Read Birifor, Malba 1 Kɔrɛ̃tɩ Sɛbɛ 14 Bible Online

1 Kɔrɛ̃tɩ Sɛbɛ 14 - Birifor, Malba bible

1 Kɔrɛ̃tɩ Sɛbɛ 14

¹Nyɩ́ nyɩrɩ̃ bʋɔrɔ a nʋfʋ, ɩ̃-cɛ nyɩ́ mɩ bʋɔrɔ a Naaŋmɩn Sɩɛ tʋmɔ a nyɩ sɔ̃w. A ala pʋɔ, a kpɛ̃ɛ ɩ na a nyɩ na bʋʋrɔ a Naaŋmɩn pʋ-tɩɛrʋ̃.

²A ʋlɔ na ƴɛrɛ a ƴɛr-bɔ̃w-faarsɩ, aa ɩ nɩrɛ ʋ ƴɛrɛ nɩ wa, ɩ̃-cɛ a Naaŋmɩn ʋ ƴɛrɛ nɩ. A Naaŋmɩn Sɩɛ ʋ tɛrɛ ƴɛrɛ nɩ a ƴɛr-sɔɔlsɩ.

³Ɩ̃-cɛ a ʋlɔ na bʋʋrɔ a Naaŋmɩn pʋ-tɩɛrʋ̃, nɩbɛ ʋ ƴɛrɛ nɩ, sũono nɩ ba a ba karɛɛ, kpãkpana nɩ ba, mɩ ɓaala nɩ ba.

⁴A ʋlɔ na ƴɛrɛ a ƴɛr-bɔ̃w-faarsɩ, a ʋ yẽ tɛw a sũono ʋ kara, ɩ̃-cɛ a ʋlɔ na bʋʋrɔ a Naaŋmɩn pʋ-tɩɛrʋ̃, a *duo-puorbo ʋ sũono a ba kara ba jaa.

⁵Ɩ̃ bʋɔrɔ na nyɩ jaa nyɩ ƴɛrɛ a ƴɛr-bɔ̃w-faarsɩ. Ɩ̃-cɛ a ala ɩ̃ na nyɩrɩ̃ bʋɔrɔ ɩ na a nyɩ na tʋɔ bʋʋrɔ a Naaŋmɩn pʋ-tɩɛrʋ̃. A ʋlɔ na bʋʋrɔ a Naaŋmɩn pʋ-tɩɛrʋ̃ gãw na a ʋlɔ na ƴɛrɛ a ƴɛr-bɔ̃w-faarsɩ, a ala ma ɩ nɩrɛ be na be ire a par a sũono a duo-puorbo ba jaa wa.

⁶Yɛɛr, nyɩ́ tɩɛr nyɛ. A ala ɩ ɩ̃ wɩ na a nyɩ jie na ƴɛrɛ nɩ nyɩ a ƴɛr-bɔ̃w-faarsɩ, bõ a na ɩ nyɩ, ɩ̃-cɛ a ala ma ɩ a ƴɛr-miilaa, mɩɩ bɔ̃wfʋ mɩɩ Naaŋmɩn pʋ-tɩɛrʋ̃ bʋʋfʋ, mɩɩ jaanfʋ ɩ̃ wɩ nɩ wa?

⁷A lɛ a mɩ wɔ̃ nɩ a yele ala ba na ma pɛɛlɛ mɩɩ ba na ma ŋmeere. A ala ɩ a ba kɔkɩɛ ma be kpee kpee wa, mɩnɛ fʋ na ɩ ɩ̃ bɔ̃w a sʋkpa ba na pɛɛlɛ mɩɩ ba na ŋmeere?

⁸Ɩ̃ a ɩl-pɛɛlɛ mɩ, a ʋlɔ pɛɛl a ɩl a burbur, ala na gbɛɛrɩ̃ a jɛb ɩnɛ?

⁹A lɛ ʋ mɩ a nyɩ jie. A ala ɩ a nyɩ ƴɛrɩ̃sɩ ma caara wa, mɩnɛ ba na tʋɔ bɔ̃w a par? Vuo pʋɔ nyɩ ƴɛrɛ bara.

¹⁰A ƴɛr-yaw be na ka a tẽw pʋɔ ɩ̃ na ma bɔ̃w a nʋɔr wa, ɩ̃-cɛ bõ-ƴen ma be be na ma tɛrɛ a par wa.

¹¹Ɩ̃-cɛ a ala ɩ a nɩrɛ ƴɛrɛ nɩ ma na a ƴɛrɩ̃ ʋlɔ ɩ̃ na ma wono wa, ɩ̃ na ɩ na saana a ʋ jie, ɩ̃ ʋ mɩ ɩ ma saana.

¹²Ala-ɩ̃-sɔ, a nyɩmɩ mɩ, a mɩnɛ nyɩ na tɩɩ bʋɔrɔ a Naaŋmɩn Sɩɛ tʋmɔ a nyɩ sɔ̃w, nyɩ́ nyɩrɩ̃ bʋɔrɔ a ala na sũono a duo-puorbo a ba karɛɛ.

