Read Birifor, Malba Ɛfɛɛsɩ Sɛbɛ 1 Bible Online

Ɛfɛɛsɩ Sɛbɛ 1 - Birifor, Malba bible

Ɛfɛɛsɩ Sɛbɛ 1

¹A maa Pol a Naaŋmɩn na vɛl ir ɩ̃ ɩ a *Jeeju-Kirisi *nɩ-tʋnaa ɩ̃ tɩɩrɛ a sɛbɛ na kʋrɔ a nyɩmɩ na ɩ a Naaŋmɩn nɩbɛ na be a Ɛfɛɛsɩ-tẽw na mɩ ɩ a nɩ-dẽdẽsɩ a Jeeju-Kirisi jie.

²A sũofʋ nɩ a pɩɛnfʋ na yi a sɩ Sãa Naaŋmɩn nɩ a sɩ Nɩ-kpɛ̃ɛ Jeeju-Kirisi sɛ̃, á be a nyɩ jie.

³A Naaŋmɩn ʋlɔ na ɩ a sɩ Nɩ-kpɛ̃ɛ *Jeeju-Kirisi Sãa ɩ̃ sɔ pɛwfʋ! A-na-ɩ a mɩnɛ sɩ na be a *Kirisi jie sɩ pɔw na a maal-vɩlaa bʋrɔ bʋrɔ a jaa na ɩ a sɩɛ ben a Naaŋmɩn sɛ̃ a saa juu.

⁴A lɛdaar ʋ na ma dãa maal a tẽw sɛr wa, ʋ vɛl sɩ na ir ƴɔ̃w a Kirisi pʋɔ a mɩnɛ a sɩ na tʋɔ ɩ a cɛcɛ, kɔ̃ tɛrɛ sãwfʋ jie a ʋ nii-sɔw wa. A mɩnɛ ʋ na nʋ sɩ,

⁵ʋ dãa na de nĩe ow sɩ kpee a sɩ na lɩɛb ɩ a ʋ bibiir a Jeeju-Kirisi ɩnɛ, a-na-ɩ lɛ ʋ nyɛ a nʋmɔ ʋ ɩ̃ mɩ ɩ a ʋ pʋ-tɩɛrʋ̃.

⁶Ala-ɩ̃-sɔ, nyɩ́ ɩ a sɩ pɛwrɛ a Naaŋmɩn na yi a yuor a ʋ maal-vɩlaa pʋɔ a mɩnɛ ʋ na nyɩrɩ̃ sũo sɩ nɩ a ʋ Bi-nʋnaa.

⁷A ʋ jie sɩ pɔw a faafʋ a ʋ jɩ̃ɩ na cir ɩnɛ, ɩ̃ ʋ mɩ de na a sɩ bɩɛfʋ bar kʋ sɩ. Nyɩ́ nyɛ a mɩnɛ ʋ na nyɩrɩ̃ sũo sɩ

⁸ɩ̃ a ʋ maal-vɩlaa mɩ dɔɔlɔ taa a sɩ jie! Ʋ kʋ sɩ na a kpaarfʋ nɩ a yẽ a jaa

⁹a sɩ na bɔ̃w nɩ a yel-sɔɔlsɩ ala na be a ʋ pʋ-tɩɛrʋ̃ pʋɔ, a-na-ɩ lɛ ʋ mɩ dãa bʋɔrɔ ʋ maal a ʋ tʋmɔ a Kirisi pʋɔ.

¹⁰A ʋ tʋmɔ ala ʋ na maala a lɛdaar a baarfʋ daar na tara ɩ na, ú kpaarɩ̃ a yele a jaa na be a saꞌlon, nɩ a ala a jaa na be ka a tene a be a Nɩ-kpɛ̃ɛ bõ-ƴen pulẽe na ɩ a Kirisi.

¹¹A Kirisi jie sɩ na mɩ be, a Naaŋmɩn ow sɩ na biin kpee, a mɩnɛ ʋ na de nĩe vɛl sɩ ir tu nɩ a ʋ pʋ-tɩɛrʋ̃ tʋmɔ. A Naaŋmɩn ɩ̃ ɩ a ʋlɔ na maala a yele a jaa tuure nɩ a mɩnɛ ʋ na ƴɔ̃w nyãa.

¹²Ʋ mɩ vɛlʼã a sɩmɩ ir na dãa de nĩe tɛrɛ nɩ a Kirisi a tɩɛrɩ̃-son a sɩ na tʋɔ pɛwrɛ ʋ, a ʋ yuor na yire.

