Read Birifor, Malba Ɛfɛɛsɩ Sɛbɛ 4 Bible Online

Ɛfɛɛsɩ Sɛbɛ 4 - Birifor, Malba bible

Ɛfɛɛsɩ Sɛbɛ 4

¹Ala-ɩ̃-sɔ, a maa na ɩ a kasu sʋbɔ a Nɩ-kpɛ̃ɛ ɩnɛ ɩ̃ kpãkpana nyɩ, nyɩ́ ɩ a nyɩ maalfʋ a cere tuure nɩ a ala ɩnɛ a Naaŋmɩn na bʋɔl nyɩ.

²Nyɩ́ ɩ nɩbɛ bala na wur a ba mɩ̃ɛ, ɩ nɩ nɩ-hɛlɛlɛ, tɛrɛ nɩ a su-nyɔwraa a daar a jaa, mɩ diere nɩ a bɩɛfʋ jiir bara kʋrɔ taa nɩ nʋfʋ.

³A Naaŋmɩn Sɩɛ maal nyɩ na a nyɩ ɩ bõ-ƴen, ala-ɩ̃-sɔ nyɩ́ bɔ̃w ɩraa a ʋna bõ-ƴen ɩfʋ pʋɔ tɛrɛ nɩ taa a su-ɓaar.

⁴Sɩ jaa kpaarɩ̃ na ɩ ɩ̃gan bõ-ƴen, ɩ̃ a Naaŋmɩn Sɩɛ mɩ ɩ bõ-ƴen, a mɩnɛ a Naaŋmɩn na mɩ bʋɔl nyɩ a nyɩ na lãa tɛrɛ tɩɛrɩ̃-son bõ-ƴen tɛw.

⁵Nɩ-kpɛ̃ɛ bõ-ƴen tɛw ɩ̃ be be. A sɩ ƴɔ̃w-nyãa nɩ a kʋ̃ɔ mʋrfʋ mɩ ɩ bõ-ƴen tɛw.

⁶Naaŋmɩn bõ-ƴen tɛw ɩ̃ be be, ʋlɔ na ɩ a nɩbɛ ba jaa Sãa. A ba jaa pʋɔ, ʋlɔ ɩ̃ ɩ a kpɛ̃ɛ, mɩ tʋnɔ a tʋmɔ a ba jie, ɩ̃ mɩ be a ba pʋ̃ɔ.

⁷Ɩ̃-cɛ a sɩ jaa bõ-ƴene-ƴene pɔw na a tʋɔfʋ kpee kpee tu nɩ a ala sɩ na pɔw a *Kirisi maal-vɩlaa jie.

⁸A mɩnɛ a Naaŋmɩn Sɛbɛ na yel: “A lɛdaar ʋ na dãa do, ʋ nyɔɔrʼã a ʋ sama-deme do nɩ, ɩ̃ mɩ de a yele po a ʋ nɩbɛ.”

⁹Bõ ɩ̃ ɩ a ƴɛr-birʼã par, na yel á ʋ do na? A miile na á ʋ dãa na de nĩe suu ka a tẽw pulẽe.

¹⁰A ʋlɔ na suu a lɛ, a ʋlɔ naa ɩ̃ do a saꞌlon iin, a mɩnɛ ʋ na tʋɔ paal a jiir a jaa.

¹¹A ʋlɔ ɩ̃ mɩ po a nɩbɛ a ba tʋmɔ kpee kpee. Ʋ ƴɔ̃w na a ŋmɛɛ a ba ɩ *nɩ-tʋnɩsɩ, a ŋmɛɛ ɩ a Naaŋmɩn pʋ-tɩɛrʋ̃-bʋʋrbɔ, a ŋmɛɛ go lɛ ɩ a ƴɛr-son-hierbe, ɩ̃ a ŋmɛɛ mɩ lɛ ɩ a tɔtɔɔrbɔ, jaana nɩ a nɩbɛ.

¹²Ʋ po ba na a tʋmɔ a lɛ a mɩnɛ a ba na gbɛɛrɩ̃ nɩ a Naaŋmɩn nɩbɛ a ba na tʋɔ tʋnɔ a ʋ tʋmɔ, maala nɩ a Kirisi ɩ̃gan ʋ karɛɛ a ƴɔ̃w-nyãa pʋɔ,

¹³wa tara nɩ a lɛdaar a sɩ jaa na lãwna taa ɩrɛ bõ-ƴen a sɩ ƴɔ̃w-nyãa pʋɔ, bɔ̃wnɔ nɩ a Naaŋmɩn Bie ɩ̃ mɩ lɩɛbɛ ɩrɛ a nɩ-bɛrɛ na bɩ, wɔ̃ taa nɩ a Kirisi na ɩ a cɛcɛ.

¹⁴A nɔhɔ̃, saa lɛ ɩrɛ bibiir a jaan-kpeesɩ na ma de vavire yʋɔrɔ nɩ a kʋ̃ɔ sɛsɛb kaarɩ̃ wa. A jaanfʋ ala ma yi na a bɛbɛlbɛ bala na kpɩl jie, bɛlɛ nɩ a nɩbɛ a ba bɔrɔ.

¹⁵Ɩ̃-cɛ a sɩmɩ, a mɩnɛ sɩ na ƴɛrɛ a yel-mɩ̃ɛ ƴɛrɩ̃ nɩ a nʋfʋ, sɩ na karɩ̃ na a yele a jaa pʋɔ a Kirisi jie na ɩ a juu.

