Read Birifor, Malba 1 Kɔrɛ̃tɩ Sɛbɛ 7 Bible Online

1 Kɔrɛ̃tɩ Sɛbɛ 7 - Birifor, Malba bible

1 Kɔrɛ̃tɩ Sɛbɛ 7

¹A ƴɛ̃ƴɛrɩ̃, sɩ ta na a ƴɛrɩ̃sɩ ala nyɩ na dãa soor a nyɩ sɛbɛ pʋɔ. A vɩɛlɛ na a daba kɔ̃ sɩɩr pɔw wa.

²Ɩ̃-cɛ a gã-ta-burbur ɩnɛ, a sa na a daba na tɛrɛ a ʋ mɩ̃ɛ pɔw ɩ̃ a pɔw na mɩ tɛrɛ a ʋ sɩrɛ.

³A sɩrɛ sɛw na ʋ kʋrɔ a ʋ pɔw a ala na sɛw, ɩ̃ a pɔw ʋ mɩ maala a lɛ a ʋ sɩrɛ jie.

⁴A pɔw ma sɔ a ʋ mɩ̃ɛ ɩ̃gan wa, a ʋ sɩrɛ sɔ. A sɩrɛ ma mɩ sɔ a ʋ mɩ̃ɛ ɩ̃gan wa, ɩ̃ a ʋ pɔw mɩ sɔ.

⁵Nyɩ taa wa ŋmara a gaajie, ɩ̃ a ala ma ɩ nyɩ mana taa ɩ̃ ŋma daar fɩ̃ɩ pʋɔ a Naaŋmɩn sʋɔrfʋ ɩnɛ wa. A ala ɩ̃ baar, nyɩ́ lɛ kpaarɩ̃, a mɩnɛ a Satã kɔ̃ wa nyɛ sɔr kpɛ nyɩ a lɛdaar nyɩ na ma lɛ tʋɔrɔ tɛrɛɛ a nyɩ mɩ̃ɛ wa.

⁶A ala ɩ̃ na miile nyɩ ma ɩ ƴɛr-kpɛ̃w wa, ɩ̃-cɛ sɔr ɩ̃ miile nyɩ.

⁷Ɩ̃ naa bʋɔrɔ na a dabsɩ ba jaa ba jɛ a ɩ̃ kaarɩ̃, ɩ̃-cɛ ba jaa bõ-ƴene-ƴene tɛrɛ na a ba bõ-pɔrɔ ʋlɔ a Naaŋmɩn na kʋ ba.

⁸Nyɛ a ala ɩ̃ na yele a dakɔbɔ nɩ a kpɩ̃ɩ-pɔɔbɔ: a vɩɛlɛ na a ba na cãa jɛ a ɩ̃ kaarɩ̃.

⁹Ɩ̃ a bala ma tʋɔrɔ tɛrɛɛ a ba mɩ̃ɛ wa, bá kul a pɔw, mɩɩ a sɩrɛ, a-na-ɩ a kulfʋ sa na a nɩrɛ na jɛ sɔbɔ a nii-sɔw.

¹⁰A ala ɩ̃ na yele a bala na kul ma yi a ɩ̃ jie wa, ɩ̃-cɛ a Nɩ-kpɛ̃ɛ jie a yi: a pɔw ʋ taa wa jaara a ʋ sɩrɛ bara wa.

¹¹Ɩ̃ a ala ɩ̃ ɩ ʋ wa jaar ʋ na, ú jɛ a lɛ, mɩɩ ú ɓaalɩ̃ a ʋ sɩrɛ. Ɩ̃ a daba, ʋ taa wa mɩ diwre a ʋ pɔw bara wa.

¹²A ala ɩ̃ na yele a bala na cɛ jie ma yi a Nɩ-kpɛ̃ɛ jie wa, ɩ̃ maa ɩ̃ yele: a ala ɩ a popuoro tɛrɛ na a pɔw na ma puoro wa ɩ̃ sɔw jɛ nɩ ʋ, ʋ taa diwre ʋ bara wa.

¹³Ɩ̃ a pɔw wa mɩ tɛrɛ a sɩrɛ na ma puoro wa, ɩ̃ mɩ sɔw jɛ nɩ ʋ, ʋ taa wa jaara ʋ bara wa.

¹⁴A-na-ɩ a daba ʋlɔ na ma puoro wa, a Naaŋmɩn ꞌwuoro ʋ na a ʋ pɔw na puoro ɩnɛ, ɩ̃ a pɔw ʋlɔ na ma puoro wa, a Naaŋmɩn mɩ ꞌwuoro ʋ na a ʋ sɩrɛ na mɩ puoro ɩnɛ. A ala ma dãa ɩ lɛ ʋ wa a ba bibiir naa wɔ̃ na taa nɩ tɩbɛ deme bibiir. Ɩ̃-cɛ a Naaŋmɩn sɩrɩ̃ na ꞌwuoro ba, a ba mã, mɩɩ a ba sãa na puoro ɩnɛ.

