Read Birifor, Malba Kɔlɔsɩ Sɛbɛ 4 Bible Online

Kɔlɔsɩ Sɛbɛ 4 - Birifor, Malba bible

Kɔlɔsɩ Sɛbɛ 4

¹Nɩ-bɛrɛ, nyɩ́ maala a nyɩ gbãgbaar a mɩnɛ a na tor, kɔ̃ ŋmama ba wa, ɩ̃ mɩ bɔ̃w ka a nyɩmɩ mɩ̃ɛ mɩ tɛrɛ na Nɩ-kpɛ̃ɛ na be a saa juu.

²Nyɩ́ sʋɔrɔ a Naaŋmɩn kɔ̃ gala wa, bɔ̃w jʋʋrɔ nɩ, pɛwrɛ nɩ ʋ a ala ʋ na maal ɩnɛ.

³Nyɩ́ mɩ sʋɔrɔ ʋ ƴɔnɔ sɩ, ʋ na kʋ sɩ sɔr a ʋ ƴɛrɩ̃ ƴɛrfʋ ɩnɛ, a sɩ na man a *Kirisi ƴɛr-sɔɔlaa, a ƴɛr-sɔɔlaa ʋlɔ ɩnɛ ɩ̃ be a kasu pʋɔ.

⁴Nyɩ́ sʋɔrɔ ƴɔnɔ ma a mɩnɛ ɩ̃ na tʋɔ miil a ʋ ƴɛrɩ̃ cãa pʋɔ a mɩnɛ na sɛw ɩ̃ ƴɛr.

⁵Nyɩ́ tɛrɛ a kpaarfʋ a nyɩ maalfʋ pʋɔ a bala na ma puoro wa jie, nyɩrɛ tʋnɔ a daarʼã pʋɔ nyɩ na be.

⁶Nyɩ́ ɩ a nyɩ ƴɛrɩ̃sɩ a vɩɛlɛ ɩ̃ mɩ nʋmɔ a daar a jaa. Nyɩ́ bɔ̃w nɩ a mɩnɛ nyɩ na ƴɛrɛ cɔwrɔ a nɩrɛ lɛ.

⁷A Tɩsɩkɩ na ɩ a sɩ yɛb-nʋnaa na mɩ ɩ a tʋ̃tʋ̃-dẽdẽ nɩ a ɩ̃ lãa-tʋnɔ a Nɩ-kpɛ̃ɛ tʋmɔ pʋɔ na man nyɩ na a ɩ̃ ƴɛrɩ̃ a jaa.

⁸Ɩ̃ tʋnɔ ʋ na ʋ na wɩ man nyɩ a mɩnɛ sɩ na jɛ, ɩ̃ na mɩ kʋ nyɩ a ꞌlafʋ.

⁹A Onejim na ɩ a yɛb-dẽdẽ nɩ a yɛb-nʋnaa na mɩ ɩ a nyɩ nɩrɛ na bɩɛl ʋ wɩ nɩ. Ba na man nyɩ na a ala a jaa na maala a ka.

¹⁰A Arɩsɩta na lãa be nɩ ma a kasu pʋɔ nɩ a Markɩ na ɩ a Banabasɩ sãa yɛbɛ puor nyɩ na. (Nyɩ gɔrʼã wõ a Markɩ ʋlɔ ƴɛrɩ̃. A ʋlɔ wa wɩ, nyɩ́ de ʋ vɩlaa.)

¹¹A *Jeeju na lɛ dɩ a Jusitisi mɩ puor nyɩ na. Basɩmɛ tɛw ɩ̃ be be ɩ̃ ɩ a Jufisɩ na lãa tʋnɔ nɩ ma a Naaŋmɩn fãw tʋmɔ. Ba dãa na lɩɛb ɩ ma ɓaɓaalba.

¹²A Epafɩrasɩ na ɩ a nyɩ nɩrɛ ɩ̃ mɩ ɩ a *Jeeju-Kirisi tʋ̃tʋnɔ puor nyɩ na. Ʋ ma nyɩrɛ na sʋɔrɔ a Naaŋmɩn ƴɔnɔ nyɩ a mɩnɛ a nyɩ na ɩraa cĩcĩ, bɩ a sɩɛ pʋɔ, ɩ̃ mɩ nʋ a Naaŋmɩn pʋ-tɩɛrʋ̃ maalfʋ nɩ a nyɩ suur ʋ jaa.

¹³Ɩ̃ na tʋɔ na yel a nɔhɔ̃ a ʋ ɩnɛ, á ʋ ma tɩɩ na vɔwrɔ a nyɩ ɩnɛ nɩ a Lawdise nɩbɛ ɩnɛ nɩ a Heerapoli nɩbɛ ɩnɛ mɩ.

¹⁴A Luki na ɩ a sɩ baraa na mɩ ɩ a dɔɔtʋrɔ nɩ a Demasɩ puor nyɩ na.

¹⁵Nyɩ́ puor a yɛɛr bala na be a Lawdise nɩ a Nɩmfa, lãa nɩ a *duo-puorbo bala na ma kpaara taa be a ʋ yir.

¹⁶A nyɩmɩ wa ꞌwuor a sɛbɛ na kʋ taa baar, nyɩ́ mɩ ɩ a ba mɩ ꞌwuor ʋ kʋ a duo-puorbo bala na be a Lawdise-tẽw. Ɩ̃ a nyɩmɩ, nyɩ́ mɩ ꞌwuor a sɛbɛ ʋlɔ sɩ na dãa tɩɩr kʋ a Lawdise tẽ-deme.

¹⁷Nyɩ́ yel a Arasɩb á ʋ bɔ̃w ꞌwuoro a tʋn ʋlɔ ba na ƴɔ̃w ʋ a ʋ maal a Nɩ-kpɛ̃ɛ ɩnɛ, a mɩnɛ ʋ na tʋɔ maal wa baar.

¹⁸A ɩ̃ mɩ̃ɛ nuu ɩ̃ sɛb a ƴɛrɩ̃sɩ asɩmɛ: A maa Pol, ɩ̃ puoro nyɩ na. Nyɩ́ bɔ̃wnaa, a kasu pʋɔ ɩ̃ cãa be. A Naaŋmɩn sũofʋ, ú be a nyɩ jie.