Read Birifor, Malba 1 Tɛsaloniki Sɛbɛ 2 Bible Online

1 Tɛsaloniki Sɛbɛ 2 - Birifor, Malba bible

1 Tɛsaloniki Sɛbɛ 2

¹Yɛɛr, nyɩ mɩ̃ɛ bɔ̃w ka a sɩ wɩfʋ a nyɩ sɛ̃ ma ɩ pɔrɔ wa.

²Nyɩ mɩ bɔ̃w ka a mɩnɛ sɩ na ma dãa ta a nyɩ sɛ̃ sɛr wa, a Fɩlɩpɩ tẽ-deme dãa na hʋɔl sɩ mɩ tʋ tʋ nɩ sɩ, ɩ̃-cɛ a mɩnɛ sɩ na ta a nyɩ tẽw, a ala saarɩ̃ ɩ a nɩ-yaw na mɩ dãa jɛbɛ nɩ sɩ ʋ, a Naaŋmɩn kʋ sɩ na a ꞌlafʋ a sɩ ƴɛrʼɩ̃ a ʋ ƴɛr-son kʋ nyɩ.

³A sɩ ƴɛrɩ̃ miilfʋ sɩ na wɩ, saa wɩ nɩ jiri ƴɛrɩ̃sɩ, mɩɩ a bõ-kpee bɔfʋ nɩ a bɛlɩ̃fʋ wa.

⁴Ɩ̃ a Naaŋmɩn ɛ̃ɛ jʋʋr sɩ bɔ̃w, ɩ̃ pãa de a ʋ ƴɛrɩ̃ kʋ sɩ, ɩ̃ a lɛ sɩ ƴɛrɛ. Saa ƴɛrɛ bʋɔrɔ a nɩbɛ ba pɛwrɛ sɩ wa, ɩ̃-cɛ á nʋmɔ a Naaŋmɩn ʋlɔ na ma ꞌwuor bɔ̃w a ala na be a sɩ sube pʋʋr.

⁵Nyɩ bɔ̃w ka saa dãa wɩ a nyɩ jie nɩ yɛ̃ ƴɛrɩ̃sɩ wa, ɩ̃ saa mɩ lɛ wɩ nɩ a nɔ-kãa bʋɔrɔ sɩ pɔw bom kãw wa. A Naaŋmɩn mɩ̃ɛ bɔ̃w na a sɩ tɛw.

⁶Saa mɩ dãa bʋɔrɔ a yo-yifʋ a nɩbɛ jie wa; nɩ a nyɩ jie, mɩɩ a nɩrɛ lɛ jie wa.

⁷A-na-ɩ a *Kirisi *nɩ-tʋnɩsɩ sɩ ɩ, sɩ dãa na tɛrɛ a sɔr na fɛr nyɩ, ɩ̃-cɛ sɩ ɛ̃ɛ na bal a nyɩ sɔ̃w, wɔ̃ taa nɩ a pɔw na guolo a ʋ bibiir cɔɔrɔ nɩ ba.

⁸A mɩnɛ sɩ na tɩɩ nʋ nyɩ, ala-ɩ̃-sɔ a saa bʋɔrɔ sɩ tɩɩr a Naaŋmɩn ƴɛr-son tɛw kʋ nyɩ wa, ɩ̃-cɛ a sɩ de a sɩ mɩ̃ɛ ʋ jaa kʋ nyɩ, a-na-ɩ nyɩ lɩɛbʼã ɩ a sɩ nɩ-nʋnɩsɩ.

⁹Yɛɛr, nyɩ cãa na bɔ̃w a mɩnɛ sɩ na dãa dɩ a tuo, ɩ̃ tʋnɔ nɩ kpɛ̃w a tɩsɔw nɩ a mɔtɔ̃w, a mɩnɛ sɩ kɔ̃ wa ƴɔ̃w nɩrɛ kãw won wa a lɛdaar sɩ na hiere a Naaŋmɩn ƴɛr-son kʋrɔ nyɩ.

¹⁰Nyɩ mɩ̃ɛ bɔ̃w sɩ na a Naaŋmɩn kaarɩ̃, a mɩnɛ sɩ na dãa wɔ̃ a nyɩmɩ popuorbo sɔ̃w. A sɩ maalfʋ dãa na ɩ cɛcɛ, ɩ̃ mɩ tor; burbur ma dãa be be fɩ̃ɩ wa.