¹³A nɩrɛ ʋlɔ na ƴɛrɛ a ƴɛr-bɔ̃w-faarsɩ sɛw na ʋ sʋɔr a Naaŋmɩn a mɩnɛ ʋ na tʋɔrɔ lɩɛbɛ a ana ƴɛrɩ̃sɩ.

¹⁴A-na-ɩ a maa puoro a Naaŋmɩn nɩ a ana ƴɛr-bɔ̃w-faarsɩ, a ɩ̃ sɩɛ puoro na ɩ̃ cɛ a ɩ̃ yɛ̃ bar.

¹⁵Ala-ɩ̃-sɔ, bõ ɩ̃ na maal? Ɩ̃ na puoro na a Naaŋmɩn nɩ a ɩ̃ sɩɛ, ɩ̃ mɩ puoro nɩ a ɩ̃ yɛ̃. Ɩ̃ na mɩ cɩɛrɛ na a yele nɩ a ɩ̃ sɩɛ, ɩ̃ mɩ cɩɛrɛ nɩ a ɩ̃ yɛ̃.

¹⁶A ala ɩ fʋ pɛwrɛ na a Naaŋmɩn nɩ a fʋ sɩɛ, mɩnɛ a ʋlɔ na ɩ a dakume ɩ̃ be a be na tʋɔ yel a “*Amɛn” a fʋ Naaŋmɩn pɛwfʋ ɩnɛ? A-na-ɩ ꞌwaa bɔ̃w a fʋ ƴɛrɩ̃ par wa.

¹⁷A fʋ Naaŋmɩn pɛwfʋ na tʋɔ na vɩɛlɛ, ɩ̃-cɛ aa sũo a fʋ tɔ sʋbɔ ʋ na karɩ̃ wa.

¹⁸Ɩ̃ pɛwrɛ na a Naaŋmɩn a mɩnɛ ɩ̃ na ƴɛrɛ a ƴɛr-bɔ̃w-faarsɩ gãw nyɩ nyɩ jaa.

¹⁹Ɩ̃-cɛ a duo-puorbo nii-sɔw, a nʋmɔ ma na ɩ̃ na ƴɛr ƴɛr-bie anuu nɩ a ɩ̃ yɛ̃, na jaanʼɩ̃ a nɩbɛ, gãw a ƴɛr-yaw ɩ̃ na ƴɛrɛ nɩ a ƴɛr-bɔ̃w-faarsɩ.

²⁰Yɛɛr, nyɩ taa wɔ̃ taa nɩ bibiir a yɛ̃ pʋɔ wa, ɩ̃-cɛ a ala ɩ̃ ɩ a bier maalfʋ ʋ, nyɩ́ ɩ bi-pɩɩlsɩ, ɩ̃ bɩ a yɛ̃ pʋɔ.

²¹A sɛbʼã a Naaŋmɩn Sɛbɛ pʋɔ: “Ƴɛr-kpeesɩ ɩ̃ na de ƴɛrʼɩ̃ a nɩbɛ basɩmɛ. Sáanba ɩ̃ na de ƴɛrʼɩ̃ ba, ɩ̃-cɛ ba kɔ̃ mɩ cɛl ma wa. Lɛ a Nɩ-kpɛ̃ɛ yel.”

²²Ala-ɩ̃-sɔ, a ƴɛr-bɔ̃w-faarsɩ ma ɩ jɩbaa a popuorbo jie wa, ɩ̃-cɛ a bala na ma puoro wa jie ʋ ɩ a jɩbaa. Ɩ̃ a Naaŋmɩn pʋ-tɩɛrʋ̃ bʋʋfʋ ma ɩ jɩbaa a bala na ma puoro jie wa, ɩ̃ a bala na puoro jie ʋ ɛ̃ɛ ɩ a jɩbaa.

²³A ala ɩ a duo-puorbo duo na taa, ɩ̃ a ba jaa nyɔw ɩ̃ ƴɛrɛ a ƴɛr-bɔ̃w-faarsɩ, ɩ̃ a dakumsɩ mɩɩ a bala na ma puoro wa wa kpɛ a be nyɛ nyɩ a lɛ, ba kɔ̃ yel á nyɩ yaara na wa?

²⁴Ɩ̃-cɛ a ala ɩ a ba jaa bʋʋrɔ na a Naaŋmɩn pʋ-tɩɛrʋ̃, ɩ̃ a dakume mɩɩ a ʋlɔ na ma puoro wa wa kpɛ, a ala a jaa ʋ na wono, a na tɔ ʋ na a suur pʋɔ ʋ nyɔw ɩ̃ pɛrɛ.

²⁵A yele ala na dãa sɔɔlɩ̃ a ʋ suur pʋɔ na yi na cãa pʋɔ, ɩ̃ ʋ na gũu na surĩ a juu pɛwrɛ nɩ a Naaŋmɩn yele nɩ áa Naaŋmɩn sɩrɩ̃ na be a nyɩ sɔ̃w.

