Read Birifor, Malba Fɩlɩpɩ Sɛbɛ 1 Bible Online

Fɩlɩpɩ Sɛbɛ 1 - Birifor, Malba bible

Fɩlɩpɩ Sɛbɛ 1

¹A maa Pol nɩ a Timote na ɩ a *Jeeju-Kirisi tʋ̃tʋnbɔ ɩ̃ tɩɩrɛ a sɛbɛ na kʋrɔ a nyɩmɩ Naaŋmɩn nɩbɛ na be a Jeeju-Kirisi pʋɔ a be a Fɩlɩpɩ-tẽw, nɩ a bala na ɩ a ni-dierbe, nɩ a bala na mɩ ɩ a yel-ꞌwuorbo.

²A sũofʋ nɩ a pɩɛnfʋ ala na yi a sɩ Sãa Naaŋmɩn nɩ a Nɩ-kpɛ̃ɛ Jeeju-Kirisi sɛ̃, á be a nyɩ jie.

³A lɛ ɩ̃ na mɔɔ tɩɛr yuo nyɩ, ɩ̃ ma pɛwrɛ na a ɩ̃ Naaŋmɩn a nyɩ ɩnɛ.

⁴A daar a jaa ɩ̃ na ma sʋɔrɔ ƴɔnɔ nyɩ, ɩ̃ ma sʋɔrʼã nɩ nʋ̃ɔ,

⁵a mɩnɛ nyɩ na sũo ma a Naaŋmɩn ƴɛr-son tʋmɔ pʋɔ a nyɔwfʋ bibir wa ta nɩ a ƴɛ̃ƴɛrɩ̃

⁶Ɩ̃ barʼã nyãa áa Naaŋmɩn ʋlɔ na nyɔw a tʋ̃-vɩlaa a nyɩ sɔ̃w na cenʼɩ̃ na wa baar a *Jeeju-Kirisi lɛwaa bibir.

⁷A vɩɛlɛ na ɩ̃ na tɛrɛ a tɩɛrɩ̃-lɛ a nyɩ jaa ɩnɛ, a-na-ɩ nyɩ kpɛ ma na nyãa. A ala ɩ a kasu pʋɔ ɩ̃ na be, mɩɩ a mɩnɛ ɩ̃ na cɩɩrɛ taa nɩ a nɩbɛ a Naaŋmɩn ƴɛr-son ɩnɛ miile nɩ a ʋ ɩ na yel-mɩ̃ɛ, a nyɩ jaa fɛw ɓã ma na, a sɩ lãa pɔw a Naaŋmɩn sũofʋ.

⁸A Naaŋmɩn bɔ̃w na ka maa ŋmaa jiri wa a mɩnɛ ɩ̃ na yel nyɩ á ɩ̃ tɩɩ na nʋ nyɩ nɩ a Jeeju-Kirisi nʋfʋ.

⁹A ɩ̃ Naaŋmɩn sʋɔrfʋ a nyɩ ɩnɛ ɩ na áa nyɩ nʋfʋ na dɔɔlɔ a daar a jaa, a mɩnɛ nyɩ na sɩrɩ̃ tɛrɛ a bɔ̃wfʋ nɩ a yɛ̃ a jaa,

¹⁰bɔ̃wnɔ nɩ a ala na vɩɛlɛ. A nɔhɔ̃, nyɩ na ɩ na cɛcɛ kɔ̃ tɛrɛ mabfʋ jie a *Kirisi waa bibir wa,

¹¹ɩ̃ mɩ paalʼɩ̃ a maal-bi-torisɩ ala na yi a Jeeju-Kirisi jie, a mɩnɛ a Naaŋmɩn pɛwfʋ nɩ a ʋ yuor na yire.

¹²Yɛɛr, ɩ̃ bʋɔrɔ na nyɩ bɔ̃w ka a ala na ta ma, ɛ̃ɛ na maal a Naaŋmɩn ƴɛr-son ʋ tɔ cen nii-sɔw.

¹³A maalʼã a sɔdaalsɩ bala ba jaa na gure ma, nɩ a nɩbɛ ba jaa, a ba bɔ̃w bɔ̃w ka ɩ̃ be na a kasu pʋɔ a *Kirisi ɩnɛ.

¹⁴Ɩ̃ a mɩnɛ ba na nyɛ ma a lɛ, a yɛɛr yaw jie pɔw na a ꞌlafʋ a Nɩ-kpɛ̃ɛ pʋɔ, ma ꞌla man a Naaŋmɩn ƴɛrɩ̃ maa jɔ dãbɩ̃ɛ wa.

¹⁵Sɩrɛ jaa ʋ, a ŋmɛɛ a ba sɔ̃w ƴɛrɛ na a Kirisi ƴɛrɩ̃ tɛrɛ nɩ ma a nyuur nɩ a cɩɩrʋ̃, ɩ̃-cɛ a ŋmɛɛ ƴɛrɛ nɩ na su-son.

¹⁶A bala, nʋfʋ ba tɛrɛ ƴɛrɛ nɩ, a-na-ɩ ba bɔ̃w ka a Naaŋmɩn biin ma na a ka ɩ̃ na var a bala na cɩɩrɛ a ʋ ƴɛr-son bar.

