Read Birifor, Malba Galatɩ Sɛbɛ 3 Bible Online

Galatɩ Sɛbɛ 3 - Birifor, Malba bible

Galatɩ Sɛbɛ 3

¹A nyɩna Galatɩ nɩ-dãbolo naa, ala ɩ̃ ƴɔ̃w nyɩ a tɩsɔɔlʋ̃ʋ ʋlɔ? Mɩnɛ a wa ta a lɛ? A-na-ɩ nyɩ wõ na a *Jeeju-Kirisi ƴɛrɩ̃ cɛcɛ wɔ̃ taa nɩ a nyɩ nii-sɔw ba dãa kpa ʋ a nɩ-kʋ-daa juu.

²Ɩ̃ bʋɔrɔ na ɩ̃ soor nyɩ bom kãw a nyɩ kʋ ma a sɔwfʋ. Nyɩ pɔw na a Naaŋmɩn Sɩɛ a ƴɛr-kpɛn jɔfʋ ɩnɛ, mɩɩ a-na-ɩ nyɩ wõ na a Naaŋmɩn ƴɛr-son ɩ̃ sɔw?

³Mɩnɛ nyɩ na tʋɔ ɩ a dãbolo a lɛ? A Naaŋmɩn Sɩɛ pʋɔ nyɩ nyɔw a nyɩ Naaŋmɩn sɔr tufʋ, ɩ̃ lɛ bʋɔrɔ nyɩ baarʼɩ̃ nyɩ mɩ̃ɛ fãgã?

⁴Pɔrɔ nyɩ pɔw a ana yele a jaa na ta nyɩ mɩɩ? A kɔ̃ tʋɔ ɩ pɔrɔ wa.

⁵A lɛdaar a Naaŋmɩn na ma kʋ nyɩ a ʋ Sɩɛ ɩ̃ mɩ maala a nɔ-kofʋ tʋmɔ a nyɩ sɔ̃w, ʋ ma maalʼã a-na-ɩ nyɩ jɔrɔ na a ƴɛr-kpɛn, mɩɩ a-na-ɩ nyɩ wõ na a ʋ ƴɛrɩ̃ ɩ̃ sɔw?

⁶Nyɩ́ tɩɛrʼɩ̃ a mɩnɛ a Naaŋmɩn Sɛbɛ na yel a Abʋraham ɩnɛ. A yelʼã á ʋ ƴɔ̃w na a Naaŋmɩn a nyãa ɩ̃ a Naaŋmɩn de ʋ ʋ ɩ nɩ-toraa a ʋ nii-sɔw.

⁷Nyɩ sɛw na nyɩ bɔ̃w áa bala na ƴɔ̃w a Naaŋmɩn a nyãa, bala ɩ̃ sɩrɩ̃ ɩ a Abʋraham bal nɩbɛ.

⁸A Naaŋmɩn Sɛbɛ de na nĩe yel áa Naaŋmɩn nɔɔ de na a nɩ-bʋlsɩ a ba tor a ʋ nii-sɔw a ba ƴɔ̃w-nyãa ɩnɛ. Ala-ɩ̃-sɔ ʋ de nĩe man a ƴɛr-son naa kʋ a Abʋraham: “A nɩ-bʋlsɩ ba jaa na pɔw na a nason a fʋ ɩnɛ.”

⁹A nɔhɔ̃, a bala na tɛrɛ a ƴɔ̃w-nyãa na mɩ pɔw na a nason lãa nɩ a Abʋraham na dãa sɔw de a Naaŋmɩn ƴɛrɩ̃.

¹⁰Ɩ̃-cɛ nabier na nyɔw na a nɩrɛ lɛ na bʋɔrɔ a torfʋ a ƴɛr-kpɛn jɔfʋ pʋ̃ɔ, a-na-ɩ a sɛbʼã a Naaŋmɩn Sɛbɛ pʋɔ áa nɩrɛ lɛ na ma jɔrɔ a ala a jaa na sɛb a *Naaŋmɩn ƴɛr-kpɛn Sɛbɛ pʋɔ wa, á ʋ na pɔw na nabier.