²⁶Yɛɛr, mɩnɛ a na be? A lɛdaar nyɩ na ma duo taa, bõ-ƴen a nyɩ sɔ̃w ma tɛrɛ na yele na cɛ, a ƴen sʋbɔ ma tɛrɛ jaanfʋ na jaan, a kãw ma tɛrɛ a Naaŋmɩn ƴɛr-miilaa na miil, a bõ-ƴen go ma tɛrɛ a ƴɛr-bɔ̃w-faarsɩ na ƴɛr, ɩ̃ a ƴen sʋbɔ go na lɩɛbɛ a ana ƴɛrɩ̃sɩ. A ala a jaa sɛw na na sũo nyɩ a nyɩ karɛɛ.

²⁷A ala ɩ ba wa ƴɛrɛ na a ƴɛr-bɔ̃w-faarsɩ, a sɛw na ba ɩ nɩbɛ ayi mɩɩ ata, ɩ̃-cɛ ba taa wa poro ata wa, ɩ̃ bá ƴɛrɛ ɩ̃ cɩɛrɛ kʋrɔ taa, ɩ̃ nɩrɛ ú mɩ lɩɛb a ala ba na yele.

²⁸Ɩ̃ a ala ɩ nɩrɛ ma be a *duo-puorbo sɔ̃w na lɩɛb a ba ƴɛrɩ̃ wa, a ʋlɔ na ƴɛrɛ ú sine, ɩ̃ ƴɛrɛ nɩ a ʋ mɩ̃ɛ nɩ a Naaŋmɩn.

²⁹A ala ɩ a Naaŋmɩn pʋ-tɩɛrʋ̃-bʋʋrbɔ ʋ, bá ɩ nɩbɛ ayi mɩɩ ata, ɩ̃-cɛ a bala na cɛ, bá jɛ pɛrɛ a ala ba na yele.

³⁰A ala ɩ a ƴen sʋbɔ na jɛ a be wa pɔw na a ƴɛr-miilaa a Naaŋmɩn jie, a dãdãw sʋbɔ, ú sine.

³¹Nyɩ jaa na tʋɔ na bʋʋrɔ a Naaŋmɩn pʋ-tɩɛrʋ̃ bõ-ƴene-ƴene, a mɩnɛ a na tʋɔ jaan a nɩbɛ ba jaa kpãkpana nɩ ba.

³²A Naaŋmɩn pʋ-tɩɛrʋ̃-bʋʋrbɔ ma tʋɔ na tɛrɛ a ba mɩ̃ɛ a tʋmɔ ala pʋɔ,

³³a-na-ɩ a Naaŋmɩn ma ɩ nyanyaafʋ Naaŋmɩn wa, ɩ̃-cɛ v bʋɔl sɩ na a sɩ na tɛrɛ su-ɓaar. A mɩnɛ a na ma maala a Naaŋmɩn duo-puorbo sɔ̃w a jiir a jaa,

³⁴a pɔɔbɔ sɛw na ba ma sine a duo-taa pʋʋr. Sɔr ma be be a pɔw na ƴɛr ƴɛrɩ̃ wa. A sɛw na ba ma wur a ba mɩ̃ɛ a mɩnɛ a *Naaŋmɩn ƴɛr-kpɛn na yel.

³⁵A ala ɩ ba buɔrɔ na ba soor bom, bá soor a ba sɩrbɛ be a yir. Aa vɩɛlɛ a pɔw na ƴɛr a ƴɛrɩ̃ a Naaŋmɩn yir pʋɔ wa.

³⁶Nyɩ jie a Naaŋmɩn ƴɛrɩ̃ dãa yi mɩɩ a nyɩ jie tɛw a dãa ta?

³⁷A ala ɩ̃ ɩ nɩrɛ tɩɛr bɔ̃w ka a v ɩ na a Naaŋmɩn pʋ-tɩɛrʋ̃-bʋʋrɔ, mɩɩ a v tɛrɛ na a Naaŋmɩn Sɩɛ bɔ̃wfʋ, a sɛw na v bɔ̃w ka a asɩmɛ ɩ̃ na sɛb ɩ na a Nɩ-kpɛ̃ɛ ƴɛr-kpɛ̃w.

³⁸A ala ɩ a nɩrɛ ma sɔw a ala wa, nyɩ taa mɩ sɔw de v wa.

³⁹Ala-ɩ̃-sɔ ɩ̃ yɛɛr, nyɩ́ nyɩrɩ̃ buɔrɔ a Naaŋmɩn pʋ-tɩɛrʋ̃ bʋʋfʋ, ɩ̃-cɛ nyɩ taa mɔ̃wnɔ a ƴɛr-bɔ̃w-faarsɩ ƴɛrfʋ bara wa.

⁴⁰Nyɩ́ maala a yele a jaa a mɩnɛ a na sɛw, tuure nɩ a mɩnɛ ba na guor.