Read Birifor, Malba 1 Tɛsaloniki Sɛbɛ 5 Bible Online

1 Tɛsaloniki Sɛbɛ 5 - Birifor, Malba bible

1 Tɛsaloniki Sɛbɛ 5

¹Ɩ̃-cɛ yɛɛr, a ala ɩ a bibir nɩ a daar a ana yele nɔɔ tara ʋ, nyaa lɛ bʋɔrɔ sɩ lɛ sɛb yel nyɩ bom kãw wa,

²a-na-ɩ nyɩmɩ mɩ̃ɛ bɔ̃w na vɩlaa áa Nɩ-kpɛ̃ɛ wafʋ bibir na wɔ̃ na taa nɩ a mɩnɛ a nyanyuur na ma wa a tɩsɔw.

³A daar ʋlɔ a nɩbɛ nɔɔ yele: “Damfʋ ma be be wa; pɩɛnfʋ tɛw ɩ̃ be be,” ɩ̃ a jie naan, a sãwfʋ nɔɔ ta na a ba jie wɔ̃ taa nɩ a mɩnɛ a walfʋ na ma ta a pɔw, ɩ̃ cɩ̃ɛfʋ jie kɔ̃ be be fɩ̃ɩ wa.

⁴Ɩ̃-cɛ yɛɛr, a ala ɩ a nyɩmɩ ʋ, nyaa be a libe pʋɔ a mɩnɛ a ʋna bibir nɔɔ dũunɩ nyɩ wa.

⁵A nyɩmɩ, nyaa ɩ a libe pʋɔ nɩbɛ wa. Saa mɩ wɔ̃ taa nɩ a bala na ma tʋnɔ a ba tʋmɔ a tɩsɔw wa. A-na-ɩ cãa pʋɔ nɩbɛ sɩ ɩ, mɩ tʋnɔ a sɩ tʋmɔ a mɔtɔ̃w.

⁶Ala-ɩ̃-sɔ sɩ taa wɔ̃ a nɩŋmɛɛ kaarɩ̃ na gure wa, ɩ̃-cɛ sɩ́ cɛl tɔ jʋʋrɔ ɩ̃ mɩ bɔ̃w tɛrɛ a sɩ mɩ̃ɛ.

⁷A bala na ma gure, tɩsɔw ba ma gur; a bala a dãa na kʋrɔ, tɩsɔw a ma kʋ ba.

⁸Ɩ̃-cɛ a sɩmɩ na ɩ a cãa nɩbɛ, sɩ́ tɛrɛ a sɩ mɩ̃ɛ, mɩ de a sɩ nyãa-piwraa na ɩ a sɩ ƴɔ̃w-nyãa nɩ a sɩ nʋfʋ, ɩ̃ mɩ de a sɩ ju-piwraa na ɩ a faafʋ tɩɛrʋ̃ daadaa.

⁹A-na-ɩ a Naaŋmɩn ma vɛl sɩ ir biin a ʋ su-tuo ɩnɛ wa, ɩ̃-cɛ ʋ vɛl sɩ na ir a sɩ na pɔw a faafʋ a sɩ Nɩ-kpɛ̃ɛ *Jeeju-Kirisi ɩnɛ,

¹⁰a ʋlɔ na dãa kpi a sɩ ɩnɛ, a mɩnɛ a sɩmɩ wa saarɩ̃ kpi, mɩɩ sɩ cãana, a sɩ na tʋɔ lãa tɛrɛ nɩ ʋ a baafʋ.

¹¹Ala-ɩ̃-sɔ nyɩ́ ɓaala taa ɩ̃ mɩ sũono taa a mɩnɛ nyɩ na gɔr maala.

¹²Yɛɛr, sɩ sʋɔrɔ nyɩ na a nyɩ na bɔ̃wnɔ nɩ a bala na dɩrɛ a tuo tʋnɔ a nyɩ sɔ̃w, na mɩ ɩ a nyɩ ni-dierbe mana nyɩ a yɛ̃ a Nɩ-kpɛ̃ɛ pʋɔ.

¹³Nyɩ́ bɔ̃w ƴɔnɔ ba nɩ nʋfʋ a ba tʋmɔ ɩnɛ, ɩ̃ mɩ tɛrɛ nɔ-bõ-ƴen a nyɩ sɔ̃w.

¹⁴Yɛɛr, sɩ lɛ kpãkpana nyɩ na, nyɩ́ mana a tõtol deme a yɛ̃, mɩ ɓaala nɩ a bala na ma tɛrɛ a ꞌlafʋ wa. Nyɩ́ mɩ tɩɛ a bala na bal, tɛrɛ nɩ a su-nyɔwraa a nɩbɛ ba jaa jie.

¹⁵Nyɩ́ tɛrɛ nyɩ mɩ̃ɛ a nɩrɛ kãw kɔ̃ wa de a bier ya a bier wa, ɩ̃-cɛ a daar a jaa nyɩ́ bʋɔrɔ a son maalfʋ, a nyɩ sɔ̃w nɩ a nɩbɛ ba jaa jie mɩ.

¹⁶Nyɩ́ cɩlɛ a daar a jaa,

¹⁷mɩ puoro nɩ a Naaŋmɩn kɔ̃ gala wa.

¹⁸A bom lɛ na tara, nyɩ́ puoro a Naaŋmɩn, a-na-ɩ a lɛ ɩ̃ ɩ a ʋ pʋ-tɩɛrʋ̃ a *Jeeju-Kirisi pʋɔ a nyɩ ɩnɛ.

¹⁹Nyɩ taa vara a Naaŋmɩn Sɩɛ tʋmɔ wa.

²⁰Nyɩ taa mele a ʋ pʋ-tɩɛrʋ̃-bʋʋrbɔ wa.

²¹Nyɩ́ ma bɔ̃w jʋʋr a yele a jaa, ɩ̃ sɔw de a ala na vɩɛlɛ.

²²Nyɩ́ taw jãa nɩ a maal-fãa bʋrɔ bʋrɔ a jaa fɛw.

²³A pɩɛnfʋ Naaŋmɩn mɩ̃ɛ, ú ow nyɩ kpee cɛcɛ, gu nyɩ a nyɩ mɩ̃ɛ ʋ jaa, a sɩɛ pʋɔ, a suur, nɩ a ɩ̃gan pʋɔ, a nyɩ kɔ̃ wa tɛrɛ cɛfʋ jie a sɩ Nɩ-kpɛ̃ɛ Jeeju-Kirisi lɛwaa bibir wa.

²⁴A ʋlɔ na bʋɔl nyɩ ɩ na dẽdẽ; ʋ na maalʼã a ala a jaa.

²⁵Yɛɛr, nyɩ́ mɩ sʋɔrɔ a Naaŋmɩn ƴɔnɔ sɩ.

²⁶Nyɩ́ puoro a sɩ yɛɛr ba jaa woro nɩ ba nɩ a Nɩ-kpɛ̃ɛ yuor.

²⁷Ɩ̃ yele nyɩ na nɩ a Nɩ-kpɛ̃ɛ yuor á nyɩ́ ꞌwuor a sɛbɛ naa a yɛɛr ba jaa nii-sɔw.

²⁸A sũofʋ na yi a sɩ Nɩ-kpɛ̃ɛ Jeeju-Kirisi sɛ̃ ú be a nyɩ jie.