Read Birifor, Malba 2 Tɛsaloniki Sɛbɛ 2 Bible Online

2 Tɛsaloniki Sɛbɛ 2 - Birifor, Malba bible

2 Tɛsaloniki Sɛbɛ 2

¹Yɛɛr, a ala na ɩ a sɩ Nɩ-kpɛ̃ɛ *Jeeju-Kirisi waa bibir, nɩ a mɩnɛ sɩ na duoro taa a ʋ nii-sɔw, sɩ sʋɔrɔ nyɩ na nyɩ taa ɩ a nyɩ tɩɛrɩ̃sɩ a vavire mɩɩ dama nyɩ a nyɩ tɩɛr beeka á Nɩ-kpɛ̃ɛ bibir gɔrʼã ta wa. A na tʋɔ na ɩ nɩrɛ kãw ɩ̃ dãa yel nyɩ a lɛ, yele nɩ á Naaŋmɩn pʋ-tɩɛrʋ̃ ʋ, mɩɩ Naaŋmɩn ƴɛrɩ̃ ʋ ƴɛrʼɩ̃, mɩɩ a sɩmɩ ɩ̃ dãa sɛb nyɩ a lɛ.

³Nyɩ taa wa bar nɩrɛ ʋ wa bɛlɩ̃ nyɩ fɩ̃ɩ wa. A-na-ɩ a ʋna bibir kɔ̃ɔ ta sɛr wa, ɩ̃ a nɩ-yaw nɔɔ wa jaara na a Naaŋmɩn puorfʋ bara, ɩ̃-cɛ a Burbur Sʋbɔ wa nyɩr a ba nyɛ ʋ, a ʋlɔ na ɩ a nɩ-wɛraa.

⁴Ʋ na ɩ na a Naaŋmɩn san-sʋbɔ, ɩ̃ ʋ na jɛw na a ʋ mɩ̃ɛ gãw a ala a jaa ba na bʋɔlɔ a Naaŋmɩn, mɩɩ ba na puoro, wa ta nɩ a mɩnɛ ʋ na kpɛɛrɛ jɩnɛɛ a Naaŋmɩn puor-yir kpɛ̃ɛ pʋɔ, ɩ̃ yel á ʋlɔ mɩ̃ɛ ɩ̃ ɩ a Naaŋmɩn.

⁵Nyaa cãa bɔ̃wnaa a mɩnɛ ɩ̃ na ma dãa yele nyɩ a ala, a lɛdaar ɩ̃ na dãa cãa be nɩ nyɩ wa mɩɩ?

⁶Nyɩ bɔ̃w na a bom ʋlɔ na vara a Burbur Sʋbɔ ʋlɔ a sɔr a ƴɛ̃ƴɛrɩ̃ na, ɩ̃-cɛ ba na nyɛ ʋ na a lɛ a ʋ daar nɔɔ tara.

⁷A-na-ɩ a Burbur Sʋbɔ fãgã sɔɔlɩ̃ na gɔr tʋnɔ a ʋ tʋmɔ, ɩ̃-cɛ a ʋlɔ na vara ʋ a sɔr na cãa na maala a lɛ wa ta nɩ a lɛ ba na ire ʋ bara.

⁸A daar ʋlɔ pʋɔ, a Burbur Sʋbɔ na nyɩrʼã cãa pʋɔ a ba nyɛ ʋ, ɩ̃ a Nɩ-kpɛ̃ɛ na pɛɛl ʋ na kú, ɩ̃ mɩ wɛl ʋ nɩ a ʋ nyɩnyɩlfʋ ʋ na waara nɩ.

⁹A ʋna Burbur Sʋbɔ naa na wa nɩ na a Satã fãw maala nɩ a nɔ-kofʋ tʋmɔ nɩ a nɔ-kpaar tʋ̃-bʋrɔ bʋrɔ, ŋmara nɩ a jiri,

¹⁰tʋnɔ nɩ a ʋ gõgolĩfʋ tʋmɔ a jaa, bɛlɛ nɩ a bala na wɛrɛ. Ba na wɛ na a-na-ɩ baa sɔw nʋ a yel-mɩ̃ɛ ʋlɔ na dãa tʋɔrɔ faara ba wa.

¹¹Ala-ɩ̃-sɔ a Naaŋmɩn ƴɔ̃w a bɛlɩ̃fʋ a na tʋɔ ba a ba na sɔw a jir-ƴɛrɩ̃sɩ.

¹²A nɔhɔ̃, a bala ba jaa na mɔɔ sɔwrɔ a yel-mɩ̃ɛ wa, ɩ̃ wa nʋnɔ a maal-fãa, a Naaŋmɩn na guorʼã a ba ƴɛrɩ̃ ɩ̃ ƴɔ̃w ba yel.

¹³Yɛɛr, sɩ sɛw na sɩ puor a Naaŋmɩn a daar a jãa a nyɩ ɩnɛ, a nyɩmɩ a Nɩ-kpɛ̃ɛ na nʋ. A-na-ɩ ʋ vɛl nyɩ na ir a nyɩ na de nĩe pɔw a faafʋ, a mɩnɛ a ʋ Sɩɛ na ow nyɩ a kpee, nɩ a mɩnɛ nyɩ na ƴɔ̃w a yel-mɩ̃ɛ ƴɛrɩ̃ a nyãa.

¹⁴A ƴɛr-son sɩ na wa ƴɛr kʋ nyɩ ɩnɛ a Naaŋmɩn bʋɔl nyɩ a nyɩ na pɔw a ala a jaa, ɩ̃ mɩ bʋɔl nyɩ a nyɩ na tʋɔ mɩ pɔw a sɩ Nɩ-kpɛ̃ɛ *Jeeju-Kirisi yo-yifʋ.

¹⁵Ala-ɩ̃-sɔ yɛɛr, nyɩ́ bɔ̃w ɩraa cĩcĩ, bɔ̃w tɛrɛ nɩ a jaanfʋ ala sɩ na jaan nyɩ a sɩ ƴɛrɩ̃sɩ pʋɔ, mɩɩ a sɩ sɛbɛ pʋɔ.

¹⁶Ɩ̃ sʋɔrɔ na a sɩ Nɩ-kpɛ̃ɛ Jeeju-Kirisi mɩ̃ɛ, nɩ a sɩ Sãa Naaŋmɩn á ú kʋ nyɩ a ꞌlafʋ a nyɩ sube pʋʋr mɩ sũo nyɩ a nyɩ tɛrɛ a fãgã a tʋ̃-sono nɩ a ƴɛr-sono a jaa pʋɔ. A-na-ɩ ʋ nʋ sɩ na ɩ̃ kʋ sɩ a ꞌlafʋ a daar a jaa, a sɩ na mɩ tɛrɛ nɩ ʋ a tɩɛrʋ̃ son, a yi a ʋ su-pɩlaa jie.