Read Birifor, Malba 2 Kɔrɛ̃tɩ Sɛbɛ 7 Bible Online

2 Kɔrɛ̃tɩ Sɛbɛ 7 - Birifor, Malba bible

2 Kɔrɛ̃tɩ Sɛbɛ 7

¹Ɩ̃ yɛɛr nʋnɩsɩ, a-na-ɩ sɩ tɛrɛ na a ana pʋlɩ̃fʋ ƴɛrɩ̃sɩ a nɔhɔ̃, nyɩ́ ɩ a sɩ pɔl a yele ala bar, na sɔbɔ a sɩ ɩ̃gan nɩ a sɩ sɩɛ, dɩ nɩ a tuo ɩ̃ ɩ cɛcɛ, jɔrɔ nɩ a Naaŋmɩn.

²Nyɩ́ ɩ a sɩ kpɛ nyɩ nyãa. Saa maal nɩrɛ bier wa. Saa mɩ sãw nɩrɛ bar wa, ɩ̃ ma mɩ ŋmam nɩrɛ kãw wa.

³Maa ƴɛrɛ a lɛ na ƴɔ̃w nyɩ ƴɛrɩ̃ wa, ɩ̃-cɛ a mɩnɛ ɩ̃ na dãa de nĩe yel nyɩ, sɩ tɩɩ na nʋnɔ nyɩ bʋɔrɔ sɩ be taa a baafʋ pʋɔ, mɩɩ a kũu pʋɔ.

⁴Ɩ̃ barʼã tɩɛrʋ̃ a jaa a nyɩ ɩnɛ; a nyɩ maalfʋ ɩ ma na nʋ̃ɔ. A sɩ won pʋɔ a jaa ɩ̃ tɛrɛ na ꞌlafʋ, a nʋ̃ɔ mɩ ƴala ma.

⁵Yel-mɩ̃ɛ ʋ, a lɛ sɩ na dãa ta a Masɛdɔn-tẽw, saa dãa pɔw pɩɛnfʋ wa. Sɩ tuorʼɩ̃ na a won a jiir a jaa. Sɩ pɔw na a jɛb, ɩ̃ a dãbɩ̃ɛ mɩ dãa nyɔw sɩ.

⁶Ɩ̃-cɛ a Naaŋmɩn ʋlɔ na ma kʋrɔ a ꞌlafʋ a bala sube na sãw, ʋ mɩ dãa na kʋ sɩ a ʋna ꞌlafʋ a mɩnɛ a Tɩtɩ na wa.

⁷Ɩ̃ aa ɩ a ʋ waa ɩnɛ tɛw ʋ wa, ɩ̃-cɛ a mɩnɛ a ʋlɔ mɩ̃ɛ na mɩ dãa pɔw a ꞌlafʋ a nyɩ jie. Ʋ mɩ man sɩ na a mɩnɛ nyɩ na tɩɩ bʋɔrɔ nyɩ lɛ nyɛ ma, nɩ a mɩnɛ a nyɩ sube na sãw, nɩ a mɩnɛ nyɩ na ɓã ma. Ala-ɩ̃-sɔ ɩ̃ lɛ pɔw na a nʋ̃ɔ kpɛ̃ɛ go.

⁸A ala saarɩ̃ ɩ a ɩ̃ sɛbɛ ɩ̃ na dãa sɛb sãw nyɩ na a sube, maa waala a ƴɛ̃ƴɛrɩ̃ wa. Ɩ̃ dãa na waala, a-na-ɩ ɩ̃ nyɛ na bɔ̃w ka a ɩ̃ sɛbɛ sãw nyɩ na sube fɩ̃ɩ,

⁹ɩ̃-cɛ ɩ̃ cɩlɛ na a ƴɛ̃ƴɛrɩ̃ na. Aa ɩ a nyɩ sube sãwfʋ ɩnɛ ɩ̃ cɩlɛ wa, ɩ̃-cɛ a mɩnɛ a nyɩ su-sãwfʋ na ƴɔ̃w nyɩ a yɛ̃-lɩɛbfʋ pʋɔ. A nyɩ su-sãwfʋ maal nyɩ na a mɩnɛ a Naaŋmɩn na dãa bʋɔrɔ, ala-ɩ̃-sɔ saa maal nyɩ bier wa.

