Read Birifor, Malba Fɩlɩpɩ Sɛbɛ 4 Bible Online

Fɩlɩpɩ Sɛbɛ 4 - Birifor, Malba bible

Fɩlɩpɩ Sɛbɛ 4

¹Ala-ɩ̃-sɔ, ɩ̃ badɛɛ nɩ a ɩ̃ yɛɛr ɩ̃ na nʋ, ɩ̃ na lɛ bʋɔrɔ ɩ̃ lɛ nyɛ, na ma mɩ maal ma a nʋ̃ɔ nyɔw ma, na mɩ lɛ ɩ a ɩ̃ tɩɛrʋ̃ barfʋ bom, nyɩ́ bɔ̃w ɩraa cĩcĩ a Nɩ-kpɛ̃ɛ pʋɔ.

²Ɩ̃ sʋɔrɔ na a Evodi nɩ a Sɩ̃tɩsɩ a ba ɓaalɩ̃ taa bɩlɛ a mɩnɛ ba na ɩ a yɛɛr a Nɩ-kpɛ̃ɛ pʋɔ.

³Ɩ mɩ sʋɔrʼã a fʋ̃ʋ na ɩ a ɩ̃ lãa-tʋ̃-dẽdẽ, a fʋ na sũo a pɔɔbɔ bala, a-na-ɩ ba dãa na pɔw ma a sɩ lãa jɛb a Naaŋmɩn ƴɛr-son jɛb lãa nɩ a Kilema nɩ a ɩ̃ lãa-tʋnbɔ bala a yoe na sɛb a baafʋ sɛbɛ pʋɔ.

⁴A mɩnɛ nyɩ na be a Nɩ-kpɛ̃ɛ pʋɔ, nyɩ́ cɩlɛ a daar a jaa. Ɩ̃ lɛ yele nyɩ na, nyɩ́ ma cɩlɛ!

⁵Nyɩ́ ɩ a nɩbɛ ba jaa a ba bɔ̃w nyɩ a nyɩ ɩ nɩ-hɛlɛlɛ. A Nɩ-kpɛ̃ɛ lɛwaa pɩɛlʼã.

⁶Nyɩ taa wa waala bom kãw ɩnɛ wa, ɩ̃-cɛ nyɩ́ puoro sʋɔrɔ nɩ a Naaŋmɩn a ala a jaa nyɩ na bʋɔrɔ ɩnɛ, sʋɔrɔ pɛwrɛ nɩ ʋ a ala ʋ na maala nyɩ ɩnɛ.

⁷Ɩ̃ a Naaŋmɩn pɩɛnfʋ na gãw a bɔ̃wfʋ a jaa na gu na a nyɩ suur nɩ a nyɩ tɩɛrɩ̃sɩ a dɔ̃dɔr-gure kaarɩ̃, a mɩnɛ nyɩ na be a *Jeeju-Kirisi pʋɔ.

⁸Yɛɛr, a ala na cɛ ɩ na a nyɩ́ bɔ̃w cɛlɛ a bom lɛ na tor mɩ sɛw nɩ a pɛwfʋ, a bom lɛ na ɩ a bõ-son sɛw nɩ a cʋfʋ, mɩ ɩ nɩ a dẽdẽ nɩ a cɛcɛ, a bom lɛ na vɩɛlɛ, na mɩ sɛw nɩ a ƴɔ̃wfʋ.

⁹Nyɩ́ nyɔw ɩ̃ maala a ala nyɩ na jaan ɩ̃ mɩ pɔw a ɩ̃ jie, a ala nyɩ na wõ nɩ a ala nyɩ na mɩ nyɛ ma ɩ̃ maal. Ɩ̃ a Naaŋmɩn ʋlɔ na ma kʋrɔ sɩ a pɩɛnfʋ na be nɩ nyɩ na.

¹⁰Nʋ̃ɔ kpɛ̃ɛ nyɔw ma na a Nɩ-kpɛ̃ɛ pʋɔ a mɩnɛ nyɩ na pãa lɛ tɩɛrɛ nɩ ma a ƴɛ̃ƴɛrɩ̃. Maa bʋɔrɔ ɩ̃ yel á nyaa dãa bɔ̃w nɩ ma wa, ɩ̃-cɛ a sɔr ɩ̃ ma dãa be wa.

