Read Birifor, Malba Kɔlɔsɩ Sɛbɛ 3 Bible Online

Kɔlɔsɩ Sɛbɛ 3 - Birifor, Malba bible

Kɔlɔsɩ Sɛbɛ 3

¹A Naaŋmɩn maal nyɩ na a nyɩ lãa irʼɩ̃ a *Kirisi a kũu pʋɔ, ala-ɩ̃-sɔ nyɩ́ lana bʋɔrɔ a yele ala na be a saa juu, a jie a Kirisi na jɛ a Naaŋmɩn dʋrɩ̃ lõboorɩ̃.

²Nyɩ taa tɩɛrɛ a ala na be ka a tẽw juu wa, ɩ̃-cɛ nyɩ́ tɩɛrɛ a ala na be a saa juu.

³A-na-ɩ nyɩ kpi na, ɩ̃ a nyɩ baafʋ sɔɔlɩ̃ na nɩ a Kirisi a Naaŋmɩn jie.

⁴A lɛdaar a Kirisi na ɩ a nyɩ baafʋ tɔr jaa nɔɔ nyɩrɛ, a nyɩmɩ mɩ, nyɩ na lãa na nyɩrʼɩ̃ ʋ mɩ pɔw a ʋ yo-yifʋ.

⁵Ala-ɩ̃-sɔ nyɩ́ kú a nyɩ tẽw pʋɔ bɔb na ɩ a gã-ta-burbur, a maal-bi-kpansɩ, a vĩ yele bɔfʋ, a tɩɛrɩ̃-kpansɩ, nɩ a mimir kpɛfʋ na wɔ̃ taa nɩ a tɩɩb puorfʋ.

⁶A yel-nɔhɔ̃ nʋmɔ ɩnɛ a Naaŋmɩn su-tuo na suu pɔw a bala na wõw ʋ a toor.

⁷A korĩ-cɛ nyɩ na dãa cãa ɩ a maal-fãa nɩbɛ, a lɛ nyɩ ma dãa maala.

⁸Ɩ̃-cɛ a ƴɛ̃ƴɛrɩ̃ na, nyɩ́ bar a yele ala a jaa na wɔ̃ taa nɩ a suur, a nʋɔr vʋ̃fʋ, nɩ a bɩcɩɩr. Nyɩ taa wa ɩrɛ a korfʋ nɩ a ƴɛr-kpansɩ a lɔɔ yire a nyɩ nʋɔr pʋɔ wa.

⁹Nyɩ taa ŋmara a jiri ƴɔnɔ taa wa, a-na-ɩ nyɩ barʼã a nyɩ korĩ-cɛ wãa nɩ a ʋ maal-bie

¹⁰ɩ̃ lɩɛb ɩ a nɩ-paala a Naaŋmɩn na lɩɛbɛ cɔɔrɔ a daar a jaa, a nyɩ na lɩɛb be a ʋlɔ Naaŋmɩn na mɛ nyɩ kaarɩ̃, a nyɩ na tʋɔ bɔ̃w ʋ cɛcɛ.

¹¹A nɔhɔ̃, a Jufisɩ nɩ a nɩ-bʋlsɩ ma be kpee wa. A bala na ŋmaa a yʋɔr ma lɛ be kpee nɩ a bala na ma ŋmaa wa. A ƴɛr-kpee-ƴɛrbɛ nɩ a vapɔrɔ nɩbɛ, a gbãgbaar nɩ a bala na sɔ a ba mɩ̃ɛ ma mɩ lɛ be kpee wa. A-na-ɩ a *Kirisi ɩ na a ala a jaa na sɛw a nɩbɛ, mɩ be a ba jaa jie.

¹²A mɩnɛ nyɩ na ɩ a Naaŋmɩn nɩbɛ ʋ na nʋ, ɩ̃ vɛl ir a nyɩ na ɩ a ʋ ben, ala-ɩ̃-sɔ nyɩ́ tɛrɛ a nã-bɔ̃wfʋ nʋnɔ nɩ taa, bɔ̃w nɩ taa a yɛ̃, tɛrɛ nɩ a mɩ̃ɛ wurfʋ nɩ a su-nyɔwraa, ɩ nɩ nɩ-hɛlɛlɛ.

