Read Birifor, Malba 1 Kɔrɛ̃tɩ Sɛbɛ 11 Bible Online

1 Kɔrɛ̃tɩ Sɛbɛ 11 - Birifor, Malba bible

1 Kɔrɛ̃tɩ Sɛbɛ 11

¹Nyɩ́ tɔɔnɔ ma, a mɩnɛ ɩ̃ na mɩ tɔɔnɔ a *Kirisi.

²Ɩ̃ kpiire nyɩ na a mɩnɛ nyɩ na cãa tɛrɛ a ɩ̃ tɩɛrɛ a daar a jaa, nɩ a mɩnɛ nyɩ na mɩ cãa nyɔw a jaanfʋ ala ɩ̃ na dãa jaan nyɩ tɛɛlɛ.

³Ɩ̃-cɛ ɩ̃ bʋɔrɔ na nyɩ bɔ̃w nɩ a nanɩ: a *Kirisi ɩ̃ ɩ a dabsɩ ba jaa juu, ɩ̃ a daba mɩ ɩ a pɔw juu, ɩ̃ a Naaŋmɩn mɩ ɩ a Kirisi juu.

⁴A ala ɩ̃ ɩ a daba wa sʋɔrɔ na a Naaŋmɩn, mɩɩ bʋʋrɔ a Naaŋmɩn pʋ-tɩɛrʋ̃ kʋrɔ a nɩbɛ, ɩ̃ wa pɔw bom a ʋ juu pʋɔ, a Kirisi na ɩ a ʋ juu ʋ kpɛrɛ.

⁵Ɩ̃-cɛ a pɔw wa sʋɔrɔ a Naaŋmɩn, mɩɩ a Naaŋmɩn pʋ-tɩɛrʋ̃ ʋ bʋʋrɔ kʋrɔ a nɩbɛ, ɩ̃ ma pɔw bom a ʋ juu wa, a ʋ sɩrɛ na ɩ a ʋ juu ʋ kpɛrɛ. A wɔ̃ na taa nɩ ʋ pũo na a ʋ juu.

⁶A-na-ɩ a ala ɩ̃ ɩ a pɔw ma pɔw bom a ʋ juu wa, ú ɩ a ba ŋma ʋ a jukɔbɔ bar. Ɩ̃-cɛ a-na-ɩ a ma ɩ na vĩ a pɔw na ŋma a ʋ jukɔbɔ, mɩɩ na pũo a ʋ juu, ala-ɩ̃-sɔ a sɛw na ʋ na lũ bom pɔw.

⁷A daba ma sɛw na pɔw a ʋ juu wa, a-na-ɩ a daba ɩ̃ miile a mɩnɛ a Naaŋmɩn na be, nɩ a ʋ yo-yifʋ mɩ. Ɩ̃-cɛ a pɔw ɩ̃ miile a daba yo-yifʋ.

⁸A-na-ɩ a daba ma yi a pɔw jie wa, ɩ̃ pɔw ɩ̃ yi a daba jie.

⁹Ɩ̃ a Naaŋmɩn ma mɛ a daba a pɔw ɩnɛ wa, ɩ̃ pɔw ʋ mɛ a daba ɩnɛ.

¹⁰Ala-ɩ̃-sɔ, a sɩ-tʋnɩsɩ ɩnɛ, a pɔw sɛw na na lũ a bom pɔw a ʋ juu na miile a ʋ mɩ̃ɛ wurfʋ.

¹¹Ɩ̃-cɛ a Nɩ-kpɛ̃ɛ nii-sɔw, a ala ɩ̃ ɩ a daba ma be be wa, a pɔw tɛw ma ɩ bom wa, ɩ̃ a ala ɩ̃ ɩ a pɔw ma mɩ be be wa, a daba tɛw ma mɩ ɩ bom wa.

¹²A-na-ɩ a mɩnɛ a pɔw na yi a daba jie, a lɛ a pɔw na mɩ dɔw a daba, ɩ̃ a ala a jaa yi na a Naaŋmɩn jie.

¹³Nyɩ́ pɛ nyɩ mɩ̃ɛ je kãa. A vɩɛlɛ na a pɔw na sʋɔrɔ a Naaŋmɩn a nɩbɛ sɔ̃w, ɩ̃ ma lũ bom pɔw a ʋ juu wa?

¹⁴A nɩrɛ mɩ̃ɛ tɩɛrʋ̃ miile na áa ɩ na vĩ a daba na tɛrɛ a jukɔb-wobo.

¹⁵Ɩ̃-cɛ a ɩ na yo-yifʋ bom a pɔw jie ʋ na tɛrɛ a jukɔb-wobo. A-na-ɩ a Naaŋmɩn kʋ ʋ na a jukɔb-wobo a na tʋɔ ɩ ʋ bõ-pɔwraa.

¹⁶Ɩ̃-cɛ a ala ɩ̃ ɩ nɩrɛ cãa na bʋɔrɔ ʋ cɩɩrɛ a asɩmɛ, ʋ sɛw na na bɔ̃w ka a Naaŋmɩn-puorbo a jiir a jaa nɩ a sɩmɩ mɩ̃ɛ ma tɛrɛ maal-kpee wa.

¹⁷A ala pʋɔ sɩ na ta a ƴɛ̃ƴɛrɩ̃, maa tʋɔrɔ kpiire nyɩ wa. A-na-ɩ a nyɩ duo-taa ma maal nyɩ na bier gãw a son.

¹⁸A dãdãw bom ɩ na: ba yel ma na, á nyɩmɩ wa duo taa, á nyɩ ma faara na taa, ɩ̃ ɩ̃ sɔw na ŋmãa.