¹¹Sɩ nyɛ na bɔ̃w ka nɩrɛ ma tʋɔrɔ toro a Naaŋmɩn nii-sɔw a ƴɛr-kpɛn ɩnɛ wa, a-na-ɩ a sɛbʼã a Naaŋmɩn Sɛbɛ pʋɔ áa ʋlɔ na tor a ʋ nii-sɔw a ʋ ƴɔ̃w-nyãa ʋ na tɛrɛ ɩnɛ na baa na.

¹²Ɩ̃ a ƴɛr-kpɛn ma ɩrɛ bõ-ƴen nɩ a ƴɔ̃w-nyãa wa. A-na-ɩ a yelʼã a Naaŋmɩn Sɛbɛ pʋɔ áa ʋlɔ na ɛ̃ɛ maala a ƴɛr-kpɛn tʋmɔ a jaa na pɔw na a baafʋ a ala ɩnɛ.

¹³A mɩ yelʼã: “A nabier na mɩ ta na a ʋlɔ ba nɔɔ kpara yaala a daa juu.” Ɩ̃ a mɩnɛ a *Kirisi na de a ʋna nabier a sɩ ɩnɛ, ʋ da sɩ na faa a ƴɛr-kpɛn nabier pʋɔ.

¹⁴A ala a jaa maalʼã a lɛ a mɩnɛ a nason ʋlɔ a Naaŋmɩn na dãa pʋlɩ̃ nɩ a Abʋraham na mɩ tʋɔ ta a nɩ-bʋlsɩ a Jeeju-Kirisi ɩnɛ, nɩ a mɩnɛ a sɩ na mɩ tʋɔ pɔw a Naaŋmɩn Sɩɛ ʋlɔ ʋ na dãa pʋlɩ̃ nɩ sɩ a sɩ ƴɔ̃w-nyãa pʋɔ.

¹⁵Yɛɛr, ɩ̃ na de na a nɩbɛ maalfʋ miilʼɩ̃ nyɩ bom. A ala ɩ̃ ɩ nɩrɛ hiinʼã nʋɔr a mɩnɛ a na sɛw, nɩrɛ kãw ma tɛrɛ sɔr na sãw a ʋna nʋɔr bar mɩɩ ʋ dɔɔl bom kãw wa.

¹⁶Ɩ̃ sɩ bɔ̃w ka a Naaŋmɩn dãa na pʋlɩ̃ nɩ a Abʋraham nɩ a ʋ bal parvʋɔr nɩrɛ kãw. A Naaŋmɩn Sɛbɛ ma yel á ʋ pʋlɩ̃ nɩ na a ʋ bal parvʋɔr nɩbɛ wɔ̃ taa nɩ nɩ-yaw ba ɩ wa, ɩ̃-cɛ a yelʼã á ʋ bal parvʋɔr nɩrɛ kãw, na miile a nɩ-bõ-ƴen tɛw, na ɩ a *Kirisi.

¹⁷Nyɛ a ala ɩ̃ na bʋɔrɔ ɩ̃ yel. A ƴɛr-kpɛn ala na bɩɛr wa a lɛ a yomo kɔɔr anaan dɔɔl lɩjɛrʼɩ̃ pie na tɔl baar ma tʋɔrɔ sãwna a nʋɔr ʋlɔ a Naaŋmɩn na de nĩe biin wa. A ala ɩ̃ dãa ɩ a lɛ ʋ, a ʋna nʋɔr biinfʋ kɔ̃ tʋɔ cãa ɩ bom wa.

¹⁸A ala ɩ̃ ɩ a yel-sono ala a Naaŋmɩn na gbɛɛrɩ̃ bin sɩ yi na a ƴɛr-kpɛn jɔfʋ pʋɔ, aa lɛ tʋɔrɔ yire a pʋlɩ̃fʋ pʋɔ wa. Ɩ̃-cɛ a Abʋraham pɔw na a ana yele a Naaŋmɩn pʋlɩ̃fʋ pʋɔ.

