Read Birifor, Malba 1 Kɔrɛ̃tɩ Sɛbɛ 6 Bible Online

1 Kɔrɛ̃tɩ Sɛbɛ 6 - Birifor, Malba bible

1 Kɔrɛ̃tɩ Sɛbɛ 6

¹A lɛdaar a kãw a nyɩ pʋɔ na mɔɔ tɛrɛ nɩ a ʋ tɔ sʋbɔ a ƴɛrɩ̃, mɩnɛ ʋ ma ɩ ɩ̃ cen na bʋɔl a ʋ tɔ sʋbɔ ʋlɔ a ʋlɔ na ma puoro wa jie, ɩ̃ ma lɛ bar a Naaŋmɩn deme jie cenfʋ?

²Nyaa bɔ̃w ka a Naaŋmɩn deme ɩ̃ nɔɔ guoro a tẽw na ƴɛrɩ̃sɩ wa? Ɩ̃ a ala ɩ a nyɩmɩ wa guoro a tẽw na ƴɛrɩ̃sɩ, nyaa sɛw na guor a ƴɛrɩ̃sɩ ala na ma mɩ ɩ bom wa mɩɩ?

³Nyaa bɔ̃w ka a sɩmɩ wa guoro a sɩ-tʋnɩsɩ ƴɛrɩ̃sɩ wa, wa pãa yele nɩ a tẽw na yele?

⁴Ɩ̃-cɛ a ƴɛrɩ̃ nɔhɔ̃ wa ta nyɩ, a nyɩ ma de cenʼɩ̃ a bala ba na ma sɔr ƴɔ̃w a *duo-puorbo pʋɔ wa sɛ̃!

⁵Ɩ̃ ƴɛrɛ na a lɛ na ƴɔ̃w nyɩ vĩ. Nɩrɛ ma tɩɩ be a nyɩ sɔ̃w na kpaar tʋɔrɔ guoro a ʋ tɔ sʋbɔ ƴɛrɩ̃ wa?

⁶A vɩɛlɛ na a yɛbɛ na taw a ʋ tɔ sʋbɔ cenʼɩ̃ a ƴɛrɩ̃ guorfʋ a bala na ma puoro wa jie mɩɩ?

⁷Nyɩ gɔrʼã sãw sɩrɛ jaa a mɩnɛ nyɩ na taw taa cen a bala na ma puoro wa jie. A dãa na sɛw a fʋ na sɔw a ʋna bɩɛfʋ. Bõ ɩ a fʋ kɔ̃ sɔw a ba ju fʋ wa?

⁸Ɩ̃-cɛ nyɩmɩ ɛ̃ɛ maala a fãa jure nɩ, ɩ̃ a ma lɛ ɩ a nyɩ yɛɛr sɔ̃w nyɩ maala a lɛ!

⁹Má nyɩ bɔ̃w ka a bala na maala a fãa ma kpɛɛrɛ a Naaŋmɩn fãw pʋɔ wa. Nyɩ taa bɛlɛ nyɩ mɩ̃ɛ wa. A bala na pebe, mɩɩ a tɩbɛ deme, a gã-ta-burbur deme, a dabsɩ bala na maala taa a vĩ tʋmɔ,

¹⁰a nyanyube, a bala na ma jɩɛlɛ a yele, a bala a dãa na ma kúrɔ, a bala na ma kpɛrɛ a nɩbɛ, nɩ a bala na ma fara a nɩbɛ yele, ma kpɛɛrɛ a Naaŋmɩn fãw pʋɔ wa.

¹¹Lɛ a nyɩ ŋmɛɛ dãa wɔ̃, ɩ̃-cɛ a Naaŋmɩn pɛw nyɩ na bar, ɩ̃ ow nyɩ kpee a nyɩ ɩ a ʋ ben, ɩ̃ mɩ lɩɛb nyɩ a nyɩ tor a ʋ nii-sɔw a Nɩ-kpɛ̃ɛ *Jeeju-Kirisi yuor nɩ a sɩ Naaŋmɩn Sɩɛ ɩnɛ.

¹²A ŋmɛɛ a nyɩ sɔ̃w ma yelʼã: “Maa ciire bom maalfʋ wa.” Sɩrɛ jaa ʋ, ɩ̃-cɛ aa ɩ a yele a jaa ɩ̃ vɩɛlɛ a maalfʋ wa. Ɩ̃ na mɩ tʋɔ na yel á maa ciire bom maalfʋ wa, ɩ̃-cɛ maa diere a ɩ̃ mɩ̃ɛ bara a bom tʋɔrɔ ma wa.

¹³Nyɩ ma mɩ yelʼã áa dɩb maalʼã a puor ɩnɛ, ɩ̃ a puor mɩ maal a dɩb ɩnɛ. A lɛ ʋ, ɩ̃-cɛ a Naaŋmɩn na wɛlʼã a ba jaa ayi bar. Ɩ̃-cɛ a nɩsaa-salaa ɩ̃gan ma maal a pebfʋ ɩnɛ wa, ɩ̃-cɛ a Nɩ-kpɛ̃ɛ ɩnɛ ba maal ʋ.

¹⁴A Naaŋmɩn maalʼã a Nɩ-kpɛ̃ɛ ʋ ir a kũu pʋɔ, ɩ̃ ʋ nɔɔ mɩ maal sɩ na a sɩ ir a kũu pʋɔ nɩ a ʋ kpɛ̃w.

¹⁵Nyɩ bɔ̃w na ka a nyɩ ɩ̃gan ɩ na a *Kirisi ɩ̃gan ɓãbie. Ɩ̃ na de na a Kirisi ɩ̃gan ɓãbie maal a ɩ pɔw-baa ɩ̃gan ɓãbie? A kɔ̃ ɩ a lɛ wa.

¹⁶Mɩɩ nyaa bɔ̃w ka a daba ʋlɔ na gã nɩ a pɔw-baa, ba lɩɛbʼã ɩ ɩ̃gan bõ-ƴen wa? A-na-ɩ a Naaŋmɩn Sɛbɛ yelʼã: “Ba jaa ayi na lɩɛbʼã ɩ ɩ̃gan bõ-ƴen.”

¹⁷Ɩ̃-cɛ a ʋlɔ na mara taa nɩ a Nɩ-kpɛ̃ɛ na lɩɛbʼã ɩ nɩ ʋ bõ-ƴen a sɩɛ pʋɔ.

¹⁸Nyɩ́ taw yi a gã-ta-burbur pʋɔ! A maal-fãa lɛ a nɩrɛ na maala ma kpɛɛrɛ a ʋ ɩ̃gan pʋɔ wa; ɩ̃-cɛ a nɩrɛ ʋlɔ na de a ʋ mɩ̃ɛ ƴɔ̃w a gã-ta-burbur pʋɔ, a ʋ mɩ̃ɛ ɩ̃gan pʋɔ ʋ maala a fãa ƴɔnɔ.

¹⁹A Naaŋmɩn kʋ nyɩ na a ʋ Sɩɛ ʋ be a nyɩ pʋ̃ɔ, ɩ̃ nyaa bɔ̃w ka a nyɩ ɩ̃gan ɩ na a ʋna Sɩɛ di-tuo wa? Nyaa sɔ nyɩ mɩ̃ɛ wa.

²⁰A Naaŋmɩn da nyɩ na. Ala-ɩ̃-sɔ nyɩ́ de a nyɩ ɩ̃gan kʋrɔ nɩ ʋ a ju-kpɛ̃ɛ.