¹⁷Ɩ̃-cɛ a ŋmɛɛ ƴɛrɛ na a Kirisi ƴɛrɩ̃ bʋɔrɔ nɩ a ba mɩ̃ɛ yuor. A ba pʋɔ ma vɩɛlɛ wa. Ba tɩɛrʼã beeka ba na dɔɔlʼã a ɩ̃ won a kasu pʋɔ.

¹⁸Bõ a na ɩ? A yel-mɩ̃ɛ ba ƴɛrɛ nɩ, mɩɩ a bɛlɩ̃fʋ ba ƴɛrɛ nɩ, a Kirisi ƴɛrɩ̃ yire na a ala a jaa pʋɔ. Ala-ɩ̃-sɔ ɩ̃ cɩlɛ na, ɩ̃ ɩ̃ na cãa na cɩlɛ.

¹⁹A-na-ɩ ɩ̃ bɔ̃w ka a ala a jaa na lɩɛbʼã ɩ a ɩ̃ faafʋ, a yi a nyɩ Naaŋmɩn sʋɔrfʋ nɩ a sũofʋ ala a *Jeeju-Kirisi Sɩɛ na sũo nɩ ma.

²⁰Ɩ̃ tɛrɛ na tɩɛrɩ̃-son bɔ̃w cɛlɛ nɩ, á ala wa saarɩ̃ wɔ̃ mɩnɛ ɩ̃ a kɔ̃ ɩ ma vĩ wa. Ɩ̃-cɛ, a mɩnɛ ɩ̃ na dãa tɛrɛ a ꞌlafʋ a daar a jaa, lɛ ɩ̃ na mɩ cãa tɛrɛ ʋ, a mɩnɛ a maa wa kpi, mɩɩ ɩ̃ cãa na, a Kirisi na pɔw a ju-kpɛ̃ɛ a ɩ̃ jie.

²¹A ala ɩ a maa ʋ, a Kirisi ɩ̃ ɩ a ɩ̃ baafʋ, ɩ̃ a kũu sa ma na.

²²Ɩ-cɛ a ala ɩ a maa cãa, ɩ̃ na tʋɔ na cãa maal tʋ̃-son. Maa bɔ̃w a buor ɩ̃ na vɛlɛ ire wa.

²³Yele ayi sɔɔlɩ̃sɔw ɩ̃ be. Ɩ̃ nyɛ na a tɩɩ vɩɛlɛ ɩ̃ na yi a ka ɩ̃ cen na be nɩ a Kirisi,

²⁴ɩ̃-cɛ a ɛ̃ɛ na sɛw ɩ̃ na cãa be a ka a nyɩ ɩnɛ.

²⁵Ɩ̃ a mɩnɛ ɩ̃ na nyɛ a lɛ, ɩ̃ bɔ̃w ka ɩ̃ na jɛ na, be nɩ nyɩ nyɩ jaa, naa maal nyɩ a nyɩ karɩ̃ ɩ̃ mɩ pɔw a nʋ̃ɔ a ƴɔ̃w-nyãa pʋɔ.

²⁶A nɔhɔ̃, a maa wa lɩɛb be a nyɩ sɔ̃w, nyɩ na barʼɩ̃ na a Jeeju-Kirisi tɩɛrʋ̃ vʋ̃ʋ a ɩ̃ ɩnɛ.

²⁷A ala saarɩ̃ wɔ̃ mɩnɛ, nyɩ́ ɩ a nyɩ maalfʋ á tuure a Kirisi ƴɛr-son, a mɩnɛ a maa wa tʋɔ wɩ ꞌwuor nyɩ je kãa, mɩɩ maa wɩ wa, ɩ̃ ɩ̃ na tʋɔ wõ á nyɩ tɛrɛ na tɩɛrʋ̃ bõ-ƴen ɩraa nɩ cĩcĩ, mɩ tɛrɛ nɩ nɔ-bõ-ƴen jɛbɛ nɩ a ƴɛr-son ƴɔ̃w-nyãa jɛb.

²⁸Nyɩ taa wa sɔwrɔ a nyɩ sama-deme a ba wa pere nyɩ wa. A na miil ba áa wɛfʋ jie ba cere, ɩ̃ mɩ miil nyɩ a nyɩ na pɔw na a faafʋ. Ɩ̃ a ala a jaa yi na a Naaŋmɩn jie.

²⁹A Naaŋmɩn maal-vɩlaa pʋɔ nyɩ pɔw na a sɔr na ƴɔ̃w a Kirisi a nyãa. Ɩ̃-cɛ aa ɩ a ala tɛw ʋ wa, ɩ̃ nyɩ mɩ pɔw na a sɔr na nyɛrɛ a won a ʋ ɩnɛ,

³⁰a mɩnɛ nyɩ na pɔw ma a won ala pʋɔ ɩ̃ na mʋɔrɔ nɩ. A ɩ na a won ala nyɩ na dãa nyɛ nɩ ma, ɩ̃ lɛ wõ, a cãa be a ɩ̃ jie a ƴɛ̃ƴɛrɩ̃ na.