¹¹A-na-ɩ nyɩ bɔ̃w na a mɩnɛ sɩ na maal a nyɩ jaa bõ-ƴene-ƴene jie, a mɩnɛ a daba na ma maal a ʋ bibiir jie. Sɩ miil nyɩ na a Naaŋmɩn sɔr, mɩ ɓaalɩ̃ nyɩ ɩ̃ mɩ kpãkpan nyɩ a mɩnɛ a nyɩ maalfʋ kɔ̃ wa sãw a Naaŋmɩn yuor wa, a ʋlɔ na bʋɔl nyɩ a nyɩ na kpɛ a ʋ mɩ̃ɛ fãw nɩ a ʋ yo-yifʋ pʋɔ.

¹³A sɩmɩ mɩ, sɩ puoro na a Naaŋmɩn ma gala wa, a-na-ɩ a mɩnɛ nyɩ na wõ a Naaŋmɩn ƴɛrɩ̃ a sɩ jie, nyaa de ʋ ʋ ɩ a nɩbɛ ƴɛrɩ̃ wa, ɩ̃-cɛ nyɩ de ʋ na a mɩnɛ ʋ na sɩrɩ̃ ɩ a Naaŋmɩn ƴɛrɩ̃, na be a nyɩ pʋ̃ɔ lɩɛbɛ a nyɩmɩ na sɔw de ʋ.

¹⁴Yɛɛr, nyɩ lɩɛbʼã wɔ̃ taa nɩ a Naaŋmɩn *duo-puorbo a Jude wɩɛr pʋɔ na be a *Jeeju-Kirisi pʋɔ, a-na-ɩ nyɩ nyɛ na hʋʋr a nyɩ mɩ̃ɛ tẽ-deme jie, wɔ̃ taa nɩ a bala na mɩ dãa nyɛ a hʋʋr a Jufisɩ jie.

¹⁵A Jufisɩ bala, ba kú na a Nɩ-kpɛ̃ɛ *Jeeju nɩ a Naaŋmɩn ƴɛr-hierbe, ɩ̃ mɩ diw sɩ bar a Jeeju yuor ɩnɛ. A ba maalfʋ ma vɩɛlɛ a Naaŋmɩn jie wa, a-na-ɩ ba ꞌlaarʼã a nɩbɛ ba jaa.

¹⁶Ba mɩ bʋɔrɔ na ba var sɩ a sɔr a mɩnɛ a sɩ kɔ̃ wa ƴɛrɛ a Naaŋmɩn ƴɛrɩ̃ kʋrɔ a nɩ-kpeesɩ a ba pɔw a faafʋ wa. A nɔhɔ̃ ba dɔɔl taa a ba maal-faar a daar a jaa, ɩ̃ a Naaŋmɩn su-tuo pãa na ta ba.

¹⁷Yɛɛr, sɩ ŋma na taa a daar fɩ̃ɩ pʋɔ (a ɩ̃gan buur tɛw pʋɔ, ɩ̃-cɛ a sɩɩr cãa be taa), ala-ɩ̃-sɔ a sɩ tɩɩ bʋɔrɔ sɩ lɛ nyɛ nyɩ ɩ̃ dãa ƴɔ̃w a fãgã

¹⁸bʋɔrɔ sɩ wɩ a nyɩ sɛ̃. A maa Pol mɩ̃ɛ bɔ na a sɔr gbɛɛ amɩnɛ jaa faa, a-na-ɩ a Satã dãa na var sɩ a sɔr.

¹⁹Bõ na ɩ a sɩ tɩɛrʋ̃ son nɩ a sɩ nʋ̃ɔ a sɩ Nɩ-kpɛ̃ɛ *Jeeju nii-sɔw? Bõ na ɩ a tʋɔfʋ bom sɩ nɔɔ ꞌlara miile a sɩ mɩ̃ɛ a ʋ waa daar ɩ̃ a ala ma ɩ a nyɩmɩ ʋ wa?

²⁰A-na-ɩ a sɩ yo-yifʋ nɩ a sɩ nʋ̃ɔ yi na a nyɩ jie.