Read Birifor, Malba Kɔlɔsɩ Sɛbɛ 1 Bible Online

Kɔlɔsɩ Sɛbɛ 1 - Birifor, Malba bible

Kɔlɔsɩ Sɛbɛ 1

¹A maa Pol a Naaŋmɩn na vɛl ir ɩ̃ ɩ a *Jeeju-Kirisi *nɩ-tʋnaa nɩ a sɩ yɛbɛ Timote ɩ̃ tɩɩrɛ a sɛbɛ na

²kʋrɔ a nyɩmɩ Naaŋmɩn nɩbɛ na be a Kɔlɔsɩ-tẽw na ɩ a sɩ yɛɛr dẽden a *Kirisi pʋɔ. A sũofʋ nɩ a pɩɛnfʋ na yi a sɩ Sãa Naaŋmɩn sɛ̃, á be a nyɩ jie.

³Sɩ ma pɛwrɛ na a Naaŋmɩn na ɩ a sɩ Nɩ-kpɛ̃ɛ *Jeeju-Kirisi Sãa a daar a jaa sɩ na ma sʋɔrɔ ʋ ƴɔnɔ nyɩ.

⁴A-na-ɩ sɩ wõ na a ba ƴɛr a nyɩ ƴɔ̃w-nyãa nyɩ na tɛrɛ nɩ a Jeeju-Kirisi, nɩ a nʋfʋ nyɩ na mɩ tɛrɛ nɩ a Naaŋmɩn nɩbɛ ba jaa.

⁵A ala yi na a nyɩ tɩɛrɩ̃-son nyɩ na tɛrɛ a yele ala ɩnɛ a Naaŋmɩn na gbɛɛrɩ̃ bin nyɩ a saa juu, nyɩ na dãa de nĩe wõ a lɛdaar a Jeeju-Kirisi ƴɛr-son, na ɩ a yel-mɩ̃ɛ ƴɛrɩ̃, na ta a nyɩ sɛ̃.

⁶A ƴɛr-son ʋlɔ wɔnɔ na a wɔmɔ yɛrɛ pɔwrɔ a tẽw ʋ jaa juu, a mɩnɛ ʋ na mɩ maal a nyɩ jie wa nyɔw nɩ a bibir ʋlɔ nyɩ na wõ a Naaŋmɩn wɩɛfʋ ƴɛrɩ̃ mɩ bɔ̃w nɩ a ala ʋ na sɩrɩ̃ ɩ.

⁷A Epafɩrasɩ na ɩ a sɩ lãa-tʋnɔ sɩ na nʋ ɩ̃ dãa jaan nyɩ a ala, Ʋ ɩ na a *Kirisi tʋ̃tʋ̃-dẽdẽ na tʋnɔ a sɩ ɩnɛ.

⁸A ʋlɔ ɩ̃ yel sɩ a nʋfʋ ʋlɔ a Naaŋmɩn Sɩɛ na kʋ nyɩ.

⁹Ala-ɩ̃-sɔ, wa nyɔw nɩ a ʋna bibir sɩ na wõ a nyɩ ƴɛrɩ̃, sɩ maa galɩ̃ nyɩ a Naaŋmɩn sʋɔr-ƴɔ̃wfʋ wa. Sɩ ma sʋɔrɔ ʋ na a ʋ kʋ nyɩ a kpaarfʋ nɩ a yɛ̃ a jaa na yi a ʋ Sɩɛ jie, a nyɩ na tʋɔ bɔ̃w bɔ̃w nɩ a ʋ pʋ-tɩɛrʋ̃,

¹⁰a nyɩ maalfʋ na cere tuure nɩ a mɩnɛ a Nɩ-kpɛ̃ɛ na bʋɔrɔ, a na mɩ nʋmɔ ʋ a daar a jaa. A nɔhɔ̃, nyɩ na maala na a tʋ̃-vɛlɛ bʋrɔ bʋrɔ, ɩ̃ a nyɩ bɔ̃wfʋ mɩ karɛɛ a Naaŋmɩn pʋɔ.

¹¹Sɩ mɩ sʋɔrɔ ʋ na a nyɩ na tʋɔ pɔw a fãgã a yele a jaa pʋɔ, a yi a kpɛ̃w ʋlɔ ʋ na yi nɩ a yuor, a mɩnɛ a nyɩ na tʋɔ ɩraa nɩ cĩcĩ, tɛrɛ nɩ a su-nyɔwraa a daar a jaa.

¹²Nyɩ́ pɛwrɛ a Sãa Naaŋmɩn nɩ nʋ̃ɔ, na kʋ nyɩ a sɔr a nyɩ na tʋɔ pɔw a yele ala ʋ na gbɛɛrɩ̃ bin, nɩ a bala ʋ na sɔ, a tẽ-cãa pʋɔ.

¹³A-na-ɩ ʋ faa sɩ na yi nɩ a libe kpɛ̃w pʋɔ, ɩ̃ maal sɩ a sɩ kpɛ a ʋ Bi-nʋnaa fãw pʋɔ.

¹⁴A ʋlɔ pʋɔ sɩ na be ɩnɛ, sɩ pɔw a faafʋ, ɩ̃ a Naaŋmɩn mɩ de a sɩ maal-faar bar kʋ sɩ.

¹⁵A *Kirisi ɩ̃ miile a mɩnɛ a Naaŋmɩn ʋlɔ ba na ma nyɛ wa na be. Ʋ ɩ na a Naaŋmɩn Bie na be a yele a jaa ʋ na maal juu.

