Read Birifor, Malba Ɛfɛɛsɩ Sɛbɛ 5 Bible Online

Ɛfɛɛsɩ Sɛbɛ 5 - Birifor, Malba bible

Ɛfɛɛsɩ Sɛbɛ 5

¹A-na-ɩ nyɩ ɩ na bibiir a Naaŋmɩn na nʋnɔ, ala-ɩ̃-sɔ nyɩ́ tɔɔnɔ ʋ.

²Nyɩ́ tɛrɛ nʋfʋ a nyɩ baafʋ pʋɔ, wɔ̃ taa nɩ a *Kirisi na nʋ sɩ ɩ̃ de a ʋ mɩ̃ɛ kʋ sɩ. A-na-ɩ ʋ de na a ʋ mɩ̃ɛ kʋ a Naaŋmɩn, na ʋ lɩɛb ɩ a baar-lo-bom, nyuure vɩlaa kpɛɛrɛ ʋ.

³Nyɩ ɩ na a Naaŋmɩn deme, ala-ɩ̃-sɔ a gã-ta-burbur mɩɩ a maal-bi-kpansɩ mɩɩ a folʋ̃ʋ ƴɛrɩ̃sɩ a jaa ma sɛw a ma yi a nyɩ nɔɛ pʋʋr wa.

⁴Aa vɩɛlɛ a nyɩ na ƴɛrɛ a vĩ ƴɛrɩ̃sɩ mɩɩ a ƴɛr-folo-folo mɩɩ a ƴɛr-kpansɩ wa, ɩ̃ nyɩ́ ma ɛ̃ɛ pɛwrɛ a Naaŋmɩn.

⁵Nyɩ́ bɔ̃wnaa, a bala na gana taa a burbur ba jaa, nɩ a bala na maala a maal-bi-kpansɩ, nɩ a bala na kpɛ a mimir (a-na-ɩ a ʋlɔ na kpɛ a mimir wɔ̃ na taa nɩ a tɩɩb sʋbɔ) ma tʋɔrɔ kpɛɛrɛ pɔwrɔ a yel-sono ala na be a Naaŋmɩn fãw pʋɔ wa.

⁶Nyɩ taa ɩ a nɩrɛ wa bɛlɩ̃ nɩ nyɩ a ƴɛr-pɔrsɩ wa. A yel-nɔhɔ̃ ɩnɛ a Naaŋmɩn su-tuo mɔɔ pɔw a bala na wõw ʋ a toor.

⁷Ala-ɩ̃-sɔ nyɩ taa lãwna taa nɩ a nɩ-lɛ nʋmɔ wa.

⁸A korĩ-cɛ, a libe pʋɔ nyɩ dãa be, ɩ̃-cɛ a ƴɛ̃ƴɛrɩ̃ na nyɩ na be a Kirisi pʋɔ, cãa pʋɔ nyɩ be. Ala-ɩ̃-sɔ, nyɩ́ maala a cãa pʋɔ nɩbɛ maalfʋ,

⁹a-na-ɩ a cãa tɛrɛ na a son ɩfʋ, a torfʋ nɩ a yel-mɩ̃ɛ tʋ̃-bʋrɔ bʋrɔ a jaa.

¹⁰Nyɩ́ ƴɔ̃w fãw ɩ̃ bɔ̃w barsɩ a maal-bie ala na nʋmɔ a Nɩ-kpɛ̃ɛ.

¹¹Nyɩ taa wa beree tɔ a tʋ̃-pɔrsɩ pʋɔ a bala na be a libe pʋɔ na tʋnɔ wa, ɩ̃ nyɩ́ ɛ̃ɛ maal a yi cãa pʋɔ.

¹²A ma ɩ na vĩ a ala ɩ fʋ mana na a ala ba na ma sɔɔlɩ̃ maal.

¹³Ɩ̃-cɛ a lɛdaar a tʋmɔ ala na yi a cãa pʋɔ, ba na nyɛ na a mɩnɛ a na wɔ̃,

¹⁴a-na-ɩ a yele a jaa na ma yi a cãa pʋɔ ma caarɩ̃ na. Ala-ɩ̃-sɔ a yel: “A fʋ̃ʋ na gur, jaw! Jaw ir a kũusɩ pʋɔ, ɩ̃ a Kirisi na caarɩ̃ fʋ na a ʋ cãa.”

¹⁵Ala-ɩ̃-sɔ nyɩ́ bɔ̃w tɛrɛ nyɩ mɩ̃ɛ a nyɩ maalfʋ pʋɔ, kɔ̃ maala wɔ̃ taa nɩ a bala na ma bɔ̃w bom wa, ɩ̃-cɛ nyɩ́ maala nɩ-kpaarsɩ maalfʋ.

¹⁶Nyɩ́ nyɩrɛ tʋnɔ a tʋ̃-vɛlɛ ala nyɩ na tʋɔrɔ a daarʼã pʋɔ, a-na-ɩ a bibie asɩmɛ ɩ na bibi-tor.