¹⁹A sɩrɩ̃ na sɛw a faa-taa na be a nyɩ sɔ̃w, a sɩ na tʋɔ bɔ̃w a bala na ɩ a dẽdẽ.

²⁰A lɛdaar nyɩ na ma duo taa, aa ɩ a Nɩ-kpɛ̃ɛ dɩb nyɩ ma dɩrɛ wa.

²¹A-na-ɩ a lɛ nyɩ na ma lãa jɛ a dɩb par, naa ma dɩ na a ʋ mɩ̃ɛ dɩb ʋ yẽ, ɩ̃ cɛ a ŋmɛɛ bar a ba jɛ nɩ a kɔ̃, ɩ̃ a dãa kúrɔ a nɩŋmɛɛ.

²²Nyaa tɛrɛ yir nyɩ na dɩrɛ ɩ̃ mɩ nyuure wa? Mɩɩ nyɩ bʋɔrɔ na nyɩ mɛbɛ a Naaŋmɩn-puorbo, ƴɔnɔ nɩ a bala na ma tɛraa wa a vĩ mɩɩ? Bõ nyɩ bʋɔrɔ ɩ̃ yel nyɩ? Ɩ̃ kpiir nyɩ mɩɩ? Maa fɛr tʋɔrɔ kpiire nyɩ wa.

²³A Nɩ-kpɛ̃ɛ jie ɩ̃ dãa pɔw a jaanfʋ ʋlɔ ɩ̃ na dãa jaan nyɩ. A ɩ na a tɩsɔw ʋlɔ ba na dãa nyɔwrɔ a Nɩ-kpɛ̃ɛ *Jeeju, ʋ de na a buru,

²⁴ɩ̃ a lɛ ʋ na pɛw a Naaŋmɩn baar, ʋ ŋmaa na a buru ɩ̃ yel: “A nanɩ ɩ na a ɩ̃ ɩ̃gan ɩ̃ na tɩɩr a nyɩ ɩnɛ. Nyɩ́ maala a lɛ bɔ̃wnɔ nɩ ma.”

²⁵Ɩ̃ a lɛ ba na dɩ a dɩb baar, ʋ mɩ de na a ŋman ɩ̃ yel: “A dɩvɛ̃ na be a ŋman na pʋɔ, miile na a pʋlɩ̃-ta-paalaa a ɩ̃ jɩ̃ɩ na gbɛɛrɩ̃. A daar a jaa nyɩ nɔɔ nyuure, nyɩ́ maala bɔ̃wnɔ nɩ ma.”

²⁶A-na-ɩ a daar a jaa nyɩ na ꞌwɔbɔ a buru na, mɩ nyuure nɩ a dɩvɛ̃, nyɩ miile na a Nɩ-kpɛ̃ɛ kũu lɛɛ wa tara nɩ a ʋ waa daar.

²⁷Ala-ɩ̃-sɔ, a nɩrɛ lɛ wa ꞌwɔbɔ a buru mɩɩ nyuure a Nɩ-kpɛ̃ɛ dɩvɛ̃, ɩ̃ a ʋ maalfʋ ma vɩɛlɛ wa, ʋ na pɔw na a ƴɛrɩ̃ a Nɩ-kpɛ̃ɛ ɩ̃gan nɩ a ʋ jɩ̃ɩ ɩnɛ.

²⁸Ala-ɩ̃-sɔ a nɩrɛ sɛw na na jʋʋr a ʋ mɩ̃ɛ je kãa ɩ̃ pãa ꞌwɔb a buru, mɩ nyu nɩ a dɩvɛ̃.

²⁹A ʋlɔ na ꞌwɔbɔ mɩ nyuure nɩ ɩ̃ ma bɔ̃wnɔ nɩ a Nɩ-kpɛ̃ɛ ɩ̃gan wa, ƴɛrɩ̃ ʋ bʋɔrɔ ƴɔnɔ a ʋ mɩ̃ɛ a lɛ ʋ na ꞌwɔbɔ nyuure nɩ.

³⁰A ala ɩnɛ a ꞌwɔbɔ a yaw jie a nyɩ sɔ̃w, a ŋmɛɛ bal, ɩ̃ a nɩŋmɛɛ kpi.

³¹Ɩ̃-cɛ a ala ɩ̃ ɩ sɩ de na nĩe jʋʋr a sɩ mɩ̃ɛ, saa lɛ tʋɔrɔ pɔwrɔ a Nɩ-kpɛ̃ɛ kpãafʋ wa.

³²Ɩ̃ a Nɩ-kpɛ̃ɛ ma guorʼã a sɩ ƴɛrɩ̃ ɩ̃ kpãa sɩ, a mɩnɛ a sɩ kɔ̃ wa pɔw a yel ala a Naaŋmɩn nɔɔ ƴɔnɔ a tẽw na nɩbɛ wa.

³³Ala-ɩ̃-sɔ yɛɛr, a lɛ nyɩ na mɔɔ duo taa a dɩb dɩfʋ ɩnɛ, nyɩ́ ma gu taa.

³⁴A ala ɩ̃ ɩ a kɔ̃ nyɔw na a kãw, ú dɩ be a ʋ yir, a mɩnɛ a nyɩ duo-tar kɔ̃ wa lɩɛb ƴɔ̃w nyɩ yel wa. Ɩ̃-cɛ ɩ̃ na cɔɔrɩ̃ na a yele ala na cɛ a lɛdaar ɩ̃ nɔɔ wɩɛrɛ a be.