¹⁵Ɩ̃-cɛ a ʋlɔ na ma puoro wa wa bʋɔrɔ ʋ ŋmaa a kpee, ú ŋmaa. A ʋlɔ ŋmaa a lɛ, a sɩrɛ mɩɩ a pɔw na ɩ a popuoro ma cãa be a ʋna kulfʋ ƴɛrɩ̃ pʋɔ wa. A-na-ɩ a pɩɛnfʋ ɩnɛ a Naaŋmɩn bʋɔl sɩ.

¹⁶A fʋ̃ʋ pɔw na puoro, mɩnɛ fʋ ɩ ɩ̃ bɔ̃w ka fʋ nɔɔ tʋɔ na faa a fʋ sɩrɛ? Ɩ̃ a fʋ̃ʋ daba na puoro, mɩnɛ fʋ ɩ ɩ̃ bɔ̃w ka fʋ nɔɔ tʋɔ na faa a fʋ pɔw?

¹⁷A ala ma ɩ a lɛ a be wa, a nɩbɛ ba jaa sɛw na ba cere tuure nɩ a bõ-pɔrɔ ʋlɔ a Naaŋmɩn na kʋ ba, ɩ̃ mɩ cere tuure nɩ a mɩnɛ ba na dãa wɔ̃ ɩ̃ a Naaŋmɩn wa bʋɔl ba. A ƴɛrɩ̃ ʋlɔ ɩ̃ mana kʋrɔ a *duo-puorbo a jiir a jaa.

¹⁸A ala ɩ a nɩrɛ dãa na ŋmaa a yʋɔr ɩ̃ a Naaŋmɩn wa bʋɔl ʋ ʋ puoro, ʋ taa bʋɔrɔ ʋ lɛ lɩɛb wa. A ala ɩ a nɩrɛ ma dãa ŋmaa a yʋɔr wa ɩ̃ a Naaŋmɩn wa bʋɔl ʋ, ʋ taa lɛ bʋɔrɔ ʋ ŋmaa wa.

¹⁹A fʋ̃ʋ ŋmaa a yʋɔr mɩɩ faa ŋmaa wa, aa ɩ bom wa. A *Naaŋmɩn ƴɛr-kpɛn jɔfʋ ɩ̃ ɩ a bom.

²⁰A nɩrɛ lɛ, ú cãa jɛ a mɩnɛ ʋ na dãa wɔ̃ ɩ̃ a Naaŋmɩn wa bʋɔl ʋ.

²¹Gbãgbaa fʋ dãa ɩ ɩ̃ a Naaŋmɩn wa bʋɔl fʋ? Taa waala wa. Ɩ̃-cɛ a ala ɩ̃ ɩ sɔr be na be fʋ na diere yire, fú de.

²²A-na-ɩ a gbãgbaa ʋlɔ a Nɩ-kpɛ̃ɛ na bʋɔl, ʋ ɩ na a Nɩ-kpɛ̃ɛ nɩ-faaraa. A lɛ ʋ mɩ, a nɩrɛ ʋlɔ na sɔ a ʋ mɩ̃ɛ ɩ̃ a Nɩ-kpɛ̃ɛ wa bʋɔl ʋ, ʋ ɩ na a Nɩ-kpɛ̃ɛ gbãgbaa.

²³A Naaŋmɩn da nyɩ na. Nyɩ taa lɩɛb ɩ nɩbɛ gbãgbaar wa.

²⁴Yɛɛr, nyɩ jaa bõ-ƴene-ƴene, nyɩ́ jɛ a Naaŋmɩn nii-sɔw a mɩnɛ nyɩ na dãa wɔ̃ ɩ̃ ʋ wa bʋɔl nyɩ.

²⁵A bala na ma kul taa sɛr wa, maa tɛrɛ ƴɛr-kpɛ̃w na yi a Nɩ-kpɛ̃ɛ jie wa, ɩ̃-cɛ ɩ̃ na miil nyɩ na a ala ɩ̃ na tɩɛrɛ, a maa a Naaŋmɩn nã-bɔ̃wfʋ na sũo ɩ̃ ɩ a nɩ-dẽdẽ.

²⁶A mɩnɛ sɩ na be a won pʋɔ a ƴɛ̃ƴɛrɩ̃ na, ala-ɩ̃-sɔ ɩ̃ tɩɛrʼã bɔ̃w ka a vɩɛlɛ na a nɩrɛ na jɛ a lɛ.

²⁷A ala ɩ̃ ɩ fʋ tɛrɛ na pɔw, taa wa diwre ʋ bara wa. A ala ɩ̃ ɩ faa tɛrɛ pɔw wa, taa bʋɔrɔ fʋ kul wa.

²⁸Ɩ̃-cɛ a ala ɩ fʋ wa kulʼã, faa maal fãa wa. Ɩ̃ a ala ɩ a pɔsabile wa mɩ kulʼã, ꞌwaa mɩ maal fãa wa. Ɩ̃-cɛ a bala na kul taa na pɔw na a tẽw na pʋɔ won, ɩ̃ maa bʋɔrɔ a ana yele a ta nyɩ wa.