¹⁶A ʋlɔ ɩnɛ a ɩ̃gan ɓãbie cow taa, ɩ̃ a ɩ̃gan ʋ jaa fɛw lũ na taa nɩ a ʋ cowfʋ jiir ala a jaa ʋ na tɛrɛ. A nɔhɔ̃, a lɛdaar a ɩ̃gan ɓãbie a jaa na tʋnɔ a ba tʋmɔ a mɩnɛ a na sɛw, a ɩ̃gan ʋ jaa ma karɩ̃ na dɔɔlɔ a nʋfʋ pʋɔ.

¹⁷Ala-ɩ̃-sɔ, nyɩ́ nyɛ a ala ɩ̃ na yele nyɩ nɩ a Nɩ-kpɛ̃ɛ yuor. Nyɩ taa cãa maala a mɩnɛ a nɩ-bʋlsɩ na maala, tuure nɩ a ba tɩɛrɩ̃-pɔrsɩ wa.

¹⁸A ba tɩɛrɩ̃sɩ be na a libe pʋɔ. Baa pɔw a Naaŋmɩn baafʋ fɩ̃ɩ wa. A ba sube nyɩrɩ̃ na kpɛmɛ a baa bɔ̃w bom wa.

¹⁹Bom maa cãa ba ba wa, a ba de a ba mɩ̃ɛ ƴɔ̃w a pebfʋ pʋɔ, tʋnɔ nɩ a tʋ̃-kpansɩ bʋrɔ bʋrɔ a jaa, maa mɩ tɩɛrʼɩ̃ bom wa.

²⁰Ɩ̃-cɛ a nyɩmɩ, aa ɩ ala nyɩ jaan a *Kirisi ɩnɛ wa.

²¹A mɩnɛ nyɩ na ɩ a Kirisi nɩbɛ, ɩ̃ bɔ̃w ka nyɩ wõ na a ba ƴɛr a *Jeeju ƴɛrɩ̃, ɩ̃ jaan nyɩ a yel-mɩ̃ɛ ʋlɔ na be a ʋ pʋɔ.

²²Ala-ɩ̃-sɔ, a sɛw na a nyɩ korĩ-cɛ maal-bie a bɔr, a ana korĩ-cɛ maalfʋ na dãa tɛrɛ a jɩɛlfʋ bɛlɛ nɩ nyɩ cere nɩ a wɛfʋ jie.

²³A sɛw na a nyɩ sɩɛ nɩ a nyɩ tɩɛrɩ̃sɩ a jaa a lɩɛb ɩ yel-paala.

²⁴Nyɩ́ lɩɛb maala a maal-bi-paala ala na tuure a Naaŋmɩn ben na mɩ yi a ʋ jie, tɛrɛ a torfʋ nɩ a cɛcɛ ɩfʋ ala na ɩ a yel-mɩ̃ɛ.

²⁵Ala-ɩ̃-sɔ nyɩ́ ɩ a jirsɩ a bɔr. Nyɩ jaa bõ-ƴene-ƴene nyɩ́ yele taa a yel-mɩ̃ɛ, a-na-ɩ sɩ jaa ɩ na ɩ̃gan bõ-ƴen ɓãbie.

²⁶A ala ɩ nyɩ wa nyɛ na suur, nyɩ́ tɛrɛ nyɩ mɩ̃ɛ kɔ̃ wa maal fãa wa. Nyɩ taa ɩ a mɔtɔ̃w ʋ wa mʋr pɔw a nyɩ suur wa,

²⁷ɩ̃ nyɩ taa wa kʋrɔ a Satã sɔr ʋ kpɛɛrɛ nyɩ wa.

²⁸A ʋlɔ na dãa jure, ú ɩ a baar, ɩ̃-cɛ ú nyɔw a tʋmɔ na ɩ a son, tʋnɔ nɩ kpɛ̃w, a mɩnɛ ʋ na tʋɔ pɔw a yele sũo nɩ a nãw deme.

²⁹Nyɩ taa wa ɩrɛ ƴɛr-kpana ʋ wa yire a nyɩ nʋɔr pʋɔ fɩ̃ɩ wa, ɩ̃-cɛ nyɩ́ ƴɛrɛ ƴɛr-vɛlɛ, a daar ʋlɔ na sɛw, a na maala a nɩbɛ a ba karɛɛ a ba ƴɔ̃w-nyãa pʋɔ, ɩ̃ sũono a bala na pɩɛlʼɩ̃ nyɩ.

³⁰Nyɩ taa wa sãwna a Naaŋmɩn Sɩ-cɛcɛ suur wa. Ʋlɔ ɩ̃ ɩ a jɩbaa a Naaŋmɩn na ƴɔ̃w nyɩ, na miile a ʋ na faa nyɩ na a bibi-baaraa dayen.

³¹Nyɩ́ bar a nɩrɛ pʋ̃ɔ ƴɔ̃wfʋ, nɩ a su-damfʋ, nɩ a suur nyɛfʋ a jaa. Nyɩ́ mɩ bar a gɔ̃-pɔɔr, a kpɛfʋ, nɩ a pʋ-to-tʋmɔ a jaa, a bɔr a nyɩ sɔ̃w.

³²Ɩ̃ nyɩ́ ɛ̃ɛ ɩ nɩ-sono, tɛrɛ nɩ taa a nã-bɔ̃wfʋ, bara nɩ a bɩɛfʋ jiir kʋrɔ taa, a mɩnɛ a Naaŋmɩn na mɩ bar a nyɩ bɩɛfʋ jiir kʋ nyɩ a Kirisi ɩnɛ.