Read Birifor, Malba Fɩlɩpɩ Sɛbɛ 3 Bible Online

Fɩlɩpɩ Sɛbɛ 3 - Birifor, Malba bible

Fɩlɩpɩ Sɛbɛ 3

¹Ɩ̃ yɛɛr, a ƴɛ̃ƴɛrɩ̃ na, nyɩ́ cɩlɛ a mɩnɛ nyɩ na be a Nɩ-kpɛ̃ɛ pʋɔ. Aa kpɛmɛ ma ɩ̃ na lɛ yel nyɩ a ala ɩ̃ na dãa de nĩe yel nyɩ wa, ɩ̃ a na tɩɛ nyɩ na tɛɛlɛ.

²Nyɩ́ tɛrɛ nyɩ mɩ̃ɛ a bana baar ɩnɛ, a bana bier-maalba na ma cɛ̃pɛrɛ a yʋɔr ŋmaafʋ.

³Sɩmɩ sɩrɩ̃ ɩ a bala na ŋmaa a yʋɔr, a-na-ɩ a Naaŋmɩn Sɩɛ sɩ tɛrɛ puoro nɩ ʋ, ɩ̃ saa bar a nyãa ƴɔ̃w a ɩ̃gan buur yele pʋɔ wa, ɩ̃ *Jeeju-Kirisi pʋɔ sɩ bar a sɩ tɩɛrɩ̃sɩ ƴɔ̃w.

⁴A maa mɩ, ɩ̃ naa mɩ dãa na tʋɔ bar nyãa ƴɔ̃w a ana ɩ̃gan buur yele pʋɔ. A ala ɩ nɩrɛ bɔ̃w ka ʋ na tʋɔ na sɔr a ʋ mɩ̃ɛ yele barʼɩ̃ a nyãa, ɩ̃ na tʋɔ na sɔr a gãw a lɛ.

⁵Bibie anuu-nʼata ba dɔw ma ɩ̃ pɔw, ɩ̃ a ba ŋmaa ma a yʋɔr. *Ɩsɩrayɛl nɩrɛ ɩ̃ ɩ, be a Bɛ̃jamɛ bal pʋɔ. Eburo nɩrɛ dɔw ma ɩ̃ ɩ a Eburo nɩrɛ. A ala ɩ a Jufisɩ ƴɛr-kpɛn ƴɛrɩ̃ ʋ, Farɩsɩ nɩrɛ ɩ̃ ɩ,

⁶tɛrɛ a ɓĩɓinfʋ hʋɔlɔ nɩ a *duo-puorbo. A ala ɩ a ɩ̃ torfʋ ɩ̃ na tɛrɛ a ƴɛr-kpɛn jɔfʋ ɩnɛ ʋ, bom ma dãa cɛ ma wa.

⁷Ɩ̃-cɛ a ana yele ɩ̃ na dãa nyɛ a ɩ ma yel-dɔɔlsɩ, ɩ̃ de ba na a ƴɛ̃ƴɛrɩ̃ na a ɩ ma yel-pɔrsɩ a *Kirisi ɩnɛ.

⁸Ɩ̃ aa ɩ a ana yele tɛw ʋ wa, ɩ̃-cɛ ɩ̃ de na a yele a jaa a ɩ ma yel-pɔrsɩ a ɩ̃ Nɩ-kpɛ̃ɛ Jeeju-Kirisi bɔ̃wfʋ ɩnɛ na nyɩrɩ̃ sa gãw a yele a jaa. A ʋlɔ ɩnɛ ɩ̃ barʼã a yele a jaa a lo, ɩ̃ mɩ de ba a ba ɩ ma saba, a mɩnɛ a ɩ̃ bõ-dɔɔlaa na tʋɔ ɩ a Kirisi,

⁹ɩ̃ mɩ wa ɓã taa nɩ ʋ a sɩ ɩ bõ-ƴen. Maa bʋɔrɔ a ɩ̃ mɩ̃ɛ torfʋ ʋlɔ na yi a ƴɛr-kpɛn jɔfʋ pʋɔ wa, ɩ̃-cɛ ɩ̃ bʋɔrɔ na a torfʋ ʋlɔ na yi a ɩ̃ ƴɔ̃w-nyãa pʋɔ ɩ̃ na tɛrɛ nɩ a Kirisi. A ʋna torfʋ naa yi na a Naaŋmɩn jie, ɩ̃ be a ʋlɔ na tɛrɛ nɩ ʋ a ƴɔ̃w-nyãa jie.