²⁹Yɛɛr, nyɛ a ala ɩ̃ na yele: a daar ɩ na ŋmãa. Wa nyɔw nɩ a ƴɛ̃ƴɛrɩ̃ na, a bala na kul a pɔɔbɔ bá maala wɔ̃ taa nɩ baa kul wa.

³⁰A bala na kono, bá maala wɔ̃ taa nɩ sube ma sãw ba wa. A bala na cɩlɛ, bá wɔ̃ taa nɩ baa tɛrɛ nʋɔ wa. A bala na daara a yele bine, bá mɩ wɔ̃ taa nɩ baa tɛrɛ bom wa.

³¹Ɩ̃ a bala na ƴaba, ba taa nyɩrɩ̃ de a ba mɩ̃ɛ ƴɔ̃w a ala pʋɔ wa, a-na-ɩ a tẽw na nɩ a ʋ yele a jaa tɔlɔ na.

³²Ɩ̃ bʋɔrɔ na nyɩ taa tɛrɛ dɛn wa. A daba ʋlɔ na ma tɛrɛ pɔw wa ma cɛlɛ na a Nɩ-kpɛ̃ɛ yele, a mɩnɛ ʋ na tʋɔrɔ maala a nʋmɛɛ a Nɩ-kpɛ̃ɛ.

³³Ɩ̃-cɛ a ʋlɔ na tɛrɛ a pɔw ma cɛlɛ na a tẽw na pʋɔ yele, a mɩnɛ ʋ na tʋɔrɔ maala a nʋmɛɛ a ʋ pɔw.

³⁴A ʋ tɩɛrɩ̃sɩ ŋma na jiir ayi. A lɛ a mɩ wɔ̃ nɩ a pɔw ʋlɔ na ma tɛrɛ a sɩrɛ wa, mɩɩ a pɔsabile. Ʋ ma cɛlɛ na a Nɩ-kpɛ̃ɛ yele, a-na-ɩ ʋ ma bʋɔrɔ na a ʋ ɩ̃gan nɩ a ʋ sɩɛ a ɩ a Nɩ-kpɛ̃ɛ ben. Ɩ̃ a pɔw ʋlɔ na tɛrɛ a sɩrɛ ma cɛlɛ na a tẽw na pʋɔ yele, a mɩnɛ ʋ na tʋɔrɔ maala a nʋmɛɛ a ʋ sɩrɛ.

³⁵Ɩ̃ ƴɛrɛ na a asɩmɛ a nyɩ son ɩnɛ. Aa ɩ bɛraa ɩ̃ bʋɔrɔ ɩ̃ ƴɔ̃w nyɩ wa, ɩ̃-cɛ a nyɩ na maala a ala na sɛw, de nɩ a nyɩ mɩ̃ɛ ƴɔ̃w a Nɩ-kpɛ̃ɛ tʋmɔ pʋɔ kɔ̃ tɛrɛ tɩɛrʋ̃ kpee wa.

³⁶A ala ɩ a daba ma lɛ tʋɔrɔ tɛrɛɛ a ʋ mɩ̃ɛ a ʋ baraa nii-sɔw wa a tɩɛrɩ̃sɩ na gãw ʋ ɩnɛ, ɩ̃ tɩɛr bɔ̃w ka a sɛw na ba kul taa, ú maal a mɩnɛ ʋ na bʋɔrɔ a ba kul taa. Aa ɩ fãa wa.

³⁷Ɩ̃-cɛ a daba ʋlɔ na bɔ̃w ɩraa cĩcĩ a ʋ tɩɛrɩ̃sɩ pʋɔ, ma tɛrɛ damfʋ wa, bɔ̃w tɛrɛ nɩ a ʋ mɩ̃ɛ, ɩ̃ wa vɛl ir a ʋ suur pʋɔ a ꞌwaa kule a ʋ baraa wa, ʋ maalʼã vɩlaa.

³⁸A nɔhɔ̃, a ʋlɔ na kul a ʋ baraa maalʼã vɩlaa, ɩ̃ a ʋlɔ na ma kul wa maalfʋ sa na.

³⁹A pɔw na tɛrɛ a sɩrɛ na be nɩ ʋ na lɛɛ wa ta nɩ a ʋ sɩrɛ kũu daar. Ɩ̃ a ʋlɔ wa kpi, sɔr be na be ʋ na kul a ʋlɔ ʋ na bʋɔrɔ, ɩ̃-cɛ a sɛw na ʋ kul a ʋlɔ na ɩ a popuoro.

⁴⁰Ɩ̃ a ala ɩ ʋ jɛ na a lɛ a na nyɩrɩ̃ na nʋmɔ ʋ. Lɛ ɩ̃ nyɛ a ɩ a sɔr, ɩ̃ ɩ̃ mɩ tɩɛrʼã bɔ̃w ka ɩ̃ tɛrɛ na a Naaŋmɩn Sɩɛ.