.

¹⁸A ala saarɩ̃ ɩ a dãa na kpɛmɛ a Abʋraham ʋ na tɛrɛ a tɩɛrʋ̃ son, ɩ̃-cɛ ʋ ƴɔ̃w na a Naaŋmɩn a nyãa, tɛrɛ nɩ ʋ a tɩɛrʋ̃ cɛcɛ. A nɔhɔ̃ ʋ lɩɛbʼã ɩ a tẽ-bʋrɔ bʋrɔ sãa-kʋmɔ, tu nɩ a ƴɛrɩ̃ ʋlɔ a Naaŋmɩn na dãa yel ʋ: “A nɔhɔ̃ a fʋ bibiir nɔɔ ɩ.”

¹⁹A ala saarɩ̃ ɩ a ʋ yomo na tara a kʋbaa, ɩ̃ ʋ nyɛ bɔ̃w ka ʋ ta na a kũu, a ʋ pɔw Sara ma mɩ lɛ be na lɛ dɔw bie wa, ɩ̃-cɛ ʋ cãa na ɩraa cĩcĩ a ʋ ƴɔ̃w-nyãa pʋɔ.

²⁰Ɩ̃ a mɩnɛ a Naaŋmɩn na pʋlɩ̃ nɩ ʋ, ꞌwaa tɛrɛ baalɩ̃fʋ a ʋ tɩɛrɩ̃sɩ pʋɔ wa, ɩ̃-cɛ ʋ ɛ̃ɛ na pɔw kpɛ̃w a ʋ ƴɔ̃w-nyãa pʋɔ kʋrɔ nɩ a Naaŋmɩn a ju-kpɛ̃ɛ.

²¹Ʋ bɔ̃w na bɔ̃w ka a Naaŋmɩn tɛrɛ na kpɛ̃w na maal a ala ʋ na pʋlɩ̃.

²²Ala-ɩ̃-sɔ a yel, áa Naaŋmɩn de ʋ na ʋ ɩ a nɩ-toraa a ʋ jie a ʋ ƴɔ̃w-nyãa ɩnɛ.

²³A ʋna ƴɛr-birʼãa na yel, áa Naaŋmɩn de ʋ na, ma sɛb a Abʋraham ɩnɛ tɛw ʋ wa.

²⁴A mɩ sɛbʼã a sɩ ɩnɛ mɩ. A Naaŋmɩn na mɩ de sɩ na a sɩ tor, a sɩmɩ na ƴɔ̃w a ʋlɔ na maal a sɩ Nɩ-kpɛ̃ɛ *Jeeju ʋ ir a kũu pʋɔ a nyãa.

²⁵Ʋ ɩ na a Jeeju ʋlɔ ba na dãa ƴɔ̃w a ba kú a sɩ bɩɛfʋ ɩnɛ a Naaŋmɩn jie, ɩ̃ a Naaŋmɩn lɛ maal ʋ ʋ ir a kũu pʋɔ a sɩ na tor a ʋ nii-sɔw.