¹⁶A-na-ɩ a ʋlɔ a Naaŋmɩn de maalʼɩ̃ a yele a jaa na be a saꞌlon nɩ a tẽw pʋɔ, a ala ba na nyɛrɛ nɩ a ala ba na ma nyɛrɛ wa, a jamansɩ, a nɩ-bɛrɛ, a tʋɔfʋ, mɩɩ a fãgãsɩ, a Naaŋmɩn de na a Kirisi maalʼɩ̃ a ana yele a jaa, ɩ̃ a yele a jaa mɩ maalʼã a Kirisi ɩnɛ.

¹⁷Ʋ de na nĩe be, ɩ̃ a yele a jaa pãa tuure. Ʋlɔ ɩ̃ tɩɛ a yele a jaa tɛɛlɛ.

¹⁸Ʋlɔ ɩ a juu a *duo-puorbo jie na ɩ a ʋ ɩ̃gan. Ʋ mɩ ɩ na a ba nyɔwfʋ jie na de nĩe ir a kũu pʋɔ ɩ a Bi-dãdãw, a mɩnɛ ʋ na tʋɔ ɩ a dãdãw sʋbɔ a yele a jaa pʋɔ.

¹⁹A-na-ɩ a Naaŋmɩn mɩ̃ɛ ɩ̃ nʋ ɩ̃ be ʋ jaa a ʋ Bie pʋɔ,

²⁰ɩ̃ mɩ nʋ ɩ̃ de a ʋ Bie ɓaalɩ̃ nɩ a yele a jaa. A Kirisi kũu ʋ na kpi a nɩ-kʋ-daa juu a Naaŋmɩn de ƴɔ̃w nɩ a pɩɛnfʋ a nɩbɛ jie nɩ a ʋlɔ jie, a mɩnɛ ʋ na tʋɔ ɓaalɩ̃ a yele a jaa na be a tẽw pʋɔ nɩ a ala na be a saꞌlon.

²¹A nyɩmɩ mɩ, nyɩ mɩ dãa na ŋma taa nɩ a Naaŋmɩn na nyɩ ɩ a ʋ sama-deme a nyɩ maal-bebe nyɩ na maala ɩnɛ, sɔnɔ nɩ ʋ.

²²Ɩ̃-cɛ a ƴɛ̃ƴɛrɩ̃ na ʋ ɓaalɩ̃ nyɩ na nɩ a ʋ Bie ɩ̃gan buur kũu ʋ na kpi, a mɩnɛ ʋ na tʋɔ maal nyɩ a nyɩ ɩraa a ʋ nii-sɔw ɩ nɩ cɛcɛ, kɔ̃ tɛrɛ sãwfʋ jie nɩ cɛfʋ jie wa.

²³Ɩ̃-cɛ a sɛw na a nyɩ na cãa ba ɩraa a nyɩ ƴɔ̃w-nyãa pʋɔ kɔ̃ sɔw bar a tɩɛrɩ̃-son nyɩ na pɔw a lɛdaar nyɩ na dãa wõ a *Jeeju-Kirisi ƴɛr-son wa. A ɩ na a ƴɛr-son ʋlɔ ba na hier kʋ a tẽw nɩbɛ ba jaa, ɩ̃ a ala ɩnɛ a maa Pol lɩɛb ɩ a tʋ̃tʋnɔ.

²⁴A ƴɛ̃ƴɛrɩ̃ na ɩ̃ cɩlɛ na a won ala ɩnɛ ɩ̃ na nyɛrɛ a nyɩ ɩnɛ. A-na-ɩ a ɩ̃ won pʋɔ ɩ̃ cowro na a ala na ɓɔr a *Kirisi won ʋ na dãa nyɛ a ʋ *duo-puorbo na ɩ a ʋ ɩ̃gan ɩnɛ.

²⁵Ɩ̃ mɩ lɩɛbʼã ɩ a ba tʋ̃tʋnɔ, tuure nɩ a mɩnɛ a Naaŋmɩn na ƴɔ̃w ma a tʋmɔ ala ɩ̃ na tʋnɔ a nyɩ ɩnɛ. Ʋ ƴɔ̃w ma na ɩ̃ na man a ʋ ƴɛrɩ̃ a nyɩ na tʋɔ bɔ̃w a par,

²⁶a ƴɛrɩ̃ ʋlɔ ʋ na dãa sɔɔlɩ̃ a nɩbɛ ba jaa jie a korĩ-cɛ jaa, ɩ̃ a ƴɛ̃ƴɛrɩ̃ ʋ de man kʋ a bala ʋ na sɔ.

²⁷A-na-ɩ a Naaŋmɩn bʋɔrɔ na ʋ maal ba a ba bɔ̃w a mɩnɛ a ʋna bõ-sɔɔlaa na nyɩrɩ̃ vɩɛlɛ gãw a yele a jaa a nɩ-bʋlsɩ jie. A ƴɛrɩ̃ ʋlɔ ɩ na, a Kirisi na be a nyɩ pʋ̃ɔ, maal nyɩ a nyɩ tɛrɛ a tɩɛrɩ̃-son cɛlɛ nɩ a Naaŋmɩn yo-yifʋ yele.

²⁸A ʋ ƴɛrɩ̃ sɩ mana kʋrɔ a nɩbɛ ba jaa, kpãkpana nɩ ba, ɩ̃ mɩ jaana ba bõ-ƴene-ƴene nɩ a kpaarfʋ ala a jaa a Naaŋmɩn na kʋ sɩ, a mɩnɛ a sɩ na tʋɔ maal a nɩbɛ ba jaa a ba bɩ a Kirisi pʋɔ ɩraa nɩ a Naaŋmɩn nii-sɔw.

²⁹A ala ɩnɛ ɩ̃ mɩ ƴɔ̃w a fãgã tʋnɔ jɛbɛ nɩ, tuure nɩ a mɩnɛ a Kirisi kpɛ̃w na mɩ tʋnɔ a ɩ̃ pʋ̃ɔ.