¹⁰A bom tɛw ʋlɔ ɩ̃ na bʋɔrɔ ɩ na, ɩ̃ bɔ̃w a Kirisi nɩ a kpɛ̃w ʋlɔ na yi a ʋ kũu-pʋɔ-irfʋ, nɩ a mɩnɛ ɩ̃ na mɩ kpɛ a ʋ won pʋɔ, ɩ̃ mɩ kpi a kũu ʋlɔ na wɔ̃ taa nɩ a ʋ ben,

¹¹cɛlɛ nɩ a ala ɩ ɩ̃ nɔɔ mɩ tʋɔ na ir a kũusɩ pʋɔ.

¹²Maa yel á ɩ̃ gɔrʼã pɔw a ɩ̃ dãw-taa yar baar wa mɩɩ á ɩ̃ ɩ na cɛcɛ wa, ɩ̃-cɛ ɩ̃ ƴɔ̃w na kpɛ̃w ɩ̃ nyɩrɛ a mɩnɛ ɩ̃ na tʋɔ pɔw, a-na-ɩ a ala ɩnɛ a *Jeeju-Kirisi nyɔw ma.

¹³Yɛɛr, aa ɩ wɔ̃ taa nɩ ɩ̃ pɔw na a ʋna bom sɛr wa, ɩ̃-cɛ a bom bõ-ƴen ʋlɔ ɩ̃ na maala ɩ na, ɩ̃ ma hiinʼã a ala na tɔl baar ɩ̃ nyɩrɛ wɩɛrɛ a ala na cãa waara jie.

¹⁴Ala-ɩ̃-sɔ ɩ̃ nyɩrɛ cere a tʋraa par a mɩnɛ ɩ̃ na tʋɔ pɔw a saa juu bom ʋlɔ a Naaŋmɩn na bʋɔlʼɩ̃ ma a Jeeju-Kirisi pʋɔ.

¹⁵A sɩmɩ sɩ jaa na karɩ̃ a sɩɛ pʋɔ sɛw na na tɛrɛ a ʋna tɩɛrʋ̃ naa. Ɩ̃-cɛ a ala ɩ a ŋmɛɛ be na be tɛrɛ tɩɛrʋ̃ kpee, a Naaŋmɩn na miil ba na a ala mɩ.

¹⁶A ala saarɩ̃ wɔ̃ mɩnɛ, nyɩ́ ɩ a sɩ cãa cere a sɔr ʋlɔ pʋɔ sɩ na de wa ta nɩ a ƴɛ̃ƴɛrɩ̃.

¹⁷Yɛɛr, nyɩ́ tɔɔnɔ ma nyɩ jaa, ɩ̃ mɩ ꞌwuoro a bala na cere tuure nɩ a mɩnɛ sɩ na dãa maal.

¹⁸A-na-ɩ ɩ̃ dãa na yel nyɩ gbɛ-yaw ɩ̃ lɛ yele nyɩ nɩ mɔtɔ̃-kʋ̃ɔ, a yaw jie maalfʋ miile na a ba ɩ na a *Kirisi sama-deme mɩ jaarʼĩ a ʋ nɩ-kʋ-daa ƴɛrɩ̃.

¹⁹A ba baarfʋ daar na ɩ na a wɛfʋ. A ba pifʋ ɩ̃ ɩ a ba naaŋmɩn. A vĩ yele lɩɛbʼã ɩ a ba yo-yifʋ, ɩ̃ a tẽw pʋɔ yele tɛw pʋɔ a ba tɩɛrɩ̃sɩ ma be.

²⁰A ala ɩ a sɩmɩ ʋ, saa juu nɩbɛ sɩ ɩ, na sɩ piire a mɩnɛ a sɩ Fafaara na ɩ a Nɩ-kpɛ̃ɛ Jeeju-Kirisi na yire a be waara.

²¹Ʋ na wa na lɩɛb a sɩ ɩ̃gan nãw ʋ lɩɛb wɔ̃ taa nɩ a ʋ ɩ̃gan nyɩnyɩlaa, tu nɩ a ʋ kpɛ̃w ʋlɔ ʋ na tʋɔ nɩ a yele a jaa a be a ʋ pulẽe.