Read Birifor, Malba 1 Kɔrɛ̃tɩ Sɛbɛ 8 Bible Online

1 Kɔrɛ̃tɩ Sɛbɛ 8 - Birifor, Malba bible

1 Kɔrɛ̃tɩ Sɛbɛ 8

¹A ƴɛ̃ƴɛrɩ̃ na, ɩ̃ bʋɔrɔ na ɩ̃ man nyɩ a yele ala ba na ma lo nɩ a baba ƴɛrɩ̃. Sɩ jaa sɩrɩ̃ na tɛrɛ a bɔ̃wfʋ a mɩnɛ nyɩ na yel, ɩ̃-cɛ a bɔ̃wfʋ ma maalʼã a nɩrɛ ʋ vʋnɔ, ɩ̃-cɛ a nʋfʋ ma maal sɩ na a sɩ karɛɛ a Naaŋmɩn sɔr pʋɔ.

²A ala ɩ̃ ɩ nɩrɛ tɩɛrʼã bɔ̃w ka ʋ bɔ̃w na bom, ꞌwaa bɔ̃w bom kãw a mɩnɛ a na sɛw sɛr wa.

³Ɩ̃-cɛ a ala ɩ̃ ɩ a nɩrɛ nʋnɔ na a Naaŋmɩn, a Naaŋmɩn bɔ̃w ʋ na.

⁴Ala-ɩ̃-sɔ, a ala na ɩ a tɩbɛ yele dɩfʋ, sɩ bɔ̃w ka tɩɩb ma ɩ bom ka a tẽw pʋɔ wa, ɩ̃ a Naaŋmɩn bõ-ƴen tɛw ɩ̃ be be.

⁵A ala ɩ̃ saarɩ̃ ɩ a bala ba na ma bʋɔlɔ a naaŋmɩnsɩ na be a saꞌlon mɩɩ a tẽw pʋɔ, (ɩ̃ sɩ bɔ̃w ka a naaŋmɩnsɩ nɩ a fãwsɩ waa na),

⁶ɩ̃-cɛ a sɩ jie, Naaŋmɩn bõ-ƴen tɛw ɩ̃ be be, a ʋlɔ na ɩ a sɩ Sãa, a ʋlɔ jie a yele a jaa na yi, a sɩ mɩ ɩ a ʋ ben. Ɩ̃ Nɩ-kpɛ̃ɛ bõ-ƴen tɛw ɩ̃ mɩ be be na ɩ a *Jeeju-Kirisi, a ʋlɔ ɩnɛ a yele a jaa be ka, ɩ̃ a ʋlɔ ɩnɛ sɩ mɩ tɛrɛ a baafʋ.

⁷Ɩ̃-cɛ aa ɩ a nɩbɛ ba jaa ɩ̃ tɛrɛ a ʋna bɔ̃wfʋ wa. A popuorbo ŋmɛɛ nyɩrɩ̃ na mɩlɩ̃ nɩ a tɩbɛ, ma cãa jɔrɔ dãbɩ̃ɛ áa yele ala ba na dɩrɛ cãa na ɩ a tɩbɛ yele. Ala-ɩ̃-sɔ, a ana yele sɔb ba na bar, a-na-ɩ a ba mɩ̃ɛ bɔ̃wfʋ cãa na pab.

⁸Aa ɩ dɩb na pɩɛlʼɩ̃ sɩ a Naaŋmɩn wa. A sɩmɩ ma dɩ wa, bom ma yire a sɩ pʋɔ wa. A sɩmɩ mɩ dɩ, bom ma mɩ lɛ dɔɔlɔ sɩ wa.

⁹Ɩ̃-cɛ nyɩ́ tɛrɛ nyɩ mɩ̃ɛ a ala nyɩ na tɛrɛ a sɔr maala ɩnɛ, a kɔ̃ wa maal a nyɩ yɛbɛ na bal a ƴɔ̃w-nyãa pʋɔ ʋ wa lo a fãa pʋɔ wa.

¹⁰A ala ɩ̃ ɩ a nɩrɛ ʋlɔ mɩ̃ɛ bɔ̃wfʋ na pab wa nyɛ na a fʋ̃ʋ na tɛrɛ a bɔ̃wfʋ a fʋ jɛ dɩrɛ a dɩb a tɩɩb diem, ʋ kɔ̃ tɩɛr bɔ̃w ka a vɩɛlɛ na ʋ na dɩ a tɩbɛ yele wa?

¹¹A lɛ, a fʋ bɔ̃wfʋ na saa na a yɛbɛ ʋlɔ na bal, a *Kirisi na kpi a ʋ ɩnɛ, na wɛ.

¹²Ɩ̃ a lɛ nyɩ na maal a fãa a nɔhɔ̃, a nyɩ yɛɛr bala jie a mɩ̃ɛ bɔ̃wfʋ na cãa pab, a Kirisi mɩ̃ɛ nyɩ maal a ʋna fãa ƴɔ̃w.

¹³Ala-ɩ̃-sɔ, a ala ɩ̃ ɩ a ɩ̃ bõ-dɩraa dɩfʋ na maalʼã a ɩ̃ yɛbɛ ʋ vɩɛ a Naaŋmɩn sɔr, maa lɔɔ dɩrɛ a ʋna bom fɩ̃ɩ wa, a mɩnɛ ɩ̃ kɔ̃ wa maal a ɩ̃ yɛbɛ ʋ vɩɛ wa.