¹³A nyɩmɩ mɩ, a mɩnɛ nyɩ na wõ a Naaŋmɩn yel-mɩ̃ɛ ƴɛr-son ʋlɔ na miil nyɩ a cɩ̃ɛfʋ sɔr, nyɩ sɔw na de a Kirisi, ɩ̃ mɩ pɔw a Naaŋmɩn Sɩɛ ʋ na dãa pʋlɩ̃ nɩ, na miile á ʋlɔ ɩ̃ sɔ nyɩ.

¹⁴A Sɩɛ ʋlɔ mɩ miile sɩ na a yele ala a Naaŋmɩn na gbɛɛrɩ̃ bin a ʋ nɩbɛ ɩnɛ, a yele ala sɩ na pɔwrɔ a lɛdaar a Naaŋmɩn na faara a ʋ mɩ̃ɛ nɩbɛ ba jaa baara, a ba pɛwrɛ ʋ, a ʋ yuor na yire.

¹⁵Ala-ɩ̃-sɔ a maa mɩ, a mɩnɛ ɩ̃ na wõ a ba ƴɛrɛ a nyɩ ƴɔ̃w-nyãa nyɩ na tɛrɛ nɩ a sɩ Nɩ-kpɛ̃ɛ *Jeeju-Kirisi, nɩ a nʋfʋ nyɩ na tɛrɛ nɩ a Naaŋmɩn deme ba jaa jie,

¹⁶ɩ̃ maa galɩ̃ a Naaŋmɩn pɛwfʋ a nyɩ ɩnɛ wa, ɩ̃-cɛ ɩ̃ ma sʋɔrɔ ʋ na ƴɔnɔ nyɩ a ɩ̃ Naaŋmɩn sʋɔrfʋ pʋɔ.

¹⁷Ɩ̃ ma sʋɔrʼã a sɩ Nɩ-kpɛ̃ɛ Jeeju-Kirisi Naaŋmɩn na ɩ a Sãa ʋlɔ na yi a yuor, á ʋ kʋ nyɩ a ʋ kpaarfʋ Sɩɛ na mɩ miile a ala na sɔɔlɩ̃, a nyɩ na tʋɔ bɔ̃w ʋ cɛcɛ.

¹⁸Ɩ̃ mɩ sʋɔrɔ ʋ na á ʋ yuo a nyɩ tɩɛrʋ̃ a nyɩ na tʋɔ bɔ̃w a yele ala ɩnɛ a Naaŋmɩn na bʋɔl nyɩ, nyɩ nɔɔ mɩ pɔwrɔ a ʋ jie a nɩdaar kãw, nɩ a na-yel-ɓɔmɔ ala ʋ na gbɛɛrɩ̃ bin a ʋ nɩbɛ ɩnɛ,

¹⁹nɩ a mɩnɛ a ʋ kpɛ̃w na nyɩrɩ̃ bɛrmɛ gãw a sɩmɩ na sɔw de ʋ jie, a kpɛ̃w ʋlɔ ʋ dãa de tʋ̃ nɩ a ʋ fãgã tʋmɔ

²⁰a lɛdaar ʋ na ir a *Kirisi a kũu pʋɔ, ɩ̃ maal ʋ ʋ jɛ a ʋ dʋrɩ̃ loor be a saa juu.

²¹Ɩ̃ a mɩnɛ ʋ na jɛ a be, ʋlɔ ɩ̃ gãw a tʋɔfʋ a jaa, nɩ a fãgãsɩ a jaa, nɩ a kpɛn a jaa, nɩ a nɩ-bɛrɛ ba jaa, nɩ a nɩrɛ lɛ na yi a yuor na wa beree a ƴɛ̃ƴɛrɩ̃ daar nɩ a daar ʋlɔ na waara pʋɔ.

²²A Naaŋmɩn de na a yele a jaa ƴɔ̃w a ʋ pulẽe, ɩ̃ mɩ ƴɔ̃w ʋ ʋ ɩ a kpɛ̃ɛ a yele a jaa ɩnɛ a *duo-puorbo pʋɔ

²³na ɩ a ʋ ɩ̃gan. Ʋlɔ ɩ̃ sɛw ba ba jaa, a mɩnɛ a Naaŋmɩn na mɩ sɛw ʋ ʋ jaa.