¹⁰A-na-ɩ a su-sãwfʋ ʋlɔ a Naaŋmɩn na ma de lɩɛbʼɩ̃ a sɩ yɛ̃ na cere nɩ sɩ a faafʋ pʋɔ, ma tɛrɛ waalʋ̃ʋ wa. Ɩ̃-cɛ a su-sãwfʋ ʋlɔ na yi ka a tẽw na pʋɔ, ʋlɔ ma ƴɔ̃w a nɩrɛ a kũu pʋɔ.

¹¹A mɩnɛ a nyɩ sube na sãw tu nɩ a mɩnɛ a Naaŋmɩn na bʋɔrɔ, nyɩ́ nyɛ a ala a na maal nyɩ! Nyɩ sɩrɩ̃ na tʋlɔ, ɩ̃ mɩ bɔ̃w miilʼɩ̃ a nyɩ son ɩfʋ. A ʋna fãa maalfʋ cɛ nyɩ na, a nyɩ mɩ jɔrɔ a Naaŋmɩn. Nyɩ́ nyɛ a mɩnɛ nyɩ na sɩrɩ̃ wono a toor vɩlaa, tɛrɛ nɩ a ɓĩɓinfʋ, mɩ sɩrɩ̃ bʋɔrɔ nɩ a fãa sʋbɔ kpãafʋ. Nyɩ miilʼã a lõbobo a jaa á nyɩ ɩ na cɛcɛ a ʋna ƴɛrɩ̃ naa pʋɔ.

¹²Ala-ɩ̃-sɔ, a sɛbɛ ʋlɔ ɩ̃ na tɩɩr kʋ nyɩ, maa sɛb a ʋlɔ na maal a fãa ɩnɛ wa. Aa mɩ ɩ a ʋlɔ ba na maal a fãa ƴɔ̃w ɩnɛ ʋ wa, ɩ̃-cɛ a nyɩmɩ ɩnɛ ʋ, a na miil nyɩ a Naaŋmɩn nii-sɔw a mɩnɛ nyɩ na tʋlɔ a sɩ nʋfʋ ɩnɛ.

¹³Ala-ɩ̃-sɔ sɩ lɛ pɔw na a ꞌlafʋ. Ɩ̃ aa ɩ a ꞌlafʋ tɛw sɩ pɔw wa, ɩ̃-cɛ a gãw na a lɛ. Sɩ mɩ cɩlɛ na a mɩnɛ sɩ na nyɛ a nʋ̃ɔ ʋlɔ a Tɩtɩ na tɛrɛ, a-na-ɩ a ʋ suur ɓãa na a nyɩ jaa fɛw ɩnɛ.

¹⁴Ɩ̃ dãa na sʋ̃ɔ nyɩ fɩ̃ɩ a Tɩtɩ sɛ̃, ɩ̃ nyaa ƴɔ̃w ma vĩ wa. A-na-ɩ a mɩnɛ a daar a jaa sɩ na ma ƴɛrɛ nɩ nyɩ a yel-mɩ̃ɛ tɛw, a lɛ ʋ mɩ, a mɩnɛ sɩ na sʋ̃ɔ nyɩ a Tɩtɩ sɛ̃, a mɩ tɔɔ na ɩ a yel-mɩ̃ɛ a lɛ.

¹⁵A ʋlɔ wa tɩɛr yuo, nyɩ ma nyɩrɩ̃ na kpɛ ʋ a nyãa, a mɩnɛ nyɩ na sɔw de ʋ nɩ a ƴɔ̃wfʋ nɩ a ɓĩifʋ pʋɔ, mɩ wono nɩ ʋ a toor a nyɩ jaa fɛw.

¹⁶Nʋ̃ɔ kpɛ̃ɛ nyɔw ma na a mɩnɛ ɩ̃ na barʼɩ̃ nyɩ a nyãa a yele a jaa fɛw ɩnɛ.