¹⁹A ala ɩ̃ ɩ a lɛ ʋ, bõ ɩnɛ ba ƴɔ̃w a ƴɛr-kpɛn? A Naaŋmɩn bɩɛrʼã ƴɔ̃w a ƴɛr-kpɛn a sɩ na tʋɔ bɔ̃w a ala na ɩ a mabfʋ a ʋ nii-sɔw. A dãa na sɛw a kam wa ta nɩ a lɛdaar a Abʋraham bal nɩrɛ ʋlɔ ɩnɛ ba na pʋlɩ̃ nɩ nɔɔ waara. A sɩ-tʋnɩsɩ dãa na de a ana ƴɛr-kpɛn wa nɩ man kʋ a Mowisi na dãa ɩ a *lɔlʋɔrɔ.

²⁰Ɩ̃-cɛ a ala ɩ̃ ɩ nɩ-bõ-ƴen tɛw ɩ̃ maala a bom, lɔlʋɔrɔ ma beree be wa. Ɩ a Naaŋmɩn ɩ na a ʋlɔ tɛw na wa nɩ a ʋna pʋlɩ̃fʋ naa.

²¹A lɛ bʋɔrɔ na a yel a ƴɛr-kpɛn lɛ lɩɛbɛ na a Naaŋmɩn pʋlɩ̃fʋ mɩɩ? Aa ɩ lɛ ʋ wa. A ala ɩ̃ dãa ɩ a ƴɛr-kpɛn be na be na tʋɔrɔ kʋrɔ a nɩbɛ a baafʋ, sɩ naa dãa na sɩrɩ̃ tor a Naaŋmɩn nii-sɔw a ana ƴɛr-kpɛn jɔfʋ ɩnɛ.

²²Ɩ̃-cɛ a Naaŋmɩn Sɛbɛ miilʼã áa maal-fãa kpalʼã a nɩbɛ ba jaa a kasu pʋɔ a mɩnɛ a bala na sɔw de a *Jeeju-Kirisi na tʋɔ pɔw a bom ʋlɔ a Naaŋmɩn na pʋlɩ̃ nɩ a ƴɔ̃w-nyãa deme.

²³A mɩnɛ a ƴɔ̃w-nyãa daar na ma dãa ta sɛr wa, a ƴɛr-kpɛn dãa na pɔw sɩ kasu pʋɔ lɛɛ wa ta nɩ a lɛdaar a ƴɔ̃w-nyãa ƴɛrɩ̃ na yi a cãa pʋɔ.

²⁴Ala-ɩ̃-sɔ a ƴɛr-kpɛn dãa na wɔ̃ taa nɩ a sɩ tɔtɔwrɔ wa ta nɩ a lɛdaar a *Kirisi na wa, a mɩnɛ sɩ na tʋɔ tor a Naaŋmɩn nii-sɔw a ƴɔ̃w-nyãa ɩnɛ.

²⁵Ɩ̃ a ƴɛ̃ƴɛrɩ̃ na a ƴɔ̃w-nyãa daar na ta, a tɔtɔwrɔ ʋlɔ ma lɛ cãa tɛrɛ fãgã a sɩ jie wa.

²⁶A-na-ɩ a nyɩ ƴɔ̃w-nyãa nyɩ na tɛrɛ be nɩ a Jeeju-Kirisi pʋɔ, nyɩ ɩ nɩ a Naaŋmɩn bibiir nyɩ jaa.

²⁷A nyɩmɩ jaa ba na dãa mʋr a kʋ̃ɔ a nyɩ ɩ nɩ a Kirisi a bõ-ƴen, a Kirisi nyɩ de su a lɛ a cẽcen kaarɩ̃.

²⁸Ala-ɩ̃-sɔ a Jufi nɩrɛ ma be kpee nɩ a nɩ-bʋlɔ wa; a gbãgbaa ma mɩ be kpee nɩ a ʋlɔ na sɔ a ʋ mɩ̃ɛ wa; a daba ma mɩ lɛ be kpee nɩ a pɔw wa. Nyɩ jaa ɩ na bõ-ƴen a mɩnɛ nyɩ na be a Jeeju-Kirisi pʋɔ.

²⁹Ɩ̃ a ala ɩ a Kirisi ben nyɩ ɩ, nyɩ ɩ na a Abʋraham bal nɩbɛ, na pɔwrɔ a ala a Naaŋmɩn na pʋlɩ̃ nɩ a bana nɩbɛ naa.