¹³Nyɩ́ tɛrɛ taa su-nyɔwraa, ɩ̃ a ala ɩ a nyɩ tɔ sʋbɔ tɛrɛ nɩ nyɩ na ƴɛrɩ̃, nyɩ́ de bar kʋ taa. Nyɩ sɛw na nyɩ ma de bar kʋ taa a mɩnɛ a Nɩ-kpɛ̃ɛ na mɩ maal a nyɩ jie.

¹⁴A ala a jaa pʋɔ, a kpɛ̃ɛ ɩ na a nyɩ na tɛrɛ a nʋfʋ na maala nyɩ a nyɩ na bɔ̃w lãw taa ɩ bõ-ƴen.

¹⁵Nyɩ́ bar a Kirisi pɩɛnfʋ ʋ be a nyɩ sube pʋʋr tɔwrɔ nyɩ, a-na-ɩ a ʋna pɩɛnfʋ pʋɔ a Naaŋmɩn kpaarɩ̃ nyɩ a nyɩ ɩ a ɩ̃gan bõ-ƴen. Ɩ̃ nyɩ́ pɛwrɛ ʋ a ala ʋ na maal nyɩ ɩnɛ.

¹⁶Nyɩ́ sɔw de a Kirisi ƴɛrɩ̃ ʋ nyɩrɩ̃ sɛw a nyɩ suur, a mɩnɛ nyɩ na jaana taa mɩ kpãkpana nɩ taa nɩ a kpaarfʋ ala a jaa a Naaŋmɩn na kʋ nyɩ. Nyɩ́ mɩ pɛwrɛ a Naaŋmɩn nɩ a nyɩ suur ʋ jaa, cɩɛrɛ nɩ a Naaŋmɩn Sɛbɛ yelsɩ, nɩ a yelsɩ ala nyɩ na ƴɔ̃w, nɩ a ala a Naaŋmɩn Sɩɛ na kʋ nyɩ.

¹⁷A yele a jaa nyɩ na maala mɩɩ a ƴɛrɩ̃sɩ a jaa nyɩ na ƴɛrɛ, nyɩ́ maala a Nɩ-kpɛ̃ɛ *Jeeju yuor pʋɔ, pɛwrɛ nɩ a Sãa Naaŋmɩn nɩ a Kirisi yuor.

¹⁸Pɔɔbɔ, nyɩ́ cʋrɔ a nyɩ sɩrbɛ a mɩnɛ a na sɛw a bala na be a Nɩ-kpɛ̃ɛ jie na maala.

¹⁹Sɩrbɛ, nyɩ́ nʋnɔ a nyɩ pɔɔbɔ. Nyɩ taa maala ba bier wa.

²⁰Bibiir, nyɩ́ wono a nyɩ dɔɔrbɔ toor a yele a jaa pʋɔ, a-na-ɩ lɛ a Nɩ-kpɛ̃ɛ bʋɔrɔ a nyɩ jie.

²¹Saanba, nyɩ taa wa hʋɔlɔ a nyɩ bibiir, a ba sube wa sãw wa.

²²Gbãgbaar, nyɩ́ wono a nyɩ nɩ-bɛrɛ toor a ka a tẽw na pʋɔ a yele a jaa pʋɔ. Nyɩ taa ma maala a lɛdaar tɛw ba na ma jʋʋrɔ nyɩ a na nʋmɔ ba wa, ɩ̃ nyɩ́ tʋnɔ kʋrɔ ba nɩ su-son, a Nɩ-kpɛ̃ɛ nyɩ na jɔrɔ ɩnɛ.

²³A bom jaa lɛ nyɩ na maala, nyɩ́ maalʼɩ̃ a nyɩ suur ʋ jaa wɔ̃ taa nɩ a Nɩ-kpɛ̃ɛ nyɩ maala kʋrɔ, ɩ̃ a kɔ̃ ɩ nɩbɛ tɛw ʋ wa,

²⁴bɔ̃w nɩ ka a Nɩ-kpɛ̃ɛ na ya nyɩ na. A ʋ jie nyɩ na pɔw a yele ala ʋ na gbɛɛrɩ̃ bin a ʋ nɩbɛ. A Nɩ-kpɛ̃ɛ ʋlɔ nyɩ na tʋnɔ kʋrɔ ɩ na a *Kirisi.

²⁵Ɩ̃-cɛ a ʋlɔ na maal a bier na pɔw na a bier yar, a-na-ɩ a Naaŋmɩn ma ꞌwuoro a nɩbɛ kpee kpee wa.