¹⁷Nyɩ taa ɩ dãbolo wa, ɩ̃-cɛ nyɩ lã bɔ̃w a ala a Naaŋmɩn na bʋɔrɔ a nyɩ jie.

¹⁸Nyɩ taa cãa ɩ dã-ꞌlaarba wa; a sãwfʋ pʋɔ a na cenʼɩ̃ nyɩ. Ɩ̃-cɛ nyɩ́ sɛw nɩ a Naaŋmɩn Sɩɛ.

¹⁹Nyɩ́ cɩɛrɛ a Naaŋmɩn Sɛbɛ yele, nɩ a yele ala nyɩ na ƴɔ̃w, nɩ a ala a Naaŋmɩn Sɩɛ na kʋ nyɩ, ŋmeere nɩ a bɩnɛ pɛwrɛ nɩ ʋ nɩ a nyɩ suur ʋ jaa.

²⁰A daar a jaa, nyɩ́ puoro a Sãa Naaŋmɩn nɩ a sɩ Nɩ-kpɛ̃ɛ *Jeeju-Kirisi yuor a yele a jaa pʋɔ.

²¹A mɩnɛ nyɩ na ƴɔnɔ a *Kirisi, nyɩ́ mɩ cʋrɔ taa.

²²Pɔɔbɔ, nyɩ́ cʋrɔ a nyɩ sɩrbɛ a mɩnɛ nyɩ na mɩ cʋrɔ a Nɩ-kpɛ̃ɛ,

²³a-na-ɩ a sɩrɛ ɩ̃ ɩ a ʋ pɔw juu, a mɩnɛ a Kirisi na ɩ a juu a *duo-puorbo na ɩ a ʋ ɩ̃gan jie, mɩ ɩ nɩ a ba Fafaara.

²⁴Ala-ɩ̃-sɔ a pɔɔbɔ sɛw na na cʋrɔ a ba sɩrbɛ a yele a jaa pʋɔ, wɔ̃ taa nɩ a duo-puorbo na cʋrɔ a Kirisi.

²⁵Sɩrbɛ, nyɩ́ nʋnɔ a nyɩ pɔɔbɔ wɔ̃ taa nɩ a mɩnɛ a Kirisi na mɩ nʋ a duo-puorbo, ɩ̃ de a ʋ mɩ̃ɛ kʋ ba.

²⁶Ʋ maalʼã a lɛ na ow ba kpee a ba ɩ a Naaŋmɩn ben, a mɩnɛ ʋ na pɛw ba nɩ a kʋ̃ɔ nɩ a ƴɛrɩ̃ cɔɔrɩ̃.

²⁷A-na-ɩ ʋ bʋɔrɔ na ʋ maal a duo-puorbo a ba ɩraa a ʋ nii-sɔw tɩɩ vɩɛlɛ ɩ nɩ a cɛcɛ, kɔ̃ tɛrɛ sãwfʋ jie, nɩ mabfʋ jie, nɩ lɔ̃lɔrɩ̃fʋ jie, nɩ bom kãw na wɔ̃ a lɛ wa.

²⁸A lɛ ʋ mɩ, a sɩrbɛ sɛw na na nʋnɔ a ba pɔɔbɔ, a mɩnɛ ba na nʋ a ba mɩ̃ɛ. A ʋlɔ na nʋnɔ a ʋ pɔw, a ʋ mɩ̃ɛ ʋ nʋnɔ.

²⁹A-na-ɩ nɩrɛ ma be na ꞌlaar a ʋ ɩ̃gan wa. Ʋ ma ɛ̃ɛ na cɔɔrɔ ʋ ɩ̃ bɔ̃w cɛlɛ ʋ, a mɩnɛ a Kirisi na maala a duo-puorbo jie,

³⁰a-na-ɩ sɩ ɩ na a ʋ ɩ̃gan ɓãbie.

³¹A mɩnɛ a Naaŋmɩn Sɛbɛ na yel: “A ala ɩnɛ a daba na bar a ʋ sãa nɩ a ʋ mã, ɩ̃ mar taa nɩ a ʋ pɔw a ba lɩɛb ɩ ɩ̃gan bõ-ƴen.”

³²A ƴɛr-sɔɔlaa na ɩ na bõ-kpɛ̃ɛ a ka. A ɩ̃ jie, a ƴɛrɛ na a Kirisi nɩ a duo-puorbo ƴɛrɩ̃.

³³Ɩ̃-Cɛ a mɩ ƴɛrɛ nɩ na a nyɩmɩ mɩ. A sɛw na a sɩrɛ ʋ nʋnɔ a ʋ pɔw a ʋ mɩ̃ɛ kaarɩ̃, ɩ̃ a pɔw na mɩ ƴɔnɔ a ʋ sɩrɛ.