Read Birifor, Malba 1 Tɛsaloniki Sɛbɛ 3 Bible Online

1 Tɛsaloniki Sɛbɛ 3 - Birifor, Malba bible

1 Tɛsaloniki Sɛbɛ 3

¹Ala-ɩ̃-sɔ a nyɩ tɩɛrʋ̃ nyɩrɩ̃ na gãw sɩ, a sɩ guor taa ɩ̃ jɛ a Atɛn-tẽw pʋɔ a sɩ yẽ,

²ɩ̃ tʋ̃ a sɩ yɛbɛ Timote na ɩ a Naaŋmɩn tʋ̃tʋnɔ a *Kirisi ƴɛr-son pʋɔ, ʋ wɩ a nyɩ sɛ̃ na sũo nyɩ, a nyɩ na tɛrɛ a fãgã nɩ a ꞌlafʋ a nyɩ ƴɔ̃w-nyãa pʋɔ.

³Saa bʋɔrɔ nɩrɛ kãw ʋ wa ɩ a dama ʋ a ana hʋʋr nyɩ na nyɛrɛ ɩnɛ wa. A-na-ɩ nyɩ mɩ̃ɛ bɔ̃w ka a sɛw na a ta sɩ a lɛ.

⁴A mɩnɛ sɩ na dãa cãa be a nyɩ sɛ̃, sɩ dãa na de nĩe yel nyɩ a sɩ na nyɛ na a ana nãw, ɩ̃ nyɩ bɔ̃w na a ala ɩ̃ ta sɩ.

⁵Ala-ɩ̃-sɔ, a nyɩ tɩɛrʋ̃ dãa na gãw ma, ɩ̃ jɛ faa ɩ̃ tʋ̃ a ɩ̃ bɔ̃w a mɩnɛ a nyɩ ƴɔ̃w-nyãa na be. Ɩ̃ dãa na jɔrɔ dãbɩ̃ɛ a mɩnɛ a bɩbɩɩrɛ nɔɔ nyɛ sɔr bɩɩr nyɩ, ɩ̃ cɛ a sɩ tʋmɔ bar a lo.

⁶Ɩ̃-cɛ a ƴɛ̃ƴɛrɩ̃ na, a Timote yi na a nyɩ sɛ̃ ɩ̃ wa ta man sɩ a nyɩ ƴɛr-vɛlɛ, na ɩ a nyɩ ƴɔ̃w-nyãa nɩ a mɩnɛ a nʋfʋ na be a nyɩ sɔ̃w, nɩ a mɩnɛ nyɩ na mɩ cãa tɛrɛ a sɩ tɩɛrʋ̃ bʋɔrɔ nyɩ lɛ nyɛ sɩ a sɩ kaarɩ̃.

⁷Ala-ɩ̃-sɔ yɛɛr, sɩ lɛ tɛrɛ na ꞌlafʋ a nyɩ ƴɔ̃w-nyãa ɩnɛ, a sɩ na lɛ tʋɔ a won nɩ a hʋʋr nyɛfʋ ala pʋɔ sɩ na be.

⁸A wɔ̃ na taa nɩ baa-paalaa sɩ ma pɔw, a ala ɩ nyɩ ɩraa na cĩcĩ a Nɩ-kpɛ̃ɛ sɔr pʋɔ.

⁹Mɩnɛ sɩ na tʋɔ puor a Naaŋmɩn a na sɛw, a ʋna nʋ̃ɔ kpee jaa sɩ na tɛrɛ a nyɩ ɩnɛ a Naaŋmɩn nii-sɔw?

¹⁰A daar a jaa sɩ ma suɔrɔ na a Naaŋmɩn ú kʋ sɩ a sɔr bɩlɛ, a sɩ lɛ tʋɔ lɛ nyɛ taa gbelẽgbelẽ, na sɩ tʋɔ ɓã nyɩ a ala na ɓɔr a nyɩ ƴɔ̃w-nyãa pʋɔ.

¹¹Sɩ sʋɔrʼã a Naaŋmɩn na ɩ a sɩ Sãa mɩ̃ɛ, nɩ a sɩ Nɩ-kpɛ̃ɛ *Jeeju, ʋ gbɛɛrɩ̃ a sɔr a sɩ be wɩfʋ ɩnɛ.

¹²A Nɩ-kpɛ̃ɛ ʋ̃ dɔɔl a nyɩ nʋfʋ a paal, maalʼɩ̃ nyɩ a nyɩ nʋnɔ taa, mɩ nʋnɔ a nɩbɛ jaa, a mɩnɛ sɩ na mɩ nʋnɔ nyɩ.

¹³A sɩ Sãa Naaŋmɩn ú sũo nyɩ a nyɩ ɩraa cĩcĩ kɔ̃ dama wa, ɩ̃ mɩ ow nyɩ kpee a nyɩ kɔ̃ tɛrɛ cɛfʋ jie a ʋ nii-sɔw a lɛdaar a sɩ Nɩ-kpɛ̃ɛ Jeeju nɔɔ waara nɩ a ʋ sɩ-tʋnɩsɩ wa.