Read Birifor, Malba 1 Tɛsaloniki Sɛbɛ 1 Bible Online

1 Tɛsaloniki Sɛbɛ 1 - Birifor, Malba bible

1 Tɛsaloniki Sɛbɛ 1

¹A maa Pol nɩ a Sɩlasɩ nɩ a Timote ɩ̃ sɛbɛ a sɛbɛ na tɩɩrɛ kʋrɔ a nyɩmɩ Tɛsaloniki *duo-puorbo na be a sɩ Sãa Naaŋmɩn nɩ a sɩ Nɩ-kpɛ̃ɛ *Jeeju-Kirisi pʋɔ. A Naaŋmɩn sũofʋ nɩ a ʋ pɩɛnfʋ á be a nyɩ jie. A TƐSALONIKI NƖBƐ NA SƆW DE A NAAŊMƖN ƳƐRƖ̃

²Sɩ puoro na a Naaŋmɩn a nyɩ jaa ɩnɛ a daar a jaa, ɩ̃ sʋɔrɔ ʋ ƴɔnɔ nyɩ ma gala wa.

³A lɛdaar sɩ na ma puoro a sɩ Sãa nɩ a sɩ Naaŋmɩn, sɩ maa hiin a nyɩ ƴɔ̃w-nyãa tʋmɔ wa, nɩ a mɩnɛ nyɩ na dɩ a tuo ɩ̃ tʋ̃ a tʋmɔ a yi a nyɩ nʋfʋ pʋɔ, nɩ a mɩnɛ nyɩ na mɩ ɩraa a cĩcĩ a nyɩ tɩɛrʋ̃ son pʋɔ, a jaa yi a sɩ Nɩ-kpɛ̃ɛ *Jeeju-Kirisi jie.

⁴Yɛɛr, sɩ bɔ̃w na ka a Naaŋmɩn nʋ nyɩ na, ɩ̃ vɛl nyɩ ir sɔ.

⁵A-na-ɩ a lɛdaar sɩ na wɩ nɩ a Naaŋmɩn ƴɛr-son a nyɩ sɛ̃, saa ƴɛr nyɩ a ƴɛrɩ̃sɩ tɛw wa, ɩ̃ sɩ wɩ nɩ na a fãw ʋlɔ a Naaŋmɩn Sɩɛ na kʋ sɩ, a sɩ bɔ̃w nɩ áa ƴɛrɩ̃ ʋlɔ sɩrɩ̃ na ɩ yel-mɩ̃ɛ. Nyɩ bɔ̃w na a nɩ-wɔ̃ mɩnɛ sɩ na dãa ɩ a nyɩ sɔ̃w, a na sũo nyɩ.

⁶Ɩ̃ a nyɩmɩ, nyɩ lɩɛbʼã ɩ a sɩ tɔ̃tɔɔnbɔ, ɩ̃ mɩ tɔɔnɔ a sɩ Nɩ-kpɛ̃ɛ, a mɩnɛ nyɩ na sɔw de a Naaŋmɩn ƴɛrɩ̃ sɩ na ƴɛr nyɩ a kpowfʋ pʋɔ, mɩ tɛrɛ nɩ a nʋ̃ɔ ʋlɔ a Naaŋmɩn Sɩɛ na kʋ nyɩ.

⁷Ala-ɩ̃-sɔ nyɩ lɩɛbʼã ɩ nɩ-tɔɔnsɩ a Masɛdɔn nɩ a Akayi ten pʋʋr a Naaŋmɩn-puorbo ba jaa jie.

⁸A-na-ɩ a Nɩ-kpɛ̃ɛ ƴɛrɩ̃ nyɩ na ƴɛr cʋbʼã cen na vɩɛ a Masɛdɔn nɩ a Akayi ten bar, a nɩbɛ wõ a jiir a jaa a nyɩ ƴɔ̃w-nyãa nyɩ na tɛrɛ a Naaŋmɩn jie. Ala-ɩ̃-sɔ saa lɛ bʋɔrɔ sɩmɩ mɩ̃ɛ sɩ lɛ man go wa.

⁹A-na-ɩ a bala mɩ̃ɛ mana na a mɩnɛ nyɩ na sɔw de sɩ a lɛ sɩ na dãa wɩ a nyɩ sɛ̃, nɩ a mɩnɛ nyɩ na jaar a nyɩ tɩbɛ sɔr bar, ɩ̃ lɩɛb de a ʋlɔ na ɩ a yel-mɩ̃ɛ Naaŋmɩn nɩ a Naaŋmɩn-mimir, mɩ tʋnɔ kʋrɔ ʋ.

¹⁰Ba mɩ mana na a mɩnɛ nyɩ na cɛlɛ a Naaŋmɩn Bie nɔɔ yire a saa juu waara, a *Jeeju ʋlɔ a Naaŋmɩn na ir a kũu pʋɔ, nɔɔ wɩ́ɛrɛ sɩ a Naaŋmɩn su-tuo na waara ɩnɛ.