¹¹Ɩ̃ maa mɩ ƴɛrɛ a lɛ bʋɔrɔ nɩ bom wa, a-na-ɩ ɩ̃ jaanʼã a mɩnɛ ɩ̃ na ɩrɛ ɩ̃ a bom lɛ ɩ̃ na tɛrɛ na tʋɔ sɛw nɩ ma.

¹²Ɩ̃ bɔ̃w na a mɩnɛ ɩ̃ na ɩrɛ a nãw pʋɔ nɩ a tɛrɛfʋ pʋɔ. A ala saarɩ̃ wɔ̃ mɩnɛ, ɩ̃ jaanʼã a mɩnɛ ɩ̃ na bara a tɩɛrʋ̃ a yele a jaa pʋɔ: ɩ̃ pi na mɩɩ a kɔ̃ nyɔw ma na; ɩ̃ nyɩrɩ̃ na tɛraa mɩɩ a ɓɔr ma na.

¹³Ɩ̃ na tʋɔ na a yele a jaa a yi a ʋlɔ na kʋrɔ ma a kpɛ̃w jie.

¹⁴Ɩ̃-cɛ nyɩ maalʼã vɩlaa a mɩnɛ nyɩ na sũo ma a ɩ̃ won pʋɔ.

¹⁵A nyɩmɩ Fɩlɩpɩ deme mɩ bɔ̃w na, a lɛdaar ɩ̃ na dãa yi a Masɛdɔn a korĩ-cɛ ɩ̃ nyɔw a Naaŋmɩn ƴɛr-son ƴɛrfʋ, a *duo-puorbo ma dãa sũo ma wa. Nyɩmɩ tɛw ɩ̃ dãa sũo ma, ɩ̃ mɩ pɔw a ɩ̃ sũofʋ.

¹⁶A mɩnɛ ɩ̃ na dãa de nĩe be a Tɛsaloniki-tẽw nyɩ dãa na sũo ma, gbɛɛ yayaw a lɛdaar ɩ̃ na dãa be a nãw pʋɔ.

¹⁷Aa ɩ wɔ̃ taa nɩ yele ɩ̃ bʋɔrɔ wa, ɩ̃ ɩ̃ bʋɔrɔ na nyɩ mɩ pɔw a bõ-dɔɔlaa ʋlɔ a Naaŋmɩn na kʋrɔ nyɩ.

¹⁸Ɩ̃ pɔw na a yele a jaa nyɩ na tɩɩr, lɛ ɩ tɛraa sʋbɔ. A-na-ɩ a mɩnɛ a Epafurodi na wa nɩ a yele ala nyɩ na tɩɩr kʋ ma, a sɛw ma na. A ana yele wɔ̃ na taa nɩ a baar-lo-yele na nyuure vɩlaa kpɛɛrɛ a Naaŋmɩn, ʋ na nyɛ a mɩ vɩɛlɛ ʋ.

¹⁹Ɩ̃ a ɩ̃ Naaŋmɩn na kʋ nyɩ na a ala a jaa na bɔr nyɩ tu nɩ a ʋ na-yel-vɛlɛ na be a *Jeeju-Kirisi pʋɔ.

²⁰A sɩ Sãa Naaŋmɩn, ú tɛrɛ a yo-yifʋ a daar a jaa. *Amɛn.

²¹Nyɩ́ puor a Naaŋmɩn nɩbɛ ba jaa a *Jeeju-Kirisi pʋɔ. A yɛɛr bala na be nɩ ma puor nyɩ na.

²²A Naaŋmɩn nɩbɛ ba jaa mɩ puor nyɩ na. A bala na de nĩe puor nyɩ ɩ na a jaman-kpɛ̃ɛ yir deme.

²³A Nɩ-kpɛ̃ɛ Jeeju-Kirisi sũofʋ ú be nɩ nyɩ a sɩɛ pʋɔ.